Luke 9
9
Jesus e kkau ko na kau fanonga e tino angafuru ma rua
(Mat 10.5–15; Mak 6.7–13)
1Ko Jesus ne karanga ki na kau fanonga ke oomai ki roto, sori rei kia ratou ko te makeke ma te manuu ke fue kese ko nga atua pariki ma ke faka maroro ko te ngae ngae. 2Tera kau rei koratou ea koia ke oro o tuufaki ko te Kainanga o Tupua, ma ke faka maroro ko te ngae ngae, 3ia tua koia ne muna atu kia ratou, “Kau see sau pe nia i otou vasia e oro iei: siei se raakau toko toko, siei se tanga, siei ni kai, siei ni mane, siei fokia se suru fakatausara. 4I otou vasia e faka afea iei, fare i paito oko rei ki totou vasia ka oro kese i te noforanga. 5#Act 13.51.#Luk 10.4–11.I ngangea te kano fenua see ratou faka afe riaina kotou iei, tiakina ko taoni, titi rei ko te efu efu i otou vae ke fai pe te faka iro kia ratou.”
6Tera te kau fanonga ne oro saere ia noforanga kaatoa o tuufaki ko te Rongo Laoi ma e faka maroro ko te kano fenua ia ngangea kaatoa.
Ko Herod e fepoikaki
(Mat 14.1–12; Mak 6.14–29)
7 #
Mat 16.14; Mak 8.28; Luk 9.19. Ko Herod te fakarongo anga o Galilee, ne rongo kia nea kaatoa ku faka sasa ria. Koia ku fepoikaki vare maatea rei ko na atamai, natafito rake faoa e mmuna ko John te Faka uku ku foki mai ki te ora! 8Rake faoa e mmuna ko Elijah ku faka saa kia taangata nei, kae rake faoa e koi mmuna rei se nea i nga ʻprophetʼ i mua ku foki mai ki te ora. 9Herod ne muna, “Te ua o John ne kau sepea kese ki tua. Kae koai rei nei ko te tangata kuou e rongo kiei nei aa?” Kae koia koi faara rei ke ono mata kia Jesus.
Jesus e faangai koa afe e rima
(Mat 14.13–21; Mak 6.30–44; Jon 6.1–14)
10A kau fai fekau ne foki mai o faka ari kia Jesus aratou nea kaatoa ne fai. Tera sau ea koia koratou oro arei maso koratou ki te taoni e ati ko Bethsaida. 11Vasia o te kano fenua ne rongo kiei, tautari arei koratou kiei. Faka afe rei ea koia koratou, kae araara faki ko te Kainanga o Tupua kia ratou, ma ne nai faka maroro ria koratou e ngae ngae.
12Vasia ku maru afi afi iei, na kau fanonga e tino angafuru ma rua ne oomai kiei, o muna atu, “Fakkau te kano fenua ke oro kia noforanga ma kia paito e piri mai, ke faara ni kai ma ratou, ma ni ngangea mee, natafito ngangea nei siei rei pe nia iei.”
13Kae ko Jesus ne muna atu kia ratou, “Kotou maso kotou sori pe nia ma ratou ke kai.”
Tongoi atu rei koratou, “A matou e fai a foi preti e rima, ma foi ika e rua fuarei. Ea ko kee e fifia mai kia matou, ke oro o tauvi mai ko ni mo kai ma te kano fenua nei?” 14(E rima koa afe o nga taangata.) Kae ko Jesus ne muna atu ki na kau fanonga, “Vae ko te kano fenua ke fare ki raro ia ratou kau noforanga ke taki tino rima.”
15Ia tua te kau fanonga ne fai tautari, ma koratou ne fare kaatoa rei ki raro. 16Tera ko Jesus ne sau koa foi preti e rima ma foi ika e rua, ono ki te vaerangi, faka ue ue ki Tupua kia mo kai, tofi tofi ea koia, sori rei ki na kau fanonga ke vae ki te kano fenua. 17Tera koratou kaatoa ne kkai maakona rei, tera na kau fanonga ne fao koa kete e fuanga furu ma rua ia kai ne tee i te kano fenua.
Peter e nai faka aria ko Jesus
(Mat 16.13–19; Mak 8.27–29)
18Take aso, vasia o Jesus e rotu maso koia, na kau fanonga ne oomai kia koia. Koia ne fesiri atu kia koratou, “Te kano fenua e mmuna kuou rei koai?”
19 #
Mat 14.1,2; Mak 6.14,15; Luk 9.7,8. Tongoi atu rei koratou, “Rake faoa e mmuna, ko kee ko John te Faka uku. Rake faoa e mmuna ko kee ko Elijah, kae rake faoa e mmuna ko kee te ʻprophetʼ oa vasia i mua ku foki mai ki te ora.”
20 #
Jon 6.68,69. Kae fesiri rei koia kia ratou, “Kotou rei ia, e mmuna kuou koai?”
