पेरेरित 13
13
बारनाबास आउर साउलकेहें पठाइलगेल
1एन्‍टिओखियाके मन्‍डलिमे अगम्‍जानि आउर गुरुभर रेहें। ओइनें बारनाबास, काला कहना सिमियोन, कुरेनि सहरके लुसियस, हेरोद राजासँघ बारहल मनेन आउर साउल रेहें। 2एक रोज ओइनें उपबास बइठके परमपरभुके आराधना करति रहल बखत पबित्‍र आत्‍मा ओइन अइसे कहनें, “मइ बारनाबास आउर साउलकेहें जउन कामके तहन बुलइले आहुँ, उहि कामके तहन ओइन नियुक्‍त करो।”
3तउ ओइनें फेर उपबास बइठनें आउर बारनाबास आउर साउलके उप्‍पर हाथ धरके पराथ्‍ना करनें आउर ओइन परभुके काममे पठइनें।
पावल आउर बारनाबास साइपरस टापुमे
4उहिकमारे बारनाबास आउर साउल पबित्‍र आत्‍मालइक पठाइलकेमारे, सिलुकिया सहरमे गिनें आउर हुँवाँति जहाजमे चरहके साइपरस टापुमे गिनें। 5जब ओइनें सलामिस सहरमे पुगनें, हुँवाँ यहुदिभरिनके बइठक घरमे जाक परमेस्‍वरके बचन परचार करनें। ओइन मदत करेक तहन युहन्‍ना फेक ओइनसँघ रेहें।
6जब ओइनें सारा टापुमे यात्‍रा करति पाफोस सहरमे पुगनें, हुँवाँ ओइनें एक जनें यहुदि झुठा अगम्‍जानि बार-येसु कहना जादुगर मनइकेहें भिटनें। 7उ जादुगर साइपरस टापुक बन्‍ना हाकिम सरगियस पउलसके सँघरिया रेहें। सरगियस पउलस एकठोर गियानि मनइ रेहें। उनके परमेस्‍वरके बचन सुन्‍ना मन होइलके मारे बारनाबास आउर साउलकेहें बुलाइक पठइनें। 8पर उ जादुगर, जेहका नाउँ गिरिक भासामे एलुमास रेहे, उ सरगियस पउलसकेहें परभु येसुमे बिस्‍वास करनाति रोकेक तहन बारनाबास आउर साउलके बिरोध करे लगनें। 9ओहकापाछुक साउल, जेहका नाउँ पावल फेक रेहे, उ पबित्‍र आत्‍मालइक भरपुर होक एलुमासकेहें एकटक लगाक दिखनें आउर कहनें, 10“ए सइतानके सन्‍तान, तइं ठगना आउर नाइबरहिया चाललइक भरल बाटे। का तइं परमपरभुके सुधे डगरकेहें टिरहबा कराइ नाइछुरबे? 11अब देख, परमपरभुके दन्‍ड तोर उप्‍पर परल आहे। अब तइं कुछ बखततक अन्‍धरा हुइबे आउर घामके उजियर फेक देखे नाइसिक्‍बे।” तुरन्‍ते ओहका आँखिमे करिया बदरि जइसन होइल आउर उ अन्‍धरा हुइगेल। उहिकमारे कुइ ओहका हाथ पकरके लइजाबे कहिके यँहरवँहर मदत खोजे लागल।
12तउ इ सब घटना देखके सरगियस पउलस परभु येसुमे बिस्‍वास करनें, काहिक्‍कि परभुके बारेम सिछ्‍छा सुनके उ अचम परल रेहें।
पावल आउर बारनाबास पिसिदिया इलाकक् एन्‍टिओखिया सहरमे
