प्रेरित 9
9
शाऊलो जीबन परिवर्तन छान्च
(प्रेरित २२:६-१६; २६:१२-१८)
1बाकी र होस बेला सम्मन ड शाऊले प्रभुवो चेलाकोके साट्के टेमो धम्की याहामो ह्वामो लेया। हटै होस पट्ट पूजाहारीकुङ अगुवाटुङ आना। 2शाऊले होस्के, “येशूये टनाक्च लामाङ ह्वाच भर्मीको लेन्जा र माझा न्हीस्वान्के घोम यरुशलेमाङ राक्के याहानी” टेमो दमस्कसाङ लेच यहूदीकुङ गुमुस्ठ इमाकोवाङो शासककुङ लागी चिठी रीक्मो याहाके बीरीना।
3शाऊल दमस्कस सहर आना हटै जब होसै सहरटुङ टाका तब काक्खीनी नमीङ होच्यौ वरिपरी चहक छान्मो काट ज्योति ट्याङा। 4शाऊल झाङ खोरोवा हटै काक्खीनी इट टेच आवाज सेया, “शाऊल, ए शाऊल, नेङे ङाके ही टीमो सटडीडल?”
5हटै शाऊले टेया, “प्रभु, नाको कुस नाल्नी?” हटै येशूये टेकाङ, “ङा येशू आला जस्के नेङे सटडीमो नाले। 6अब नाङ सोनीसीङ सहराङ आन्न हटै होलाङ नाङ्के काट भर्मीये नेङे ही जाट्के परीस्ले होसै टेमो याहाले।”
7शाऊल कठा आन्च लेन्जाको लाटा लख अकमक्क छान्मो टोरोस्मो मुमोलेया। होसोकोइ होस आवाज च सेया बाकी र कुस्के ड माडाङा। 8शाऊल झइङ सोवा हटै मीमीक खोला बाकी ड ही ड डाङ्के माह्योका। होट छान्नाङ मेनो मीलफाकोइ मीहुटाङ जीम्म दमस्कसाङ राका। 9होलाङ होचे सोम्याक सम्मन मीमीके ड माडाङा, ज्याच कुराको ड माज्या हटै हीड मागा।
10दमस्कसाङ हननिया टेच काट चेला लेया। होस्के दर्शनाङ प्रभुये इट टेम ङाहाक्काङ, “ए हननिया!”
हटै हननियै टेया, “प्रभु, टेनी।”
11तब प्रभुये टेकाङ, “सोन हटै सीधा टेच गल्लीयाङ आन्न र होलाङ यहूदौ इमाङ टार्सस सहराङो शाऊल टेच भर्मीके एटो। होलाङ होचे प्रार्थना जाट्मो मुमोले। 12शाऊले दर्शन डाङा। होचे दर्शनाङ हननिया टेच भर्मी मेनटुङ राहानीसीङ फेरी अटडाङे टेमो मेनटाक मीहुट डाच डाङा।”
13हननियै टेया, “हे प्रभु, होस भर्मीये च यरुशलेमाङो नाकोके विश्वास जाट्च भर्मीकोके ढलीङ सटडीया टेच कुरा ङै ढलीङ जनाकोटुइङ सेमोन। 14होस नाकोके विश्वास जाट्च भर्मीकोके घोके टेमो मुख्य पूजाहारीकोटुइङ डीहीन्च अधिकार कठा राहामले।”
15बाकी ड प्रभुये हननियाके टेकाङ, “नाङ आन्के ज परीस्ले हीके टेहाङ ङै होस्के ङौ सेवा जाट्के हटै मायहूदीकोके, होसोकुङ राजाकोके र इस्राएलीकुङ बीचाङ ङौ बारेयाङ प्रचार जाट्के छान्डीमोन। 16होचे ङौ लागी कुडीस दुःख भोग्डीके परीस्ले, होस ङै होस्के टनाक्लाङ।”
