1 Amurǝm 19
19
Iliya ɓanggi Jezebel
1Ahap ne Jezebel gìr mǝnana kat Iliya pàk ka, andǝ ulang walban mǝnana #19:1 Ɓalli gbal aɓa: 18:40.wal amǝ'ɓangnǝa [mala Ba'al] kat nǝ nggeabyau ka. 2Pǝlǝa Jezebel tasǝ mǝ'na-túrbân aban Iliya nǝ cau ama, <<Ɓǝ̀ aɓakuli pangnǝ mim, yale ɓǝ̀ kútì mǝno, ɓǝ̀ ǝn twal yilǝmo kǝla mǝnana a twal yilǝmi amǝ'ɓangnǝa mala Ba'al, liwi nǝ bu-pwari kǝla man raka.>> 3Ɓangciu pàkki Iliya, pǝlǝa lo ɓangŋa ace amsǝ yilǝmi. Sǝ lang yi bik #19:3 Ɓalli gbal aɓa: Tite 21:31.Biyasheba mǝnana a bu-nzali Yahuda ka, pǝlǝa nying guro male abanì.
4Sǝama yì Iliya nǝ ɓamurǝi ka, twal gya mala nongŋo mwashat a ɓabondo, sǝ yi dumnǝdo a tǝrta muna-nggun. Sǝ zǝmbi Ɓakuli ace mǝnana ɓǝ̀ twal yilǝmi ka, bang ama, <<Karǝna anggo ado, We Yahweh, twal yilǝmem acemǝnana ǝn kútì akâ ɗàng.>> 5Pǝlǝa sarǝa nong'ntullo a tǝrta ɓè muna-nggun. Kara ɓè mǝturonjar je, sǝ ne wi ama, <<Lo, lìli.>> 6Lang sǝnban ngga, sǝn kyak mǝnana à lurǝi amur nkalang bǝsa ka andǝ mùr aɓa dù nǝ ban múrí. Nda li sǝ nu, sǝ nong-nongŋo ɗǝm ngga. 7Mǝturonjar mala Yahweh nyare yiu ɗǝm sǝ je Iliya, ne wi ama, <<Lo, lìli, acemǝnana gya mǝnana a dǝmbo ka mǝsauwe na.>>) 8Nda Iliya lo, li sǝ nu, sǝ kum rǝcandǝa mala gya mala #19:8 Ɓalli gbal aɓa: 19:8; Pur 24:18; 34:28; Nggur 9:9; 18; Mat 4:2; Mar 1:13; Luk 4:2.nongŋo lumi-ine dù andǝ pwari, aban ká Horep, yì nkono mala Ɓakuli ka.
Yahweh ne Iliya cau a Horep
9A ban mǝno ka, Iliya yi kútí aɓa gumi-ɓa'tali, sǝ nongŋo abanì; pǝlǝa Yahweh ɗì ama, <<Iliya, mana a kǝ pak kani?>> 10Iliya eari wi ama, <<Mǝ ndanǝ #19:10 Ɓalli gbal aɓa: Ɓal 25:11; 13.ɓabumpina kǝ̀rkǝ́r ace Yahweh, Ɓakuli Mǝtala Abangŋo; acemǝnana amǝ'Isǝrayila ka, à vwakinabuia arǝ kùrcau mò, à arkina agyangŋan mò, sǝ à walna amǝ'ɓangnǝa mô nǝ nggeabyau. Kǝ mǝ nda ǝn ueo, nǝmurǝam ngga, sǝ à ndaban alta yilǝmem à nǝ̀ twali.>> 11Yahweh ne wi ama, <<Puro kya cam amur nkono aɓadǝm Yahweh, acemǝnana Yahweh no nǝ̀ ya kútí nǝ banì.>>
Pǝlǝa ɓè nggea gung mǝcandǝe san nkonoe, sǝ arki atali bǝti-bǝti aɓadǝm Yahweh, sǝama Yahweh pà kàm aɓa gungnì ɗàng. Anzǝm gung ngga, nzali gǝggǝli, sǝama Yahweh pà kàm aɓa gǝggǝli mala nzali mǝno ɗàng. 12Anzǝm gǝggǝli mala nzali ka, bǝsa sǎ, sǝama Yahweh pà kàm aɓa bǝshe ɗàng. Anzǝm bǝshe ka, mǝgiu mǝɓuɓɓuki yiu. 13Sǝ lang Iliya ok giuì ka, gìr ɓamǝsǝi nǝ daura-murɓe male, sǝ wario kya came a bankutio aɓa gumi-ɓa'talinì.
