पेरेरित 12
12
पत्‍रुस जेलमे
1उ समयमे हेरोद राजा मन्‍डलिक कुछ बिस्‍वासिभरिन पकरके सताइ लगनें। 2उ युहन्‍नाके दादा याकुबकेहें तरबारलइक मारेक लगइनें। 3जब हेरोद राजा इ कामति यहुदिभरिन खुसि होइल दिखनें, तउ पत्‍रुसकेहें फेक पकरेक पठइनें। उ बखत खमिर नाइमिलाइल रोटि खइना पबनिक समय रेहे। 4तउ हेरोद राजा पत्‍रुसकेहें पकरके जेलमे डारके सोला जनें सिपाहिभरिन चार-चार जनक समुह बनाक पत्‍रुसके पहरा देहेक लगइनें। हेरोद राजा छुटकारक पबनि पाछुक पत्‍रुसकेहें यहुदिभरिनके आगे लाक नियाय करना कहिके बिचार करले रेहें।#पर्‌स १२:१-२७ 5अइसे पत्‍रुस जेलभित्‍तर कइद रहल बखत मन्‍डलिक मनइभर अक्‍के मनके होक उनका तहन परमेस्‍वरसँघ जोरदार पराथ्‍ना करत रेहें।
पत्‍रुस जेलमहति निकरनें
6हेरोद राजा पत्‍रुसकेहें मनइभरिनके आगे लइना रोजुक अग्‍देक रात पत्‍रुस दुइठोर सिंकरिलइक बँधके दुइ जनें सिपाहिभरिनके बिचमे सुतत् रेहें आउर आकुर सिपाहिभर फेक जेलके दोरमे पहरा करत रेहें। 7तउ अरबरगि परमपरभुके एकठोर स्‍वरगदुत देखा परनें आउर कुन्‍ठि उजियर होइल। स्‍वरगदुत पत्‍रुसकेहें हलइति “हालि उठो” कहिके जगइनें। तउ उनका हाथमे बाँधल सिंकरि खुलगेल। 8ओहकापाछुक स्‍वरगदुत उनके कहनें, “लत्‍ता आउर चप्‍पल पँइधो।” तउ पत्‍रुस उस्‍ते करनें। स्‍वरगदुत फेर कहनें, “चदरा होरके मोर पाछे आउ।” 9उहिकमारे पत्‍रुस स्‍वरगदुतके पाछे-पाछे जेलमहति बाहिर अइनें। पर स्‍वरगदुतन करल इ काम सहि आहे कहिके उनके पता नाइरेहे, पर उ दरसन देखत आहुँ कहिके सुच्‍नें। 10जब पत्‍रुस आउर स्‍वरगदुत पहिला आउर दुसरा पहरा दिबइया टोलिकेहें नँघके सहरमे जइना लोहक गेटतिरा अइनें, उ गेट अपनें खुलल आउर ओइनें बाहिर निकरनें। ओइनें निकरके एकठोर गल्‍लि पार करसिक्‍नेंत स्‍वरगदुत अरबरगि पत्‍रुसकेहें छोरके चलगिनें।
11जब पत्‍रुसके होस खुलल, उ अइसे कहनें, “अब मइ सहिके पता पइनु, कि परमपरभु अपना स्‍वरगदुतकेहें पठाके हेरोद राजा आउर यहुदि अगुवाभरिन करेक खोजल सब नाइबरहिया कामति मोहके छुटकारा दहनें।”
12पत्‍रुस इ बात पता पाइलपाछुक, उ मर्‌कुस कहना युहन्‍नाके दाइ मरियमके घरमे गिनें। हुँवाँ ढेरे जनें जमा होक पराथ्‍ना करत रेहें। 13जब पत्‍रुस दोर ढकढकबइनें, तउ रोदा नाउँके एक जनें कमलहरि लउँरिया दोर खोले अइनें। 14जब उ पत्‍रुसके अबाज चिन्‍हनें, तउ ढेरे खुसि होक दोर नाइखोलके दउरत भित्‍तर जाक कहनें, “पत्‍रुस दोरमे ठरहेल आहें।” 15पर ओइनें रोदाकेहें कहनें, “तइं बउराइत बाटे कि का?” पर उ अपना कहल बात सहि आहे कहिके जिद्‌दि करनें। तउ ओइनें कहनें, “उ पत्‍रुसकेहें रेखदेख करइया स्‍वरगदुत हुइहें।”
16पर पत्‍रुस भर बाहिरति दोर ढक‍ढक‍बाइत रहनें। जब ओइनें दोर खुल्‍नें, तउ ओइनें पत्‍रुसकेहें देखके अचम परनें। 17पर पत्‍रुस ओइन चुप रेहेक तहन हाथति इसारा करके परभु उनके जेलमहति कइसे छुटकारा दहनें कहिके ओइन बतादहनें। “इ बात याकुब आउर आकुर बिस्‍वासिभरिन फेक बतइयो” कहिके उ कहनें। ओहकापाछुक उ अउरे जगामे गिनें।
18भिन्‍हिक होइल, तउ पत्‍रुस जेलमहति अरबरगि गायब होइलके बारेम सिपाहिभरिनके बिचमे बन्‍ना हल्‍ला-खल्‍ला होइल। 19तउ हेरोद राजा पत्‍रुसकेहें खुजना हुकुम दहनें, पर सिपाहिभर उनके कहुँ फेक नाइपइनें। उहिकमारे हेरोद राजा पहरा दिबइयाभरिन सोधपुछ करनें आउर ओइनति कुछु जबाफ नाइपइनेंत ओइन मिरतुदन्‍ड दहनें।
ओहकापाछुक हेरोद राजा यरुसलेम छोरके कइसरिया सहरमे गिनें आउर हुँये बइठनें।
हेरोद राजक मिरतु
20उहि बखत हेरोद राजा टुरोस आउर सिदोन सहरके मनइभरिनसँघ बहुते दिक्‍काइल रेहें। उहिकमारे उ दुइ सहरके नेताभर एक होक हेरोद राजक एकठोर बिस्‍वासिलो सेबक बलस्‍तसकेहें मनबाक हेरोदसँघ मेलमिलाप करेक तहन बिन्‍ति करेक खुजनें, काहिक्‍कि हेरोद राजक देसमहति ओइन अनाज आबे।
21तउके एकठोर तोकल रोजमे हेरोद राजा अपना राजकिय लत्‍ता पइंन्‍धके राजगद्‌दिमे बइठनें आउर ओइन आगे भासन करनें। 22तउ मनइभर चिल्‍लइति “इ ते मनइक बोलि नाइआहे, पर देबताके बोलि आहे,” कहिके हेरोद राजक परसन्‍सा करे लगनें। 23अइसे हेरोद परमेस्‍वरकेहें आदर नाइदहल‌केमे अरबरगि परमपरभुके एकठोर स्‍वरगदुत उनके परहार करनें आउर उ बज-बज किरमा परके मरनें।
24पर परमेस्‍वरके बचन फइलति आउर बिस्‍वासिभरिनके सँख्‍या बरह्‌ति गेल।
25बारनाबास आउर साउल यरुसलेममे अपना काम पुरा करलपाछुक, ओइनें मर्‌कुस कहना युहन्‍नाकेहें लइके यरुसलेमति एन्‍टिओखिया सहरमे लउटनें।
© 2024 (Active), Mother Tongue Translators Society and Wycliffe Bible Translators, Inc. All rights reserved.