Acts 4
4
Peter ma John i mua o te Kau Fono fono
1Peter ma John e koi tau araara ki te kano fenua, vasia nga ariki fai kava, ma te fakarongo ranga o faoa reosaki o te Paito Tapu, ma nga Sadducee ne oko mai ki raua. 2Koratou ku teke, natafito tau toka rua o kau fai fekau nei e akonaki ko te kano fenua kia Jesus ku faka masike riaina mai te mate, iei e faka tonu sia riaina rei ta ko te mate ka maasike ki te ora. 3Tera ne ratou pukea ria koraua, o tuku ki te fare pono pono, oko rei ki take aso, natafito ku afi afi ko fenua. 4Kae temate rei ia ratou ne fakarongo kia raua ne fakattonu, ma te fakataunga o nga taangata ne oko rei kia afe e rima (5,000).
5Take aso koa fakarongo ranga o nga Jew, nga matapure, ma nga fakaako oa tukunga ne taanaki i Jerusalem. 6Koratou ne fekitei ma te Maurunga o nga Pure Fai kava ko Annas, ma Caiaphas, ma John, ma Alexander, ma rake faoa i te kanoa paito o te Maurunga o nga Pure Fai kava. 7Koratou ne fai te kau fai fekau nei ke turaki ia ratou mua, ma ne feesiri kia raua, “Faka fefea korua ne fai nei? Se makeke koai korua ne fai? Oai te ingoa ne fai fekauaki e korua?”
8Peter e nofo riaina e te Mauri Tapu o Tupua, ne nai tongoia koratou, “Kotou nga taki o te kano fenua, ma nga matapure: 9Kae komaua e siria ina i te aso nei ki te manava arofa ne faia riaina ki te tangata tino mate ke maroro laoi, 10tera ke kotou iroa ina, kotou rei ma te kano fenua kaatoa i Israel, ko te tangata e tuu nei, ne faka maroro ria ki te mana o te ingoa o Jesus Christ o Nazareth, koia ne kotou tamatea riaina, ma Tupua ne nai faka masike riaina mai te mate. 11Jesus te tangata ne munakina e te Tusi ranga o te Pepa Tapu,
‘Te fatu ku tiakina riaina ea kotou te faoa taa paito,
e furisia ake ki tua te matuaa fatu rei.’
12“Te faka sao ranga e mau riaina ia koia fuarei, natafito siei pe koai ia taangata kaatoa nei na ingoa ne soria ina e Tupua ki nga taangata, ia koia fuarei kotatou ka faka saofia.”
13Te kano faoa o te kau araara fanga ku fereki ko aratou mauri, ke ono kia Peter ma John ki rau fai muna faka mata purotu, mae ke ratou iroa ina koraua a taangata si se ne akona riaina. Tera ku fiti ake ia ratou roto koraua noko kau fanonga ma Jesus. 14Kae siei pe nia ma ratou ke mmuna kiei, natafito koratou ku ono ko te tangata ne rau faia ke maroro, e fetau turaki koratou ma Peter ma John i ngangea. 15Tera koratou ne mmuna atu kia raua ke oro kese ma te Kau Fono fono i rota paito, ma ne fakatafito o tau araara maso koratou. 16Koratou ne feesiri, “A nia ma tatou ka fai ki nga taangata nei? Faoa kaatoa rei e farenaki i Jerusalem ku ratou iroa ina ko te furisanga ne fai fekauaki ea koraua nei, ma ka see tatou lesia riaina. 17Kae ke pii tia koa nea nei ka see akonaki saere ki te kano fenua, tatou faka iro ki nga taangata nei ka see fai fokia ke araara pe kiai i te ingoa o Jesus.”
