प्रेरित 6
6
सात जना भर्मीको छान्डीया
1जब होस बेलाङ चेलाको निरन्तर बढडीस्मो आना तब हिब्रु ढुट ङाक्च यहूदीको र ग्रीक ढुट ङाक्च यहूदीको एना। ग्रीक ढुट ङाक्च यहूदीकोइ, “कानुङ विधवाकोइ दिन-दिनै डुप्के परीस्स ज्याच कुराकोवाङ नाक्कोइ पुङ्नाङ सेहेम मटङोसास” टेमो हिब्रु ढुट ङाक्च यहूदीकोके गनगन जाट्के ठाला। 2हटै बाह्र जना प्रेरितकोइ पट्ट चेलाकोके काट ठावाङ एटा हटै इट टेया, “काने परमेश्वरो बचन प्रचार जाट्के डास्मो ज्याच-गाच कुराङ भुल्मो मुके ठीक माला। 3होट छान्नाङ येशूवाङ विश्वास जाट्च भर्मीको, नाक्को मध्येइङ पवित्र आत्मा हटै बुद्धिये भरिपूर्ण लेच र पट्टकोइ आदर जाट्च सात जना भर्मीको छान्डीनीस। होसोकोके काने इसै काम जाट्के नियुक्त जाट्लीङ। 4बाकी र कान चहीन्या लगातार प्रार्थना जाट्के हटै परमेश्वरो बचन प्रचार जाट्के समय याहालीङ।”
5प्रेरितकोइ टेच इसै कुरा पट्ट चेलाकोके मन परीसा। हटै होसोकोइ विश्वास र पवित्र आत्मै भरीपूर्ण छान्च स्तिफनसके छान्डीया। हटै फिलिप, प्रखरस, निकनोर, तीमोन, पर्मिनास हटै एन्टिओखिया सहरावो यहूदी धर्म लाच मायहूदी निकोलाउसके ड छान्डीया। 6हटै होसोकोइ होस सात जनाकोके प्रेरितकोटुङ राका र प्रेरितकोइ होसोकोटाक मीहुट डामो होसै कामो लागि परमेश्वरो आशिष अटडीहीने टेमो प्रार्थना जाटा।
7परमेश्वरो बचन लगातार फैलडीस्मो आना हटै यरुशलेमाङ प्रभु येशूवो चेला झन-झन धेरै छान्मो आना। ढलीङ पूजाहारीकोइ ड प्रभु येशूवाङ विश्वास जाटा।
स्तिफनसके घोवा
8परमेश्वरो महान् दया हटै शक्तिये भरिपूर्ण छान्च स्तिफनसे भर्मीकुङ बीचाङ कराहाङ्च-कराहाङ्च अचम्मावो काम जाटा हटै चिन्हको टनाका। 9बाकी र कोही भर्मीकोइ चहीन्या होच्यौ विरोध जाट्के ठाला। होसोको यहूदीकुङ गुमुस्ठ इमाङो स्वतन्त्र दासको टेच दलाङो भर्मीको लेया। होसोको कुरेनी र अलेक्जेन्ड्रिया सहरो, किलिकिया र एशिया इलाकाइङ राहाच यहूदीको लेया। होसोको पट्टको खाट्मो स्तिफनस कठा बहस जाट्के ठाला। 10बाकी र पवित्र आत्मै स्तिफनसके ङाक्के बुद्धी याहाकाङ होट छान्नाङ होसोकोइ स्तिफनसके झुट टेके माहेका। 11हटै होसोकोइ कोही भर्मीके घुस याहानीसीङ, “काने स्तिफनसे मोशा हटै परमेश्वरो विरुद्धाङ ङाक्च काडाङास” टेनीस टेमो टेके बीरीना। 12होट टेके बीरीन्मो होसोकोइ भर्मीकोके, अगुवाकोके र व्यवस्थौ धर्मगुरुकोके भड्कडीया। हटै होसोकोइ स्तिफनसके घोमो महासभौ अघेर राका। 13हटै होसोकोइ स्तिफनसो बारेयाङ झुट ङाक्के भर्मीकोके राका। होस भर्मीकोइ स्तिफनसके टेया, “इसै भर्मीये च सधैँ पवित्र मन्दिर हटै मोशै पाहाक्च कुराकुङ विरोध जाट्मो ङाक्ले। 14कानकोइ इच्यै इट ड टेच सेमोनीङ, ‘नासरताङो येशूये इसै मन्दिरके हुलुक्लेको र काने विश्वास जाट्मो राहाच मोशै पाहाक्च नियमको घनीङ फेर्डीले।’” 15हटै होस बेला महासभाङ मुच भर्मीकोइ स्तिफनसके ङोस्मो मुवा। होस बेला स्तिफनसो अनुहार स्वर्गदूतो लख चहक छान्मो टार्लीमोलेया।
© 2024 (Active), Mother Tongue Translators Society and Wycliffe Bible Translators, Inc. All rights reserved.