13ओहकापाछुक पावल आउर उनका सँघरियाभर पाफोस सहरति जहाजमे चरहके पामफिलिया इलाकक् परगा सहरमे पुगनें। पर मर्‌कुस कहना युहन्‍ना भर ओइनति अल्‍गट होक यरुसलेमघइन लउटनें। 14पर पावल आउर बारनाबास परगातिति पिसिदिया इलाकक् एन्‍टिओखिया सहरमे गिनें। सहिंतइना रोजमे ओइनें यहुदिभरिनके बइठक घरमे गिनें। 15मोसन लिखल बेबस्‍था आउर अगम्‍जानिभरिन लिखल किताब पर्‌हसिकल पाछुक, यहुदिभरिनके बइठक घरके अगुवाभर पावल आउर बारनाबासकेहें बुलाक कहनें, “भइयो, अगर तोइनसँघ मनइभरिन हिम्‍मत दहना कुछ बचन आहे कहलेति बताउ।” 16इ सुनके पावल उठनें आउर ओइन सान्‍त होइक हाथके इसारा करति कहनें, “इस्‍राइलिभर आउर परमेस्‍वरके आराधना करइया अउरे जातके मनइभर, मोर बात सुनो।” 17हमरे इस्‍राइलि जातिभरिनके परमेस्‍वर हम्‍मर पुरखाभरिन छँटनें आउर ओइनें मिस्‍र देसमे रहल बखतमे ओइन महान जाति बनइनें। तउके परमेस्‍वर अपना सक्‍ति दिखाक ओइन मिस्‍र देसमहति निकारके लइनें।#पर्‌स १:७; १२:५१ 18ओइनें उजार जगामे रेहे बखत हरिघरि परमेस्‍वरके आग्‍याँ उल्‍लङ्‌घन करनें, तभुफेक परमेस्‍वर चालिस बरसतक ओइन रेखदेख करनें।#गन्‍ति १४:३४; बेबस १:३४ 19परमेस्‍वर कनान देसके सात जातिकेहें नास करनें आउर उ देस हम्‍मर पुरखाभरिन दहनें।#बेबस ७:१; यहो १४:१ 20उ बखततक लगभग चार सउ पचास बरस बित्‍गेल रेहे।#न्‍याय २:१६; १ समु ३:२० “ओहकापाछुक परमेस्‍वर ओइन सासन करेक तहन नियायधिस छँटनें। उ नियायधिसभर एकपाछुक अउरे करति अगम्‍जानि सामुएलके पालातक काम करनें।
21“ओहकापाछुक हम्‍मर पुरखाभर परमेस्‍वरसँघ एकठोर राजाके माँग करनें। तउ परमेस्‍वर बेन्‍यामिन कुलके किसके लउँरा साउलकेहें राजा बनइनें। साउल चालिस बरसतक राज्‍य करनें।#१ समु ८:५; १०:२१ 22पर परमेस्‍वर साउलकेहें राजाके पदमहति हटाके दाउदकेहें राजा बनइनें। परमेस्‍वर दाउदके बारेम अइसे कहनें, ‘यिसइके लउँरा दाउद मोहके मन परल एकठोर मनइ आहे, जउन मोर सब इच्‍छा पुरा करि।’#१ समु १३:१४; १६:१२; भज ८९:२० 23दाउद राजाके कुलमहति परमेस्‍वर अपना बाचा ढार इस्‍राइलिभरिनके तहन मुक्‍ति दिबइया येसुकेहें पठइनें। 24येसु अइना तिति अग्‍दे, युहन्‍ना सब इस्‍राइलिभरिन पाप मानके बप्‍तिस्‍मा लिहियो कहिके परचार करनें।#मर्‌क १:४; लुका ३:३ 25युहन्‍ना अपना सेबकाइके आखरिघइन अइसे कहले रेहें, ‘मइ कउन आहुँ कहिके तोइनें सुच्‍तो? मइ मुक्‍ति दिबइया नाइआहुँ, पर मोर तिति पाछे एक जनें आइत आहें, जेहका जुताके टेनि खुल्‍ना लायकके फेक मइ नाइआहुँ।’”#मत्‍ति ३:११; मर्‌क १:७; लुका ३:१६; युह १:२०,२७
