प्रेरित 8
8
शाऊले येशूवाङ विश्वास जाट्चकोके सटडीच
1शाऊले ड स्तिफनसके ल्हुङे ङाप्मो साट्के टेमो मन्डीमलेया। होसै याकीङ होडा यरुशलेमाङ लेच मण्डलीकुङ विरुद्धाङ कराहाङ्च सतावट राहाके ठाला। हटै प्रेरितको बाहेक येशूवाङ विश्वास जाट्च अरू पट्टको यहूदिया हटै सामरिया भरि छरपष्ट छाना।
2हटै परमेश्वरके डुट्के जाक्च कोही भर्मीकोइ स्तिफनसके ठाका र ढलीङ शोक मन्डीया।
3बाकी र शाऊले चहीन्या मण्डलीके म्हास्मो आना। होचे पट्टकुङ इम-इम पस्डीमो प्रभुवाङ विश्वास जाट्च लेन्जा र माझाकोके घीसार्डीमो झ्यालखनाङ कानाला।#प्रे २२:४,५; २६:९-११
सामरियाङ सेहेच-समाचार प्रचार
4होस येशूवाङ विश्वास जाट्म छरपष्ट छान्म आन्चकोइ जहाँ आन्ढेयाङ ड सेहेच-समाचार प्रचार जाटा। 5फिलिप चहीन्या सामरियाङो काट सहराङ आना हटै होलाङ येशू ज पापीङ बचडीच ख्रीष्ट आला टेमो प्रचार जाटा। 6फिलिपे प्रचार जाट्च कुरा सेनीसीङ हटै होचे जाट्च अचम्मावो कामको डाङ्नीसीङ ढलीङ ज भर्मीकोइ होच्यौ कुरा ध्यान याहामो सेया। 7होलाङ लेच ढलीङ भर्मीकोके दुष्ट आत्माकोइ सटडीमोलेया हटै होसोकोटुइङ दुष्ट आत्माको च्याक्मो ख्यौवा र पक्षघात लक्डीस्मो छाच भर्मीको हटै ह्वाके माहेक्च लङ्गडाको गेपा। 8होस कारणे सामरिया सहरावो भर्मीको ढलीङ मराङा।
9होसै सहराङ सिमोन टेच काट भर्मी लेया। होचे फिलिप राहाके टेनाङ चेक अघेरीङ होडा ज सामरियाङो भर्मीकोके जादू जाट्मो अचम्मो पार्डीमोलेया। होचे मेल्लाके ढलीङ कराहाङ्च भर्मी टेयाला। 10हटै होस सहराङ मुच माहार्च-कराहाङ्च भर्मीकोइ होस्के ध्यान योहोला हटै, “इसै परमेश्वरो कराहाङ्च शक्ति आले” टेयाला। 11ढलीङ पहीलीङ होडा ज शिमोने भर्मीकोके जादू जाट्मो अचम्म पार्डीच कारणे पट्टकोइ होचे टेच कुराकोके सेहेम सेवोला। 12बाकी र फिलिपे जब परमेश्वरो राज्यौ बारेयाङ सेहेच-समाचार हटै येशू ज पापीङ बचडीच ख्रीष्ट लेको टेमो प्रचार जाटा तब ढलीङ भर्मीकोइ होचे टेच कुराङ विश्वास जाटा। हटै ज-जसे विश्वास जाटा होसोकोइ लेन्जा-माझा न्हीस्वाने बप्तिस्मा ला। 13सिमोने ड विश्वास जाटा हटै बप्तिस्मा ला। हटै होस सधैँ फिलिप कठा ह्वाके ठाला। फिलिपे जाट्च ढलीङ खालाङो कराहाङ्च र अचम्मावो कामको डाङ्मो होस छक्क परीसाला।
14सामरिया सहरावो भर्मीकोइ परमेश्वरो बचनके विश्वास जाटा टेच सेनीसीङ यरुशलेमाङ लेच प्रेरितकोइ पत्रुस र यूहन्नाके सामरीया सहरावो भर्मीकोटुङ बीरीना। 15जब सामरिया सहराङ पत्रुस हटै यूहन्ना टाक्राहा तब होसोकोइ येशूवाङ विश्वास जाट्च भर्मीको पवित्र आत्मौ शक्तिये अटपीङे टेमो प्रार्थना जाटा। 16हीके टेहाङ होसोको कुच्यै ड पवित्र आत्मौ शक्ति माडीहीन्मो लेया। होसोकोइ प्रभु येशूवो म्यार्मीनाङ बप्तिस्मा मात्रै लामोलेया। 17पत्रुस र यूहन्नै मेक्कुङ मीहुट होसोकोटाक डा। हटै होसोकोइ पवित्र आत्मा डीहीना।
18जब शिमोने प्रेरितकोइ येशूवाङ विश्वास जाट्चको टाक मीहुट डानाङ पवित्र आत्मा डीहीनोले टेमो डाङा तब होचे पत्रुस र यूहन्नाके पैसा याहाके पा। 19हटै होचे इट टेया, “इसै शक्ति ङाके ड याहानी, ङै ड भर्मीकोटाक मीहुट डानाङ होसोकोइ पवित्र आत्मा अटडीहीने।”
