Luke 11

Fakaako ranga a Jesus ki fai rotu

(Mat 6.9–13; 7.7–11)

1Take vasia ko Jesus noko rotu i te ngangea. Vasia koia ne faka oti iei, te tangata i na kau fanonga ne muna atu kiei, “Te Ariki ee, ako mai komatou ki te fai rotu pea John ne ako ea koia ko na kau fanonga.”

2Muna atu rei ko Jesus kia ratou, “Vasia kotou ka rotu iei, rotu faka peinei:

‘Pa ee:

tou ingoa e tapu ke faka epa ria;

tou Kainanga ke au.

3Sori mai kia matou koa mo kai mo te aso nei.

4Faka ngaromia mai ko amatou sara,

natafito e matou faka ngaromia koa sara oa faoa kaatoa e fai mai kia matou.

Ma kau see aumai komatou ki te titipea ranga.’ ”

5Tera muna atu rei ko Jesus ki na kau fanonga, “Pe se nea ia kotou ke fai poi rei ki te paito o na soavaka i turua poo, o muna atu kiei, ‘Soa ee, sori mai mua raa foi preti ke toru. 6Toku soavaka ne au e songoi au ki toku paito, kae siei rei pe ni mo kai ke naa ke sori kiei!’ 7Kae tou soavaka ke fai tongoi mai rei i na rota paito, ‘Kau see faka ova mai kia kuou! Te urufanga ku sai, aku tamariki ma kuou ku mee. Kuou ka se ma tokai ake rei ki runga o sori atu pe nia kia ko kee.’ 8Taa arei?! Kuou ka faka ari atu kia kotou, kae moa rei koia ka see tuu ake o sori atu te foi preti natafito ko kee na soavaka, kae koia ka tuu ake ki runga o sori atu kia kee a nea katoa e fifia ko kee kiei, natafito ko kee see faka maa ma tau kaisi.

9“Ma tera kuou ka faka ari atu kia kotou: Kaaisi, ka soria atu. Faara, ka kotou maua ria. Fiti fiti, te urufanga ka sara atu kia kotou. 10Ki te faoa kaatoa e kaaisi ka sori atu, ma pe koai e faara ka ratou maua, ma te urufanga ka sara kia koratou e fiti fiti.

11“Se nea ia kotou i nga mmana ka sori ki tana tama te sineke i vasia koia e kaisi atu ki foi ika? 12O pe ko kee ka sori kiei te morokau i vasia koia e kaisi ki te foi fuei? 13Kotou moa rei e pariki, kae e kotou iroa ina koa nea laoi ke sori ki otou tama. Tera rei, ka ravea atu rei ko te Mmana i te vaerangi ka sori na Mauri Tapu kia koratou e kaaisi kiei!”

Jesus ma Beelzebul

(Mat 12.22–30; Mak 3.20–27)

14Jesus ne nai fueina ki tua te atua pariki kae si se ma muna. Vasia te atua pariki ne poi kese ki tua, tafito raa ko te tangata o tau araara. Te kano fenua ku mmate ko aratou tino, 15#Mat 9.34; 10.25.kae rake faoa i te kano fenua e mmuna, “Ko Beelzebul te ariki o nga atua pariki ne sori kiei ko te manuu ke nai fueina kese koratou.”

16 # Mat 12.38; 16.1; Mak 8.11. Rake faoa e fifia rei ke maataki ko Jesus, tera koratou ne muna atu kia koia ke fai ko te furisanga ke faka ari koia ne faka tonu e Tupua. 17Kae ko Jesus e nai iroa ina aratou maanatu, tera muna atu arei kia ratou, “Se fenua sokotasi ke vae rua maso koia i na kanoa fenua o featu maso koratou, ka si see roa ake! Te kanoa paito ke vae maso koratou, ka fare kese kese. 18Kae te kainanga o Satan ke fai ko ana kano featunga maso koratou, ka roa faka fefea? Kotou e mmuna, kuou e fue kese ko nga atua pariki natafito ko Beelzebul ne sori mai kia kuou ko na makeke. 19Kae teinei rei taku kee fai fue kese ko nga atua pariki, koai rei ne nai soria atu kia otou faoa ko te mana ke fue kese koratou? Otou kee faoa e faka aria atu ko kotou e sara! 20Kae kuou e fue kese rei ko nga atua pariki i te manuu o Tupua, tera e faka ari mai rei te Kainanga o Tupua ku au ia kotou ku oti.

