Luke 12

Te faka iro iro anga ki te taataa laoi

(Mat 10.26–27)

1 # Mat 16.6; Mak 8.15. Tera afe o te kano fenua ne taanaki mai ki roto, tera ku fai taka fanga fuarei kia ratou fuarei, tera ko Jesus ne muna mua raa ki na kau fanonga, “Faka matakite kotou kia ʻyeastʼ o nga Pharisee, kuou e atamai ki aratou taataa laoi anga. 2#Mak 4.22; Luk 8.17.Ta pe nia ne ufi ufi ka fukea ki tua, ma a nea katoa e faka fufu ka faka aria ke iroa ina. 3Kae tera, pe nia motou e munaki i te pouri, ka faia ke rangona riaina i te ao, ma pe nia motou e fe tamusu aki kiei i rota paito e sai, ka foorua tiaina mai fongo paito.”

Koai ke mataku kiei

(Mat 10.28–31)

4“Tera kuou ka muna atu kia kotou, soa ma ee, kau see maattaku ki faoa e ratou taia ko te tino, kae kia muri ka see ratou faia pe nia e pariki maatea rei fokia. 5Kuou ka faka ari atu kia kotou koai ke maattaku kotou kiei: Maattaku fuarei ki Tupua. Ta koia ka nai tamatea ko te tino, kae kia muri e fai na tonu ke pee kotou ki te afi. Tera fakattonu mai kia kuou, ta koia fuarei kotou ke maattaku kiei!

6“Tera e kotou iroa ina, a foi punai manu e rima e fai tauvi kia foi para pene e rua fuarei. Kae siei se punai manu sokotasi ne faka ngaro e Tupua. 7A rau uru fokia otou poko uru naa ku taua fakaoti rei. Tera kau see fai o maattaku. Kotou e sapa rei ma nga punai manu naa!

E tara ma e faka peua ria ko Christ

(Mat 10.32–33; 12.32; 10.19–20)

8“Tera kuou ka faka ari atu kia kotou: pe koai ma e faka atetea ki tua ia mata o te kano fenua koratou o oku, te Tama a Tangata nei ka fai faka peeraa kia koratou ia mata o nga ʻangelʼ o Tupua. 9Kae pe koai ma e ratou fakapoua kuou ia mata o te kano fenua koratou siei o oku, te Tama a Tangata ka nai fakapoua ria fokia koratou ia mata o nga ʻangelʼ o Tupua.

10 # Mat 12.32; Mak 3.29. “Pe koai ma e fai pariki ko aratou taranga ki Tama a Tangata ka ma faka ngaromia, kae pe koai ma e muna faka puaka ki te Mauri Tapu o Tupua ka se ma faka ngaromia.

11 # Mat 10.19,20; Mak 13.11; Luk 21.14,15. “I ratou vasia e aumai ea ratou kotou kia paito taanaki o nga Jew ke maataki ea ratou, o pe kia mua o nga gavana, o pe ki faoa fono fono, kau see faka tuasaa kia kotou pe ka toko faka fefea, o pe nia motou ka mmuna kiei. 12Natafito ka ako atu e te Mauri Tapu pe nia motou ka mmuna kiei.”

Te araara fanga faka tautau ki te taufenua seke atamai

13Te tangata i te kano fenua ne muna atu kia Jesus, “Te fakaako ee, muna ki toku taina ke mau vae ia kope kopenga omau mmana ne tuku mai kia maua.”

14Tongoi atu rei ko Jesus, “Soavaka ee, koai ne nai soria mai kia kuou te tonu ke faka taka taka pe ke vae rua i oru kope kopenga naa ia korua?” 15Tera muna atu arei koia kia ratou kaatoa, “Faka matakite, ma kae faka reo kotou maso kotou ia tukunga kaatoa o totomatua. Natafito te ora maori o tangata si see naa i ana kope kopenga, moa rei na taufenua e sapa.”