26“देखो भइयो, अब्‍राहामके सन्‍तानभर आउर परमेस्‍वरके आराधना करइया अउरे जातके मनइभर, मुक्‍तिके इ सन्‍देस परमेस्‍वर हम्‍मर तहन पठइले आहें। 27काहिक्‍कि यरुसलेमके मनइभर आउर ओइन सासकभर, येसु मुक्‍ति दिबइया खिरिस्‍ट आहें कहिके नाइचिन्‍हनें। अगम्‍जानिभर धरमसास्‍त्‍रमे लिखल बात हरेक सहिंतइना रोजमे ओइनें पर्‌हनें तभुफेक ओइनें नाइसम्‍खनें आउर येसुकेहें मारेक लगाक उनका बारेम लिखल बचन ओइनें पुरा करनें। 28ओइनें येसुकेहें मिरतु दन्‍ड देहेक तहन कुछ दोस नाइपाक फेक, उनके मरहिक परि कहिके पिलातससँघ बिन्‍ति करनें।#मत्‍ति २७:२२-२३; मर्‌क १५:१३-१४; लुका २३:२१-२३; युह १९:१५ 29अइसे येसुके बारेम लिखल सब अगम्‍बानि पुरा करलपाछुक, ओइनें येसुकेहें कुरुसमहति उतारके चिहानमे धरनें।#मत्‍ति २७:५७-६१; मर्‌क १५:४२-४७; लुका २३:५०-५६; युह १९:३८-४२ 30पर परमेस्‍वर येसुकेहें मरलमहति जिति परनें। 31गालिल इलाकामहति उनकासँघ यरुसलेममे आइल मनइभरिनतिरा येसु ढेरे रोजतक देखा परति रहनें। अब उ मनइभर इस्‍राइलके मनइभरिनके तहन साछि आहें।#पेरे १:३ 32अब परमेस्‍वर हम्‍मर पुरखाभरिनसँघ करल बाचाके सुसमाचार हमरे तोइनतिरा लइके आइल होइ। 33ओइन सन्‍तान अरथात हम्‍मर तहन येसुकेहें जिति करके परमेस्‍वर उ बाचा पुरा करनें। भजनसङ्‌गरह दुइमे येसुके बारेम अइसे लिखल आहे,
‘तुम मोर लउँरा बाटो,
आज मइ तुम्‍हर बाबा होइल आहुँ।’#भज २:७
34परमेस्‍वर खिरिस्‍टकेहें सरेक नाइदइक, मरलमहति फेर जिति परहें कहना बातके बारेम, उ अइसे कहले आहें,
‘दाउदकेहें बाचा करल पबित्‍र
आउर पक्‍का आसिस मइ तोइन दहमु।’#यसइ ५५:३
35भजनसङ्‌गरहक किताबके अउरे जगामे अइसे लिखल आहे,
‘तुम अपना परम पबित्‍र जनके देहिंकेहें सरे नाइदहबो।’#भज १६:१०
36इ बात दाउद अपना बारेम नाइकहले आहें, काहिक्‍कि उ अपना पुस्‍तामे परमेस्‍वरके इच्‍छा ढार काम करसिकलपाछुक मरनें। तउके अपना पुरखाभरिनसँघ भँठलगिनें आउर उनका देहिं सरगेल। 37पर परमेस्‍वर येसुकेहें मरलमहति जिति परनें आउर उनका देहिं नाइसरल। 38उहिकमारे देखो दादाभइयाभर, येसुमे बिस्‍वास करलपाछुक पाप माफ हुइता कहिके हमरे तोइन कहतहोइ। 39येसुमे बिस्‍वास करइया सक्‍कु मनइ सब पापमहति छुटकारा पइतियाँ आउर परमेस्‍वरके नजरमे धरमि ठहराइल जितियाँ। इ बात मोसक बेबस्‍था पालन करके सम्‍भब नाइरेहे। 40उहिकमारे, अगम्‍जानिभरिन मन्‍कल बचन तोइनमे पुरा नाइहोबे कहिके, तोइनें होसियार रहियो।
