1 Amurǝm 18
18
Obadiya je andǝ Iliya
1Anzǝm anongŋo pas ka, cau mala Yahweh yiu aban Iliya aɓa tàruià pǝlǝa [mala tǝla-mbulo] ama, <<Kyane, lǝmdǝ ɓamurò aban Ahap, sǝ mǝ nǝ sulǝ mbulo amur nzali.>> 2Nda Iliya wario, nǝ̀ nggá lǝmdǝ ɓamurì aban Ahap ka. Adyan ngga, nzal-gula candǝna a Samariya, 3sǝ Ahap tunǝ Obadiya#18:3 Obadiya mǝnia ka, nda mana gilǝ Malǝmce mala Obadiya ka ɗàng. mǝnana nda mǝ'ɗenyinǝ ɓala-murǝm ngga. (Obadiya ka, ɓwa na kǝ ɓanggi Yahweh kǝ̀rkǝ́r; 4acemǝnana lang Jezebel nǝ̀ nggǝ wal-lú amǝ'ɓangnǝa mala Yahweh ka, Obadiya twal amǝ'ɓangnǝa gbǝman-mwashat (100), sǝ kya sǝmbǝria arǝ agumi-ɓa-tali ɓari, lumi-tongno aɓa komǝye, sǝ kǝ pea wia girlina andǝ mur.) 5Ahap ne Obadiya ama, <<Gya aɓa nzalinì aban amgbeaɗe-mur kat andǝ aɓangŋaban kat. Earka sǝm nǝ̀ kum bondo ace amsǝ yilǝmi apǝr andǝ apǝr-mǝdambǝriso, ace mǝnana ɓǝ̀ sǝm nggá ɓwarban agirkusǝu kat ɗàng.>> 6Nda sǝ à gau nzali mana à nǝ̀ gya aɓalǝi ka anrea; Ahap o a buì mwashat sǝ Obadiya um nǝ ɓè buì.
7Lang Obadiya na aban ká ka, kara Iliya yi kumi, súrǝì sǝ ɓun aɓadǝmbi a nzali sǝ na ama, <<A nda le, ɓwamǝgule mem Iliya?>>
8Iliya eari wi ama, <<Mǝ nda. Kyane banggi mǝtala-ɓala mò ama, <Iliya na kani!> >>
9Obadiya banggi wi ama, <<Ya cauɓikea na ǝn pakko sǝ a kǝ tasǝam, mim guro mò a ɓabu Ahap ɓǝ̀ wal-luem? 10Ən kánbo nǝ yilǝmi Yahweh Ɓakuli mô, kǝ nzali, ko domurǝm pa kàm mǝnana mǝtala-ɓala mem túrban nggam ɓǝà alto raka. Sǝ nzali, ko domurǝm mǝnana kat bang ama, <Pa kani raka,> tsǝia à kángìr ama à sǝno ɗang. 11Sǝ ado ka, a kǝ nam ama, Kya ne mǝtala-ɓala mò ama, <Iliya na kani.> 12Nǝ̀ gandǝ do ama, lang ǝn nggǝ nyio ka, #18:12 Ɓalli gbal aɓa: 2Amur 2:16; Ezǝk 3:12,14; 8:3; Atúró 8:39Bangŋo mala Yahweh nǝ̀ um nǝ we a ban mǝnana ǝn súrǝì raka, sǝ ɓǝ̀ ǝn kya nanì Ahap sǝ yiu sǝ kumo raka, nǝ̀ wal-luem. Sǝama mim guro mò, twal a lo mem ngga, mǝ nda mǝɓanggi Yahweh. 13Mǝtala-ɓala mem, à nô gìr mǝnana ǝn pa, lang Jezebel na aban wal-lú amǝ'ɓangnǝa mala Yahweh ka re? Mǝnana ǝn sǝmbǝrǝ amǝ'ɓangnǝa mala Yahweh gbǝman-mwashat (100), aɓalǝ agumi-ɓa-tali ɓari, lumi-tongno aɓa komǝye, sǝ ǝn warinǝia nǝ girlina andǝ mur ka? 14Sǝ ado ka, a kǝ nam ama, kyane ne mǝtala-ɓala mò ama, <Iliya na kani.> Nǝ̀ wal-luem!>>
15Iliya bang ama, <<Mbak-kàngkàng Yahweh, Mǝtala Abangŋo, mǝnana ǝn camgiyi aɓadǝmbi nakam ngga, mǝ nǝ lǝmdǝ ɓamúràm abaní yalung.>> 16Nda sǝ Obadiya wari aban Ahap kya banggi wi, sǝ Ahap wario kya kum Iliya ka.
