Luke 10

Jesus e fakkau te tino fitu ma rua

1Ia tua nei, te Ariki ne faka patino te tino fitu ma rua o nga taangata, ke oro e toko toko rua ke mmua kia taoni ma nga noforanga katoa koia e fai ke poi kiei. 2#Mat 9.37,38.Muna atu rei koia kia ratou, “Te tofi ku matua maatea rei, kae see tokarava ko na faoa mo ona ke fai fekauaki. Rotu ki te tangata ona o te tofi koia ke kau ko ana fai fekau ke oro ki na tofi o fai fekauaki. 3#Mat 10.16.Oro! Kuou e fakkau atu kotou pe nga punai sipi sipi ke oro ki tauranga nga korii tauvao. 4Kau see sau se tanga fao fatu, se tanga, o pe ni rafi vae. Kau see faka afe pe koai i te riu ara. 5Vasia ko kotou e fe urufi oro ki rota paito, muna rei mua, ‘Te roto mafora ke naa i te paito nei.’ 6Kae te tangata o te roto fakapere e nofo iei, tuku arei tou roto mafora ke naa kiei; kae siei rei, fokisaki tou roto mafora. 7#1 Cor 9.14; 1 Tim 5.18.Fare arei i te paito sokotasi, kakai ma e inu pe nia ma ratou e sori atu kia kotou, natafito a taangata fai fekau e laoi rei ke soria kiei ko aratou tauvi. Kau see oro saere ki take paito ma ki take paito. 8Vasia kotou e oro kia taoni e faka afea ria kotou, kai pe nia e sori atu kia kotou. 9Faka maroro ko te fenua ngae ngae o taoni naa, kae muna atu ki te kano fenua o ngangea, ‘Te Kainanga o Tupua ku piri mai kia kotou.’ 10#Act 13.51.Kae vasia kotou e oro ki te taoni si see faka afea ria kotou, oro ki tua ki roto noforanga, o mmuna, 11#Mat 10.7–14; Mak 6.8–11; Luk 9.3–5.‘Te efu efu o totou noforanga e piki fokia ia matou rafi vae nei, ka titi ki tua ke fai pe te faka pariki kia kotou. Kae faka maanatu kia nea nei: Te Kainanga o Tupua ku piri mai kia kotou!’ 12#Mat 10.15; 11.24.Kuou e faka ari atu kia kotou te maori: I te aso o Tupua ka faka tautara iei, ka arofa maatea ki Sodom kae siei rei te taoni nei!

A taoni e seke fakatonu

(Mat 11.20–24)

13“E fakaruru faka arofa maatea rei kia kotou, Chorazin! E fakaruru faka arofa maatea rei kia kotou fokia, Bethsaida! A furi furi sanga ne fai atu kia kotou, pe ne fai i Tyre ma Sidon, te kano fenua i kuraa kua roa rei ma ratou fare ki raro o fe urufi ki aratou fati suru masaesae, ma e male e faka refu refu ko aratou tino ke faka ari koratou ku taafuri kese mai ia ratou sara! 14Tupua ka maatea ko na arofa ka faka ari i te aso o faka tautara ki nga Tyre ma Sidon, kae siei rei ki kotou. 15Kae kia kotou, nga Capernaum! Kotou ne fifia ke sau maso kotou ki runga ki te vaerangi? Kotou ka rakuna ifo ki raro ki te Ngangea o te Mate!”

16 # Mat 10.40; Mak 9.37; Luk 9.48; Jon 13.20. Muna atu rei ko Jesus ki na kau fanonga, “Pe koai e fakarongo atu kia kotou, e fakarongo mai kia kuou. Pe koai si see fifia atu kia kotou, si see fifia mai kia kuou, ma pe koai si see fifia mai kia kuou, si see fifia fokia kia koia ne kau mai ia kuou.”

Te foki mai ranga o te tino fitu ma rua

17Te tino fitu ma rua o na kau fanonga ne foki mai ma te mata mau, o mmuna, “Te Ariki ee, nga atua pariki fokia ne fakarongo kia matou i vasia e matou fueina kese koratou ki tou ingoa!”

18Tongoi atu rei ko Jesus kia ratou, “Kuou ne kau ravea ina ko Satan e faka tokia ifo mai te vaerangi pe te foi kamo. 19Fakarongo! Totou manuu ne sori atu ea kuou, tera ke kotou fai taka fanga ki nga sineke ma nga morokau, ma ke kotou taomia koa makeke o te nea tau firi firi, tera siei fokia pe sea ka nai fai pariki tiaina kotou. 20Kae, kotou kau see vaki vaki natafito nga atua pariki ne fakarongo atu kia kotou. Kae vaki vaki tonu natafito otou ingoa ku tusia ria i te vaerangi.”

Jesus e vaki vaki

(Mat 11.25–27; 13.16–17)

21I te vasiaa, Jesus ne maatea rei na mata mau i te Mauri Tapu o Tupua, ma e muna, “Pa ee, te Ariki o te vaerangi ma o taangata nei! Kuou e faka ue ue kia kee, natafito ku kee faka aria ina ki te faoa se ne akona ria pe nia ma au ne fuu mai te faoa poto ma ne akona. Ioo rei, Pa ee, teinei e fai tautari pea kee ne fifia.