17प्रभुये टेच इसै कुरा सेनीसीङ हननिया आना। हटै होस शाऊल लेच इम भित्री आना हटै होसटाक मीहुट डामो इट टेया, “ए शाऊल भया, नाङ लामाङ राहानाङ जुन प्रभु येशू देखा परीस्काङ होस्कोइ नाङ फेरी डाङ्के हेक्च छान्के हटै पवित्र आत्मै पीङ्के टेमो ङाके बीरीन्च आला।” 18हननियै इसै कुरा टेच डीक्को शाऊलो मीमीकीङ डीस्यौ कत्ला लख झाला। हटै होस डाङ्के हेक्च छाना र सोनीसीङ बप्तिस्मा ला। 19हटै होचे ज्याच कुरा ज्या र फेरी बोल डीन्हा।
शाऊले दमस्कसाङ प्रचार जाट्च
20हटै शाऊल तुरुन्त यहूदीकुङ गुमुस्ठ इमकोवाङ आन्मो, “येशू ज परमेश्वरो मीजा आला” टेमो प्रचार जाट्के ठाला।
21हटै होच्यौ कुरा सेनीसीङ पट्टको छक्क छान्मो इट टेके ठाला, “इसै ज यरुशलेमाङ लेच येशूवो म्यार्मीन लाचकोके सटडीच भर्मी माला र? इलाङ येशूवो चेलाकोके घोनीसीङ छ्याक्मो मुख्य पूजाहारीकोटुइङ नुन्के टेमो राहाच इसै ज माला र?”
22बाकी ड शाऊल झन-झन शक्तिशाली छान्मो प्रचार जाटा हटै येशू ज पापीङ बचडीच ख्रीष्ट आला टेमो प्रमाण याहा। हटै दमस्कसाङ लेच यहूदीकोइ हीड जवाफ याहाके माहेका।
23हटै यहूदीको ढलीङ दिन छान्नाङ जम्मा छान्मो शाऊलके #२ कोर ११:३२,३३साट्के सल्लाह जाटा। 24बाकी र शाऊले मेन्के साट्के पामोले टेच कुरा थाहा डीन्हा। शाऊलके साट्के टेमो यहूदीको रात-दिन दमस्कस सहरावो गलामाङ रुङ्म मुच कारणे 25कयाक नभी शाऊलो कोही चेलाकोइ होस्के होस सहरीङ जोहोके सहयोग जाटा। होसोकोइ शाऊलके काट ढाकर भित्री का हटै लहरै छ्याक्मो सहरो घाङ्च पर्खाल बहीरीङ झलाका र शाऊलके होटीङ जोहोटाका।
शाऊल यरुशलेम सहराङ
26शाऊल यरुशलेमाङ राहानीसीङ येशूवो चेलाकोर कठा खाट्के प्रयास जाटा। बाकी र पट्ट चेलाको शाऊल डाङ्मो बीरीया हीके टेहाङ होसोकोइ होस साँच्चै ज प्रभुवो चेला लेया टेमो माढीया। 27बाकी र बारनाबासे शाऊलके मेन कठा प्रेरितकोटुङ आल्हा। हटै बारनाबासे प्रेरितकोके शाऊले लामाङ प्रभुके डाङ्च, प्रभुये शाऊल कठा कुरा जाट्च र होचे माबीरीमो दमस्कसाङ येशूवो बारेयाङ प्रचार जाट्च कुरा सेटाका। 28हटै शाऊल होसोको कठा ज जताततै ह्वामो यरुशलेमाङ माबीरीमो प्रभुवो म्यार्मीनाङ प्रचार जाटा। 29होचे ग्रीक ढुट ङाक्च यहूदीको कठा ड तर्क जाटा। बाकी ड होसोकोइ शाऊलके साट्के पा। 30इसै कुरा थाहा डीन्नीसीङ येशूवाङ विश्वास जाट्चकोइ शाऊलके कैसरिया सहराङ नुन्हा हटै होटै टार्सस सहरलाक बीरीना।
31होस न्हुनीङ यहूदिया, गालील र सामरिया ठाँवाङ लेच पट्ट मण्डलीयाङ शान्ती छाना। चेलाकोइ प्रभुवो आदर जाटा हटै पवित्र आत्माइङ उत्साह डीहीना। होसोको विश्वासाङ बलियो छान्मो बढ्डीस्मो ज नुङा।
