Acts 6
6
Te faka patino ranga o te kau e toka fitu
1Mo vasia ki muri, te kano faoa o te kau fanonga e soko mau mai fuarei, ku fakatafito o faka marau raua taranga ko nga Jew ma nga Jew e araara ia taranga faka Greek. Ko nga Jew e araara ia taranga faka Greek e fiso kia sori oa ratou maatua tangi soa si see faia faka laoi. 2Tera te kau fai fekau e tino angafuru ma rua ne taanaki mai ko te kau fanonga kaatoa rei ki roto, ma ne mmuna atu, “Si see laoi kia matou ke tuku ki tua koa tuufaki ranga oa taranga a Tupua, kae ke fai koa fainga fekau oa mane. 3Tera taina ma ee, faka patino ni taangata ke toka fitu ia kotou, koratou e nofo riaina e te Mauri Tapu o Tupua, ma e mata purotu, ma ka tuku ea tatou ke oono ia fai ngangea nei. 4Kae komatou ia ka rotu atu ma ka fai fekau kia tuufaki ranga oa taranga.”
5Te kano faoa kaatoa rei ku fifia ki te atamai a te kau fai fekau. Tera koratou ne faka patino ko Stephen, te tangata e maatea na fakatonu ma e nofo riaina e te Mauri Tapu, Philip, Prochorus, Nicanor, Timon, Parmenas, ma Nicolaus te Gentile mai Antioch koia ne furisia ki faka Jew. 6Te kano faoa nei, ne kave ea ratou ki te kau fai fekau. Koratou ne rotu ma ne tuku ko aratou rima kia ratou.
7Ta tera a taranga a Tupua e rongo rongo saki saere. Te kau fanonga i Jerusalem ku mate rei na tokarava, ma temate rei ko nga pure fai kava ku fakatonu.
Ko Stephen ku pukea riaina
8Ko Stephen, te tangata ku fakatapu riaina e Tupua ki na makeke, ku nai fai fekauaki riaina koa ngangea faka mate tino oa furisanga ki te kano fenua. 9Kae rake taangata ku faka pou kiei, koratou te kano faoa o te paito taanaki o nga taangata e ati “Te Faoa ku Tau atetea”, iei ko nga Jew mai Cyrene ma Alexandria, ma rake Jew mai Cilisia ma Asia, koratou ne fakatafito taua taranga ma Stephen. 10Kae te Mauri Tapu o Tupua ne sori ko te purotu kia Stephen, i vasia koia e muna iei, tera siei pe koai ke nai tongoia. 11Tera ne tau koratou purenga ki rake taangata ke mmuna, “Komatou ne fakarongo kiei, ne muna faka puaka kia Moses ma ki Tupua!” 12Ia atamai nei, ku ratou faia riaina ko te kano fenua ma nga matapure, ma nga fakaako oa tukunga ke faka teke teke. Koratou ne oomai o puke ko Stephen o sau ki te Kau Fono fono. 13Tera koratou ne aumai ko rake taangata, ke faka ari ko aratou loi kiei, “Te tangata nei, koia e araara pariki mau rei ki tatou Paito Tapu ma kia Fono a Moses. 14Komatou ne fakarongo kiei, e muna kia Jesus o Nazareth ka nai ofa akina ko te Paito Tapu nei, ma ka nai siakina ko atatou tukunga ne sori mai kia Moses!” 15Koratou kaatoa rei e farenaki i te Kau Fono fono, ku tuu ko aratou mata kia Stephen, ma ne ratou ravea ina koa mata o Stephen ku fai pe te ʻangelʼ.
© 2025 Wycliffe Bible Translators, Inc.