मती 15

पुरखा ने रीति नी परमेसवर ने हुकम

(मरकुस 7:1–13)

1पसे थुड़ाक फरीसी नी मुसा ने नियम हिकाड़वा वाला यरूसलेम हू ईसु कनी आजा नी वणा हू पुसयू, 2“तारे सेला अमारे पुरखा ने रीति ने पाळण हय नीं करे? वा खावा खावा हू पेले आपड़े आत हय नीं तुई?”

3ईसुई उतर आलजू, “तमो बी आपड़े रीति ने वजहू परमेसवर ने हुकम हय तुड़ो हो? 4केमके परमेसवर केजू तु के, ‘तु आपड़े आई बाप ने कदर कर’ नी ‘जी कणु आपड़े आई या बाप ने बुरू के हे, वी मारी दड़वो जुजे।’ 5पण तमो मनकय हिकाड़ो हो के, अगर तमारे आई बाप तमय हू मदत मागे ते केवान के, ‘मुँ मारे हेतु परमेसवर हुपी सुको हूँ, तणी मुँ तमारे मदत नीं करी हकू।’ 6अणी तरह हू वणाय आपड़े आई बाप ने कदर करवा ने जरूरत नीं हे। एवू करीनी तमो आपड़े रीति ने वजहू परमेसवर ने वसन टाली दियो हो। 7हे कपटीयो, परमेसवर ने हाड़े हू बुलवा वालाय यसायाय तमारे हारू असल केजू हे के,

8“ ‘य मनका मुडे़ हू मारे कदर करी हे,

पण अणनु मन मय हू हर वला सिटी रे हे।

9नी मय हारू अणने आरादना बेकार हे,

केमके य मनका ने आग्याये ने दरम ने हिक करीनी हिकाड़े हे।’ ”

जीवन खराप करवा वाली वाती

(मरकुस 7:14–23)

10ईसुई पीढ़ आपड़े कनी हादिनी वणहू केजू, “हबलो नी हमजो। 11मनक ने मन मा जी कई जाए हे वु वणाय असुद नीं करे, पण विने मुड़े हू निकलवा वालू सबद वणाय असुद करे हे।”

12तेरे ईसु ने सेला वणा कनी आवीनी केजू, “हूं तु जाणे हे के, तारे वाती फरीसीय कईक बुरी मानजी हे?”

13ईसुई उतर आलजू, “हरेक वु रूकडू जियू हरग मा आजर बाप ने हाड़े हू नीं लगाड़जू हे, उपाड़ी दिदू जाहीं। 14#लूका 6:39वणय जावा दिओ, वा ते आदलो ने आदला नेता हे नी अगर आदलो आदलाय वाट पाळे, ते वा बेजणा खाड़ा मा पड़हीं।”

15तेरे पतरसे वणा हू केजू, “अमय अपवितर करवा वाली काणी ने मतलब हमजाव।”

16ईसुई केजू, “हूं तमो अबार लगण बी नीं हमजता? 17हूं तमो नीं जाणता हो? जी कई किनेक मुडा मा जाए हे, वु विने उजरा मा जाए हे नी उजरा मा हू निकली जाए हे। 18#मती 12:34पण जी मनक ने मुड़े हू बान्णे आवे हे वु विने मन मा हू निकले हे। यूस वणाय असुद करे हे। 19केमके जी बुरा विसार, मारवू, सिनाली, बुरो वेवार, सुरी, जुटू नी परमेसवर ने बुराई करवू मन मा हूस आवे हे। 20युस हे जी मनकाय असुद करे हे, पण आत तुजा वगर खावा खावू मनकाय असुद नीं करे हे।”

गेर यहुदि बयीरी ने विसवास

(मरकुस 7:24–30)

21ईसु वे जगा सुड़ीनी सूर नी सेदा ने परदेस ने हाड़े जातो रेजो। 22वणा देस हू एक कनानी जाति ने बयीरी आजी नी डाडी करीनी केवा लागी, “हे परबू, दाऊद ने सन्तान, मय माते दया कर। बुरी आतमा मारे सुरजी विताड़े हे।”

23ईसुई वणी हू एक सबद बी नीं केजू, तणी विने सेला वणा कनी आजा नी विनती करवा लागा, “अणजी जावा ने के, केमके वे आपड़य वाहे डाडी करती थकण आवे हे।”

24ईसुई उतर आलजू, “मुँ बस इज़रायेल ने मनका ने खुवाणी थकण गायरअ ने अलावा कणी बिजअ ने हारू नीं मुकलजो हूँ।”

25तेरे पसे वणी बयीरजी ईसु ने हामे नमीनी विनती किदी, “हे परबू, मारे मदत कर।”

26उतर मा ईसुई केजू, “सुरअ ने खावा लईनी कुतरअ ने मोरी दड़वू सई नीं हे।”

27वे के हे, “यू हासु हे परबू, पण कुतरअ बी वु सुरसार थुडुक ते खाई लिई हे जी मालिक ने टेबल माते हू पड़े।”

28अणी वात माते ईसुई वणी हू केजू, “हे बयीरी तारे विसवास मुटो हे, जेवू तु साहे हे तय हारू एवूस थाए।” नी वणीनी सुरी तणीस वला होज थाई गई।

ईसुई कईक बिमार मनका होज किदअ

29पसे ईसु विय हू गलील दरिया ने कनी आजो। नी वी विय एक मगरा माते सड़ीनी बेहीं गियो। 30नी मुटी पीढ़ लुला-लगड़ा, आन्दा, बुबड़ा, नी कईक बिमारी हू बिमार वणा कनी लईनी आजअ नी पोगअ कनी मेलजअ। नी ईसुई व हेता बिमारी हू होज किदअ। 31जेरे मनकय यू जुजू के, बुबड़ा बुले हे, लुला होज किदा जय हे नी लगड़ा हिड़ी हे नी आन्दा जुई हे ते सकित थाईनी इज़रायेल ने परमेसवर ने मईमा किदी।

सयार अजार मनकय खावा खवाड़वू

(मरकुस 8:1–10)

32तेरे ईसुई आपड़े सेला कनी हादिनी केजू, “मय अणी पीढ़ माते तरस आवे हे केमके य मनका तीन दाड़ा हू दाडू अमारे हाते हे नी अणअ कनी कई खावानु नीं हे। मुँ अणय पुकजा मुकलवा नीं साहतो हूँ केमके थाई हके हे के, व कियेक वाट मास सक्कर खाईनी पड़ी जय।”

33तेरे पसे ईसु ने सेला केवा लागा, “अतरा रूटा अणी हुनी जगा मा अणी पीढ़ ने हारू अमअ किय हू लावअ?”

34तेरे ईसुई वणहू पुसयू, “तमारे कनी कतरा रूटा हे?”

वणय केजू, “हात रूटा नी थुड़ीक नानी मातली हे।”

35ईसुई पीढ़े जमी माते बेवा ने हुकम आलजो। 36नी रूटा नी मातली लईनी वणाय परमेसवर ने दन्यवाद करीनी तुड़जा नी आपड़े सेलोय आलतो गियो नी सेला मनकय आलता गिया। 37मनकअ तीय लगण खातअ रेजअ जेरे लगण तराई नीं गिय। पसे विने सेलय वसीला थकण बटकअ हू हात हुल्ला परजा। 38नी खावा वालअ बयीरी नी सुरअ सुड़ीनी विय सयार अजार आदमी ता।

39पसे ईसु पीढ़ ने मुकलीनी नाव मा सड़ी गियो, नी मगदन परदेस मा आजो।

Currently Selected:

मती 15: WBR

Highlight

Compare

Copy