Luke 8

Nga maatua faafine ne kau fanonga kia Jesus

1Mo vasia ki muri, Jesus ne poi saere kia taoni lasi ma nga noforanga, o tuufaki ko te Rongo Laoi o te Kainanga o Tupua. Na kau fanonga e tino angafuru ma rua ne oro koratou, 2#Mat 27.55,56; Mak 15.40,41; Luk 23.49. tera fokia ko nga maatua faafine koratou ne nai faka saofia mai i nga atua pariki ma mai ia ngaengae: Ko Mary, (na ingoa e ati ko Magdalene), koia ne fueina kese ki tua nga atua pariki e toka fitu mai ia koia, 3ko Joanna te nofine o Chuza, te tangata reo paito a Herod, ma Susanna, ma rake maatua faafine. Koratou ku fai fekauaki o sosoa kia Jesus ma na kau fanonga mai ia ratou kee kopenga.

Te araara fanga faka tautau kia fatu kai ne riaki

(Mat 13.1–9; Mak 4.1–9)

4Te kano fenua e koi oomai kia Jesus mai i nga taoni kaatoa e fe tao maki fuarei, ma vasia te kano fenua lasi e taanaki iei, Jesus ne araara faki tana araara fanga faka tautau nei:

5“Nai take vasia te tangata ne poi ke too ko ana fatu kai. Vasia koia e riaki saere ko ana fatu kai i roto maara, rake fatu kai ne soro ki te ara i ngangea ne fai taka fanga riaina, ma nga manu ne oomai, kai rei ea ratou. 6Rake nea ne soro ki te kunga kere fatu fatu, ma vasia oa fatu kai ne somo aki iei, ne mate arei, natafito te kunga kere si see sisiu. 7Rake nea ne soro ki te ngangea uruvao, ne fe somo aki ake maru maru kia arei. 8Ma rake fatu kai ne soro ki te kere laoi, ne fe somo aki ake, ma ne fufua laoi, ana fua e maatea rei, e taki fua te rau.”

Tera faka suku suku rei ko Jesus, “Fakarongo pe kotou e fai otou taringa!”

Te atamai oa araara fanga faka tautau

(Mat 13.10–17; Mak 4.10–12)

9Feesiri rei na kau fanonga kia Jesus, “Sea te atamai a mo araara fanga nei?” 10Tongoi atu rei ko Jesus, “Te atamai o te faka fuu o te Kainanga o Tupua ne sori atu kia kotou. Kae ki rake faoa, kuou e muna ia araara fanga faka tautau fuarei, tera koratou e pula, kae see ratou ravea ina, ma e fakarongo, kae see atetea.”

Jesus e faka atetea te araara fanga faka tautau kia fatu kai ne riaki

(Mat 13.18–23; Mak 4.13–20)

11“Teinei te atamai o te araara fanga faka tautau: A fatu kai te taranga a Tupua. 12A fatu kai ne soro ki te riu ara, e fai ki faoa ne fakarongo kia taranga a Tupua. Kae te Atua Pariki ne au, nai sau kesea rei koa taranga mai ia ratou fatu manava, ke see fakatonu ma ke see faka saofia. 13A fatu kai rei ne feettoki ki te kunga kere fatu fatu, e fai ki faoa ne fakarongo kia taranga a Tupua, ma ne ratou saua ria ma te vaki vaki. Kae se ne sau faka laoi ea ratou, koratou ne fakatonu fuarei mo vasia molakea, kae ne feettoki kese i te vasia ne maatakina iei. 14A fatu kai rei ne soro ki te ngangea uruvao, e fai ki faoa ne fakarongo kia taranga a Tupua, kae te faka tuasaa oa taufenua ma te ora vaki vaki oa taangata nei, ne nai piipii tia koratou ma aratou fua ka see rreu rei. 15A fatu kai rei ne soro ki te kere laoi, e fai ki faoa ne fakarongo kia taranga a Tupua, ma ne tautari ma ratou fatu manava laoi ma ne faka somo ko te ora laoi, oko rei ki aratou vasia ku fufua laoi iei.

Te laiti i araro o te kumete

(Mak 4.21–25)

16 # Mat 5.15; Luk 11.33. “Siei pe koai ke tutu tana laiti, purou rei ki te kumete, pe tuku rei ki araro o na meeranga. Kae tera koia ka tuku ki na tuuranga ki te kano fenua ke ono ki te maarama i vasia e oomai ki roto iei.

17 # Mat 10.26; Luk 12.2. “Pe nia ne funa ria kese ka aumai ina ki te atetea ranga, tera pe nia e ufi ufi ka aumai ina ki te maarama anga.

