मती 5

ईसु ने उपदेस

1ईसुई जेरे ये मुटी पीढ़ जुजी ते वी एक मगरा माते सढ़ी गियो। विय वी बेहीं गियो नी विने सेला वणा पाहे आजा। 2तेरे ईसुई वणय उपदेस आलतो थकण केजू,

हासी खुसी

(लूका 6:20–23)

3“दन्य हे व जी मन ने दीन हे,

हरग ने राज वणने हारूस हे।

4दन्य हे व जी रूई रेजअ हे,

केमके परमेसवर वणय सानती आलहीं।

5दन्य हे व जी नरम मन ने हे,

केमके व तरती ने हकदार थाहीं।

6दन्य हे व जी दरम ने काम करवा ने हारू उतावळअ हे,

केमके परमेसवर वणने मरजी पुरी करहीं।

7दन्य हे व जी दयालु हे,

केमके वणअ माते दया किदी जाहीं।

8दन्य हे व जणने मन पवितर हे,

केमके व परमेसवर जुहीं।

9दन्य हे वा जी मेल मिलाप ने काम करे हे,

केमके व परमेसवर ने सुरा केवाहीं।

10 # 1 पत 3:14 दन्य हे व जी दरम ने वजहू हू हतापजअ जय हे,

केमके हरग ने राज वणनेस हे।

11 # 1 पत 4:14 “दन्य हो तमो, केमके मनका मारे वजहू तमारे अपमान करहीं नी तमय विताड़हीं नी मारे हारू तमारे विरोद मा जुटी वाती केहीं। 12#परेरि 7:52तेरे तमो राजी थाईनी कईक आनन्द मनावजो, केमके हरग मा तमय इनु फल मलहीं। यू इमुस थाजू हे के, जेम तमय हू पेले परमेसवर ने हाड़े हू बुलवा वाले मनकय विताड़जा ता।

लुण नी उजाळू

(मरकुस 9:50; लूका 14:34,35)

13 # मर 9:50; लूका 14:34,35 “तमो तरती ने हरेक मनका ने हारू लुण हो, पण अगर लुण ने हवादुस वगड़ी जाए, ते पसे वणाय पासू हवाद मा केम करीनी लावहो? पसे वु कणा काम नु नीं रेजू पण वणाय बान्णे दड़जू जाए नी मनका ने पोग बुदे खदेड़जू जाए।

14 # यूह 8:12; 9:5 “तमो दनिया ने हारू उजाळू हो। एक एवू गाम जी मगरा ने फुगी माते वसेलू हे वु हापी नीं हके हे। 15#मर 4:21; लूका 8:16; 11:33मनका दिवो लगाड़ीनी कणा ठाबडा ने बुदे नीं राके, पण वणाय टुल्ला माते मेले हे नी वी घेर ने हेतय मनकय उजाळू आले हे। 16#1 पत 2:12वणीस तरह हू तमारे उजाळू मनका ने हामे एवू समके के, व तमारे हाऊ कामा ने जुईनी तमारे बाप जी हरग मा हे वणाने बड़ाई करे।

मुसा ने नियम ने हिक

17“यू नकी हमजो के, मुँ मुसा ने नियम या परमेसवर ने हाड़े हू बुलवा वालअ ने सोपड़ी मटावणा आजो हूँ, पण मुँ ते वणजी पुरी करवा आजो हूँ।” 18#लूका 16:17मुँ तमय हू हासु कऊँ हूँ के, आकास नी तरती टली हके हे, पण मुसा ने नियम ने एक एक सबद नी अकसर तेरे लगण बणजू रेहीं, जेरे लगण यू पुरू नीं थाई जाए।

19“तणी जी अणअ हुकम मा हू कणाक नाना मा हू नानाए तुडे़ नी मनका बी एवूस करवू हिकाड़े हे, वी हरग ने राज मा कई कदर नीं पाहे। पण जी वणअ माते हिड़े नी बिजे बी वणअ माते हिड़वा ने उपदेस आले हे, वी हरग ने राज मा मुटो हमजो जाहीं। 20मुँ तमय हू हासु कऊँ हूँ के, अगर तमारे दारमीकता मुसा ने नियम हिकाड़वा वालअ नी फरीसीयो ने दारमीकता हू बड़ीनी नीं वे, ते तमो किरे बी हरग ने राज मा नीं जाई हकहो।

री ने बारामा हिक

21“तमो जाणो हो के, अमारे पुरकाय हू केजू तु के ‘अतया नकी करो नी अगर कणुक अतया करे हे, ते वणाय कोट मा दोसी ठेहरावजो जाहीं।’ 22पण मुँ तमय हू कऊँ हूँ के, जी मनक आपड़े पड़ोसी पाई माते री करे हे ते वणाय कोट मा विनो जबाव आलवो पड़हीं। नी जी कणु आपड़े पाई ने बुराई करहीं वी महासबा मा दण ने लायक थाहीं। नी अगर कणुक आपड़े पाजय हराप आले हे वी नरक ने आग ने लायक थाहीं।

23“तणी अगर तु आपड़े परमेसवर ने हारू वेदी माते भेट सडावती वला तय यू हुते आवी जाए के, मारे पड़ोसी पाई ने मन मा मारे हारू थुड़ोक विरोद हे, 24ते तु आपड़े भेट वेदी ने हामे सुड़ी दे नी जाईनी पेले आपड़े पड़ोसी पाई हू मेल करी दे, तेरे पसे आवीनी आपड़े भेट सडाव।

