मती 16

यहुदि नेताओ ने सलाकी

(मरकुस 8:11–13; लूका 12:54–56)

1 # मती 12:38; लूका 11:16 ईसु कनी फरीसी नी सदुकी आजा नी वणाय परकवा ने हारू पुसवा लागा के, “अमय हरग ने हेलण पाळ, ताकि अमय पतो लागे के, तय यो अदिकार परमेसवर ने हाड़े हू मलजो हे।” 2वणाय उतर आलजू, “अतमजू पड़े ते तमो को हो के, ‘मोसम हाऊ हे, केमके आकास लाल हे।’ 3दाड़ो उगे तेरे तमो को हो के, ‘आज साटा आवहीं केमके आकास रातु हे नी दुदळू हे।’ तमो आकासे जुईनी विने बेद पाळी हको हो, पण समय ने हेलण ने बेद नीं परकी हको हो। 4#मती 12:39; लूका 11:29हे अणी जुग ने बुरअ नी सिनाली करवा वालअ मनका हेलण ने माग करी हे, पण योना ने हेलण सुड़ीनी वणय बिजी फेर कई हेलण नीं आलजी जाहीं।” नी ईसु वणय सुड़ीनी जातो रेजो।

ईसु ने सेतावणी

(मरकुस 8:14–21)

5ईसु ने सेला दरियो पार करती वला रूटा लिवा पुली गिया। 6#लूका 12:1ईसुई वणहू केजू, “जुओ, फरीसीयो नी सदुकीयो ने खमीर हू सकोर रो।”

7वा एक बिजा हू केवा लागा के, “आपड़ा ते रूटा लईनी नीं आजा, तणी थाई हके के, अणाय ये वात केजी हे।”

8यू जाणीनी ईसुई वणहू केजू, “हे थुड़ोक विसवास करवा वाले, तमो एक बिजा हू हूं वाती करो हो के, अमारे पाहे रूटा नीं? 9#मती 14:17–21हूं तमो अबार बी नीं हमजता? नी पास अजार मनका ने हारू पास रूटा नी पसे तमय कतरा हुल्ला परेला थकण उटाड़जा ता? 10#मती 15:34–38नी हूं तमय हुते नीं हे सयार अजार ने हारू हात रूटा नी पसे तमय कतरा हुल्ला परीनी उटाड़जा ता? 11तमो हय नीं हमजता हो? मय तमय हू रूटा ने बारामा नीं केजू, मय तमय फरीसीयो नी सदुकीयो ने खमीर हू सकोर रेवा ने हारू केजू हे।”

12तेरे वा हमजी गिया के, रूटा नी खमीर ने बारामा नीं, पण फरीसीयो नी सदुकीयो ने हिक हू सकोर रेवा ने हारू केजू हे।

ईसुस मसी हे

(मरकुस 8:27–30; लूका 9:18–21)

13जेरे ईसु केसरिया ने फिलिपी नगर ने पाहे आजो ते वणाय आपड़े सेलो हू पुसयू के, “मनका मय मनक ने सुराय हूं कय हे के, मुँ कुण हूँ?”

14 # मती 14:1,2; मर 6:14,15; लूका 9:7,8 वणय केजू, “कणुक ते कय हे के, तु बपतिसमा आलवा वालो यूहना हे, नी बिजअ कय हे के, तु एलिया हे नी थुड़क बिजअ कय हे के, तु यिरमीया या परमेसवर ने हाड़े हू बुलवा वालय माहू कणुक एक हे।”

15ईसुई वणहू केजू, “पण तमो मय हूं को हो के, मुँ कुण हूँ?”

16 # यूह 6:68,69 समोन पतरसे उतर आलजू, “तु जीवता परमेसवर ने सुरो मसी हे।”

17उतर मा ईसुई वणा हू केजू, “हे समोन, योना ने सुरा तु दन्य हे, केमके तय माते ये वात कणाय मनकाय नीं, पण हरग मा आजर बाप परमेसवर ने परगट किदी हे। 18हे पतरस मुँ तयहू कऊँ हूँ के, तारे नाम ने मतलब पाटा ने थड़ी हे। नी मुँ अणा पाटा ने थड़ी माते मारे विसवासी मण्डली बणावी नी मोत ने तागत अणा माते असर नीं करहीं। 19#मती 18:18; यूह 20:23मुँ तय हरग ने राज ने साबी आलु हूँ, ताकि तरती माते जी कई तु बादी, वु परमेसवर ने हाड़े हू हरग मा बादजू जाहीं नी जी कई तु तरती माते सुड़ी, वु हरग मा परमेसवर ने हाड़े हू सुड़ी दिदू जाहीं।”

20तेरे पसे ईसुई आपड़े सेला सेताड़ीनी हुकम आलजो, “कणाय नकी केवान के मुँ मसी हूँ।”

ईसुई आपड़े मोत ने बारामा केजू

(मरकुस 8:31; 9:1; लूका 9:22–27)

21वणी वला ईसु आपड़े सेलाय पाळवा लागो के, “जरूरी यू हे के, मुँ यरूसलेम जऊँ, नी मुसा ने नियम हिकाड़वा वाला, यहुदि मोरकिया नी मुटायाजको ने आत हू कईक दक उटाडू नी मारी दिदो जाई। पसे तीजे दाड़े मरेलअ माहू पासो जीवी उटी।”

22तेरे पसे पतरस वणाय एकहाड़े लई जाईनी वलगीनी केजू, “हे परबू, परमेसवर नीं करे के, तय माते एवू किरे थाए।”

23पसे ईसुई पतरस हाड़े मुड़ीनी केजू, “हे सेतान, मारे वाट हू एकहाड़े थाई जा। तु मारे हारू एक ठोकर ने वजअ बणे हे। केमके तु परमेसवर ने वजूने नीं पण मनका ने वजूने हुसे हे।”

ईसु ने वाहे हिड़वा ने मतलब

24 # मती 10:38; लूका 14:27 पसे ईसुई आपड़े सेलो हू केजू, “अगर कणु मारे वाहे आवणा साहे हे ते, वी आपड़े पोता ने ना के नी आपड़े पोता ने करूस उटावीनी मारे वाहे थाई जाए। 25#मती 10:39; लूका 17:33; यूह 12:25जी कणु आपड़े जीव वसाड़वा साहे हे, वी वणाय खुई दिहीं। पण जी कणु मारे हारू आपड़े जीव खुवा साहे हे, वी वणाय वसाड़हीं। 26अगर मनक हेती दनियाए जीती लिए नी आपड़े जीवन ने नुकसान उटाड़े ते वणाय हूं फायदो? या मनक आपड़े जीवन ने पासू पावा ने बदला मा हूं कई आली हके हे? 27#मती 25:31; रोमि 2:6मुँ मनक ने सुरो हरगदुतो ने हाते आपड़े परम बाप ने मईमा ने हाते आवी, तेरे हरेक मनकय वणने कामा ने बदलो आली। 28मुँ तमय हू हासु कऊँ हूँ के, थुड़ाक एवअ हे जिया तेरे लगण नीं मरहीं जेरे लगण मय मनक ने सुराय मारे राज मा आवतो थकण नीं जुई लिई।”

Currently Selected:

मती 16: WBR

Highlight

Compare

Copy