प्रेरित 3
3
काट ह्वाके माहेक्च लङ्गडा गेप्च
1कयाक नम्सीनाङो सोम बजे प्रार्थना जाट्च बेलाङ पत्रुस हटै यूहन्ना मन्दिराङ आना। 2हटै जब होसोको आर्भालाक आना होसोकोइ होलाङ काट भर्मीके होच्यौ मीलफाकोइ बुमो मन्दिरो सेहेच (सुन्दर) टेच गलामो छेवाङ राक्च डाङा। होस भर्मी फुन्ठइङ होडा ज लङ्गडा लेया। होस भर्मीके दिन-दिनै होच्यौ लफाकोइ होलाङ राकोला। हटै होचे मन्दिर भित्री पस्डीच भर्मीकोटुङ भिख ङीहीमो मुवला। 3पत्रुस हटै यूहन्ना मन्दिर भीत्री आन्नाङ होचे होसोकोटुङ ड भिख ङीहा। 4हटै पत्रुस र यूहन्नै होस लङ्गडाके सेहेम ङोसा हटै पत्रुसे होस्के, “कानकोलाक ङोसो” टेया। 5होट टेच सेनीसीङ होस लङ्गडै हीड डुप्लाङ की टेच आशै होसोकोके ङोसा। 6हटै पत्रुसे, “ङा कठा सुन-चाँदी च माले। बाकी र जे ले, होसै ज नाङ्के याहालाङ। नासरताङो येशू पापीङ बचडीच ख्रीष्टौ म्यार्मीनाङ सोनीसीङ ह्वान” टेया। 7हटै पत्रुसे होस लङ्गडौ डोर मीहुट जीम्मो सोटा र तुरुन्त होच्यौ मीहीलाङ हटै गोली गाँठाङ बल राहा। 8हटै होस लङ्गडा फोर्झोवा र सोमो ह्वाके ठाला। हटै होस पत्रुस र यूहन्नार कठा ह्वामो, फोर्झोम र परमेश्वरो प्रशंसा जाट्मो मन्दिर भित्री नुङा। 9हटै पट्ट भर्मीकोइ लङ्गडा ह्वाच र परमेश्वरो प्रशंसा जाट्च डाङा। 10तब मन्दिराङो सेहेच (सुन्दर) टेच गलामो छेवाङ भिख ङीहीम मुच लङ्गडा भर्मी आला टेमो पट्टकोइ चीन्डीया। हटै होस ह्वाच डाङ्मो पट्टको अचम्म छान्मो छक्क परीसा।
पत्रुसे मन्दिराङ प्रचार जाटा
11होस लङ्गडा भर्मीये पत्रुस र यूहन्नौ मीहुट जीम्मो ह्वाच डाङ्मो पट्ट भर्मीको अचम्म छान्मो मन्दिरो सोलोमनो दलान टेच आर्भौ ठावाङ खेर्मो होसोकोटुङ राहा। 12होस भर्मीकोके डाङ्नीसीङ पत्रुसे टेया, “ए इस्राएली भर्मीको, नाक्कोइ हीके इसै कुरा अचम्म सेमो कानकोके ङोस्मो मुडनीस? कानके नाक्कोइ कानुङ शक्ति हटै भक्तिये इसै लङ्गडाके ह्वाके हेक्च जाट्च टेमोनाल्नीस? 13होट माला, कानुङ #प्रस ३:१५पिता-पुर्खा अब्राहाम, इसहाक र याकुबो परमेश्वरे ज मेकुङ सेवक येशूके पट्ट टेनाङ कराहाङ्च जाट्काङ। बाकी र नाक्कोइ चहीन्या येशूके साट्के परीस्ले टेमो नाघोटाकास। पिलातसे होस्कोके डास्के पानाङ ड नाक्कोइ नाडास्नी नाटेयास। 