Luke 13

Tafuri mai otou sara o pe ka mate

1I te vasia naa, a rake faoa o ngangea ne araara faki atu kia Jesus a rake foi Galilee ne taia ina e Pilate, ia mo vasia koratou e sori te kavaaki ki Tupua. 2Tongoi atu rei ko Jesus kia ratou, “Ea, kotou e maanatu rei koa foi Galilee nei e titisara maatea rei ma te kano fenua katoa rei i Galilee, ta teinei arei koratou ne fakarongo neaisu faka peinei? 3Siei rei! Kuou ka faka ari atu rei kia kotou, kae ko kotou si see taafuri kese mai ia otou sara, tera kotou kaatoa rei ka mmate rei pe ne faia kia koratou! 4E faka fefea rei kia koratou e tino angafuru ma varu i Siloam ne tamatea ria i vasia o te paito maurunga ne singa ifo kia koratou? Ea, kotou e maanatu rei koratou e titisara sapa rei ma rake faoa noko fare i Jerusalem? 5Siei! Kuou ka faka ari atu rei kia kotou, kae kotou si see fai o taafuri kese mai ia otou sara, ko kotou ka mmate kaatoa rei pea koratou ne mmate naa!”

Te araara fanga faka tautau ki te raakau te ʻfigʼ e tusingano

6Tera ko Jesus ne araara faki ko te araara fanga faka tautau kia koratou, “Nai take vasia te tangata e fai ko na raakau te ʻfigʼ e somo e tuu i na tofi. Poi rei koia o faara kia fufuei ʻfigʼ, kae siei rei pe se foi ʻfigʼ ne nai maua. 7Tera koia ne muna atu ki te tangata e oono i na tofi, ‘Pula rei, ku toru koa tau ma taku au o faara ki ni fufuei ʻfigʼ i te raakau nei, kae si se ne kau maua pe nia iei. Taia ki raro! Sea na atamai ku tuku fuarei ke ora vare o aofaki ko te kere?’ 8Tongoi atu rei te tangata e oono i te tofi, ‘Te Ariki ee, tuku mua se tau sokotasi fokia. Kuou ke keri vakai, o faangai kia penu. 9Tera, kae te raakau nei e fai ko ana fua i te tau ka au, tera ku maatea rei na laoi sapa, kae siei rei, taa arei ki raro.’ ”

Jesus e nai faka maroro ria te maatua fafine tua piko i te Aso e tapu

10Take Aso e tapu Jesus noko fakaako i rota paito taanaki. 11Te maatua fafine e nofo i rota paito, e nofo ria e te atua pariki nai faia ria koia ke ngaengae ana tau e fuanga furu ma varu. Koia e poi faka tunoku rei i na tua si se ma fakatonu ake rei ki runga. 12Vasia o Jesus ne ono atu kiei, karanga atu rei koia kiei, “Maatua fafine ee, ko kee ku maroro mai tou ngae ngae!” 13Kae tuku atu koa ana rima kiei, tera i mo vakanga koia ne fakatonu ake arei maso koia ki runga, kae rausapai ki Tupua.

14Te taki o te paito taanaki ne teke kia Jesus e ikirave i te Aso e tapu. Tera koia ne karanga ake kae muna atu ki te kanoa fenua, “E ono koa aso tatou e fetau fangatasi ke fai fekau iei. Tera ia aso e fetau fangatasi ke ikirave iei, kae siei i te Aso e tapu!”

15Tongoi atu rei te Ariki kiei, “Kotou fenua taataa laoi! Pe koai ia kotou ke vete tana puluka pe tana ʻdonkeyʼ mai na tuuranga, o kave ke faa inu i te Aso e tapu. 16Teinei te afu maori o Abraham noko mono mono tia e Satan e fuanga furu ma varu koa ana tau. Ea, koia si see fetau fangatasi ke faka saofia i te Aso e tapu?!” 17I ana tongo tongoi anga ne nai faia ko ana faoa tau firi firi ke faka maa, kae te kano fenua kaatoa e maatea rei ratou vaki vaki ki aana matuaa ngangea laoi ne fai.

Te araara fanga faka tautau ki te punai fatu kai ʻmustardʼ

(Mat 13.31–32; Mak 4.30–32)

18Tera fesiri rei ko Jesus, “Te Kainanga o Tupua e fai faka fefea? Ka faka tautau ea kuou faka fefea? 19E fai ake pe te foi fatu kai ʻmustardʼ, iei ne sau e te tangata o too i na tofi. Te raakau ne somo ake te raakau lasi, nga manu ne oomai o fai fare faanganga ia raa o te raakau.”