21“Vasia te tangata makeke ma ana aranga tau ne pena pena, o reo ko na kee paito, ma ana kope kopenga kaatoa ka naa laoi. 22Kae vasia te tangata e makeke sapa ma koia e nai featu riaina koia, te tangata e makeke sapa ka nai saua kesea ko ana aranga tau noko paanaki koia kiei, tera vae rei ana kope kopenga ne sau faka kaiaa.

23 # Mak 9.40. “Pe koai siei o oku, koia e nai kivimata riaina kuou; pe koai si se nai soakina kuou ke taanaki, koia maori rei e seveki.

Te foki mai ranga o te atua pariki

(Mat 12.43–45)

24“Vasia o te atua pariki e poi ki tua ma te tangata, koia saere rei o poi i te fenua paku paku ono ono ki se ngangea mana maanava. Kae siei se ngangea ke nai maua, te atua muna rei maso koia, ‘Kuou ka foki ki toku paito ne au mai iei.’ 25Tera foki rei o poi mau atu rei ea koia te paito e tulaavaki, kae ku saaro ku maa, ma e taurekareka. 26Ta foki rei o poi o sau mai rake atua e pariki sapa rei e toka fitu, tera taki mai arei o fare i te paito nei. Tera i te fakaoti anga te tangata nei ku pariki sapa rei mai te vasia ne fakatafito iei.”

Te vaki vaki maori

27Vasia o Jesus ne muna faka peinei, te maatua fafine ne karanga ake i te kano fenua o muna kia koia, “Fakatapu ria ko te maatua fafine ne nai faanaua, ma ne nai faka saerea ko kee!”

28Kae tongoi atu rei ko Jesus, “Fakatapu ria tonu ia koratou e fakarongo ma e tautari kia taranga a Tupua.”

Te furisanga o Jonah

(Mat 12.38–42)

29 # Mat 16.4; Mak 8.12. Vasia o te kano fenua ne rofi mai kia Jesus, koia ne muna atu, “Tau tupu ranga pariki oa aso nei! Koratou e kaaisi ki se furisanga, kae siei pe nia ka sori kia ratou, kae te furisanga fuarei o Jonah. 30Ia tukunga sokotasi ko te furisanga o te ʻprophetʼ Jonah, te faka mailonga ki te kano fenua o Nineveh, tera i te riu ara sokotasi te Tama a Tangata ka fai te faka mailonga ki te kano fenua oa aso nei. 31I te Aso o te Faka tautara, te Kuini o Sheba, ka tuu ake ki runga, o nai faka tautara sia ko te kano fenua oa aso nei, natafito koia ne au rei mai te mmao anga mai na fenua ke fakarongo kia mata purotu oa fakaako ranga a Solomon. Kae kuou e faka ari atu kia kotou: Te tangata e naa i kunei, e sapa rei ma Solomon. 32I te aso e faka tautara ria iei, te kano fenua o Nineveh ka turaki ki runga o ratou faka tautara ria kotou, natafito koratou ne taafuri kese mai ia ratou sara i ratou vasia ne fakarongo ki te tuufaki a Jonah. Kae kuou ka faka ari atu rei kia kotou: Te nea e naa i kunei e sapa rei ma Jonah!

Te maarama o te tino

(Mat 5.15; 6.22–23)

33 # Mat 5.15; Mak 4.21; Luk 8.16. “Siei pe koai ke tutu te laiti, o fuu ea koia, o pe purou ki te kumete. Kae koia e tuku rei ki na tuuranga ke ravea ina e te kano fenua e fe urufi mai ki roto iei. 34Ou kafi mata e fai pe te faka maarama ki tou tino. Kae ou kafi mata ka atetea, tou tino kaatoa ka maarama fakaoti rei. Kae vasia ou kafi mata e pariki iei, tou tino kaatoa ka kau pouri katoa rei. 35Faka matakite tera, ko te maarama ke naa ia kee, siei te pouri. 36Kae, tera, tou tino e maarama kaatoa rei, siei se mo ngangea ke kau pouri, iei ka fai ke aata kaatoa rei, pe vasia te laiti e ata ata kia kee, ma na maarama e sapa rei.”

