Romans 15
15
Saka ki rake faoa, siki kia kee fuarei
1Kotatou koai ma e makeke i te fakatonu, e fetau fangatasi ke sosoa kia ratou e losi, ke amo ko aratou amonga. Kotatou ka see saka fuarei kia tatou ia. 2Kae tonu ia ke tatou saka ki nga taina o te kano rotu ki ni laoi mo ratou, tera ke faka makeke ko ratou fakatonu ki runga. 3Maina ko Christ si se ne saka kia koia fuarei, pe te Pepa Tapu e nai munakina,
“Koa taranga pariki oratou ne fai atu kia kotou,
ne fai mai kia kuou.”
4Koa nea kaatoa ne tusi riaina i te Pepa Tapu, ne tusi riaina ke fakaako kotatou, tera kotatou ke paanaki soro i te faka toka maarie ma te faka poto poto anga e sori mai te Pepa Tapu kia tatou.
5Ki te Tupua, te fakkau o te faka toka maarie ma te faka poto poto anga, ka nai taanakina kotou kia atamai sokotasi ia kotou kaatoa, ia tautari anga kia Jesus Christ. 6Tera kotou kaatoa rei ke rausapai ki te reo sokotasi te Tupua ma te Mmana o tatou Ariki Jesus Christ.
Te Rongo Laoi ki nga Gentile
7Tera fe ono taki ki roto mo te faka taurekareka o Tupua, pea Christ ne nai fifia kina kotou. 8Maina kuou e faka ari atu kia kotou, ko Christ ku au te seka ki nga Jew, ke nai faka maori ria te Tupua koia te tonu maori, ke faka tonusia maori rei ko te tongi anga ne faia ki aratou puna. 9Tera ko nga Gentile ke rausapai ki Tupua ki na manava arofa, pe te Pepa Tapu e nai munakina,
“Tera kuou ka rausapai ko kee i nga Gentile,
kuou ka pese fakapuu ki tou ingoa.”
10Tera e munakina fokia,
“Mata mau nga Gentile ma te kano fenua o Tupua!”
11Fokia e munakina,
“Rausapai te Ariki, kotou nga Gentile kaatoa.
Rausapai koia, kotou kaatoa te kano fenua.”
12Tera fokia ko Isaiah e nai munakina,
“Ko te afu o Jesse ka au,
koia ka faka saa ake ke taki ko nga Gentile,
ma koratou kaatoa ka tuku ratou paanaki soro kia koia.”
13Ko Tupua te fakkau o te paanaki soro, ke nai faia kotou ke maatea te mata mau ma te roto mafora i otou tuku soro anga kiei, tera tou paanaki soro ke somo arei i te makeke o te Mauri Tapu o Tupua.
Te atamai a Paul ne tusi faka makeke
14Oku taina ma ee, kuou ku fakarongo ake rei kotou ku maatea rei na laoi, kotou ku roto afe afe kaatoa rei, ma ku ma fai ke fakaako taki tasi ki roto. 15Kae i te leta nei, kuou ku poto poto laoi ia rake fai ngangea ku kau faka maanatua ria atu kia kotou. Kuou ku poto poto laoi rei faina i te laoi o Tupua ku nai soria ina mai kia kuou 16ke faia te seka a Jesus Christ ke fai fekau ki nga Gentile. Kuou e fai fekauaki pe te pure fai kava ia tuufaki ranga o te Rongo Laoi mai Tupua, tera ko nga Gentile ke ma kavaakina ma ke fifia kina ki Tupua, ku fakatapu riaina e te Mauri Tapu o Tupua. 17Ia faka piki anga ma Jesus Christ, tera kuou e fiapaasaki ia aku fainga fekau ma Tupua. 18Kuou ka faka poto ma e muna fuarei pe nia ma Christ ku nai faia ia kuou ke taki ko nga Gentile ke tautari ki Tupua. Koia ku nai faia rei i aku taranga ma aku fainga fekau, 19i te makeke oa furisanga ma a ngangea faka mate tino, ma i te makeke o te Mauri Tapu o Tupua. Kae tera, i aku forau anga faka tonu ki Illyricum mai Jerusalem, kuou ku kau araara fakina ko te Rongo Laoi o Christ. 20Taku atamai i nga vasia ku fai ke kau araara fakina te Rongo Laoi i nga noforanga sisiki fakarongo kia Christ, tera kuou ka see faka tuu i arunga te fakamau ranga ne faka tuu e take tangata. 21Pe te Pepa Tapu e nai munakina,
“Koratou siki faka aria kiei,
ka ono,
ma koratou siki fakarongo,
ka ratou iroa ina.”
Te atamai a Paul ke faka ati ki Rome
22 #
Rom 1.13. Kia atamai nei, kuou ku faka tuei i nga vasia katoa ke kau au kia kotou. 23Kae i vasia nei, kuou ku faka oti ko aku fainga fekau ia motu ngangea nei. Maina kuou ku roa rei ma taku fifia i nga tau kaatoa ke kau au ke ono kia kotou, 24kuou e maanatu ke fai i vasia nei. Kuou e fifia rei ke ono kia kotou i toku vasia e poi ki Spain, ma ke kotou sosoa mai ke kau poi kiei, ia tua kotatou ku fekitei i mo vasia molakea. 25#1 Cor 16.1–4.Vasia nei kuou e poi ki Jerusalem ia fainga fekau o te kano fenua o Tupua i kuraa. 26Mai a kano rotu i Macedonia ma i Achaia ku sori aratou sosoa mai ki te kano fenua faka arofa o Tupua i Jerusalem. 27#1 Cor 9.11.Koratou ia ku fifia ke fai iei. Kae ia atamai rei, koratou ku faia rei ke sosoa ki te faka ruru faka arofa nei. Faina ko nga Jew ne vaevae i aratou fakatapu anga mai Tupua, tera nga Gentile e fetau fangatasi ke sosoa ki nga Jew ma ratou fakatapu anga ia kope kopenga. 28Vasia ku kau fakaotia ko te fainga fekau nei, ma ku sori fakaoti koa fatu ne tufi mai, kuou ka poi rei ki Spain, ka ono kia kotou i toku vasia e poi kiei. 29Vasia kuou ka au kia kotou, kuou ku kau iroa rei, kuou ka au ma te fakatapu anga kaatoa rei o Christ.
30Taina ma ee, kuou e kaisi atu kia kotou i tatou Ariki Jesus Christ, ma i te fakapere e sori rei ko te Mauri Tapu o Tupua: Soko mai ki taku rotu mau ki Tupua kia kuou. 31Rotu kia kuou ke faka saofia mai te kano fenua seke fakatonu i Judea, ma taku fainga fekau i Jerusalem ka fifia kina ria e te kano fenua o Tupua i kuraa. 32Ma tera kuou ka au kia kotou ma te mata mau maatea, kae i te fifia o Tupua, kuou ka maatea toku vaki vaki laoi vasia kuou ka faka ati atu kia kotou. 33Ko Tupua te fakkau o te roto mafora ke nofo ia kotou kaatoa. E tonu!
© 2025 Wycliffe Bible Translators, Inc.