Pǝlǝa ɓè giu ɗì ama, <<Iliya, mana a kǝ pak kani?>> 14Iliya eari wi ama, <<Mǝ ndanǝ ɓabumpina kǝ̀rkǝ́r ace Yahweh, Ɓakuli Mǝtala Abangŋo. Amǝ'Isǝrayila ka, à vwakinabuia arǝ kùrcau mò, à arkina agyangŋan mò, sǝ à walna amǝ'ɓangnǝa mô nǝ nggeabyau. Kǝ mǝ nda ǝn ueo, nǝmurǝam ngga, sǝ à ndaban alta yilǝmem à nǝ̀ twali.>>
15Sǝ Yahweh banggi wi ama, <<Nyar a kusǝo, kya a ɓabondo mala Damaska. Sǝ ɓǝ̀ a bingŋǝna ka, awu nǝ ɗārǝ Hazayel ɓǝ̀ duk murǝm amur Suriya. 16#19:16 Ɓalli gbal aɓa: 2Amur 9:1-6.Sǝ awu nǝ ɗārǝ Jehu muna-ɓwabura mala Nimshi ɓǝ̀ duk murǝm amur Isǝrayila, andǝ Elisha muna-ɓwabura mala Shafat mala Abel-Mehola, ɓǝ̀ duk mǝɓangnǝa a kunio. 17Ɓwa mǝnana apî nggeabyau mala Hazayel ka, Jehu nǝ̀ wal-luí, sǝ ɓwa mǝnana apî nggeabyau mala Jehu ka, Elisha nǝ̀ wal-lú ɓwe. 18Kat andǝ mǝno ka, Mǝ ndanǝ amǝkpatam á-tongno-nong-ɓari (7,000) kàm piu a Isǝrayila, mǝnana à ɓun nǝ ankūnǝia aɓadǝm Ba'al ɗàng, sǝ à peri abaní raka.>>
Ɓakuli tunǝ Elisha
19Nda Iliya loapi ban mǝno, sǝ kya kum Elisha muna-ɓwabura mala Shafat aban rikrya nǝ andá-rya mala nggun-rya lum-nong-ɓari, sǝ yì Elisha ka, nda mǝnana kǝ rikrya nǝ lum-nong-ɓaria nggun-rya ka. Pǝlǝa Iliya gya kútí nǝbani sǝ túrì wi daura-murɓe male amurí. 20Elisha nying anda-rya male, ɓangŋa atà Iliya, sǝ ne wi ama, <<Ida, nyem mǝ nyare mǝ nggya tsǝk tárrám andǝ nggem a-ndà, sǝ mǝ nǝ kpato.>> Iliya eari wi ama, <<Nyare kyane, ǝn tamsǝo arǝ ká abania ɗàng.>> 21Nda Elisha nyarî tà Iliya, kya bwal anda-rya mala nggun-rya mwashat mǝno, pa'girnkila nǝia. Paktúró nǝ agirtúró rya sǝ lam nyamia, sǝ pè aɓwana à shè. Pǝlǝa lo o atà Iliya, pǝlǝ muna-ɓala male.
Currently Selected:
1 Amurǝm 19: mbu
Highlight
Copy
Compare
Share
Want to have your highlights saved across all your devices? Sign up or sign in
©️2022 The Seed Company
