प्रेरित 5
5
हननिया हटै सफीरा
1हननिया टेच काट भर्मी लेया हटै होच्यौ माझौ म्यार्मीन सफीरा लेया। होसोकोइ र मेक्कुङ कोही गार्हा आर्ला। 2हटै होसोको न्हीसे मेक्को-मेक्को सल्लाह जाट्मो होस गार्हा आर्लाच केही पैसा आर्चीक्मो डा। अरु बचडीस्स पैसा हननियै प्रेरितकोटुङ राका। 3बाकी र पत्रुसे टेया, “ए हननिया, कुट शैताने नोङो गीनाङ पवित्र आत्मा कठा झुट ङाक्के हटै गार्हा आर्लाच केही पैसा नाङ कठा ज डाच कुरा कामोयाहा? 4होस जग्गा मार्लौ होस नाङ्लौ ज मालेया र? हटै होस आर्लानीसीङ ड होस पैसा नाङ्लौ अधिकाराङ ज मालेया र? इन्च काम जाट्के नोङो गीनाङ कुट राहा? नेङे भर्मीकोके ढाट्च माला बाकी र परमेश्वरके ढाट्च आले।” 5इसै कुरा सेच डीक्को हननिया झाङ खोरोवा हटै सीया। हटै इसै कुरा सेचको ढलीङ बीरीया। 6हटै होलाङ लेच रेन्झाकोइ होस्के कात्रै बेहेर्डीमो बुम बहीरीङ नुन्हा हटै ठाका।
7सोम घण्टा न्हुनीङ हननियौ माझा भीत्री राहा। होस्के मेनो लेन्जा सीच टेमो थाहा मालेया। 8हटै होस्के पत्रुसे टेया, “ङाके टेउ ट, नाक्कोइ गार्हा होडीकाङ ज आर्लाच आला की माला?” हटै होचे टेया, “होडीकाङ ज आर्लाच आला।”
9पत्रुसे टेया, “नाक्को न्हीसवाने ज हीके प्रभुवो आत्माके जाँच जाट्के सल्लाह नाजाटास? ङोसो नोङो लेन्जाके ठाकान्च भर्मीको गलाम बहीरीङ टाक्राहामोले। होसोकोइ नाङ्के ड होट ज बुम बहीरीङ नुन्ले।” 10हटै होट टेच डीक्को ज होस पत्रुसो अघेर खोरोवा र सीया। हटै रेन्झाको भीत्री राहा र होस सीच डाङ्नीसीङ होच्यौ लासके ड बुम बहीरीङ नुन्हा हटै मेनो लेन्जाटुङ ज ठाकाना। 11इट छान्च सेच भर्मीको हटै मण्डलीयो भर्मीको ढलीङ बीरीया।
प्रेरितकोइ जाट्च अचम्मावो काम हटै चिन्हको
12प्रेरितकोइ भर्मीकुङ बिचाङ ढलीङ अचम्मावो कामको जाट्मो चिन्हको टनाकाला। येशूवाङ विश्वास जाट्च भर्मीको परमेश्वरो मन्दिरो सोलोमनो दलानाङ जम्मा छानाला। 13अरु भर्मीको चहीन्या होसोकोर कठा खाट्के आँट माजाटा। टेहाङ र होसोकोके भर्मीकोइ मन्डीवला। 14टेहाङ र ढलीङ भर्मीको, माझा-लेन्जा न्हीसवान येशूवाङ विश्वास जाट्मो होसोकुङ समूहाङ ठप्डीस्मो आना। 15प्रेरितकोइ जाट्च अचम्मावो काम डाङ्नीसीङ होलाङो भर्मीकोइ पत्रुस होस लामीङ ह्वानाङ होच्यौ मीर्म्ह्या टेहाङ र अटपरीसे टेमो छाच भर्मीकोके खाटको हटै गुन्द्रीयाङ डाआला। 16यरुशलेम वरिपरी लेच लाङ्घावो ढलीङ भर्मीको राहा। हटै होसोकोइ छाच भर्मीको र दुष्ट आत्माको लक्डीस्स भर्मीको राका हटै होसोको पट्टको गेपा।
प्रेरितकोके सतावट राहा
17पट्ट पूजाहारीकुङ अगुवा हटै होच्यौ लफाको सदुकीकोइ प्रेरितकोके खुब डाहा जाटोला। 18होसोकोइ प्रेरितकोके घोमो सहराङो झ्यालखनाङ ठुना। 19बाकी र होस नभी परमेश्वरो स्वर्गदूते झ्यालखनाङो गलाम फोम होसोकोके बहीरीङ राका। हटै होसोकोके टेया, 20“अब आन्नीस हटै मन्दिराङ टोरोस्नीस र भर्मीकोके इसै नयाँ जीबनो बारेयाङ सेटाक्नीस।” 21प्रेरितको स्वर्गदूतकोइ टेच डीहीम जाट्म गोराक ज मन्दिराङ आन्मो पाहाक्के ठाला। बाकी र पट्ट पूजाहारीकुङ अगुवा र होच्यौ मीलफाकोइ इस्राएलीकुङ पट्ट यहूदी अगुवाकोके महासभाङ एटा। हटै प्रेरितकोके झ्यालखनीङ डोन्मो राक्के बीरीना।