16Ta araara faki atu rei e Jesus ko te araara fanga faka tautau kia ratou, “Nai take vasia te tangata taufenua e fai ko ana kere, iei te kai o fufua raakau e maatea rei na fufua laoi. 17Koia ku tafito o maanatu kia koia maso koia, ‘A nia ma aku ka fai? Kuou siei rei mo ngangea ke tuku aku mo kai katoa kiei. 18Ta teinei kuou ka fai faka peinei: Kuou ka ofa aki ki raro koa fare oa kai nei, kae taa rei faka lasi, ta tera tuku raa ea kuou koa kai fufua raakau ma rake aku kai katoa. 19Ta muna ifo rei kuou kia kuou fuarei: Ko kee tangata manuu tia, ko kee ku fai au nea katoa e laoi tou fifia ka naa e rava ko ana tau. Sau ko te ora e faingaofia. Kai, inu, ma e vaki vaki maso kee!’ 20Kae muna atu rei ko Tupua, ‘Ko kee e seke atamai! I te poo rei nei tou ora ka sau kese iei. Tera koai rei ia ka sau ia nea kaatoa noko tuku fuarei ma au?’ ”

21Tera Jesus muna atu rei fokia, “Teinei te fai ka faia kia koia e totomatua ke tuku koa nea kaatoa ma ana fuarei, kae si see taufenua i faasi o Tupua.”

Paanaki ki Tupua

(Mat 6.25–34)

22Tera ko Jesus muna atu rei ki na kau fanonga, “Teinei arei kuou e faka ari atu kia kotou: Kau see faka tuasaa ki otou ora pe nia motou ka kai, o pe ki otou tino pe ni suru motou ka fe urufi. 23Te ora e sapa maatea rei ma kai, ma te tino e sapa maatea rei ma suru. 24Pula rei kotou ki nga lenga: koratou si see too kai, o pe ke fai kai, koratou si see fai ko aratou fare oa kai, kae ko Tupua fuarei e faangai koratou! Kotou e sapa kese rei ma nga manu! 25Kae moa rei kotou e faka tuasaa ki otou ora, kae kotou ka se ma fai otou ora ke roa ake faka molakea! 26Kae ko kotou si se ma oono ia ngangea vikilake, tera sea rei te atamai ko kotou e faka tuasaa ki rake faoa?

27“Pula rei kia manongi vao e ora. Koratou si see fai fekau o pe fai ko ni suru mo ratou. Kae kuou ka faka ari atu kia kotou, kae moa rei ko Solomon te taufenua ne uru ki ana suru laoi, kae si see taurekareka pe te foi manongi ia manongi nei. 28Kae Tupua koia e faka suru ia manongi vao e somo i te aso nei oko rei kia pongi pongi, kae sunua rei ki te afi. Ea, koia si se nai faka suru ria atu kotou? Otou paanaki e vikilake!

29“Tera kau see fe poi kaki o maanatu fuarei pe nia motou ke kai ma ke inu. 30(Natafito te faoa pouri oa taangata nei e rau fuarei kia fai nea katoa naa.) Tera totou Mmana e nai iroa ina kotou e fifia kia nea nei. 31Kae faara tonu ia ki na Kainanga, tera koa nea nei ka sori atu kia kotou.

Taufenua i te vaerangi

(Mat 6.19–21)

32“Kau see fai o maattaku, kotou nga puna manu, natafito totou Mmana e vaki vaki ke nai soria atu kia kotou te Kainanga. 33Tera fai tauvi otou kope kopenga tera sori rei koa mane ki faoa faka ruru faka arofa. Fai maso kotou otou fao mane ka si se ma pariki rei, ma ke faka sao otou taufenua i te vaerangi ka si see oti rei, natafito fenua kaiaa ka see oko kiei, ka siei fokia se manu vao ke nai fai pariki tiaina. 34Natafito otou fatu manava ka naa mau fuarei i ngangea otou taufenua e naa iei.

Te fai fekau e faka poto

35 # Mat 25.1–13. “Tera pena ki pe nia ka au, fe urufi ki otou suru, ma kae tuku otou laiti ke kai ruru arei, 36#Mak 13.34–36.fakapera rei pe faoa fai fekau e fetari ki ratou ariki ke foki mai mai i te kai kai o te avanga. I vasia koia ka au o fiti fiti atu, koratou ka sara arei ko te urufanga kiei. 37Te vaki vaki o te ariki ki aana faoa fai fekau e nai maua atu e koi ara i na vasia e foki mai iei! Kuou e faka ari atu kia kotou te maori: Koia ka sau ki tua ko na suru tino, kae muna atu rei kia ratou ke fare ki raro o sori kia ratou koa kai. 38Ratou fai vaki vaki e sapa rei e nai maua atu koratou e pena pena, maafa rei koia ka au i turua poo, pe tuei taamaki mai! 39#Mat 24.43,44.Faka maanatu: Kae te tangata ona paito pe ke nai iroa ina ko te vasia o te tangata kaiaa ka au iei, koia ka se nai tukuna ria ko te tangata kaiaa ke nai urufia ina ko na paito. 40Ma kotou fokia e fetau fangatasi ke kotou pena pena mau rei, natafito te Tama a Tangata ka au i te vasia kotou si see maanatu kiei.”