41परमेस्‍वर अइसे कहले आहें, ‘ए बिज्‍रहि करइयो, अचम मानो आउर नास हुइजाउ,
काहिक्‍कि तोइन बखतमे मइ एकठोर अइसन काम करत आहुँ,
कि ओहका बारेम कुइ तोइन बयान करिते फेक,
तोइनें कबु फेक बिस्‍वास नाइकरबो।’”#हब १:५
42जब पावल आउर बारनाबास यहुदिभरिनके बइठक घरमहति निकरके जाइ लगनें, तउ मनइभर “तोइनें अउरे सहिंतइना रोजमे फेर आक इ बात हम्‍हिन सुनाउ” कहिके ओइनसँघे बिन्‍ति करे लगनें। 43बइठक उराइलपाछुक ढेरे यहुदिभर आउर परमेस्‍वरके आराधना करइया अउरे जातके मनइभर पावल आउर बारनाबासके पाछे लगनें। तउ पावल आउर बारनाबास ओइनसँघे बात करति, परमेस्‍वरके अनुगरहमे सदा रहियो कहिके बिन्‍ति करनें।
44अउरे सहिंतइना रोजमे उ सहरके सब मनइभर परभुके बचन सुनेक तहन जमा हुइनें। 45पर हुँवाँ आइल मनइभरिनके भिर देखके, यहुदिभर हेंख करनें आउर पावलके बातके बिरोध करति अपमान करनें। 46पर पावल आउर बारनाबास हिम्‍मत करके कहनें, “परमेस्‍वरके बचन सबति पहिले ते तोइन यहुदिभरिन सुनइना रेहे, पर तोइनें इ बचन इन्‍कार करलो। अब तोइनें परमेस्‍वरसँघ सदा रहना जिन्‍दगि पइना योग्‍यक नाइबाटो कहिके परमान दहल‌के मारे, अब हमरे अउरे जातके मनइभरिनतिरा जाइत होइ। 47काहिक्‍कि परभु हम्‍हिन अइसे कहिके आग्‍याँ दहले आहें,
‘धरतिके कोनि-कोनिक मनइभर मुक्‍ति पामें कहिके
मइ तुम्‍हिन अउरे जातके मनइभरिनके तहन एकठोर उजियर बनइले आहुँ।’”#यसइ ४२:६; ४९:६
48जब अउरे जातके मनइभर इ बात सुन्‍नें, ओइनें खुसि हुइनें आउर परमेस्‍वरके बचनके परसन्‍सा करनें। परमेस्‍वरसँघ सदा रहना जिन्‍दगि पाइक तहन पहिलेहें परमेस्‍वरन छाँटल जत्‍ता येसु खिरिस्‍टमे बिस्‍वास करनें।
49उहिकमारे परभुके बचन उ इलाकाभर फइलति गेल। 50पर पावल आउर बारनाबासके बिरोध करइया सब यहुदिभर परमेस्‍वरके भक्‍ति करइया नाउँ चलल मेहरुवाभरिन आउर उ सहरके बन्‍ना-बन्‍ना मनइभरिन ओइन बिरुधमे उक्‍सइनें। ओइनें पावल आउर बारनाबासकेहें दुख दहति अपना इलाकामहति बाहिर निकार दहनें। 51उहिकमारे पावल आउर बारनाबास ओइन बिरुधमे अपना टाङ्‍गके धुर झराक आइकोनियम सहरमे गिनें।#मत्‍ति १०:१४; मर्‌क ६:११; लुका ९:५; १०:११ 52उहिबखत एन्‍टिओखियामे रहल चेलाभर आनन्‍द आउर पबित्‍र आत्‍मालइक भरपुर हुइनें।
© 2024 (Active), Mother Tongue Translators Society and Wycliffe Bible Translators, Inc. All rights reserved.