प्रेरित 7
7
स्तिफनसो सन्देश
1पट्ट पूजाहारीकुङ अगुवै स्तिफनसके, “नाङ्के दोष लैडीच कुरा सत्य आला?” टेमो गीना।
2हटै स्तिफनसे टेया, “ए ङौ डाजी-भयाको हटै बाबैको, ङै टेच कुराको सेनीस। कानुङ पुर्खा अब्राहाम हारान टेच ठावाङ आन्के टेनाङ पहीला मेसोपोटामिया टेच #उत १२:१ठावाङ मुवला। होसै बेलाङ ज कानुङ पुर्खा अब्राहामटुङ पट्ट टेनाङ कराहाङ्च परमेश्वर देखा परीस्काङ। 3परमेश्वरे अब्राहामके, ‘नोङो ठाउँ हटै नोङो कुटुम्बके डासो र ङै नाङ्के टनाक्च ठावाङ आन्न’ टेकाङ। 4होट छान्नाङ अब्राहामे कल्दीकुङ ठाउँ डासा हटै हारानाङ नुङा र होलाङ ज मुवा। हटै अब्राहामो मेनो बाबै सीनीसीङ परमेश्वरे होस्के #उत ११:३१; उत १२:४इन्नाङ नाक्को मुच इसै ठावाङ ज राक्काङ। 5होस बेला परमेश्वरे अब्राहामके इसै ठावाङ मेनो पाइला डाके सम्मन ठाँउ जा र माह्यामो लेकाङ बाकी ड परमेश्वरे अब्राहामटुङ, ‘इसै ठाउँ नाङ हटै नोङो सन्तानकोके याहालाङ’ टेमो वाचा जाट्मोलेकाङ। इसै वाचा जाट्नाङ अब्राहामो मीजा ज मालेया।#उत १२:७; १३:१५; १५:१८; १७:८ 6परमेश्वरे अब्राहामके अझै टेकाङ, ‘नोङो सन्तान अरुकुङ देशाङ आन्नीसीङ मुले। हटै होलाङो भर्मीकोइ होसोकोके मेक्कुङ दास जाट्ले र चार सय बर्ष सम्म ढलीङ दुःख डीन्ने।#उत १५:१३,१४ 7बाकी र नाक्कोके दास जाट्च भर्मीकोके ङै दण्ड याहालाङ। हटै नोङो सन्तानको होस देशीङ ख्योउले र इलाङ राहानीसीङ ङौ आराधना जाट्ले।’#प्रस ३:१२ 8हटै अब्राहाम कठा परमेश्वरे खतना जाट्के परीस्स बाचा जाट्काङ। हटै अब्राहामे मेनो मीजा इसहाको आठ दिनाङ खतना जाटा। हटै इसहाके मेनो मीजा याकूबो खतना जाटा र याकूबे मेनो बाह्र जना मीजाकुङ खतना जाटा। होट होसोको इस्राएलो बाह्र कुलो मुख्य पुर्खाको छाना।#उत १७:१०-१४; २१:२-४; २५:२६; २९:३१—३५:१८
9याकूबो मीजा योसेफके मेनो अरू डाजीकोइ डाहा जाटोला। होसोकोइ याकूबके मिश्र देशाङो भर्मीकोटुङ आर्ला हटै होस्के होस भर्मीकोइ दास जाटा। बाकी र परमेश्वर योसेफ कठा लेकाङ।#उत ३७:११; ३७:२८; ३९:२,२१ 10परमेश्वरे योसेफके पट्ट दुखइङ छुट्डीकाङ हटै होस मिश्र देशाङो फारोवो#7:10 फारोवो फारो चहीन्या मिश्रवो राजौ उपाधि लेया। अघेर राहा। हटै परमेश्वरे होस्के ठीक बुद्धी र सेहेच विचार याहाकाङ हटै फारोये होस्के मिश्र देशाङो मुख्य शासको पद याहा। हटै होस बेलइङ होडा दरबाराङ योसेफो हुकुम केस्के ठाला।#उत ४१:३९-४१ 11हटै मिश्र देश र कनान देशाङ अनिकाल छाना हटै होलाङ ज्याके कुराकुङ ढलीङ दुःख छाना र कानुङ पुर्खाकोइ ही ड ज्याके माढीना।