25“जेरे लगण तु आपड़े विरोदी ने हाते कोट मा जातो वे ते वाट मास, वणा हू जट जट मेल करी ले कियेक इम नीं थाई जाए के, विरोदी तय न्याव करवा वाला हुपे नी न्याव करवा वालो तय सपाजी हुपी दिए नी तु जेळ मा दड़ी दिदो जाए। 26मुँ तय हू हासु कऊँ हूँ के, जेरे लगण तु पाई पाई परी नीं दई तेरे लगण तु विय हू सुटी नीं हकी।

सिनाली ने बारामा हिक

27“तमो जाणो हो के, यू केजू तु के, ‘सिनाली नीं करवान।’ 28पण मुँ तमय हू कऊँ हूँ के, अगर कणुक कणीक बयीरी माते बुरी नजर हू जुए ते वी आपड़े मन मा पेले हूस वणी हाते सिनाली करी सुको हे। 29#मती 18:9; मर 9:47तणी अगर तारे जमणी आक तय पाप ने वजअ बणावे ते, वणजी काडीनी सीटी दड़ी दे। केमके तय हारू यू पलू हे के, तारे सरीर मा हू एक अंग नास थाई जाए नी तारे पुरू सरीर नरक मा नीं दड़जू जाए। 30#मती 18:8; मर 9:43नी अगर तारे जमणो आत तय ठोकर ने वजअ बणावे ते वणाय कापीनी सीटी दड़ी दे, केमके तय हारू यू पलू हे के, तारे एक अंग नास थाई जाए नी तारे पुरू सरीर नरक मा नीं दड़जू जाए।

सेड़ो फाड़वा ने बारामा हिक

(मती 19:9; मरकुस 10:11,12; लूका 16:18)

31 # मती 19:7; मर 10:4 “यू बी केजू हे के, ‘जी आपड़े बयीरजी सुड़वा साहे, वी सेड़ो फाड़वा ने कागद लकीनी आली दिए।’ 32#मती 19:9; मर 10:11,12; लूका 16:18; 1 कुरि 7:10,11पण मुँ तमय हू कऊँ हूँ के, हर वी मनक जी आपड़े बयीरजी सिनाली ने अलावा कणी बिजी वात ने वजहू सुड़ी दिए हे नी वे बयीरी कणा बिजा ने हाती रे हे ते विने सिनाली करवा ने जिमेवार विने पेलको आदमी हे। जी कणु वणी सुड़जी थकण ने हाते विवा करे ते वी बी सिनाली करे हे।

होगन खावा ने बारामा हिक

33“तमो हबली सुका हो के, अमारे पुरखा हू केजू तु के, ‘जुटा होगन नकी खावान, पण परबू ने हारू आपड़े होगन पुरो करवान।’ 34#याकू 5:12; मती 23:22पण मुँ तमय हू कऊँ हूँ के, किरे बी होगन ते खाए नकी, नीते हरग ने, केमके वे परमेसवर ने बेहवा ने आसन हे। 35नीते तरती ने, केमके ये विने पोग मेलवा ने जगा हे। नीते यरूसलेम ने, केमके वु महाराजा ने नगर हे। 36नी आपड़े मुड़का ने होगन नकी खावान केमके तु एक वाल बी नीते काळो करी हके नी नीते तोळो करी हके हे। 37पण तमारे वात ‘हा ने हा,’ या ‘ना ने ना’ थाए, केमके जी कई अणा हू वदार थाए हे वु बुराई ने हाड़े हू थाए हे।

बदला ने बारामा हिक

(लूका 6:29,30)

38“पेले केजू तु नी तमो हबली सुका हो, ‘आक ने बदला मा आक नी दात ने बदला मा दात।’ 39पण मुँ तमय हू कऊँ हूँ के, कणाक बुराई करवा वाला ने हाते बुराई नकी कर। पण अगर कणुक तारे जमणा गालजा माते एक थापेट वाए ते डावो गालजो बी वणा ने हाड़े करी दे। 40अगर कणु तय माते दावो करे नी तारे जब्बो उतारवा साहे ते तु वणाय आपड़े सादरो तक आली दे। 41अगर कणुक तय जबरजसती आपड़े सामन हवाडीनी एक मील हिडाडे़ ते तु वणा हाते बे मील हिड़ी जा। 42अगर कणुक तय हू कई मागे ते वणाय वु आली दे। जी कणु तय हू उदार लिवा साहे, वणाय ना नकी के।

वेरीय हू परेम करो

(लूका 6:27,28,32–36)

43“तमो हबली सुका हो नी केजू हे के, ‘तमो आपड़े पड़ोसी हू परेम करो नी वेरी हू वेर।’ 44पण मुँ तमय हू कऊँ हूँ के, आपड़े दुसमणा हू बी परेम करो, जी तमय विताड़े हे वणने हारू परातना करो, 45ताकि तमो हरग मा रेवा वाला आपड़े बाप ने सुरअ बणी हको। केमके वी बुरा नी हाऊ हेता माते सूरज ने उजाळू समकावे हे। दरमी नी अदरमी बेजणअ माते साटा पाड़े हे। 46यू मुँ तणी कऊँ हूँ के, अगर तमो आपड़े परेम करवा वालअ हूस परेम करो हो, ते अणा मा तारे हूं फायदो हे? हूं एवू कर लिवा वाला नीं करी हे? 47अगर तु बस आपड़े पाजो नेस नमसकार करे हे, ते तु कियू मुटू काम करी रेजो हे। हूं एवू ते परमेसवर ने नीं जाणवा वाला करी हे? 48तणी तमो पुरा पाका बणो, जेवो तमारे हरग बाप पुरो पाको हे।”

Currently Selected:

मती 5: WBR

Highlight

Compare

Copy