17Lang Ahap sǝn Iliya ka, Ahap ɗì ama, <<A nda man le, we mǝpè Isǝrayila tanni?>> 18Iliya pe wi eare ama, <<Ən pe Isǝrayila tanni ɗàng; kǝ awu nda, we wunǝ ɓala mala tarró, lang wu vwakibu wun arǝ anzongcau mala Yahweh, sǝ wu kpata aBa'al ka. 19Ado ka, túrban ɓǝà rambam Isǝrayila kat a Nkono Kamel. Sǝ wu yinǝ amǝ'ɓangnǝa mala Ba'al gbǝman-ine-nǝ-lumi-tongno andǝ amǝ'ɓangnǝa mala Ashera gbǝman-ine, mǝnana à likiyili a kpamgbang-lǐ mala Jezebel ka.#18:19 mǝnana à likiyili a kpamgbang-lǐ mala Jezebel ka ko <<mǝnana Jezebel na kǝ linǝia ka.>>>>
20Nda sǝ Ahap wari aban amǝ Isǝrayila kat, sǝ ramba amǝ'ɓangnǝa abanɓwáná a Nkono Kamel ka. 21Iliya sung tù aban aɓwe sǝ bang ama, <<Nǝ̀ sau lang sǝ wun nǝ̀ nggǝ ɗenggǝli a nre ka aɗenyicau ɓari?#18:21 Sǝni gbal aɓa: Jes 24:15; Mat 6:24 . Ɓǝ̀ Yahweh nda Ɓakuli ka wu kpate, sǝ ɓǝ̀ Ba'al na ka, wu kpate.>> Sǝ kǝɓwa pǝlǝi wi kǝ cau ɗàng.
22Pǝlǝa Iliya banggia wia ama, <<Mim, nǝmurǝam, kǝ mǝ nda mǝɓangnǝa mala Yahweh mana ue ka; sǝama amǝ'ɓangnǝa mala Ba'al ka, à nda gbǝman-ine-nǝ-lumi-tongno. 23Ado ka, wu pà sǝm ajamnda ɓari, sǝ ɓǝà twalî ɓamuria jamnda mwashat, ɓǝà sàngi nyamia ɓǝà tsǝkia amur gimsa, sǝ ɓǝà kǝa tsǝk bǝsa atè ɗàng. Sǝ mim ngga, mǝ nǝ sàngi ɓè jamnda man, mǝ nǝ tsǝì amur gimsa sǝ pà mǝ nǝ tsǝk bǝsa atè ɗàng. 24Wu tunǝ ɓakuli ma'wun, sǝ mǝ nǝ tunǝ Yahweh. Ɓakuli mana pa eare nǝ bǝsa ka, ɓǝ̀ duk Ɓakuli.>> Aɓwe kat pa eare ama, <<Cau mǝnana a ne ka, nda jik.>> 25Iliya ne amǝ'ɓangnǝa mala Ba'al ama, <<Wu tàrî ɓamur rǝ wun jamnda mwashat, wu sàngi a dǝmba, acemǝnana wu nda pas, sǝ wu tunǝ ɓakuli ma'wun, sǝama wu kǝa tsǝki wi bǝsa ɗàng.>>
26Nda à twal jamnda mǝnana à pea wia ka, à sàngi, sǝ à pakhiwi aban Ba'al twal a dǝmbari aban ká pwarizǝkya, à kǝ na ama, <<Ba'al ok sǝm!>> Sǝama à ok kǝ giu ɗàng, sǝ kǝɓwa pea wia eare ɗang. À camarǝ zurkio, sǝ à kǝ gumbǝli gyangŋan mǝnana à ɓè ka. 27Nǝ pwarizǝkya ka, Iliya ɓangginǝia, na ama, <<Wu loasǝ gi wun kpǝm, yì ka ɓakuli na. Earka nda aban pakɗenyicau, ko nda aban doagung, ko twalnabǝri, ko nda a ntulo, wu loasǝi.>>
28Nda à loasǝ gia kàm kpǝm, sǝ kǝla mana kuncau malea kania wia ka, à cangi rǝia nǝ anggeabyau andǝ amunabyau, gandǝa nkila tita ɗārǝ arǝia. 29Lang pwari wulina ka, à camarǝ ɓangnǝa ba bu-pwari paɓoro pwarikpǝra, sǝama à ok kǝ giu ɗàng, sǝ kǝɓwa pa eare ɗang, sǝ kǝɓwa falǝnǝia ɗàng.