22 # Jon 3.35; 10.15. “Toku Mmana ne sori mai kia kuou a nea kaatoa. Siei pe koai ke nai iroa ina pe koai te Tama, kae ko te Mmana fuarei. Siei fokia pe koai ke nai iroa ina pe koai te Mmana, kae te Tama fuarei ma koratou ne faka patino ria e te Tama ke faka ari koia.”

23Tera tafuri ake rei ko Jesus ki te kau fanonga, o muna atu kia ratou maso koratou, “Fakatapu ria kotou ka ono kia nea ne ono kotou kiei! 24Kuou e faka ari atu kia kotou te maori: E kkapi rei ko nga ʻprophetʼ ma nga tii ne fifia ke ono pe nia motou e ono kiei, kae koratou se ne ma fai; ma ne fifia ke rongo pe nia motou e rongo kiei, kae koratou se ne ma rongo kiei.”

Te araara fanga faka tautau ki te laoi o te foi Samaria

25 # Mat 22.35–40; Mak 12.28–34. Te fakaako oa Fono ne au ke nai titipea ko Jesus, o fesiri, “Te fakaako ee, a nia ma aku ke fai ke kau saua te ora mau?”

26Tongoi atu rei ko Jesus kiei, “A nia e munakina i te Pepa Tapu? E faka atetea faka fefea ea kee?”

27Tongoi atu rei ko tangata, “Fakapere ki te Ariki tou Tupua ma tou fatu manava katoa, ma tou ora katoa, ma tou makeke katoa, ma tou atamai katoa, ma e fakapere ki ou faoa pe ko kee e fakapere kia kee maso kee.”

28Tongoi atu rei ko Jesus kiei, “Tau tongoi e tonu; fai faka peinei, tera ko kee ka ora.”

29Kae te fakaako oa Fono e fifia rei ke maataki maso koia te tonu, tera fesiri rei koia kia Jesus, “Koai rei toku foi faoa?”

30Tongoi atu rei ko Jesus, “Nai take vasia te tangata ne fena ifo mai Jerusalem ki Jericho, kae taia ria rei koia e faoa faka toto pariki ma e kaiaa, ratou pure purea, ratou tara kesea ko ana suru kae tiakina rei ke mate ngara. 31Tera, kae fai rei ko te pure fai kava ke fena ifo i te ara. Kae vasia koia ne ono ki te tangata, poi arei koia ia ki take faasi ara. 32Ia tukunga sokotasi te foi Levite fokia ne au i te ara, ne poi o pula atu ki te tangata, poi raa ki take faasi ara. 33Kae te tangata faka Samaria ne au rei i te ngangea o tangata e teka iei. I vasia koia ne ono atu kiei, na fatu manava ku motu rei kiei i na arofa ki tangataa. 34Poi rei koia kiei, o turu mo sua sinu ma waeni ki aana pakia, ma e rii rei ea koia kia suru. Tera tuku raa ea koia ko tangata ki te tua o tana kee manu te ʻdonkeyʼ, o kave ki te paito maanava ke ono faka laoi kiei. 35I take aso sau rei ea koia ki tua koa foi mane e rua, o sori ki te tangata e oono i te paito, kae muna atu kiei, ‘Oono faka laoi kiei. I toku vasia ka foki mai iei, kuou ka tauvi atu fokia pe nia ma au ne faka leku kiei.’ ”

36Tera faka suku suku rei ko Jesus, “Kotou e maanatu, koai ia ratou e toka toru nei ne fai pe na foi faoa ki te tangata ne taia ria e faoa faka toto pariki ma e kaiaa?”

37Tongoi atu rei ko te fakaako oa Fono, “Tera koia ne arofa kiei.”

Tongoi atu rei ko Jesus, “Tera poi raa ko kee, o fai tautari kiei.”

Jesus e faka ati kia Martha ma Mary

38 # Jon 11.1. I vasia o Jesus ma ana kau fanonga e oro iei, au rei koia ki te noforanga o te maatua fafine na ingoa ko Martha nai faka afea rei koia ki na paito. 39Te taina o Martha, na ingoa ko Mary, koia e nofo piri rei kia vae o te Ariki o fakarongo kia fakaako ranga a te Ariki. 40Ko Martha ku faka teke teke vare ia fainga fekau kaatoa a ana fuarei ku fai. Tera au rei koia o muna atu, “Te Ariki ee, ko kee ku see rau rei a fainga fekau katoa ku tuku mai rei e toku taina kia kuou ke fai iei? Muna atu kiei ke au o sosoa mai kia kuou!”

41Tongoi atu rei ko te Ariki kiei, “Martha, Martha, ko kee e faka tuasaa maatea rei kia nea kaatoa, 42kae e sokotasi fuarei ke fai. Ko Mary ku faka patino ko te nea laoi ka si see ma saua kesea ma koia.”

Currently Selected:

Luke 10: TKP

Highlight

Copy

Compare