#उत ४२:१,२ 12हटै याकूबे मिश्र देशाङ अन्न लेया टेच कुरा सेनीसीङ मेनो मीजाकोके पहिलो चोटी अन्न लाके आन्के बीरीना। होसोको कानुङ पुर्खाको लेया। 13दोस्रो चोटी अन्न लाके आन्नाङ योसेफे मेनो डाजीकोके, ‘ङा योसेफ आला’ टेया हटै भर्मीकोइ फारोके योसेफो जाहानकुङ बारेयाङ सेटाका।#उत ४५:१; ४५:१६ 14हटै योसेफे मेनो बाबै याकूब र मेनो जाहान पट्टकोके मिश्र देशाङ राहानीस टेम खबर बीरीना। होसोको पचहत्तर जना लेया।#उत ४५:९,१०,१७,१८; ४६:२७ 15हटै याकूब मिश्र देशाङ आना र याकूब र होच्यौ सन्तानको होलाङ ज सीया।#उत ४६:१-७; ४९:३३ 16होसोकुङ लासकोके शकेम टेच ठावाङ नुन्हा हटै होलाङ ज डा। होसोकुङ लासको डाच ओडार चहीन्या अब्राहामे हमोरो जाहानकोटुङ लोमो लेया।#उत २३:३-१६; ३३:१९; ५०:७-१३; यहो २४:३२
17बाकी र जब परमेश्वरे अब्राहामके जाट्च बाचा पुरा जाट्च बेला खेरेप टाक्राहा तब मिश्र देशाङ कानुङ भर्मीकुङ सङ्ख्या ढलीङ बढ्ढीसा।#प्रस १:७,८ 18हटै आस्काट राजै मिश्र देशाङ राज्य जाट्के ठाला। बाकी र होचे योसेफो बारेयाङ ही र मावार्मोलेया। 19हटै होस दुष्ट राजै कानुङ पुर्खाकोके ढलीङ सटडीया। हटै चम-चम फुन्च माहार्च जजाकोके ड अटसीये टेमो इमीङ बहीरीङ लोहोके बाध्य जाटा।#प्रस १:१०,११; १:२२ 20होसै बेलाङ ज मोशाके फुना। होसै बेहेरी सेहेच लेया। मोशाके मेनो बोइ र बाबैये सोम महीना सम्मन इमाङ ज आर्चीक्मो डा।#प्रस २:२ 21हटै जब होस्के आर्चीक्के माहेक्मो इम बहीरीङ डा तब फारोवो माझा मीजै डाङ्नीसीङ नुन्हा हटै मेनो मीजा जाट्मो डा।#प्रस २:३-१० 22मोशै मिश्राङो पट्ट बुद्धियो शिक्षाको डीन्हा हटै काम जाट्के र ङाक्के सिपालु छान्मो आना।
23जब मोशा चालीस बर्ष टाका तब होचे मेनो इस्राएली जातिकोके डुप्के निर्णय जाटा।#प्रस २:११-१५ 24कयाक होचे काट मिश्रीये काट इस्राएलीके डरप्च डाङा। तब होचे होस इस्राएलीके जोगडीया हटै मिश्रीके साट्मो बदला ला। 25परमेश्वरे मोशाटुइङ ज मेनो इस्राएली भर्मीकोके पापीङ बचडीके पामोलेको टेच कुरा होसोकोइ अटवाहारे टेमो होचे सोच्डीमोलेया। बाकी र होसोकोइ होस कुरा मावारा। 26पीहीन लख मोशै न्हीस इस्राएलीको पुन्मो मुच डाङा। मोशै होसोको अटखाटे टेमो इट टेया, ‘नाक्को डाजी-भया छान्नीसीङ ड हीके पुन्मो नाल्नीस?’ 27बाकी ड होस दुरव्यवहार जाट्च इस्राएलीये मोशाके कापटा ढुस्मो इट टेया, ‘नाङ्के कुचे कानुङ शासक हटै न्यायधीश छान्के बीरीना? 28टीसीनीङ मिश्रीके साट्नाङ लख ज नेङे ङाके ड साट्के पामोनाले?’ 29जब मोशै इसै कुरा सेया तब मिश्र देशीङ जोहा हटै मिद्यान टेच ठावाङ मुके ठाला। होलाङ मुनाङ-मुनाङ मोशौ न्हीस मीजाको छाना।#प्रस १८:३,४