22बाकी र सिपाहीकोइ आन्नीसीङ ङोस्नाङ होस प्रेरितको होलाङ मालेया। हटै सिपाहीको ल्हेस्नीसीङ इट टेया, 23“झ्यालखन च सेहेमो ज ठुन्मोलेया। होलाङो पाले मुचको ड गलामाङ ज लेया बाकी र गलाम खोल्नाङ च भित्री कुस ड मालेया।” 24इसै कुरा सेनीसीङ मन्दिराङो सिपाहीकुङ कप्तान र मुख्य पूजाहारीको छक्क परीसा। हटै होसोकोइ होलाङ ही छाना टेमो सोच्डीके ज माहेका। 25हटै होसै बखटाङ ज काट भर्मी राहानीसीङ होसोकोके इट टेया, “इलाक सेनीस ट, नाक्कोइ झ्यालखनाङ ठुन्मो डाच भर्मीको च मन्दिराङ टोरोस्नीसीङ शिक्षा याहामो की मुमोले।” 26इसै कुरा सेनीसीङ कप्तान र सिपाहीकोइ प्रेरितकोके लाके नुङा। हटै होसोकोके हीड बल जफती माजाट्मो राका हीके टेहाङ सिपाहीको भर्मीको डाम्छोसा टेहाङ ल्हुङे ङाप्ले टेमो बीरीयाला।
27होसोकोइ प्रेरितकोके महासभौ अघेर टोरोसाका हटै पट्ट पूजाहारीकुङ अगुवै होसोकोके इट टेया, 28“काने नाक्कोके येशूवो बारेयाङ कुस्के ड हीड नापाहाक्नीस टेमो कडा आज्ञा याहामो कालेयास, आला की माला? ङोस्नीस, नाक्कोइ च यरुशलेम भरी पट्टकोके येशूवो बारेयाङ नासेटाक्लीसास। अझै नाक्कोइ च येशूके साट्च दोष कानके की लैडीके टेमो निधो नाजाट्लीसास!”#मत्ती २७:२५
29पत्रुसे हटै अरु प्रेरितकोइ टेया, “काने भर्मीये टेच माला बाकी र परमेश्वरे टेच कुरा डीहीम जाट्के परीस्ले। 30कानुङ पुर्खाकुङ परमेश्वरे येशूके सीठइङ जीवाट्काङ, जसके नाक्कोइ क्रुसाङ चेलोक्मो साट्मो नालेयास। 31इस्राएलीकोइ पाप जाट्के डास्मो परमेश्वरलाक अटल्हेसे र पापीङ क्षमा अटडीहीने टेमो परमेश्वरे येशूके मुक्ति याहाच राजा जाट्मो मेकुङ डोरलाक डाकाङ। 32कान इच्यौ साक्षी लेमोनीङ हटै परमेश्वरे मेकुङ आज्ञा डीहीम जाट्चकोके याहाच पवित्र आत्मा ड साक्षी लेको।”
33बाकी र जब होलाङ जम्मा छान्च भर्मीकोइ इसै कुरा सेया तब होसोको बेहेरी डाम्छोसा हटै प्रेरितकोके साट्के टेमो सल्लाह जाटा। 34बाकी र होसै बेला ज गमलिएल टेच फरिसी जो व्यवस्थौ धर्मगुरु लेया होस महासभौ अघेर राहा। होस्के पट्ट भर्मीकोइ डीहाला। होस सोवा हटै प्रेरितकोके कलापके लागी महासभौ बहीरीङ आन्के बीरीना। 35हटै होचे महासभाङ जम्मा छान्च भर्मीकोके टेया, “ए इस्राएलीको, इसै भर्मीकोके नाक्कोइ ही जाट्के पामो नाल्नीस? होच्यौ बारेयाङ सोच्डीनीस। 36चेक पहीला थुदास टेच काट भर्मीये टोरोस्म मेल्लै मेल्लाके ङा कराहाङ्च भर्मी आला टेया। हटै होस्के डुट्च भर्मीको चार सय टार छाना बाकी र होस्के साटा हटै होस्के डुट्च भर्मीको पट्टको जताततै छरपष्ट छाना हटै होच्यौ नाम निशान ही र ज मामुवा। 37न्हुनीङ जनगणनौ बेलाङ ड गालीलाङो यहूदा टेच काट भर्मी खडा छाना हटै होस्के र ढलीङ भर्मीकोइ डुटा बाकी र होस्के साटा हटै होस्के डुट्च भर्मीको जताततै छरपष्ट छाना। 38होस कारणे इच्यौ मामीलाङ ङै नाक्कोके टेलाङ, होस भर्मीकोके हीड नाजाट्नीस, बरु होसोकोके डास्नीस हीके टेहाङ होसोकोइ इसै बिचार र काम होसोकोइ मेक्कोलै खास्स आला टेहाङ होस मेल्ला म्हामो आन्ने। 39बाकी र इसै परमेश्वरीङ राहाच आला टेहाङ होस्के नाक्कोइ रोक्डीके माहेक्डनीस। नाक्कोइ परमेश्वरो विरुद्धाङ काम जाट्च छान्डनीस।”
40होस भर्मीकोइ गमलिएलो सल्लाह मन्डीया र होसोकोइ प्रेरितकोके फेरी एटा र कोर्रा लैडीया हटै, “अब नाक्कोइ येशूवो म्यार्मीनाङ ही ड नाङाक्नीस” टेमो कडा आज्ञा याहा र प्रेरितकोके आन्के याहा। 41प्रेरितको महासभाइङ ख्यौहा हटै, “परमेश्वरे कानकोके येशूवो म्यार्मीनाङ दु:ख हटै अपमान डुप्के लाइकाङो मन्डीकाङ” टेमो बेहेरी मराङा। 42हटै प्रेरितकोइ दिन-दिनै मन्दिराङ र भर्मीकुङ इमाङ आन्मो येशू ज पापीङ बचडीच ख्रीष्ट लेको टेमो सेहेच-समाचार प्रचार जाट्के हटै पाहाक्के माडासा।
© 2024 (Active), Mother Tongue Translators Society and Wycliffe Bible Translators, Inc. All rights reserved.