Kufuma 6
6
1Inzi Yawe waamwanine Musa nangue, “Wewe wakaba kumona vinakaba kumukitila Farao, pantu nakaba kumupatikizia na maka ane kuti akabe kubetabizia kuya. Kisinka Farao wakaba kubakumba mu kyalo kyakue.”
Leza wamukuuta Musa paakale
2 #
Kut 17.1; 28.3; 35.11; Kuf 3.13-15 Kabili Leza waamwanine Musa nangue, “Nene ndi Yawe. 3Naifyulile kuli Abrahamu, kuli Izaaki ni Yakobo, nga Leza wa Maka onse, inzi nsyaifyulile mu Liina lya bu Yawe kuli bene. 4Kabili naapingheene nabo ni kubalaya nangue naakabapeela kyalo kya Kanaani, momo mu baali baikeele nga baeni. 5Nene nakyunvua malilo a Baizraeli kukonkana ni vibalimukupatikiziiwa na Bamisri kubomba miilo ya buzia. Ni pakako, nakilangakana kipingo kinaapingheene nabo. 6Kansi ana Baizraeli nangue, ‘Nene ndi Yawe, nakaba kumifumia mu mutembo umutwikilue na Bamisri. Nakaba kumifumia mu buzia bubamiteekele, nakaba kubakanda bubi bubi ni kumilubula na maka ane. 7Nakaba kumyalula kuba bantu bane. Nene naakaba Leza wenu, kabili mwaakamana nangue nene i Yawe Leza wenu waamifumiizie mu buzia ku Misri. 8Nene naakamitwala mu kyalo kinaamulaile Abrahamu, ni Izaaki pamo ni Yakobo. Keki kyalo naakamipeela kuti kikabe kyenu, pantu nene ndi Yawe.’” 9Ni pakako, Musa waabaanine Baizraeli twebo twaalandile Yawe, inzi bene tebaamutwiliziizie pa mulandu wa mutima misa, ni pa mulandu wa buzia bubi bubaali bateekelue.
10Yawe i pakumwana Musa nangue, 11“Endo umwane Farao likolo wa mu Misri abapeele Baizraeli nsambu ya kufuma mu kyalo kyakue.”
12Inzi Musa waamwanine Yawe nangue, “Bantu bane tebalimukunghunvua ata kaniini. Ale Farao kuti wanghunvua syani ne aliwameemeetela?”
13Yawe i pakumwana Musa ni Haruni palua Baizraeli nangue, “Mwane Farao likolo wa ku Misri afumie Baizraeli mu Misri.”
Babikolue bakua Musa ni Haruni
14Babikolue ba mu mikowa ya Baizraeli meena abo ni aza: Bena Rubeni, libeli wakua Izraeli, meena abo ni aza: Hanoki, ni Palu, ni Hesroni pamo ni Karmi. Baba i ba mu lupua lwakua Rubeni. 15Bena Simeoni meena abo ni aza: Yemueli, ni Yamini, ni Ohadu, ni Yakini, ni Zohari pamo ni Sauli mwina mwanakazi Mukanaani. Baba i ba mu lupua lwakua Simeoni. 16#Mpe 3.17-20; 26.57-58; 1 Mil 6.16-19Bena Lawi ni baba: Gershoni, ni Kohati pamo ni Merari. Lawi waikeele pa kyalo myaka 137. 17Bena Gershoni meena abo ni aza: Libni ni Simei, kukonkana ni mikowa yabo. 18Bena Kohati meena abo ni aza: Amramu, ni Izihari, ni Hebroni pamo ni Uzieli. Kohati waikeele pa kyalo myaka 133. 19Bena Merari meena abo ni aza: Mali ni Musi. Baba i babikolue ba mu lupua lwakua Lawi.
20Amramu waupile nghina senge Yokebedi, ozo waamuvyaliile Haruni ni Musa. Amramu waikeele pa kyalo myaka 137. 21Bena Izihari meena abo ni aza: Kora, ni Nefegi pamo ni Sikiri. 22Bena Uzieli meena abo ni aza: Misaeli, ni Elizafani pamo ni Sitiri.
23Haruni waupile Eliseba mwina Abinadabu, nkaziize kwa Nasoni. Eliseba waavyele Nadabu, ni Abihu, ni Eleazari pamo ni Itamari. 24Bena Kora meena abo ni aza: Asiri, ni Elkana, pamo ni Abiasafu. Baba i babikolue ba mu lupua lwakua Kora. 25Eleazari mwina Haruni waupile mwanakazi umo wa pa baana bakazyana bena Putieli, ni ye waavyele mwana mwalalume liina lyakue Finehasi. Baba bonse i baali babikolue ba mu lupua lwa Balawi.
26Haruni ni Musa i ba-aninue na Yawe nangue, “Fumie Baizraeli mu kyalo kya Misri bali mu mabumba mabumba.” 27Baba babili, Musa ni Haruni, i baali balanda ni Farao likolo wa ku Misri palua kufumia Baizraeli mu Misri.
Musa ni Haruni bapeelua mulao na Yawe
28Mu ezio nsiku Yawe lu-aalandile kuli Musa mu kyalo kya Misri, 29waamwanine nangue, “Nene ndi Yawe. Endo umwane Farao likolo wa ku Misri byonse bindikukwana.”
30Inzi Musa waamukanzile Yawe nangue, “Nene nsivinda kukita evio pantu ndinameemeetela. Ale ni kiki kilikulengia Farao kuti antwilizie?”
Currently Selected:
Kufuma 6: KBTP
Highlight
Share
Compare
Copy
Want to have your highlights saved across all your devices? Sign up or sign in
Kitaabua New Testament @The Word For The World Southern Africa. 2023.