Jesus e nai faka tautara siaina ko nga Pharisee ma nga fakaako oa Fono

(Mat 23.1–36; Mak 12.38–40)

37Vasia o Jesus ku faka oti tana araara fanga iei, te foi Pharisee ne kafia ea koia ke rau kau kai i na paito. Tera poi rei koia o nofo ki raro ke kai. 38Te foi Pharisee ku mmate ko ana tino i vasia ku nai iroa ina ko Jesus si se ne furu mua ko ana rima ta kai raa. 39Tera te Ariki muna atu rei kiei, “Kotou koia, nga Pharisee e furu koa tua otou faangongo ma longi, kae i roto ia e pii ia atamai faka taki pariki ma te pouri e maatea rei. 40Kotou kano fenua kausi! Ea, Tupua se ne nai pena ria ko tua ma roto fokia?! 41Kae sori tonu ia pe nia e naa i roto i otou riu faangongo ma i otou riu longi ki te faka arofa, tera a nea kaatoa ka furu ke maa motou.

42“E fakaruru faka arofa maatea rei kia kotou nga Pharisee! Natafito kotou e sori koa faka fuanga furu i otou kopenga e vikilake, fakapera rei pea fai nea faka rave kai ke kara, mai i otou tofi a ʻmintʼ ma ʻrueʼ, kae kotou tiakina rei ko te laoi ma te fakapere ki Tupua. Konei a nea ke fai fekauaki ea kotou, ka see tiaki koa rake nea.

43“E fakaruru faka arofa maatea rei kia kotou nga Pharisee! Natafito kotou e fifia maatea ke kotou fare kia noforanga laoi ia paito taanaki ma ke arofa tia, ma ke faka epa ria ia ngangea makete. 44E fakaruru faka arofa maatea rei kia kotou! Natafito kotou e fai pe faoa se ne faka mailonga ria ko aratou tano, tera e fai taka fanga te kano fenua kiei, si see ratou iroa ina.”

45Te nea oa fakaako oa Fono ne muna atu kiei, “Te fakaako ee, vasia ko kee e muna faka peinei, ko kee e muna pariki mai kia matou fokia!”

46Tongoi atu rei ko Jesus, “E fakaruru faka arofa maatea rei kia kotou nga fakaako oa Fono! Kotou faka lupe lupea riaina ke mafa tiaina i otou fono ki te kano fenua, kae kotou ia ka si see ma poo atu otou foi matikao ke sosoa kia ratou. 47E fakaruru faka arofa maatea rei kia kotou! Natafito kotou e fai koa tano laoi mo nga ʻprophetʼ, koa ʻprophetʼ ne taia ria e otou puna i mua. 48Tera, kotou maso kotou e faka ari kotou e faka tonu rei pe nia ma otou puna ne fai. Natafito ne ratou taia mate arei ko nga ʻprophetʼ, kae kotou pena ria ratou tano. 49Natafito ia atamai nei, Tupua i tana mata purotu ne muna, ‘Kuou ka fakkau kia ratou nga ʻprophetʼ ma nga kave rongo, ma rake faoa i ratou ka tamatea riaina, ma rake faoa ka fai pariki tiaina!’ 50Tera te kano fenua o vasia nei ka fakkiroa ina kia tamate mate ranga o nga ʻprophetʼ kaatoa ne taia riaina tafito mai rei i te faka tupu ranga oa taangata nei, 51mai te tamate anga o Abel ki te tamate anga o Zechariah, koia ne taia riaina i te vasia i roto o te mua faitoka ma te Noforanga Tapu o Tupua. E tonu, kuou e faka ari atu kia kotou, te kano fenua o te vasia nei ka fakkiroa mo ratou kaatoa rei!

52“E fakaruru faka arofa maatea rei kia kotou, nga fakaako oa Fono! Natafito kotou ne fuu ko te kii o te urufanga ki te poto maori; kae maso kotou ka see fe urufi ki roto, kae kotou mono mono tia rei pe koai ma e fai ke fe urufi ki roto!”

53Vasia o Jesus ku poi kese ma ngangea, nga fakaako oa Fono ma nga Pharisee ku fakatafito o fai fai ngutu maatea rei kiei, ma e ratou siri siri koia kia nea kaatoa, 54ma e fai o faara ki se ngangea ke ratou maua riaina koia ne muna sara iei.

Currently Selected:

Luke 11: TKP

Highlight

Copy

Compare