प्रेरित 4
4
पत्रुस हटै यूहन्ना महासभौ अघेर
1पत्रुस हटै यूहन्नै भर्मीकोर कुरा जाट्मो मुनाङ पूजाहारीको, परमेश्वरो मन्दिर हेरचाहा जाट्च सेनाकुङ कप्तान र सदुकीको होसोकोटुङ राहा। 2पत्रुस हटै यूहन्नै येशू सीनीसीङ फेरी जीवाकाङ, होस कारणे अरू सीच भर्मीको ड फेरी जीवाले टेमो प्रचार जाट्नाङ होसोकुङ बेहेरी मीडाम्छो ख्यौहा। 3हटै होसोकोइ पत्रुस र यूहन्नाके पीहीन लख सम्मन झ्यालखनाङ ठुना हीके टेहाङ होस बखटाङ नम्मार्के भ्यामोलेया। 4बाकी र होसोकोइ प्रचार जाट्च सेहेच समाचार सेनीसीङ ढलीङ भर्मीकोइ विश्वास जाटा। हटै विश्वास जाट्च लेन्जाको बड्ढीस्मो पाँच हजार टार छाना।
5पीहीन लख गोराक पूजाहारी अगुवाको, अगुवाको हटै व्यवस्थौ धर्मगुरुको यरुशलेमाङ जम्मा छाना। 6होलाङ पट्ट पूजाहारीकुङ अगुवा हन्नास, कैयाफास, यूहन्ना, अलेक्जेन्डर हटै हन्नासो इमाङो अरु भर्मीकोर राहामो लेया। 7हटै होसोकोइ पत्रुस र यूहन्नाके होलाङ लेच भर्मीकुङ अघेर राका हटै इट टेमो गीना, “नाक्कोइ कुसै शक्तिइङ या कुच्यौ म्यार्मीनाङ इसै लङ्गडाके नागेपाकास?”
8हटै पत्रुसे पवित्र आत्मै पीङ्म होसोकोके इट टेया, “पूजाहारी अगुवाको हटै अगुवाको, 9छीनीङ काने काट लङ्गडा भर्मीके रोमो गेपाक्नाङ इसै सेहेच कामो विषयाङ कुसै शक्तिइङ नागेपाकास टेमो गीन्डनीस टेहाङ, 10नाक्को पट्टके हटै इस्राएलाङो पट्ट भर्मीकोके थाहा अटछाने की इसै लङ्गडा भर्मी नासरताङो पापीङ बचडीच येशू ख्रीष्टौ म्यार्मीनाङ गेप्च आला। नाक्कोइ चहीन्या येशूके क्रुसाङ चेलोक्मो नासाटास। बाकी र परमेश्वरे होस्कोके सीठइङ फेरी जीवाट्काङ। 11इसै कुरा परमेश्वरो बचनाङ मेको येशूवो बारेयाङ ज रीक्मोलेया,
‘जुन ल्हुङके कर्मीकोइ काम मालक्डीस्स बेकामाङो सेया
होसै ल्हुङ ज जगाङो मुख्य सुर ल्हुङ छाना।’ #भजन ११८:२२
12येशू ख्रीष्टै बाहेक अरु कुच्यै ड भर्मीकोके पापीङ बचडीके माहेक्ले। संसाराङ भर्मीकोके पापीङ बचडीके येशूवो म्यार्मीन बाहेक अरु कुसै ड म्यार्मीन माले।”
13पत्रुस र यूहन्ना खासै मापरीहीस्स साधारण भर्मी लेया। बाकी र होसोको माबीरीमो ङाका। हटै होलाङ जम्मा छान्च भर्मीको छक्क परीसा। हटै पत्रुस र यूहन्ना येशू कठा ज लेच कुरा होसोकोइ वारा। 14बाकी र होलाङ लेच लङ्गडा भर्मी पत्रुस हटै यूहन्ना कठा टोरोस्मो मुच डाङ्नीसीङ होसोको ही ड ङाक्के माहेका। 15होट छान्नाङ होसोकोइ पत्रुस र यूहन्नाके यहूदीकुङ महासभाइङ बहीरीङ आन्के आज्ञा जाटा हटै होसोको चहीन्या मेक्को-मेक्को खाट्मो इट सल्लाह जाटा, 16“अब कानकोइ इसै न्हीस भर्मीकोके ही जाट्के आउले होला? साँच्चै ज इसै न्हीस भर्मीकोइ अचम्मावो काम जाट्ले टेमो यरुशलेमाङो पट्ट भर्मीकोइ वार्के भ्यामोले हटै काने इस्के माला टेके ड माहेक्लीङ। 17बाकी र अब इसै कुरा अरू भर्मीकोइ थाहा माडीहीन्के लागी होसोकोके, ‘अबइङ होडा येशूवो म्यार्मीनो बारेयाङ कुसै ड कठा ही र कुरा नाजाट्नीस’ टेमो कडा आज्ञा यहीङ।”