30Iliya pǝlǝa ne aɓwe ama, <<Wu sung abanam!>> Pǝlǝa aɓwana kat yiu abani. Sǝ gilǝki gyangŋan mala Yahweh mǝnana à arkini ka. 31Iliya twal atali lum-nong-ɓari kǝla mana làkkì mala atau mala amuna-burana mala kèa Yakupu pàk ka, yì keà mǝnana cau mala Yahweh yiu abaní ama, <<Isǝrayila nǝ̀ duk lullǝo>> ka.#18:31 Ɓalli aɓa: Tite 32:28; 35:10; 2Amur 17:34. 32Nǝ amǝno yì atali ka sǝ ɓak gyangŋan aɓa lullǝ Yahweh. Sǝ gwam dā'ngal kàrì, mǝnana nǝ̀ gandǝ twal mùr lita lum-nong-ine ka. 33Gilǝki gimsa amurí sǝ sàngi jamnda sǝ nongsǝki amur gimsa. Pǝlǝa banggia wia ama, <<Wu lùmsǝ aganggǝlang ine nǝ mur, sǝ wu solǝi amur paɓoro mala pisǝe kǝring, sǝ amur gimsa.>> 34Sǝ bang ama, <<Wu pè kusǝ ɓari,>> sǝ à pe kusǝ ɓari. Nea wia ɗǝm ama, <<Wu pè kusǝ tàrú,>> sǝ à pè kusǝ tàrú. 35Mùrnî aki gyangŋan yi lumsǝ mǝno yì dā'ngal ka.
36Lang bu-pwari mala pa ɓoro mala pwarikpǝra pángŋǝ̀nà ka, Iliya mǝɓangnǝa sung tù, sǝ bang ama, <<Yahweh Ɓakuli mala Ibǝrayim, andǝ Ishaku, andǝ Isǝrayila, tsǝa ɓǝ̀ aɓwana sǝlǝ yalung a Isǝrayila ama, a nda Ɓakuli, sǝ ɓǝà sǝlǝ ama, mǝ nda guro mò, sǝ ɓǝà sǝlǝ ama, amǝnia yì agir ǝn pea ka, cau mò na ǝn kpate ka. 37Oem, we Yahweh, oem, ace mǝnana ɓǝ̀ amǝnia yì aɓwana ka ɓǝà sǝlǝ ama, we Yahweh ka, a nda Ɓakuli, sǝ a nda aban pǝlǝ ɓabumia ɓǝà nyar ɗǝm a bano.>>
38Kara bǝsa mala Yahweh sulǝo pisǝ gir'nkila mala pisǝe kǝring mǝnia, andǝ gimsa andǝ atali, andǝ kǝkǝri, sǝ imsǝ mùr mǝnana nda aɓa dā'ngal ka.
39Lang aɓwe sǝni ka, à kpa nzali nǝ ɓamǝsǝia. À na ama, <<Yahweh nda Ɓakuli, Yahweh nda Ɓakuli.>>
40Sǝ Iliya nea wia ama, <<Wu bwalki amǝ'ɓangnǝa mala Ba'al! Wu kǝa earî kǝ mwashat ateà ɓǝ̀ ɓwar ɗang!>> À bwalkia; sǝ Iliya sulǝia a ɓangŋaban Kishon, wal-luia kat abanì.
Yahweh sulǝ mbulo
41Pǝlǝa Iliya ne Ahap ama, <<O, kya lili sǝ wu nu, acemǝnana ǝn nggǝ ok gǝshi mbulo mǝcandǝe.>>
42Nda Ahap o nǝ̀ nggá lìli sǝ nǝ̀ nu, sǝ Iliya ka eau a ɓong Nkono Kamel; ɓun a nzali, sǝ oasǝ ɓamuri a nre ka ankūnǝi. 43Ne guro male ama, <<Eauwe kya sǝnban nǝ njar nggeamùr.>> Sǝ eauwe kya sǝnban, sǝ bang ama, <<Kǝgir pà kàm ɗàng.>> Sǝ ne wi ɗǝm ama, <<Kyan ɗǝm>> kusǝ tongno-nong-ɓari.
44A tongno-nong-ɓaria kusǝu ka, guro male bang ama, <<Ən sǝn pǝrɓang mǝkyauwe kǝla ɓabu ɓwa, eauwe kǝ yiu amur nggeamùr.>>
Sǝ Iliya ne wi ama, <<Kyane ne Ahap ama, <Kùr waru-pǝr mò [arǝ apǝr], sǝ wu sulǝ akaurǝa, ace mǝnana mbulo ɓǝkǝa kasǝkuno raka.> >>
45Zuku ka, pǝrɓang pǝndǝna nǝ mbulo cikcik, gung longŋa ɓua, sǝ mbulo mǝcandǝe sulǝo. Ahap lo nǝ waru-pǝr male, nǝ̀ nyare a Jezǝril. 46Rǝcandǝa mala Yahweh sulǝ amur Iliya, sǝ kàr nggea-daura male kùrì a taɓuni, ɓangŋa yi kútì Ahap, akidǝmba amur njar aban ká a bankutio a Jezǝril.
Currently Selected:
1 Amurǝm 18: mbu
Highlight
Copy
Compare
Share
Want to have your highlights saved across all your devices? Sign up or sign in
©️2022 The Seed Company
