मती 17

तीन सेलय ईसु हाते मुसा नी एलिया ने दरसण

(मरकुस 9:2–13; लूका 9:28–36)

1से दाड़ो वाहे ईसु, पतरस, याकूब नी विने पाई यूहनाय हाते लईनी हुनी जगा मा ऊसा मगरा माते गियो। 2विय वणने हामे विने रूप बदली गियो। विने मुडू सूरज हरकू समकेवा लागू नी विने लबरअ उजाळा वजूने समकवा लागअ। 3पसे एकदम मुसा नी एलिया वणा हामे परगट थाजा नी ईसु हू वाती करवा लागा।

4यू जुईनी पतरसे ईसु हू केजू, “हे परबू, आपड़े निय रेवू कईक हाऊ हे। अगर तु साहे ते मुँ निय तीन तम्बू बणावू एक तारे हारू, एक मुसा ने हारू नी एक एलिया ने हारू।”

5 # मती 3:17; 12:18; मर 1:11; लूका 3:22 # 2 पत 1:17,18 पतरस अबार वाती करीस रेजो तो नी जुओ, एक तोळा वादळाए आवीनी वणय टाकी दिदा नी वादळा माहू ये आकास वाणी थाजी के, “यो मारे लाड़ळो सुरो हे जणाहू मुँ कईक राजी हूँ। नी इनेस हबलो।”

6जेरे सेलाय यू हबलजू ते, वा बयी नी नीसे मुडू करीनी जमी माते पड़ी गिया। 7तेरे ईसु वणअ कनी गियो नी वणय अडतो थकण केजू, “बियो नकी, ऊबा थाई जो।” 8जेरे वणय आपड़े आकी खुलजी ते, वणय ईसु ने अलावा बिजू कणु नीं डिटु।

9जेरे वा मगरा माते हू उतरी रेजा ता ते ईसुई वणय यो हुकम आलजो के, “जी कई तमय डिटु हे, तेरे लगण कणाय नकी केता वो, जेरे लगण मुँ मनक ने सुरो मरीला माहू पासो जीवतो नीं थाई जऊँ।”

10पसे विने सेला वणा हू पुसयू, “मुसा ने नियम हिकाड़वा वाला हय कय हे के, एलिया ने पेले आवणू जरूरी हे?”

11उतर मा ईसुई वणअ हू केजू, “एलिया ते जरूर आवहीं नी हेतु हुदारहीं। 12#मती 11:14पण मुँ तमय हू कऊँ हूँ के, एलिया ते आवी सुको हे नी मनका वणाय नीं ओळकजो, पण वणा हाते जेम साहजू इम किदू। अणीस तरह हू मुँ मनक ने सुरो बी वणने आत हू दक उटाड़ी।”

13तेरे सेला हमज्जा के, वणाय वणा बपतिसमा आलवा वालो यूहना ने बारामा केजू हे।

बिमार सुराय होज करवू

(मरकुस 9:14–29; लूका 9:37–43a)

14जेरे ईसु पीढ़ कनी आजो ते, एक मनक वणा कनी आजो नी वणाय दणवत करीनी केजू, 15“हे परबू, मारे सुरा माते दया कर, वणाय कईक उमार आवी हे। नी वी कईक दुक उटावे हे, वी कणीक वला ते आग मा नी पाणी मा पड़ी जाए हे। 16मुँ वणाय तारे सेलो कनी लाजो, पण वा वणाय होज नीं करी हकजा।”

17उतर मा ईसुई केजू, “हे अविसवास करवा वाले मनको मुँ कतरीक वळा लगण तमारे हाते फेर रेई? किरे लगण मुँ तमारे बारामा विटतो रेई? वणा सुराय मय कनी लावो।” 18तेरे ईसुई वणी बुरी आतमा ने वलगीनी केजू नी वे वणा माहू निकली गई। नी वी सुरो तरत होज थाई गियो।

19पसे विने सेला एकला मा ईसु कनी जाईनी पुसयू, “अमअ वणी बुरी आतमाए बान्णे हय नीं काडी हकजा?”

20 # मती 21:21; मर 11:23; 1 कुरि 13:2 ईसुई वणहू केजू, “केमके तमय मा विसवास ने कमी हे। मुँ तमय हासु कऊँ हूँ, अगर तमय मा हरबा ने बीज जेवो विसवास वेतो ते तमो अणा मगरा हू केई हकता के, ‘निय हू सिटी थाई जा,’ ते वु सिटी थाई जातु। तमारे हारू मुसकिल कईस नीं थातु।” 21पण एवी बुरी आतमा वगर परातना नी एकाणा हू नीं निकली हे।

ईसुई आपड़े मोत ने बारामा केजू

(मरकुस 9:30–32; लूका 9:43–45)

22जेरे वा गलील मा ता ते ईसुई वणहू केजू, “मुँ मनक ने सुरो मनका ने आते हवाड़जो जाई, 23नी वा मय मारी दड़हीं, नी मुँ तीन दाड़ा वाहे पासो जीवतो थाई जाई।”

अणा माते ईसु ने सेला कईक दकी थाजा।

कर ने परवू

24जेरे ईसु नी विने सेला कफरनहूम आजा, ते मनदिर ने कर लिवा वाला पतरस कनी आजा नी केजू, “हूं तमारे गरू मनदिर ने कर आले हे या नीं?”

25पतरसे उतर आलजू, “हा, वी आले हे।”

नी जेरे वी घेर मा आजो ते पतरस ने पुसवा हू पेलेस ईसुई केजू, “हे समोन, तारे हूं विसार हे? तरती ने राजा कणाहू वराड लिई नी आली हे? हूं पोते आपड़े सुरअ हू या बिजअ हू?”

26पतरसे उतर आलजू, “बिजअ हू।”

तेरे ईसुई वणहू केजू, “ते सुरअ कर आलवा हू वसी गिय। 27पण अमय वणे मनकय खिजावणअ नीं हे। तणी दरिया ने हिड़े जा नी आपड़े तातुओ दड़अ नी पसे जिए पेलकी मातली हावा मा आवे, विने मुडू खुलवा हू तय एक सिक्को मलहीं। वणाय लईनी मारे नी तारे बदला मा वणय आली दे।”

Currently Selected:

मती 17: WBR

Highlight

Compare

Copy