Te araara fanga faka tautau kia ʻyeastʼ

(Mat 13.33)

20Fesiri rei fokia ko Jesus, “Te Kainanga o Tupua ka faka tautau rei ea kuou ki sea? 21E fai pea ʻyeastʼ ne sau e maatua fafine o faka rave ki fua faa lita oa falaua, oko rei ki na vasia ku fanake katoa rei ki runga.”

Te urufanga komo komo

(Mat 7.13–14; 7.21–23)

22Jesus ne poi kia taoni ma kia noforanga o fakaako i kuraa, o poi saere ki Jerusalem. 23Tera fesiri atu rei te nea kiei, “Maurunga ee, te kano fenua ka faka saofia ka see tokarava?”

Tongoi atu rei ko Jesus kia ratou, 24“Fai faka poto ke kotou urufia ina te urufanga e komo komo, natafito kuou ka faka ari atu kia kotou, e kkapi rei ko te kano fenua ka fai ke fe urufi ki roto, kae ka si se ma fai. 25Te ariki o te paito ka tokai ake o sai ko te urufanga. Tera totou vasia ka turaki i fafo o tafito o fiti fiti ki te urufanga o karanga, ‘Te ariki ee, sara mai te urufanga kia matou!’ Kae koia ka tongoi atu kia kotou, ‘Kuou si see kau iroa ina kotou, pe ko kotou e oomai mai fea.’ 26Tera kotou ka tongoi atu kiei, ‘Kotatou rei noko kai, ma noko inu taanaki. Ko kee rei noko fakaako i te taoni omatou!’ 27Kae koia ka muna atu fokia, ‘Kuou see kau iroa ina pe te fefea totou ngangea e oomai mai iei. Oro kese ma kuou, kotou kaatoa faoa fai fai sara!’ 28Kotou ka fai ka ttangi ma e fe ngii taki otou nifo i vasia kotou ka ono kia Abraham, ma Isaac, ma Jacob, ma nga ʻprophetʼ katoa i te Kainanga o Tupua, kae kotou ka seua kese ki tua! 29Te kano fenua ka oomai mai te tonga, te raki, te ruatuu, ma mai te tokerau, o fare ki raro o kai kai i te Kainanga o Tupua. 30#Mat 19.30; 20.16; Mak 10.31.Tera koratou e faka muri muri i vasia nei ka mua, kae koratou rei e mua i vasia nei ka faka muri muri.”

Jesus e fakapere ki Jerusalem

(Mat 23.37–39)

31I te vasia sokotasi, rake Pharisee ne oomai kia Jesus o muna atu kiei, “Ko kee poi kese rei ma kunei, o poi atu ki se ngangea, natafito ko Herod e fifia ke nai tamatea ria ko kee.”

32Tongoi atu rei ko Jesus kia ratou, “Oro o faka ari atu ki te korii tauvao naa: ‘Kuou e fue kese ko nga atua pariki ma e faka maroro ea kuou ko faoa ngaengae i te aso nei ma a pongi pongi, ma ka oko ki te toru oa aso, kae fakaoti koa aku fainga fekau.’ 33Kae kuou ka poi arei i te aso nei, ma a pongi pongi ma ki take aso. Siei se ʻprophetʼ ke tamatea riaina i se ngangea, kae i Jerusalem fuarei.

34“Jerusalem ee, Jerusalem ee! Kotou ne kotou tamatea riaina ko nga ʻprophetʼ, ma ne kotou tau fatu ria ko faoa rongo rongo saki koa taranga a Tupua ne fakkau atu! E rava rei oku vasia kuou ne fifia ke tuku oku rima o avai atu kia kotou kaatoa, fakapera pe te kio fafine e ruru ko tana faanganga ki ana kapakau, kae kotou si se ne tuku mai kia kuou! 35Pula, totou Paito Tapu ka tukuna ke tulaavaki. Kuou e faka ari atu: Kotou ka si see ono kia kuou fokia, oko rei ki vasia kotou ka mmuna, ‘Tupua ke nai fakatapu ria koia e au i te ingoa o Tupua.’ ”

Currently Selected:

Luke 13: TKP

Highlight

Copy

Compare