Romans 14
14
Kau see faka tautara ki tou taina
1 #
Col 2.16. Faka afea ko faoa si see makeke faka laoi i ratou fakatonu, ka see faka maraua taranga ki aratou atamai. 2Te paanaki a te tangata sokotasi e laoi kia koia ke kai pe nia, kae te tangata si see makeke faka laoi tana paanaki, koia e kai fuarei koa fua ma rau raakau. 3Te tangata koia e kai pe nia, ka see fai atu ki te tangata si see fai iei, ma te tangata koia e kai koa fua ma rau raakau fuarei, ka see faka tautara atu kia koia e kai koa nea kaatoa, faina Tupua e nai fifia kina koia. 4Koai ko kee ke faka tautara sia ko te seka a take tangata? Ko ratou kee ariki, koia ka fai iei o maanatu e laoi pe siei. Ma koratou ka laoi faina te Ariki ka nai faia koratou ke laoi.
5Rake taangata ratou fai maanatu ki te aso sokotasi e sapa atu ma rake aso, kae rake taangata e maanatu nga aso katoa si see kese kese. Kotatou taki tasi ke faka makeke tatou kee atamai ia. 6Pe koai ma e maanatu faka mafa ki te aso sokotasi, tera e faka napa ki te Ariki. Pe koai ma e kai koa nea kaatoa, e faka napa ki te Ariki, faina koratou e faka ue ue ki Tupua kia kai. Pe koai ma si see kai ia rake kai, tera e faka napa ki te Ariki ma koratou e faka ue ue ki Tupua. 7Maina siei se tangata ia tatou ke ora kia koia maso koia fuarei, siei se tangata ia tatou ke mate kia koia maso koia fuarei. 8Kae kotatou e ora, tatou e ora ki te Ariki, ma kotatou e mmate, tatou e mmate ki te Ariki, tera kotatou e ora pe e mate, tatou o te Ariki. 9Maina ko Christ ne mate, ma ne masike ki te ora, ke faia te Ariki o te ora ma te mate. 10#2 Cor 5.10.Ko kee ia e kai ia fua ma rau raakau fuarei, ea rei ko kee e kee faka tautara siaina rake faoa? Ma ko kee e kai ia nea katoa, sea rei ko kee e kee faka pariki tia ko rake taina? Kotatou katoa ka turaki ia mata o Tupua ki tana faka tautara. 11Faina te Pepa Tapu e muna,
“Kuou te Tupua ora e muna,
fenua katoa ka tokoturi i oku mua,
ma fenua katoa ka tara kia kuou te Tupua.”
12Tera kotatou katoa ka tasi araara faki ko tatou kovi kovi ranga ki Tupua.
Kau see fai rake taina ke tooara
13Kae tera, tuku ka see tatou faka tautara sia ko rake taina, kae tonu ia, fai tou atamai ka see fai ou taina ke tooara pe ke too ki te sara. 14Maina kuou e faka piki ki te Ariki Jesus, tera kuou ku kau iroa ina rei siei ko ni kai e kere kere, kae pe te tangata e fakatonu kia nea e kere kere, tera ku kere kere kia koia. 15Kae ko kee e kanifini ki tou taina faina i au kai e kai, tera ko kee ku see fai o fakapere kiei. Kau see tuku koa kai e kai ea kee ke nai fai pariki tia ko te tangata ko Christ ne faka mate kiei! 16Kau see tuku pe nia e fai ea kee e laoi ke taranga pariki tia. 17Maina te Kainanga o Tupua si see fai kia kai ranga ma inu manga, kae kia tonu tuu, roto mafora, ma te mata mau e soria ina e te Mauri Tapu o Tupua. 18Pe koai e nai fai fekauaki ko Christ ia riu ara nei, e fifia kina e Tupua, ma e faka tonu sia e nga taangata.
19Kae tera, kotatou ke fai mau koa nea e nai aumai ina ko te roto mafora, ma e nai faka makeke riaina katoa rei. 20Kau see fai pariki koa fainga fekau a Tupua, faina ia faasi oa kai. A kai katoa e maa, kae e sara kia tangata ke kai pe nia e nai faia take tangata ke tooara. 21E laoi rei ka see kai koa manu pe ke inu koa waeni, pe ke fai pe nia e nai faia ko take taina ke tooara iei.
22Tera pe nia ma au e fakatonu kia nea nei, tuku tou vasia i roto ma Tupua. Fakatapu ria koratou si see faka tuka tuka kia nea e nai fakatonu sia e laoi. 23Kae pe koratou e faka tuka tuka i ratou vasia e kkai iei e too pariki tia, faina koratou e seke paanaki i na vasia e kkai iei. Ma a nea kaatoa si see tautari ki te fakatonu te sara.
© 2025 Wycliffe Bible Translators, Inc.