Peter tongoia atu rei, “Ko kee ko te Ariki Fakaroro mai Tupua.”
Jesus e nai munakina ko na fakarongo neaisu ma na mate
(Mat 16.20–28; Mak 8.30—9.1)
21Tera ko Jesus ne muna atu faka makeke rei kia ratou ka see mmuna pe kiai koia te Ariki ne faka iro mai. 22Ma koia ne muna atu fokia, “Te Tama a Tangata ke fakarongo neaisu sapa, ma ka kivimata ria e nga matapure, ma nga ariki fai kava, ma nga fakaako oa Fono. Koia ka tukuna ria ki te mate, kae i na aso toru ka faka masike ria ki te ora.”
23 #
Mat 10.38; Luk 14.27. Ma koia ne muna atu kia koratou kaatoa, “Kae pe koai e fifia ke tautari mai kia kuou, koia ke tuku raro maso koia, kae amo ko na raakau tapu i nga aso katoa, tera tautari mai raa kia kuou. 24#Mat 10.39; Luk 17.33; Jon 12.25.Natafito pe koai ma e fifia ke faka sao ko aratou kee ora ia, ka faka lekutia. Kae pe koai ma e faka leku mai ko ratou ora natafito ia kuou, ka faka saofia. 25Ea, ni faoa ke ratou saua ria pe nia pe tuu ko te maaroo oa taangata katoa nei ia ratou, kae faka leku tia riaina ko aratou ora? Siki siei arei! 26Kae pe koai e faka maa ia kuou ma ki aku fakaako ranga, tera te Tama a Tangata ka faka maa fokia ia koia, i vasia koia ka au i na maarama taurekareka, ma te maarama taurekareka o na Mmana ma nga ʻangelʼ tapu. 27Kuou e faka ari atu kia kotou te maori: Rake taangata i kunei ka si see mate oko rei koratou ku ono mata ki te Kainanga o Tupua.”
Te faka ata ata anga o Jesus ki na rau ariki
(Mat 17.1–8; Mak 9.2–8)
28Matea a foi aso ku varu ku sara ia tua koia ne nai munakina koa nea nei, Jesus ne kave ea koia ko Peter, John ma James ke ratou oro ki fongo maunga o rotu iei. 29I na vasia koia e rotu iei, ana mata ne taafuri ma na suru ku maa ila rei. 30I mo vakanga a taangata e toka rua ku turaki koratou: ko Moses ma Elijah, 31ku rau faka saa ria ko taurekareka anga o te vaerangi, ma e tau araara kia Jesus ki tana fai ka see roa ake kae faka oko ko te fifia o Tupua iei, ke mate i Jerusalem. 32Peter ma ana kau soavaka ku rotonga mee mate rei, kae ratou ne ara ake, ono arei ki te maarama taurekareka o Jesus ma a taangata e toka rua ku turaki koratou. 33I vasia oa taangata ne oro kese ma Jesus iei, Peter ne muna atu kiei, “Toku Ariki ee, e maatea rei na laoi kotatou i kunei. Komatou ka faka tuu koa viki fare ke toru: Take fare mo ou, take fare mo Moses, ma take fare mo Elijah.” Koia si se nai iroa ina pe nia ma ana e muna kiei.
34Mo vasia koia e koi muna iei, te kauao ne faka saa na maru ne nai ufia riaina koratou, ma na kau fanonga ku maattaku i vasia o te kauao ne nai ufia ria koratou iei. 35#Mat 3.17; 12.18; Mak 1.11; Luk 3.22; 2 Pet 1.17,18.Te reo ne karanga ifo mai te kauao, “Teinei taku Tama fangasere, koia a aku ne faka patino, fakarongo kiei!”
36Vasia te reo ku faka oti na muna iei, koratou ne ono ko Jesus fuarei e tuu. Te kau fanonga ne faka turi arei maso koratou se ne araara pe kiai pe nia ma ratou ne ono kiei.
Jesus e faka maroro te tama tangata e nofo ria e te atua
(Mat 17.14–18; Mak 9.14–27)
37Take aso ko Jesus ma na kau fanonga ne oa ifo mai fongo maunga, fekitei akina rei te kano fenua tokkapi. 38Te tangata ne forua ake mai te kano fenua, “Te Fakaako ee! Sea rei, kuou e kaisi atu kia kee, ono mai ki taku tama, natafito koia taku fua tasi fuarei. 39Te atua pariki e nai featu ria koia ma te forua i mo vakanga, faka tekaia ria ki raro, tera kae fena ifo te pepeau mai na muangutu. Si see poi kese rei ma koia, e fai ke nai tamatea riaina koia. 40Kuou ne muna atu ki tou kau fanonga ke sau kese ea ratou, kae se ne ratou faia.”