14होस्को च पवित्र हटै धर्मी लेकाङ। बाकी र नाक्कोइ होस्कुङ सट्टाङ काट ज्यान माराके डास्मो #मत्ती २७:१५-२३; मर्कू १५:६-१४; लूक २३:१३-२३; यूह १९:१२-१५याहाके नाबीरीनास। 15जीबन याहाचके चहीन्या नाक्कोइ नासाटास। बाकी र परमेश्वरे होस्कोके सीठइङ जीवाट्मो लेको। इसै कुरौ कान साक्षी लेमोनीङ। 16येशूवो म्यार्मीनाङ विश्वास जाट्च कारणे इसै लङ्गडा ह्वाके हेक्च छाना। इसै भर्मीये येशूवो म्यार्मीनाङ विश्वास जाट्च कारणे पट्ट गेप्मो ह्वाके हेक्च डाङ्मोनाल्नीस।
17ए ङौ इस्राएली भर्मीको, ङाके थाहा ले की नाक्कुङ पूजाहारी अगुवाकोइ हटै नाक्कोइ येशू कुस लेको टेच कुरा मावार्मो ज साट्मो नालेयास। 18बाकी र परमेश्वरे पट्ट अगमवक्ताकोटुइङ ढलीङ पहीलीङ होडा ज पापीङ बचडीच ख्रीष्टै दुःख भोक्डीके परीस्ले टेच कुरा होस्कोइ इट पुरा जाट्काङ। 19होट छान्नाङ अब नाक्को पाप जाट्के डास्मो परमेश्वरलाक ल्हेस्नीस, हटै होस्कोइ नाक्कुङ पट्ट पाप क्षमा जाट्लेको। हटै नाक्कोके परमेश्वरे आत्माङ नयाँ शक्ति र शान्ति याहालेको। 20हटै परमेश्वरे नाक्कुङ लागी पहीला ज छान्डीच पापीङ बचडीच ख्रीष्टके फेरी ज बीरीन्नेको। होस्को ज येशू आला। 21परमेश्वरे अघेरीङ होडा ज मेकुङ पवित्र अगमवक्ताकोटुइङ टेच कुराको लख ज पट्ट कुराको फेरी नयाँ जाट्च बेला माछान्टार येशू स्वर्गाङ ज लेके परीस्ले। 22हीकेटेहाङ मोशै इट टेमो लेया, ‘परमप्रभु नाक्कुङ परमेश्वरे नाक्कुङ लागी नाक्कुङ जातिइङ ज ङा ढीन्च ज काट अगमवक्ता बीरीन्नेको। होस्कोइ टेच पट्ट कुराको #व्यव १८:१५,१८नाक्कोइ सेके ज परीस्ले। 23होस्कुङ कुरा मासेच भर्मीको चहीन्या परमेश्वरो #व्यव १८:१९ भर्मीकोटुइङ अलग छान्ले हटै पट्ट नष्ट छान्ले।’ 24शमूएल हटै होस न्हुनीयाङो पट्ट अगमवक्ताकोइ घनीङ छीनीङ-पीहीन छान्च इसै विषयाङ अगमवाणी टेमोलेया। 25अगमवक्ताको मार्फत परमेश्वरे टेच बाचाको नाक्कुङ लागी ज आला। हटै परमेश्वरे नाक्कुङ पुर्खाको कठा जाट्च बाचा ड नाक्कुङ लागि ज आला। परमेश्वरे कानुङ पुर्खा अब्राहामके, ‘नोङो सन्तान मार्फत पृथ्वीयाङो पट्ट जातिकोइ आशिष डीहीन्ने’ #उत २२:१८टेमो लेकाङ। 26नाक्कोके दुष्ट कामीङ ल्हेट्मो आशिष याहाके परमेश्वरे मेकुङ सेवक येशूके पहीला नाक्कोटुङ ज बीरीन्काङ।”
© 2024 (Active), Mother Tongue Translators Society and Wycliffe Bible Translators, Inc. All rights reserved.