Acts 5
5
Ananias ma Sapphira
1Kae te tangata na ingoa ko Ananias, na nofine na ingoa ko Sapphira. Koraua ne fai tauvi koa rau kere, 2kae tuku rei ko rake mane ma ana ia, na nofine ne nai iroa ina, ma ne sori ko rake mane ki te kau fai fekau.
3Peter ne muna atu kiei, “Ananias, sea natafito ku tuku ea kee ko Satan ke oono i tou fatu manava, ma ko kee ku lelesi ki te Mauri Tapu o Tupua, o tuku ko rake mane ma au ia mai ia kere? 4Ea, siki a au i vasia i mua ne fai tauvi ea kee naa? I vasia ne fai tauvi ea kee naa, a mane na siki a au ia? Sea rei natafito ko kee ne fai o maanatu o fai ko te ngangea nei? Ko kee ku see lelesi ki nga taangata, kae ku lelesi ki Tupua!”
5I vasia o Ananias ne fakarongo kiei nei, koia ne faka tekaia rei ki raro ku mate, ma koratou kaatoa ne fakarongo kiei nei, ku maatea rei ratou maattaku. 6Nga taangata muri ne fe urufi mai ki roto, o sau ko na tino o tanu.
7Ia tua oa foi aoa e toru, kae uru mai ko na nofine ki roto, kae si se nai iroa ina pe nia ne faia riaina ki na matua. 8Peter ne muna atu kiei, “Faka ari mai kia kuou, a nea nei a mane kaatoa rei a tou matua ne fai tauvi koru kere kiei?”
Tongoi atu rei, “Faka maori, a mane kaatoa rei!”
9Tera ko Peter muna atu rei kiei, “Sea natafito ko kee ma tou matua, ne koru maatakina ria ko te Mauri Tapu o te Tupua? Nga taangata ne tanu tou matua, e fetari mai i te urufanga. Ko kee ka tanu ea ratou fokia!” 10I vakanga koia ne faka tekaia rei ki raro ku mate. Nga taangata muri ne fe urufi mai ki roto, ono kiei ku mate. Tera koratou ne kave o tanu ki faasi o na matua e tanu iei. 11Te kano rotu kaatoa rei ma rake faoa ne fakarongo kiei nei, ku maatea rei ratou maattaku.
A furisanga ma a ngangea faka mate tino
12E maatea koa furisanga ma a ngangea faka mate tino a te kano kau fai fekau ne fai fekauaki ki te kano fenua. Te kano rotu kaatoa rei ne taanaki ki roto o purii ki te fare faka maru maru e ati kia Solomon. 13Siei pe koai rei i tua ne soko kia ratou, moa rei te kano fenua ne araara fakapuu kia ratou. 14Kae temate rei ko nga taangata ma nga maatua faafine ku fakatonu ki te Ariki, ma ku taanaki ki aratou kano faoa. 15I aratou fai fekauaki ranga, te kano fenua ngae ngae ku aumai ia ratou meeranga kia vaevae ara, tera i vasia o Peter e saere iei, na aata ke faka maroro ria fuarei ko rake faoa ia ratou. 16E tokkapi rei te kano fenua ne oomai mai nga noforanga e riikofi vakai i Jerusalem, e aumai ko aratou faoa ngae ngae, ma ratou faoa ne urufia ina e nga atua pariki, ma koratou kaatoa ku faka maroro ria peka rei.
Te kau fai fekau e fai pariki tia
17Tera te Maurunga o nga Pure Fai kava ma tana kano faoa kaatoa rei, e kau i te kano faoa o nga Sadducee, ku maatea rei ratou maakau ki te kau fai fekau. 18Koratou ne puke ko nga kau fai fekau, o tuku ea ratou ki te fare pono pono o te kano fenua. 19Kae i te poo ai, te ʻangelʼ o te Ariki ne ssara ea koia koa urufanga o te fare pono pono, ne nai takina ko te kano kau fai fekau ki tua, ma ne muna atu kia ratou, 20“Oro turaki i rota Paito Tapu, o faka ari ari ki te kano fenua ki te ora foou.” 21Te kano fai fekau ne tautari, ma i te pongi pongi koratou ne fe urufi ki rota Paito Tapu o fakatafito fakaako.