18हटै होसोकोइ पत्रुस र यूहन्नाके फेरी भीत्री एट्नीसीङ, “अब येशू म्यार्मीन लामो नाङाक्नीस हटै येशूवो म्यार्मीन लामो ही र मापाहाक्नीस” टेमो पत्रुस र यूहन्नाके आदेश याहा। 19बाकी र पत्रुस र यूहन्नै होसोकोके इट टेया, “नाक्कोइ टेच कुरा डीहीम जाट्के की परमेश्वरे टेच कुरा डीहीम जाट्के? परमेश्वरो अघेर कुसै कुरा ठीक ले नाक्को नाक्कोलै विचार जाट्नीस। 20हीके टेहाङ काने डाङ्च हटै सेच कुराको कान माङाक्मो मुके माहेक्लीङ।” 21होसै कुरा सेनीसीङ होस भर्मीकोइ पत्रुस र यूहन्नाके सजाय याहाके ही ड उपाय माडुप्नीसीङ झन ज धम्की याहामो डासा हीके टेहाङ होसोकोइ जाट्च अचम्मावो कामो लागी पट्ट भर्मीकोइ परमेश्वरो प्रशंसा जाट्मोलेया। 22हीके टेहाङ अचम्म तरिकै गेप्च होस लङ्गडा भर्मी चहीन्या चालीस बर्ष टेनाङ र ढलीङ छान्मो भ्यामोलेया।
येशूवाङ विश्वास जाट्चकुङ प्रार्थना
23पत्रुस र यूहन्नाके होटै डास्स डीक्को होसोको मेक्कुङ लफाकोलाक ल्हेसा हटै मुख्य पूजाहारीकोइ र यहूदी अगुवाकोइ टेच कुराको पट्ट सेटाका। 24हटै जब होसोकोइ इसै कुरा सेया तब होसोको पट्टको खाट्मो परमेश्वरके इट टेमो प्रार्थना जाटा, “हे सर्वशक्तिमान् प्रभु, नम, पृथ्वी, समुद्र हटै होलाङ लेच पट्ट थोक #प्रस २०:११; नहे ९:६; भजन १४६:६ नाकोइ ज नाखासास। 25नाकोइ कानुङ पुर्खा राजा दाऊद द्वारा पवित्र आत्मौ सहायतै इट नाटेयास,
‘हीके संसारावो भर्मीकोइ परमेश्वरो विरुद्धाङ योजना खास्ले?#भजन २:१,२
होस योजनाको व्यर्थ ले।
26परमप्रभुवो विरुद्धाङ हटै होस्कुङ
अभिषिक्त जनो विरुद्धाङ
पृथ्वीयाङो राजाको खडा छाना, हटै शासकको काट ठाङ जम्मा छाना।’
27हीकटेहाङ नाकोइ अभिषेक जाट्च, नाकुङ पवित्र सेवक येशूवो विरुद्धाङ हेरोद र पन्तियस पिलातस न्हीसवान ज, मायहूदीकोर हटै इस्राएलीकोर कठा इसै#लूक २३:७-११; मत्ती २७:१,२; मर्कू १५:१; लूक २३:१; यूह १८:२८,२९ सहराङ ज जम्मा छान्मो लेया। 28बाकी र नाको शक्तिशाली नाल्नी। इसकोइ नाकोइ पहीला ज छान्ले टेच कुराको ज जाटा। 29अब हे प्रभु, होसोकोइ कानके याहाच धम्की लाक ङोस्नी, हटै नाकुङ सेवककोके नाकुङ बचन साहस कठा ङाक्के शक्ति याहानी। 30नाकुङ पवित्र सेवक येशूवो म्यार्मीनाङ छाचकोके गेपाक्नी हटै अचम्मावो कामको र चिन्हको जाट्नी।”
31होसोकोइ होट प्रार्थना जाट्म भ्यानीसीङ होसोको जम्मा छान्च ठाँउ होयोवा हटै होसोको पट्टको पवित्र आत्मै पीङा र होसोकोइ साहस कठा परमेश्वरो बचन प्रचार जाटा।
साझा सम्पत्ती
32येशूवाङ विश्वास जाट्च पट्टको काटै मीगीनाङो हटै काटै आत्माङो छान्मोलेया। होसोकोइ होलाङ लेच मेक्कुङ सामानको, “इसै ङौ, होसै नोङो” माटेयाला। #प्रे २:४४,४५ होलाङो पट्ट थोकको साझा लेया। 33प्रेरितकोइ कराहाङ्च शक्ति डीहीन्मो प्रभु येशू फेरी जीवाचाला टेमो गवाही याहाला हटै परमेश्वरे होसोको पट्टके महान् दया जाट्काङ। 34-35होसोको कुसैके ड ही र कुरौ अभाव मापरीसाला, हीके टेहाङ होसोकोटुङ लेच जग्गा-जमीन हटै इमको आर्लाच पैसा होसोकोइ प्रेरितकोटुङ राकोला। हटै होसोकोइ होस पैसा मालेचकोके पुङ्मो याहाला।
36साइप्रस देशाङो लेवी कुलाङो काट योसेफ टेच भर्मी लेया, प्रेरितकोइ होच्यौ म्यार्मीन बारनाबास#4:36 बारनाबास बारनाबासो अर्थ हौसला याहाच भर्मी आले। डामो लेया । 37होचे मेनो काट जग्गा आर्ला हटै राहाच पैसा प्रेरितकोके याहा।
© 2024 (Active), Mother Tongue Translators Society and Wycliffe Bible Translators, Inc. All rights reserved.