41Tongoi atu rei ko Jesus, “Kotou te kano fenua e seke fakatonu ma e sara! Ka roa faka fefea ke kau nofo ma kotou? Ka roa faka fefea ke kau tuku atu kia kotou?” Tera muna atu rei koia ki te tangata, “Aumai tau tama naa ki kunei.”
42Vasia te tama tangata e au iei, te atua pariki ne nai turekina ki raro, pore arei. Jesus ne nai fueina ria ko te atua pariki, faka maroro ea koia, sau kesea mai te tama tangata, o fokisaki ea koia ki na mmana. 43Te kano fenua kaatoa ku mmate ko aratou tino ki te manuu sapa o Tupua.
Jesus e araara faki foki ko na mate
(Mat 17.22–23; Mak 9.30–32)
Te kano fenua e koi fea vare ko aratou tino kia nea katoa a Jesus ne fai i na vasia koia e muna ki na kau fanonga, 44“Kau see faka ngaro pe nia ma aku ka faka ari atu kia kotou. Te Tama a Tangata ka sori ki te makeke o nga taangata.” 45Kae ko te kau fanonga si see ratou iroa ina pe te atamai ki sea. Ne funa ria mai ia ratou, tera ka see atetea kia koratou, ma koratou ku maattaku ke feesiri atu kiei kia ngangea.
Koai e maurunga sapa rei?
(Mat 18.1–5; Mak 9.33–37)
46 #
Luk 22.24. Te kau fanonga ne faka marauraua taranga maso koratou pe koai e maurunga sapa ia ratou. 47Jesus ku nai iroa ina pe nia ma ratou e maanatu kiei, tera koia ne sau ko te tama riki riki, faka tuu ia ratou mua i na faasi. 48#Mat 10.40; Luk 10.16; Jon 13.20.Kae muna atu rei kia ratou, “Pe koai ma e nai faka afea ko tama riki riki nei i toku ingoa, e nai faka afea fokia kuou. Kae pe koai e nai faka afea kuou, e nai faka afea fokia koia ne nai kauna mai kuou. Natafito pe koai ma e faka muri muri ia kotou kaatoa naa, tera koia te matuaa tangata.”
Pe koai si see toka tokai atu kia kotou, koia totou foi faoa
(Mak 9.38–40)
49John ne karanga ake, “Te Ariki ee, komatou ne ono ki te tangata e fue kese ko nga atua pariki i tou ingoa, muna atu rei komatou kiei ka see fai, natafito koia siei tatou faoa.”
50Tera muna atu rei ko Jesus kia ratou, “Kau see fai o pii atu kiei, natafito pe koai si see toka tokai atu kia kotou, tera totou foi faoa.”
Te noforanga o nga Samaria si see fifia kia Jesus
51Ku piri ki te vasia o Jesus ka saua ki te vaerangi, kae maanatu ake rei koia, tera koia ke poi ki Jerusalem. 52Koia ne kau ana kave rongo ke mua koratou ki te noforanga o nga Samaria, o pena pena mai a nea katoa kiei. 53Kae te kano fenua o te noforanga se ne ratou faka afea ria koia, natafito koia e atetea e poi rei ki Jerusalem. 54Vasia te kau fanonga, James ma John, ne ono faka peinei, raua ne muna atu, “Te Ariki ee, ea, ko kee e fifia komaua ke karanga ki te afi mai te vaerangi ke fai pariki koratou?”
55Tafuri ake ko Jesus, pii atu arei kia raua. 56Tera oro arei koratou ki take noforanga.
Te faingataa anga ke tautari kia Jesus
(Mat 8.19–22)
57I vasia koratou e saere iei, te tangata ne muna atu kiei, “Kuou ka tautari atu kia kee ia ngangea kaatoa ka poi ko kee kiei.”
58Muna atu rei ko Jesus kia koia, “Nga manu tauvao e fai ko aratou ngangea mee, ma nga manu e fai ko aratou fare faanganga, kae te Tama a Tangata siei ni mo ngangea mee mo ona ke maanava kiei.”
59Koia ne muna atu ki take tangata, “Tautari mai kia kuou.”
Kae tangata ne muna atu, “Maurunga ee, tuku mai mua ke kau poi, o tanu toku mmana.”
60Tongoi atu rei ko Jesus kiei, “Tuku ko te mate ke tanu ko te mate, kae poi tonu ko kee, o rongo rongo saki ko te Kainanga o Tupua.”
61Take tangata ne muna atu, “Kuou ka tautari atu kia kee, toku Ariki ee, kae tuku mai mua ke kau poi, o mavae ki oku kanoa paito.”
62Tongoi atu rei ko Jesus kiei, “Pe koai e tafito o ranga, kae pula rei ki ana tua, si see fetau fangatasi ki te Kainanga o Tupua.”
Currently Selected:
Luke 9: TKP
Highlight
Copy
Compare
Share
Want to have your highlights saved across all your devices? Sign up or sign in
© 2025 Wycliffe Bible Translators, Inc.
