Kufuma 5
5
Musa ni Haruni ntanzi yakua likolo Farao
1Pa kyamba kya kulanda ni masiiko a Baizraeli, Musa ni Haruni baile kumwana Farao nangue, “Yawe Leza wa Baizraeli walanda evi, ‘Baleke bantu bane baye bankitile nsikunkulu mu kaseeba.’”
2Farao waalandile nangue, “Eba, ozo Yawe nani wakuti nghunvue lizui lyakue ni kumwitabizia kuti ndekeele Baizraeli baye? Ozo Yawe nsimumanine, kabili nsivinda kwitabizia kulekeela Baizraeli baye.”
3Musa ni Haruni baalandile evi, “Leza wa Baebrania wakitwana twize kuli wewe. Ale twitabizie tuye lwendo lwa nsiku itatu mu kaseeba, evi tuye tumwelele Yawe Leza wetu ngelelo akeeza kutwipaya na kimina kya malwele ao na bului.”
4Inzi likolo wa ku Misri wa-anine Musa ni Haruni nangue, “Ni kiki kimwakeba kufumiizia bantu ku miilo yabo? Bwelele ku miilo yenu.” 5Kabili Farao waalandile nangue, “Baba bantu bavula kukila Bamisri, ale kimulimwakebela baba bantu batuuzie ni kiki?”
6Bobo bwenka busiku Farao waakuutile bakulu ba Bamisri pamo ni nombozi ya bazia wabaana nangue, 7“Kutula lelo tekuli kupeela bantu bikusi bya kukitilako mabiliki nga vimulimwakita. Baleke baye baikebele bo bene. 8Inzi bakinkizie sie kukita mabiliki ni kukumania mpendua yenka elia pasili kukeefiapo ata limo, pantu baba bantu ni bananghani. Ni pakako i kibalimukunghemiizia balimukulanda nangue, ‘Twitabizie tuye tumwelele Leza wetu ngelelo.’ 9Kizie kupeela baba bantu miilo ikolele, evi basulwile ni kulekela kutwilizia twebo twa bufi.”
10Kupwako, bakulu ba Bamisri pamo ni nombozi ya bazia babaana Baizraeli nangue, “Farao walanda nangue nsikiya namipeela bikusi. 11Endo mwaye mwikebele mwe bene koko kumulikuya kubisangila. Inzi mupalile kukita mpendua ya mabiliki nga mumulimwakitila lyonse.” 12Ni pakako, bantu baasalagheene mu Misri mu kukeba bikusi bya kukitilako mabiliki. 13Banombozi ba bazia baabakonkobeziizie babaana nangue, “Fikilizie mpendua ya mabiliki nga vimwaali mwakita kubalua busiku lutwaali twamipeela bikusi.” 14Bakulu ba Bamisri baatendekele kuuma banombozi ba bazia ba Baizraeli koku balimukubeepuzia nangue, “Ni kiki kyakilengia lukeele ni lelo tekuti mukumanie mpendua ya mabiliki nga vimwakiba mwabomba ku mambo?”
15Ni pakako, banombozi ba bazia ba Baizraeli baile kumupaapaata Farao balanda nangue, “Wakitilaki evi ku fwe babombi bobe? 16Fwefue tetukilimukupeelua bikusi, inzi tulimukwanua tukumanie mpendua ya mabiliki ni kuya twaumua. Keki te kilubo kyetu, inzi ni kilubo kya bantu bobe.”
17Inzi Farao waalandile nangue, “Mwe bananghani! Kisinka muli bananghani, kabili i kimulimukulandila nangue, ‘Twitabizie tuye tumwelele Yawe ngelelo.’ 18Ni evi vyenka bwele muye mubombe! Tekuli muntu alikumipeela bikusi, inzi mupalile mukumanie mpendua yenka elia ya mabiliki amulimwakita kubalua busiku.” 19Kupwako, banombozi ba bazia ba Baizraeli baisanga kuba mu bwavia bukata pantu baabaanine nangue, “Tekuli kutuuzia ata kaniini kine temunakumanienke mpendua ya mabiliki amulimwakita kubalua busiku.”
20Lubaafumine ku kipango kyakua Farao, baile kusaakaana ni Musa pamo ni Haruni baali babapembeele panze. 21Kupwako, bamwana Musa ni Haruni nangue, “Yawe amipingule ni kumikanda, pantu mwakitulengia kukendua na Farao ni babombi bakue, kabili mwakilengia batendeke kutwipaya.”
Musa wamwitendokela Yawe
22Musa waile paakale kuli Yawe ni kumwana nangue, “We Yawe, wakitilaki bobu bwavia pa baba bantu bobe? Ale wakintuminaki kono? 23Pantu kutula busiku bunakingila kwa Farao ni kumwana biwanghanine, kuleetele bwavia bukata ku bantu bobe, kabili teukitilepo kantu ka kulanga nangue waakabapususia!”
Currently Selected:
Kufuma 5: KBTP
Highlight
Share
Compare
Copy
Want to have your highlights saved across all your devices? Sign up or sign in
Kitaabua New Testament @The Word For The World Southern Africa. 2023.