20बाकी र पत्रुसे टेया, “नोङो पैसा र नाङ न्हीस्वान नष्ट अटछाने, हीके टेहाङ नेङे परमेश्वरो दानके पैसै लोके हेकोले टेमो विचार नाजाटा। 21नेङे च इसै सेवाङ भाग पाके हटै मुके ही ड माडीहीन्डल हीके टेहाङ नोङो गीन परमेश्वरो अघेर ठीक मालेउले। 22होट छान्नाङ नेङे दुष्ट विचार जाट्के डासो हटै प्रभुके प्रार्थना जाटो। नोङो इन्च सोचाइके परमेश्वरे क्षमा याहाके ड हेक्लेको। 23हीके टेहाङ ईर्ष्यालु हटै पापी विचारे नाङ पीङ्मो लेच ङै नाङ्के ङाडाङाङ।”
24हटै शिमोने टेया, “नाक्कोइ ज ङौ लागी प्रभुके प्रार्थना जाट्नीस जसे जाट्नाङ नाक्कोइ टेनाङ लख ङाके नौटछाने।”
25हटै पत्रुस र यूहन्नै येशूवो बारेयाङ गवाही याहामो र प्रभुवो बचन प्रचार जाट्मो यरुशलेम लाक ल्हेसा। होसोको ल्हेस्नाङ सामरियाङो लाङ्घाकोवाङ सेहेच-समाचार सेटाका।
फिलिप हटै इथियोपियाङो सरकारी भर्मी
26प्रभुवो काट स्वर्गदूते फिलिपके टेया, “सोन हटै दक्षिणलाक आन्न र यरुशलेमीङ गाजालाक आन्च लामीङ आन्न। होसै सडक उजाड ठावाङ परीस्ले।” 27हटै फिलिप सोनीसीङ होलाक आना। होस बेलाङ ज इथियोपिया देशाङो काट नपुंसक भर्मी होसै ज लामाङ आन्मो लेया। होस इथियोपिया देशाङो माहारानी कन्दाकीयो धन-सम्पत्ति हेरचाहा जाट्च अधिकारी लेया। होस यरुशलेमाङ आराधना जाट्के आन्मो लेया। 28हटै होस मेनो इमाङ ल्हेस्टासो मेनो रथाङ मुम यशैया अगमवक्तै रीक्च कीटाब परीस्मो लेया। 29फिलिपके पवित्र आत्मै, “रथो खेरेप आन्न हटै खेरेप ज मुन” टेकाङ। 30फिलिप खेर्मो आना हटै रथटुङ टाका हटै होस भर्मीये यशैया अगमवक्तै रीक्च कीटाब पढीस्स सेया। हटै फिलिपे, “नाकोइ पढीस्स इसै कुराको बुझडीस्डनी?” टेमो गीना।
31हटै होस नपुंसके फिलिपके टेया, “कुचे र माबुझडीटार ङै कुट बुझडीस्लाङ र?” हटै होचे फिलिपके रथाङ काल्नीसीङ मेन कठा ज मुके बीरीना। 32होस नपुंसके परमेश्वरो बचनो इसै खण्ड पढीस्मज लेया,
“होस्को साट्के टेमो नुन्च भेडा लख लेकाङ,
ऊन खुरुक्नाङ माङाक्मो मुच भेडा लख
होस्कोइ मेकुङ ङेरीङ ही ड शब्द माछीक्काङ।#यशै ५३:७,८
33होस्कोके खीजडीया हटै
होस्कोके न्याय मायाहा।
पृथ्वीयाङ होस्कुङ जीबन समाप्त छाना हटै अब होस्कुङ सन्तानो बयान कुचे जाट्के?”
34हटै होस नपुंसके फिलिपके गीना, “दया जाट्मो ङाके टेनी, अगमवक्तै इसै कुरा कुच्यौ बारेयाङ टेच आला? मेल्लौ वा अरु भर्मीयो बारेयाङ?” 35हटै फिलिपे परमेश्वरो बचनो होसै खण्डइङ ज येशूवो बारेयाङ सेहेच-समाचार सेटाका हटै होस नपुंसके विश्वास जाटा। 36होसोको लामाङ आन्नाङ-आन्नाङ डी लेच ठाउँ डुपा हटै होस नपुंसके फिलिपटुङ इट टेमो गीना, “इलाङ डी लेउले अब ङाके बप्तिस्मा लाके हीये रोक्डीले?”[37हटै फिलिपे, “नाकोइ गीनीङ होडा ज विश्वास जाट्मो लेहाङ बप्तिस्मा लाके हेक्डनी” टेया। हटै होस नपुंसके, “अ, ङै येशू ख्रीष्ट ज परमेश्वरो मीजा आला टेमो विश्वास जाट्लाङ” टेया।]
38हटै नपुंसके रथके रोक्डीके बीरीन्नीसीङ होसोको झाला र डी लेच ठावाङ आना हटै फिलिपे होस्के बप्तिस्मा याहा। 39हटै जब होसोको डीइङ बहीरीङ ख्यौवा तब प्रभुवो आत्मै फिलिपके जीम्मो नुन्काङ। हटै होस नपुंसके फिलिपके फेरी माडाङढ्याङ ड होसै प्रभुवाङ मराङ्मो नुङा। 40बाकी र फिलिप अश्दोदाङ देखा परीसा। होस कैसरिया सहराङ माटाक्टार सम्मन सहर-सहर सेहेच-समाचार प्रचार जाट्मो नुङा।
© 2024 (Active), Mother Tongue Translators Society and Wycliffe Bible Translators, Inc. All rights reserved.