18 # Mat 25.29; Luk 19.26. “Tera, faka matakite ki totou fai fakarongo, natafito pe koai ma e fai ko aratou nea ka soria kiei e rava, kae kia koratou e siei rei pe nia ma ratou, ka saua ki tua pe nia ma ratou e tee e naa, moa rei si see rava.”

Te nana o Jesus ma ana taina

(Mat 12.46–50; Mak 3.31–35)

19Te nana o Jesus ma ana taina ne oomai kiei, kae koratou ku se ma fai rei ke oko kiei, natafito i te kano fenua e maatea rei. 20Tera muna atu rei ko rake faoa kia Jesus, “Tou nana mo ou taina e turaki i fafo, e fifia ke ono kia kee.”

21Kae tongoi atu rei ko Jesus kia ratou kaatoa, “Toku nana mo oku taina koai ma koratou e fakarongo kia taranga a Tupua ma e tautari kiei.”

Jesus e faka ngaio te ofa

(Mat 8.23–27; Mak 4.35–41)

22Take aso, Jesus ma na kau fanonga ne fesopoki ki te vaka, kae muna atu rei koia kia koratou, “Tatou oro ki take faasi o te roto.” Tera tafito arei o oro koratou. 23Vasia oratou ku forau iei, Jesus ku mee i mo vasia. Te matangi ku angi makeke ifo ki te roto ma te vaka ku tafito o utuufakina ki te vai, ma koratou ku pariki maatea rei. 24Tera na kau fanonga ne oomai o fango kiei ke tokai ake ki runga, kae muna atu kiei, “Te Ariki ee, te Ariki ee! Tatou ku piri ke mmate!”

Tera tokai ake rei ko Jesus ki runga, o muna atu ki te matangi ma ki te ngaru. Ne too arei te ngaio ma te roto ku ngaio rororo rei. 25Tera muna atu rei ko Jesus ki na kau fanonga, “Ko fea otou fakatonu?”

Kae koratou ku mmate ko aratou tino ma ku maattaku, ma ne tau araara maso koratou, “Se fai tangata koai nei? Koia e muna atu ki te matangi ma te ngaru, tautari arei kiei!”

Jesus e fue kese ko nga atua pariki mai te tangata

(Mat 8.28–34; Mak 5.1–20)

26Koratou ne forau ki motu ngangea i Gerasa, e forau faka rava mai Galilee. 27Vasia o Jesus ne tuu vae atu ki ngauta iei, koia ne fekitei akina e te tangata mai te taoni e nofo riaina e nga atua pariki. Koia kua roa rei ma tana poi fua, ma si see nofo i na noforanga, kae nofo mau fuarei i nga vasia i te kere tamate. 28Vasia koia ne nai ravea ina ko Jesus, koia ne tangi forua, tokoturi ia mua o Jesus, ma e forua, “Jesus te Tama a te Tupua Maurunga Sapa ee! Nia ma au e fifia kia kuou? Kuou e kaisi atu kia ko kee, kau see fakkiro mai kuou!” 29Koia e muna faka peinei, natafito ko Jesus ku nai kauna kese koa atua pariki ke oro kese ma koia. Nga vasia katoa e nai kavena koia, maafa rei onia ana rima ma ana vae e rii tiaina kia seni ma na faka reo, kae koia e nai motu motu sia koa seni, kakave rei e nga atua pariki ki te ngangea tulaavaki.

30Tera fesiri atu rei ko Jesus kiei, “Koai tou ingoa?”

Tongoi atu rei koia, “Toku ingoa ko Tokarava,” natafito nga atua e tokarava e fare ia koia. 31Ko nga atua pariki ne mmuna faka ngore ngore rei kia Jesus ka see fakkau koratou ke oro ki te rua e seke fokinga.

32Te fare piki lasi e rafi mai, e faangai i vae maunga. Nga atua pariki ne kaaisi atu kia Jesus ke tuku koratou ke oro ki nga piki, tera tuku rei ea koia ke oro kiei. 33Tera nga atua pariki ne oro kese mai tangata, oro arei o fe urufi ki nga piki. Nga piki kaatoa ne furi rei ki te vae ngangea e mato mato ki te vae roto ma ne maaremo arei iei.