30चालीस बर्ष न्हुनीङ मोशा सीनै पाहाडो उजाड ठावाङ लेया। होलाङ ढामो मुच माहार्च बुटाङ काट स्वर्गदूत मोशाटुङ देखा परीसा।#प्रस ३:१-१० 31मोशा होस डाङ्नीसीङ छक्क छाना। हटै सेहेमो ज ङोस्के टेमो आन्नाङ होचे परमप्रभुये इट टेच सेया, 32‘ङा नोङो पुर्खा अब्राहाम, इसहाक र याकूबो परमेश्वर आला।’ जब मोशै इसै कुरा सेया तब होस बीरीमो थर-थर होयोवा हटै होचे ङोस्के साहस जा र माजाटा। 33हटै प्रभुये मोशाके टेकाङ, ‘नोङो जुत्ता खोलो हीके टेहाङ नाङ टोरोस्स ठाउँ पवित्र ले। 34ङै ङौ भर्मीकोइ मिश्र देशाङ डीन्च दुःख-कष्ट साँच्चै डाङ्मोन हटै होसोकोइ दु:ख डीहीन्म राप्च सेमोन। ङा होसोकोके बचडीके म्हाकाङ राहाच आला। होट छान्नाङ राहान ङै नाङ्के मिश्र देशाङ ल्हेट्लाङ।’
35इसै मोशाके ज इस्राएलीकोइ, ‘नाङ्के कुचे कानुङ शासक हटै न्यायधीश छान्के बीरीना?’ टेमो माजाक्मोलेया। बाकी र ढामो मुच माहार्च बुटाङ स्वर्गदूतद्धारा परमेश्वर ङाक्मो मोशाके ज इस्राएलीकोके छुटकारा याहाके हटै होसोकुङ अगुवा छान्के बीरीन्काङ।#प्रस २:१४ 36हटै मोशै ज इस्राएलीकोके मिश्र देशीङ बहीरीङ राका। हटै परमेश्वरे बाचा जाट्च देशाङ आन्नाङ मिश्र देश, लाल समुद्र हटै उजाड ठावाङ होचे चालीस बर्ष सम्मन अचम्मावो काम हटै चिन्हको टनाका।#प्रस ७:३; १४:२१; गन्ती १४:३३ 37होसै मोशै ज इस्राएलीकोके इट टेमोलेया, ‘परमेश्वरे नाक्कुङ भर्मीकोटुइङ ज ङा ढीन्च ज काट अगमवक्ता नाक्कोटुङ बीरीन्नेको।’#व्यव १८:१५,१८ 38इस्राएलीको उजाड ठावो सीनै पाहाडाङ जम्मा छान्नाङ मोशा ज होसोको कठा लेया। स्वर्गदूत सीनै पर्वताङ होस कठा ज ङाकाला। हटै होसै मोशै ज इस्राएलीकोके परमेश्वरीङ डीहीन्च जीबन याहाच बचनको याहा।#प्रस १९:१—२०:१७; व्यव ५:१-३३
39बाकी ड कानुङ पुर्खाकोइ होच्यौ कुरा सेड ज मासेया हटै डीढ ज माडीया। होसोको मोशाके डास्मो मिश्राङ ज ल्हेस्के जाका। 40होसोकोइ मोशौ डाजी हारुनके इट टेया, ‘कानुङ लागी कानके लाम टनाक्के देवताको खास्मो योहो। इसै मोशा जसे कानके मिश्र देशीङ छीक्मो राका होस्के ही छाना, कानके थाहा माले।’#प्रस ३२:१ 41हटै होसोकोइ काट बाछौ मुर्ति खासा र होच्यौ अघेर बली जाटा। हटै होसोको मेक्कोइ जाट्च कामाङ मराङा।#प्रस ३२:२-६ 42होट छान्नाङ परमेश्वरे होसोकोके नमाङो ग्रह हटै ग्याहोटकोके पुजा अटजाटे टेमो डास्काङ। होच्यौ बारेयाङ परमेश्वरो बचनाङ अगमवक्ताकोइ इट रीक्मोले,
‘ए इस्राएलीको!
