Luke 14

Jesus e faka maroro tangata ngaengae

1Take Aso e tapu ko Jesus ne poi ki te rota paito o te ariki o nga Pharisee ke kai iei, a mata o te kano fenua ku tuu fuarei kiei. 2Te tangata ana vae ma ana rima e maua e te fua ne au kia Jesus. 3Tera ko Jesus ne fesiri atu ki nga fakaako oa Fono ma nga Pharisee, “Ea, ia tatou fono e masara ke ikirave koa ngaengae i te Aso e tapu, pe siei?”

4Kae koratou se ne muna rei pe ki nia. Tera ko Jesus ne sau ko tangata, ta faka maroro rei ea koia mai na ngaengae, fakkau rei ea koia ke poi. 5#Mat 12.11.Tera fesiri atu rei koia kia ratou, “Kae se nea ia kotou e fai tana tama pe tana puluka, ke too sara ki te nupu i te Aso e tapu, ko kee ka se ma fai o futi ake ki runga i te Aso e tapu?”

6Kae koratou se ne muna rei pe ki nia.

Firi firi kia noforanga laoi

7Jesus ne nai iroa ina, rake faoa e fai koratou ke fare kia noforanga laoi, tera koia ne araara faki ko te araara fanga faka tautau nei kia ratou kaatoa, 8“Vasia pe koai e nai kaafia atu ke au ki te kai kai o te avanga, kau see au o nofo ki raro ki te ngangea laoi. Naa pe koai e maurunga sapa ma kee ne kaafia ke au. 9Tera tangata ne kafi atu kia korua, nae au o muna atu, ‘Tuku kia koia ke nofo i noforanga naa.’ Tera ko kee ka mata nonoa maso ko kee, poi rei o nofo ki te noforanga i raro rei. 10Tera i tou vasia e kafia mai iei, poi o nofo ki te ngangea i raro, tera te tangata ne nai kafia atu ko kee, ka au o muna atu kia kee, ‘Toku soa ee, au ki runga ki te noforanga laoi.’ Ta teinei ka fai ko kee ke mata mata laoi ia mata o nga taangata kaatoa. 11#Mat 23.12; Luk 18.14.Natafito pe koai e fai ke sapa maso koia, ka fai ka tukuna ki raro, ma pe koai e fai ke tuku raro maso koia, ka faka sapa ria.”

12Tera muna atu rei ko Jesus ki te tangata ne kafi atu kia koia, “Vasia ko kee e sori te faka avatea pe te faka afi afi, kau see kafi ou soavaka, pe ou taina, pe ou kanoa paito, pe ou faoa e taufenua, natafito koratou ka fai kafi atu kia kee. Ia fai riu ara sokotasi ko kee ka ratou tauia pe nia ma au ne fai kia ratou. 13Vasia ko kee tau kai kai ka fai, kakafi rei ea kee te faka arofa, te sape, te fua teka ma te mata sengi, 14tera ko kee ka fakatapu riaina, natafito koratou ka se ma fai ke siaki atu kia kee. Tupua ka siaki atu kia kee, vasia te kano fenua laoi ka maasike ake mai te mate.”

Te araara fanga faka tautau ki te kai kai lasi

(Mat 22.1–10)

15Vasia nga taangata e fare i te tepolo, te nea ia ratou ne nai rangona, muna atu rei kia Jesus, “Fakatapu riaina te tangata ka kau i te kai anga i te Kainanga o Tupua!”