34Ko nga taangata noko reo i nga piki, ne ono mata pe nia ne faka saa ria nei. Tera koratou ne furi arei o kave saere ko te rongo ki te taoni ma nga noforanga ia ngangea. 35Te kano fenua ne oro ke ono pe nia ne faka saa ria. Koratou ne oomai kia Jesus ma ne ono ki te tangata ne saua kesea ko nga atua pariki iei, e nofo i faasi o Jesus, e uru ki ana suru ma koia i na atamai laoi. Tera, koratou kaatoa ku maattaku kaatoa rei. 36Koratou ne ono kiei, ne araara ki te kano fenua ki te oro kese anga o nga atua pariki i te tangata. 37Tera te kano fenua kaatoa mai te motu ngangea o Gerasa ne muna atu kia Jesus ke poi kese, natafito koratou ku maattaku maatea rei kiei. Tera ko Jesus sopo arei ki te vaka o poi. 38Te tangata nga atua pariki ne fueina kese iei, ne muna atu kia Jesus ke rau oro, kae ko Jesus ne muna atu ke foki ki na noforanga, kae muna atu rei kiei, 39“Poi ki tou kanoa paito i tou noforanga o rongo rongo saki kia ratou pe nia a Tupua ne fai atu kia ko kee.”

Tera te tangata poi arei o rongo rongo saki i roto taoni kaatoa pe nia ma Jesus ne fai atu kia koia.

Te tama afine a Jairus ma te maatua fafine ne poo ki te suru o Jesus

(Mat 9.18–26; Mak 5.21–43)

40Vasia o Jesus ne foki ki take faasi vae roto, te kano fenua ne oomai o faka afe ea ratou, natafito koratou kaatoa noko tari faki kiei. 41Tera te tangata na ingoa ko Jairus ku oko mai, te momooai o ratou paito taanaki. Koia ne au kia Jesus, tokoturi rei ki raro ki ana vae o faka ngore ngore atu kiei ke poi ki na paito. 42Natafito tana tama afine te fua tasi, ana tau e fuanga furu ma rua, ku fai ke mate.

Te vasia o Jesus e poi iei, te kano fenua e rofi saere i ana faasi. 43Te maatua fafine koia ana tau ku fuanga furu ma rua ma tana faia ria i te ngae ngae te ngana, ana mane ne poi o faka leku rei ki nga ʻdoctorʼ, kae siei rei pe koai ke nai faka maroro ria koia. 44Koia ne faka sao sao mai i te kano fenua ia tua o Jesus o poo atu ki ana suru, i mo vakanga na ngae ngae ku laoi arei. 45Jesus ne fesiri, “Koai ne poo kia kuou?”

Faoa kaatoa e peupeu kiei, ma ko Peter ne muna atu, “Te Ariki ee, te kano fenua kaatoa e fe ngiti aki saere i ou tafa!”

46Muna rei ko Jesus, “Te nea e poo mai kia kuou, natafito kuou e kau rangona ria i vasia o te manuu e poi ki tua ma kuou.” 47Tera te maatua fafine ku nai iroa ina koia ku maua ina, tera koia ne au ku pore katoa rei o tokoturi ia vae o Jesus. Ia mua o te kano fenua kaatoa rei, maatua fafine ne faka ari atu kia koia sea na atamai koia ne poo ki na suru ma na ngae ngae ne laoi arei. 48Muna atu rei ko Jesus kiei, “Taku tama afine ee, tau fakatonu ku nai faia ko kee ke maroro laoi, poi i te roto mafora.”

49Mo vasia o Jesus e muna faka peinei, te kave rongo e au mai te paito o Jairus te maurunga, o faka ari atu kia Jairus, “Tau tama afine ku mate. Kau see rau ki te fakaako naa!”

50Kae ko Jesus ne nai rangona ina, tera muna atu arei kia Jairus, “Kau see mataku, fakatonu fuarei tera tau tama afine ka maroro.”

51Vasia o Jesus ne oko mai ki te paito, koia se ne nai tukuna pe koai ke ratou oro ki roto, kae ko Peter, John, ma James ma a maatua o te tama afine fuarei. 52Mo vasia, ko te kano fenua kaatoa e ttangi ma e arofa ki te tama afine nei. Jesus ne muna atu kia ratou, “Kau see ttangi, te tama afine si se ne mate, koia e mee fuarei!”

53Koratou kaatoa ku fai faka kata kia koia, natafito e ratou iroa ina ku mate. 54Kae ko Jesus ne puke ki te rima o te tama afine nei, kae muna atu rei kiei, “Tokai ki runga taku tama afine ee!” 55Na ora ku foki mai, ma ne tokai ake arei ki runga i mo vakanga, tera ko Jesus ne muna atu kia ratou ke sori ko mo kai ma ana ke kai. 56Ana maatua ku fereki koa rau mauri, kae ko Jesus ne muna atu kia raua, “Kau see faka ari pe kiai pe nia ne fai nei.”

Currently Selected:

Luke 8: TKP

Highlight

Copy

Compare