नाक्कोइ चालीस बर्ष सम्म उजाड ठावाङ
जुन बलि याहामो नालेयास होस ङौ लागी मालेया।#आमो ५:२५-२७
43नाक्कोइ मोलेख देवतौ पाल बुमो नान्हुनास
हटै रेफन देवता टेच टुगौ मूर्ती नाराकास।
होसोको नाक्कोइ नाक्कोलै पूजा जाट्के टेम खास्स मूर्तिको लेया।
होट छान्नाङ ङै नाक्कोके दण्ड याहाके बेबिलोनो पार्लाक सम्मन ड बीरीन्नाङ।’
44उजाड ठावाङ कानुङ पुर्खाकोर कठा परमेश्वर लेकाङ टेमो वार्के लागी परमेश्वरो पाल लेया। मोशै होस पाल परमेश्वरे टनाक्च नमूना लख ज खास्मोलेया।#प्रस २५:९,४० 45परमेश्वरे इसै ठावाङ मुच अरु जातिवो भर्मीकोके छीक्काङ हटै यहोशूये होस ठाउँ जुट्नीसीङ लानाङ होसोकोइ परमेश्वरो पाल राका हटै राजा दाऊदो बेलाङ सम्मन होस पाल होसोकोर कठा ज छाना।#यहो ३:१४-१७ 46परमेश्वर दाऊद कठा ढलीङ खुशी लेकाङ। दाऊदे परमेश्वरके गीना, ‘ङै नाकुङ लागि मुच इम खास्म यहीङ? नाको कानुङ पुर्खा याकूबो परमेश्वर नाल्नी।’#२ शमू ७:१-१६; १ इति १७:१-१४ 47बाकी र परमेश्वरो लागि इम चहीन्या दाऊदो मीजा सोलोमने खासा।#१ राजा ६:१-३८; २ इति ३:१-१७
48बाकी ड पट्ट टेनाङ कराहाङ्च परमेश्वर च भर्मीये खास्च इमकोवाङ मामुलेको। जस्तै इसै कुरा अगमवक्तै घनीङ टेमोले,
49‘परमेश्वरे टेलेको, “स्वर्ग ङौ सिंहासन आला हटै पृथ्वी ङौ हील डाच ठाउँ आला,
नाक्कोइ ङौ लागी कुन्च इम खास्डनीस?
ङौ म्हुङ बाट्च ठाउँ कुलाङ ले?#यशै ६६:१,२
50इसै पट्ट चिज ङै ज खास्स माला र?”’
51नाक्कुङ गीन कठोर छान्मोले हटै मायहूदीकोइ लख नाक्कोइ परमेश्वरो बचन सेके माजाक्डनीस। नाक्कोइ नाक्कुङ पुर्खाकोइ लख ज पवित्र आत्मै टनाक्च कुराको सेन्ड माडीहीडनीस।#यशै ६३:१० 52नाक्कुङ पुर्खाकोइ पट्ट अगमवक्ताकोके सटडीया। होसोकोइ परमेश्वरो पवित्र जन राहालेको टेमो खबर सेटाक्चकोके समेत साटा। इन्नाङ नाक्कोइ चहीन्या राहाच पवित्र जनके धोखा याहामो नासाटास। 53स्वर्गदूतकोइ नाक्कोके परमेश्वरे याहाच आज्ञाको सेटाका बाकी र नाक्कोइ होस आज्ञाको डीहीम मटजाटास।”
स्तिफनसके ल्हुङे ङाप्मो साटा
54जब होसोकोइ स्तिफनसो कुराको सेया तब महासभाङ मुच भर्मीको बेहेरी डाम्छोस्मो मीस्याक जीका। 55बाकी र स्तिफनस चहीन्या पवित्र आत्मै पीङ्मो एकोहोरो स्वर्गलाक ङोस्मो मुनाङ परमेश्वरो महानतौ ज्योति डाङा र येशूके परमेश्वरो डोरलाक टोरोस्मो मुच डाङा। 56हटै स्तिफनसे टेया, “ङोस्नीस, ङै स्वर्ग फस्स हटै भर्मीयो मीजा येशू परमेश्वरो डोरलाक टोरोस्मो मुच डाङ्मजलेन।”
57हटै होसै बखटाङ ज महासभाङो भर्मीको बेहेरी च्याक्मो मेक्कुङ मेनेकेप ठुन्नीसीङ पट्टको स्तिफनसटुङ खेर्म आना। 58होसोकोइ स्तिफनसके सहरीङ घीस्सार्डीम बहीरीङ छीका हटै ल्हुङे ङाप्म साट्के ठाला। जुन भर्मीकोइ स्तिफनसो विरुद्धाङ झुटो कुराको टेमोलेया होसोकोइ मेक्कुङ कोट पीट्नीसीङ शाऊल टेच भर्मीके जीम्के याहा। 59होसोकोइ ल्हुङे ङाप्नाङ स्तिफनसे प्रभुटुङ प्रार्थना जाट्मो इट टेया, “हे प्रभु येशू, ङौ आत्माके लानी।” 60हटै होचे मीघुडै टुस्नीसीङ कराहाङ्च स्वराङ, “हे प्रभु, इसै पाप इसकोके नौटलक्डीसे!” टेया र होच्यौ प्राण आना।
© 2024 (Active), Mother Tongue Translators Society and Wycliffe Bible Translators, Inc. All rights reserved.