1 थिस्सलुनीकियो 5
5
जागता रौ
1पण हे भाइयो, परभु रै पाछौ आवण रै वगत अर काळ रै बारै में थांनै कीं लिखणै री जरुत कोनीं है। 2#मत 24:43; लूक 12:39; 2 पत 3:10क्यूंकै थै आप ठीक जांणौ हो की ज्यूं रात में चोर अणचेत आवै है, व्यौंही परभु रौ दिन आवण वाळौ है। 3जद लोग कैवता होवैला, “कुसल है, अर कीं डर कोनीं,” तो उण माथै अणचेत नास आ पड़ैला, जिण तरैह अणचेत जापायती नै पीड़ा। अर वे किणी रीत ऊं नीं बचेला।
4पण हे भाइयो, थै तो अंधारै मांय कोनीं हो की वो दिन थांरै माथै चोर रै ज्यूं आन पड़ै। 5क्यूंकै थै सैंग उजाळै री औळाद अर दिन री औळाद हो। म्हौ नीं रात रा हो, नीं अंधारै रा हो। 6इण वास्तै म्हौ दूजौ रै ज्यूं सूता नीं रौ, पण जागता अर सावचेत रौ। 7क्यूंकै जिकौ सूता है वे रात रा इज सूता है, अर जिकौ मताळा होवै है वे रात रा इज मताळा होवै है। 8#इफि 6:13–17पण अपां जिकौ दिन रा हो, अर खुद रै ऊपर काबू रैवौ हो, विसवास अर परैम री झिलम पैहन नै उद्धार री आसा रौ टोप पैहन सावचेत रौ। 9क्यूंकै परमेसर अपांनै आपरी रीस रै डंड रै खातर कोनीं, पण इण वास्तै ठैराया है की अपां अपणै परभु यीसु मसीह रै तरफ ऊं उद्धार ग्रहण करौ। 10वो अपांरै लियै इण कारण मरयो की अपां चाहे जीवता हो चाहे मरयोड़ा हो, जद वो पाछौ आवैला सगळा मिळन उणरै साथै जीए। 11इण कारण एक दूजै नै सानति दो अर एक दूजै री उनति रौ कारण बणौ, ज्यूं की थै करौ भी हो।
कलीसिया नै आखरी उपदेस
12हे भाइयो, म्हौ थांरै ऊं विनती करौ हो की जिकौ थांरै में मेनत करै है, अर परभु में थौरे अगुवे है, अर थांनै सिकसा दैवै है, उणौ रौ कदर करौ। 13अर उणरै कांम रै कारण परैम रै साथै उणनै घणौ ही आदर रै लायक समझौ। आपस मांय मेल मिलाप ऊं रैवौ। 14हे भाइयो, म्हौ थांनै समझावौ हो की जिकौ लोग आळसी है उणौनै समझाओ, कायरों नै हीमत दो, गरीबो नै संभाळौ, सगळौ रै साथै धीरज राखौ। 15सावचेत! कोई किणी ऊं बुराई रै बदळै बुराई नीं करौ। पण हमेसां भलाई करनै में तैयार रौ, आपस मांय अर सगळौ ऊं भलाई करणै री कोसीस करौ। 16हमेसां आंणंद में रौ। 17लगातार पराथना में लागौड़ा रौ। 18हरैक बात में धन्यवाद करौ। क्यूंकै थौरे वास्तै यीसु मसीह में परमेसर री आहीज इछा है।
19आतमा नै मती बुझाओ। 20भविसवांणियो नै फालतू मत जांणौ। 21सगळी बातां नै परखो। जिकौ चौखी है उणनै पकड़नै राखौ। 22सगळी तरैह री बुराई ऊं बचयोड़ा रैवौ।
आसीरवाद
23सानति रौ परमेसर आप ही थांनै पूरी रीत ऊं पवितर करै। अर थौरी आतमा अर प्रांण अर सरीर म्हौरै परभु यीसु मसीह रै आवण तांई पूरा पूरा निरदोस अर सावळ रै। 24थौरो बुलाणै वाळौ साचौ है, अर वो ऐड़ौ इज करैला।
25हे भाइयो, म्हारै सारू पराथना करौ।
26सगळै भाइयो नै साचै मन ऊं हाथ जोड़ नै नमस्कार करौ। 27म्हैं थांनै परभु रै नाम ऊं आग्या देवूं हूं, की आ चिठ्ठी सगळै भाइयो नै पढ़ायनै सुणावै।
28म्हौरै परभु यीसु मसीह रौ अनुग्रह थांरै माथै होतो रैवै।
Currently Selected:
1 थिस्सलुनीकियो 5: RWR
Highlight
Share
Copy
Want to have your highlights saved across all your devices? Sign up or sign in
© NLCI CC BY-NC-ND 4.0