18Tera koratou ne kaaranga kia raua ke foki mai ki roto, ma ne faka ari kia raua, ma ne taufau atu ka see araara faki pe ke fakaako i te ingoa o Jesus. 19Kae ko Peter ma John ne tongoi atu kia ratou, “Ko kotou maso kotou e kotou iroa ina, ko fea e tonu i faasi o Tupua, ke tautari atu kia kotou, pe ke tautari ki Tupua. 20Natafito komaua ka si see ma faka oti rei koa mau araara fanga ki pe nia ma maua ku ono mata ma ku rongo kiei.” 21Te Kau Fono fono ne taufau fakamate atu rei kia raua, ma tera ne tuku koraua ke oro. Ku see ratou maua rei ko se atamai ke fakkiroa koraua, natafito te kano fenua ku rausapai kaatoa rei ki Tupua ki pe nia ma raua ne fai. 22Tera te tangata ne fai fekauaki ko te furisanga kiei nei, ko ana tau ku sara i te fua faa.
Te kano rotu e rotu ke faka makeke ria
23I rau vasia ku tukuna ke oro iei, Peter ma John ne foki ki ratou kano faoa, ma ne faka ari atu kia ratou pe nia ma nga ariki fai kava ma nga matapure ne mmuna mai kiei. 24Vasia oratou ne fakarongo kiei, koratou ne taanaki ki ratou rotu kaatoa rei ki Tupua: “Te Ariki, ma te Faka tupunga o te vaerangi, te kere, ma te moana, ma a nea kaatoa rei i roto! 25Ia atamai o te Mauri Tapu o Tupua ne kee munakina ki matou puna David, tau seka, i vasia koia ne muna:
‘Sea natafito te kano fenua pouri ku maatea rei ratou fai teke?
Sea natafito te kano fenua ne tukuaki pouri o faka seke atamai?
26Nga tii oa taangata nei ne pena pena maso koratou,
ma nga fakarongo ranga ne taanaki ki roto o firi ki Tupua ma na Ariki Fakaroro.’
27 #
Mat 27.1,2; Mak 15.1; Luk 23.1,7–11; Jon 18.28,29. “Natafito e tonu rei ko Herod ma Pontius Pilate ne taanaki ki roto i te noforanga nei, ma te kano fenua pouri ma te kano fenua o Israel, o firi kia Jesus, tau Seka tapu, koia ne kee faia riaina ko te Ariki Fakaroro. 28Koratou ne taanaki ke fai koa nea kaatoa a au ku oti na faka maanatu ke fai fekauaki i tou makeke ma ou tukunga. 29Ta vasia nei, te Ariki ee, ono rei ki aratou fainga ne fai mai nei, ma tukua mai kia matou, ou taangata fai fekau, ke araara fakina ko au taranga ma te faka poto kaatoa rei. 30Fora ki tua tou rima o ikirave, ma tuku mai koa furisanga ma a ngangea faka mate tino, ke fai fekauaki i te ingoa o tou Seka tapu ko Jesus.”
31I vasia ku faka oti koratou rotu iei, te ngangea oratou ku taanaki iei ku ruuvia riaina. Koratou kaatoa rei ku urufia riaina e te Mauri Tapu o Tupua, ma ku fakatafito o araara faki koa taranga a Tupua ma te makeke.
Te fenua fakatonu e fai taanaki
32 #
Act 2.44,45. Te kano rotu kaatoa ku poi rei i te atamai sokotasi. Siei pe koai ke muna ana nea a ana ia, kae koratou kaatoa ku vaevae rei ia ratou kopenga kaatoa e fai. 33I te makeke ranga sapa, te kau fai fekau ne ratou araara fakina ko te masike ranga o te Ariki Jesus, ma Tupua ne nai fakatapu riaina koratou kaatoa rei. 34Siei rei pe koai i te kano faoa ke faka arofa. Koratou e fai ko aratou tofi, pea paito, e fai tauvi riaina, ma aumai koa mane, 35sori rei ki te kau fai fekau, ma a mane ka vaevae tautari ki aratou fifia taki tasi.
36Tera ko Joseph, te foi Levite ne faanau i Cyprus, koia te kau fai fekau e ati ko Barnabas (na atamai, “Koia e faka poto poto”), 37ne nai fai tauvi riaina ko na tofi, aumai koa mane, sori rei ki te kau fai fekau.
Currently Selected:
Acts 4: TKP
Highlight
Copy
Compare
Share
Want to have your highlights saved across all your devices? Sign up or sign in
© 2025 Wycliffe Bible Translators, Inc.