Te Maurunga o nga Pure Fai kava ma tana kano faoa ne kafi ke taanaki mai ki roto kaatoa rei ma nga matapure ke fai koratou Kau Fono fono lasi. Tera koratou ne kafi ki te fare pono pono ke aumai ko te kau fai fekau kia ratou. 22Kae i vasia o te faoa ne kave i te fekau ne oko ki te fare pono pono, te kau fai fekau e laavaki iei. Tera koratou ne foki ki te Kau Fono fono o faka ari kia ratou, 23“Vasia omatou ne oko ki te fare pono pono iei, a urufanga e sai ngiti rei, ma nga faoa reo e turaki e reosaki koa urufanga. Kae vasia omatou ne sara koa urufanga iei, siei pe koai i roto, e tuu laavaki!” 24I vasia o nga ariki fai kava ma te pure e oono i te faoa reosaki o te Paito Tapu ne fakarongo kiei, ku mmate ko aratou tino pe ne fai faka fefea ko te kau fai fekau nei. 25Tera te tangata ne uru mai ki roto o faka ari atu kia ratou, “Fakarongo rei! Nga taangata ne tuku ea kotou ki te fare pono pono, koratou e turaki i rota Paito Tapu, e fakaako ko te kano fenua!” 26Tera te pure ne poi ma tana kano faoa, ke fokisaki mai ko te kau fai fekau. Koratou si se ne faka oso, natafito i te kano fenua nae tau fatu riaina koratou.
27Ne aumai ea ratou ko te kau fai fekau, o faka tuu ia mua o te Kau Fono fono, ma te Maurunga o nga Pure Fai kava ne fesiri kia koratou, 28#Mat 27.25.“Komatou ne taufau atu fakamate rei kia kotou ka see fakaako i te ingoa o te tangata nei, kae ono rei ki otou nea ku fai nei! Otou fakaako ranga ku kavea saere rei i Jerusalem katoa, ma ko kotou e fifia rei ko na mate nei ke tukuakina ria kia komatou!”
29Peter ma rake kano kau fai fekau ne tongoi kia ratou, “Komatou ke tautari rei ki Tupua, siei ki nga taangata. 30Te Tupua oa tatou puna ne nai faka masike riaina ko Jesus mai na mate ranga, ia tua ne kotou tamatea riaina o tukia ki fongo raakau. 31Tupua ne nai faka masike riaina ki na faasi matau, pe te Afu Ariki ma te Faka sao, ke nai faka atetea riaina ki te kano fenua o Israel, ke siaki ko aratou tukunga pariki, ma ko aratou sara ke faka ngaromia ina. 32Komatou e araara faki koa nea nei ma te Tupua Tapu, iei te sori a Tupua kia ratou e tautari kiei.”
33Vasia o te kano faoa o te Kau Fono fono ne fakarongo kiei, koratou ku maatea rei ratou teke, koratou ku fai rei ke tamate mate ko te kau fai fekau. 34Kae te tangata sokotasi ia ratou, te foi Pharisee na ingoa ko Gamaliel, te fakaako oa Fono, koia e faka epa riaina e te kano fenua kaatoa, ne tuu ki runga i te Kau Fono fono. Koia ne muna ki te kau fai fekau ke kave ki tua mo vasia molakea. 35Tera koia ne muna atu ki te Kau Fono fono, “Nga taangata o Israel, faka matakite pe nia mo tou e fai ke fai ki nga taangata nei. 36Ia vasia ki mua, ko Theudas ne fai fekauaki, o muna koia te tangata sapa, ma te tino te rau e faa (400) o nga taangata ne soko kiei, kae koia nei ne tamatea riaina, ma na kau fanonga kaatoa ne matofa vare saere rei, ma ana fainga fekau ne faka oti arei. 37Ia tua nei, ko Judas te foi Galilee ne fai fekauaki i te vasia o te kano fenua e tau iei. Koia ne nai takina ko te kano fenua fokia, kae koia fokia ne tamatea riaina, ma na kau fanonga kaatoa ne matofa vare arei. 38Ta tera i te fai ngangea nei, kuou ka faka ari atu kia kotou, ka see fai pe nia mo tou ki nga taangata nei. Tuku koratou ia ke fai! Kae aumai rei ratou atamai ma fainga fekau nei mai a taangata nei, ka faka lekutia. 39Kae aumai rei mai Tupua, ko kotou ka ngaua fuarei o fai kia ratou. Kotou e featu maso kotou ki Tupua!”
Te Kau Fono fono ne tautari kia taranga a Gamaliel. 40Koratou ne kaaranga ki te kau fai fekau ke aumai ki roto, sasa koratou, ma ne taufau atu rei ka see araara faki ko te ingoa o Jesus, ta tera tuku koratou ke oro. 41Te kau fai fekau ku oro kese ma te Kau Fono fono, ku maatea ratou vaki vaki sapa, natafito koratou ku faia riaina ke faka maa ia fakarongo neaisu anga tafito i te ingoa o Jesus. 42Ma nga aso katoa i rota Paito Tapu, ma i nga paito o te kano fenua, koratou e akonaki ma e tuufaki arei ko te Rongo Laoi o Jesus te Ariki Fakaroro.
© 2025 Wycliffe Bible Translators, Inc.