पत्रुस लुड्डा हटै योप्पा लाङ्घाङ
32पत्रुस यहूदीको हटै सामरीको मुच पट्ट ठाउँलाक छरामो ह्वा। हटै लुड्डा टेच लाङ्घाङ लेच प्रभुवाङ विश्वास जाट्च भर्मीकोके डुप्के आना। 33पत्रुसे होलाङ एनियास टेच भर्मीके डुपा। होस भर्मी आठ ल्हेस सम्मन पक्षघात रोग छान्मो टाङ्माङ ज थला परीस्मो मुमोलेया। 34पत्रुसे होस्के टेया, “ए एनियास, येशू पापीङ बचडीच ख्रीष्टै नाङ्के इन्नाङ ज गेपाक्लेको। सोन हटै नोङो गुन्द्री खासो।” हटै एनियास पत्रुसे होट टेच डीक्को ज जुरुक्क सोवा। 35हटै होस गेप्च डाङ्नीसीङ लुड्डा र शारोनाङ मुच पट्ट भर्मीकोइ प्रभुवाङ विश्वास जाटा।
36योप्पा सहराङ तबीता टेच प्रभुवाङ विश्वास जाट्च काट माझा लेया। ग्रीक ढुटाङ होस्के डोरकास टेयाला जसो अर्थ हरिणी आला। होचे सधैँ सेहेच काम जाटाला हटै गरीबकोके खाँचो परीस्नाङ सहयोग जाटाला। 37पत्रुस लुड्डाङ लेनाङ तबीता छा हटै सीया। हटै भर्मीकोइ होच्यौ लासके हुर्नीसीङ इमाङो ढेम्च टालाङो काट कोठाङ डा। 38योप्पा टेच लाङ्घा लुड्डा टेच लाङ्घाइङ खासै लोस मालेया। चेलाकोइ पत्रुस लुड्डाङ ले टेच सेनीसीङ न्हीस भर्मीकोके पत्रुसटुङ बीरीना हटै इट टेके बीरीना, “दया जाट्मो चाँइ कानलाक राहानी!” 39हटै होसोकोइ होट टेच सेनीसीङ पत्रुस होसोकोर कठा आना। पत्रुस योप्पा टेच लाङ्घाङ टाका हटै चेलाकोइ होस्के इमाङो ढेम्च टालाङ नुन्हा। हटै होलाङ विधवाको पत्रुसो वरि-परि टोरोस्मो तबीतै जीवामो लेनाङ रुप्च कोटको हटै बढीनको टनाक्मो रापा। 40पत्रुसे होसोको पट्टकोके बहीरीङ बीरीना हटै घुडै टुस्मो प्रार्थना जाटा। हटै होस सीच भर्मीलाक ल्हेस्मो, “ए तबीता, सोन!” टेया हटै होचे मीमीक खोला र पत्रुसके डाङा र सोमो मुवा। 41पत्रुसे तबीतौ मीहुटाङ जीम्म सोटा हटै येशूवाङ विश्वास जाट्चकोके र विधुवाकोके एट्नीसीङ तबीता जीवाच टनाका। 42इसै कुरा पट्ट योप्पा सहर भरी लेच भर्मीकोइ सेया हटै ढलीङ भर्मीकोइ प्रभुवाङ विश्वास जाटा। 43हटै पत्रुस छालौ काम जाट्च सिमोन#9:43 छालौ काम जाट्च सिमोन: भर्मीकोइ सिमोने जाट्च छालौ कामके अनादर माजाटोला। टेहाङ र छालौ काम जाट्नाङ होसै अशुद्ध छान्नीसीङ परमेश्वरो मन्दिराङ आन्के माडीहीनोला। कठा योप्पा सहराङ कम्हन ज मुवा।
© 2024 (Active), Mother Tongue Translators Society and Wycliffe Bible Translators, Inc. All rights reserved.