16Muna atu rei ko Jesus, “Nai take vasia te tangata ne fai ko tana kai kai lasi, nai kaafia rei te kano fenua e kkapi rei. 17I te vasia o te kai kai ku oko ke fai, fakkau rei ea koia ko tana seka ke poi o faka ari ki ana faoa ne kafi, ‘Ke oomai, a nea kaatoa ku pena pena ku oti!’ 18Kae koratou kaatoa ku tasi muna koratou e visi visia. Te mataki tangata ne muna, ‘Kuou ne songoi tauvi te tofi, tera kuou ka poi o maataki. Sea rei maanatu laoi mai.’ 19Take tangata ne muna, ‘Kuou ne tauvi mai koa puluka e rima, ta kuou ka poi o maataki koratou. Sea rei maanatu laoi mai.’ 20Take tangata ne muna, ‘Kuou ne songoi avanga, tera kuou ka see fenatu.’ 21Ta tera te seka ne foki mai arei o faka ari koa taranga kaatoa ki na ariki. Tera te ariki ku teke maatea rei kae muna atu rei ki tana seka, ‘Faka vave o poi kia vaevae ngangea i te roto taoni, o kafi mai te faka arofa, te sape, te mata sengi, ma te fua teka.’ 22See roa ake te seka ne muna atu, ‘Te ariki ee, pe nia ma au ne muna mai kiei, ku oti na fai, kae te rota paito koi atetea rei.’ 23Tera te ariki ne muna atu ki tana seka, ‘Poi rei kia riu ara ki roto fenua, ma kia manga ara, o fai te kano fenua ke oomai ki roto, tera toku paito ka pii. 24Kuou ka muna atu kia kotou: Siei rei pe koai ia koratou ne kafi nei, ka kai ki toku faka afi afi!’ ”

Te faingataa ranga o te kau fanonga

(Mat 10.37–38)

25Te kapi ranga o te kano fenua noko oro ma Jesus. Tafuri ake rei koia o muna atu kia ratou, 26#Mat 10.37.“Kae pe koai e au kia kuou kae tana fakapere kia kuou e si see sapa ma tana fakapere ki na mmana ma na nnana, na nofine ma ana tamariki, ana taina ma ana kave, ma ki aratou ora fokia, koia ka si se ma fai toku kau fanonga. 27#Mat 10.38; 16.24; Mak 8.34; Luk 9.23.Pe koai si see nai amoa ko na kee raakau tapu o tautari mai kia kuou, ka si se ma fai toku kau fanonga.

28“Kae pe koai ia kotou e pena ke taa ea koia te taoa, koia ka nofo mua o fai fekauaki ko te tauvi o paito pe ka oko ki sea ana foi mane pe fetau fangatasi ki te tauvi o na paito ke fakaoti koa ana fainga fekau. 29Kae ko kee ka si see fai o fakaoti kia ko te taoa ia tua ku faka takoto ko na faka mau, faoa kaatoa ne ono kiei ka ratou kata ina ko kee, 30kae mmuna, ‘Te tangata naa ne fakatafito o taa, kae si se ne faka oti ko ana fainga fekau!’

31“Kae te tii e fai ke poi ma tana kano tau e oko kia afe e fuanga furu (10,000) i nga taangata ke featu ki take tii, koia e au ke faka anga kiei ma tana tino rua koa afe (20,000) i nga taangata, koia ka nofo mua, o maataki tana kano tau e makeke ke angai ki take tii. 32Kae siei, koia ka fakkau ko tana kave rongo ke poi o fekitei ki take tii, vasia koi au mmao iei, o kaisi atu kiei ke rau faka laoi.” 33Tera faka suku suku rei ko Jesus, “Ia fai atamai sokotasi, siei pe koai ia kotou ka fai toku kau fanonga, fuarei koia e sori katoa rei pe nia ma ana e fai.

Vaitai pariki

(Mat 5.13; Mak 9.50)

34“Vaitai e laoi, kae pe na namu vaitai e too kese ki tua, siei rei ka se ma fai rei ke namu vaitai fokia. 35Si see laoi ki te kere, pe kia kai laoi o te kere ke faka kutu, rakuna kese rei ki tua. Tera fakarongo pe kotou e fai otou taringa!”

Currently Selected:

Luke 14: TKP

Highlight

Copy

Compare