Te fakapoto pe te seke fakapoto

(Mat 24.45–51)

41Fesiri atu rei ko Peter, “Te Ariki ee, ko kee e araara faki tau araara fanga faka tautau nei kia matou, pe ki te kano fenua kaatoa?”

42Tongoi atu rei ko te Ariki, “Koai rei, tera, te fai fekau e faka poto ma e mata purotu? Ta tera koia ka tuku e na ariki ke oono i na rota paito ma ke sori ki rake faoa aratou vaenga kai i vasia e tau fangatasi rei. 43E maatea te vaki vaki o te fai fekau i vasia na ariki e oko mai iei, ono rei koia e fai a nea kaatoa e laoi. 44Kuou e faka ari atu kia kotou te maori: Te ariki ka tuku ko te fai fekau ke oono i ana kope kopenga kaatoa. 45Kae pe koia te fai fekau pariki, koia ka muna maso koia, ‘Toku ariki ka roa rei ko na vasia kae foki mai rei,’ ma koia ka tafito ke taa ko rake fai fekau, ko nga taangata ma nga maatua faafine, koia e kai ma e inu ke maua. 46Tera te ariki o te fai fekau nei ka foki mai i se aso i te vasia te fai fekau si see maanatu kiei, ma i se vasia koia si se nai iroa ina. Te ariki ka nai sepe sepea riki rei koia, tera ka nai tukuna ria koia ke vaevae ia fakkiro anga o faoa sasaeaki.

47“Te seka koia e nai iroa ina pe nia ma ana ariki e fifia kiei ke fai, kae koia maso koia si see pena ke fai pe nia ma ana ariki e fifia ke fai, koia ka fakkiro ka sasa maafa rei. 48Kae te seka koia si se nai iroa ina pe nia ma ana ariki e fifia kiei, kae koia e fai rei koa nea ka taia iei, na fakkiro ka si see sasa faka lasi. Te tangata ne soria e rava, mai iei fokia ka rava. Kia koia ne soria e maatea, mai iei fokia ka maatea.

Jesus te kau o te mavaevae anga

(Mat 10.34–36)

49“Kuou e au ma te afi kia taangata nei, kae oku manava ake raa ne mataki kaa mai rei te afi! 50#Mak 10.38.Kae kuou e fai te faka uku tapu ke sau, e mmafa rei ia kuou oko rei ku faka oti! 51Ea kotou e maanatu rei kuou e au ma te roto mafora kia taangata nei? Siei te roto mafora, kae te faka kese kese. 52Mai te vasia nei o poi arei, te kanoa paito e toka rima ka vae, toka toru ke featu ki toka rua, ma e toka rua ke featu ki toka toru. 53Nga mmana ka featu ki aratou tama, ma a tama ka featu ki aratou mmana. Nga nnana ka featu ki aratou tama afine, ma a tama afine ka featu ki aratou nnana; nga nnana fongoai ka fai featu ki aratou fongona, ma a fongona ka featu ki aratou nnana fongoai.”

Te atetea o te vasia

(Mat 16.2–3)

54Muna atu rei fokia ko Jesus ki te kano fenua, “Totou vasia ka ono ki te kauao e fakkake mai i te raki, mmuna arei ko kotou i te vasiaa, ‘Te ua e fai ke too,’ tera too arei. 55Ma vasia matangi e ruatuu mai, ko kotou ka mmuna, ‘E fai ke vera,’ tera vevera arei. 56Faoa taataa laoi! Ko kotou ka ma ono kia taangata nei ma te vaerangi, maanatu rei ko kotou ki te vaerangi; sea na atamai ko kotou si see kotou iroa ina ko te atamai o vasia nei?

Faka laoi ki ou faoa e tookai mai

(Mat 5.25–26)

57“Ea si see fai maso kotou o faka taka kia nea e tonu ke fai? 58Kae se tangata e nai faka anga sia ke nai kaavea ko kee ki te faka tautara, fai o faka laoi kiei i ou mo vasia e koi fai, tera koia ka se nai kavea ria ko kee ki te tangata o te faka tautara oa fono, ma te tangata oa fono ka se nai soria ko kee ki nga polisi, tera ko kee ka tuku ki te fare pono pono. 59Tera kuou e faka ari atu rei kia ko kee, ko kee ka se ma au rei ki tua oko rei ku kee tauvia ria ko tau malai.”

Currently Selected:

Luke 12: TKP

Highlight

Copy

Compare