Lōma 9
9
Te ikinga a te Atua i ona tāngata
1Ko talatala au i te tika i loto o te Metia, ko yē vativati au, ko toku atamai ko wakaponoa mai i loto o nā wakayaelenga a te Vaelua Yā. 2Kamuloa toku ngākau kopikopia e te tīngā, ko yē tukutuku te tangi. 3Pī mō lāi au kē loimataina, kē yemutia oki ki vao mai te Metia mō oku tāīna, toku ititangata tika, te kakai o Ītalāela. 4Ni tama lave lātou nā te Atua; nō lātou oki te yilatū o te Atua, ana wakapononga, te tuku mainga o te Tule, te tū o te tautapa i te Waleyā, ma ana talatala wakapono. 5Nō lātou oki nā mātutua pāteleāleka,#9:5 nā mātutua pāteleāleka: ko Āpelaama, ko Ītaaka ma Iākōpa teia. maia lātou ia na katilia mai ai te Metia, ko te Atua i lunga o te wī mea tākatoa, kē talapayangia iāna vāia wua atu! Āmene.
6Ko yē talatala au pe te mea na taukole nā talatala a te Atua nā wakapono maí. E kiai oki te wī tāngata o te ulaula o Ītalāela ni tāngata Ītalāela tika. 7E kiai oki lātou ni tama tākatoa nā te Atua, wua atu lātou ni ulaula nā Āpelaama. Eia wua, na mea te Atua pēnei, “Lā loto oki o Ītaaka e maua mai ai tō ulaula āku na wakapono atú.” 8Ēnei tona wakamaepanga, e kiai ko te wī tama pau a te tino tangata na wānanau mai nā tama a te Atua, ko nā kauliki lā o te wakapononga na wānanau mai, ko lātou te wuānga tika a Āpelaama. 9Na mea pēnei oki te wakapononga a te Atua, “Kē oko ki te vāia ka tupu ai, ka niko mai ai au, koa tō ai ma te tama a Tala.”#Kēnete 18:10
10Kāle ai oki ko te mea wua ia. Ko lua tama oki a Lēpeka na akatau wānau mai, nā te matua tāne e tayi, tō tātou tupuna ko Ītaaka. 11I mua ake oki ka wānau mai ai lua tama ia, pēkole, i mua ake lāua ka wai ai i te lelei ma te kino, na oko mai te talatala a te Atua kia Lēpeka. (Ko te manatunga, kē tū lāi te ikianga a te Atua: 12ko yē lā loto oki te ikianga a te Atua o te yanga tangata, ko ona lā ko tauvaloa te tangata.) Eia, mea loa iāna kia Lēpeka, “Ka tāvini te uluaki i te pōtiki.”#Kēnete 25:23 13Pe te tutingia oki e mea pēneí, “Na mina au ia Iākōpa, ko Ētau lā ko veliveli au.”#Malaki 1:2-3
14Ka talatala ai tātou pēwea nō te mea nei, ka mea lā tātou ko yē tautonu nā yanga a te Atua? Ēkole lava! 15Na mea oki iāna pēnei kia Mōte,
“Ka wakaāli au i oku yauyau nunui ki taku tangata wua na manatu ai,
peia toku tū manavaaloa ki te tangata āku na manatu ai.”#Ēkoto 33:19
16Nō kiai, ko yē wai ki nā manatunga tangata ma o lātou vāvenga, ko i nā yauyau nunui lā o te Atua. 17Ēnei nā muna i te Puka Yā na mea kia Pālao, “Ko oku koe na wakatūa wai aliki nō te manatunga nei, kē wakaāli ai i toku mana lā loto o koe, kē vānanga ai oki i toku ingoa ki te ao nei tākatoa.”#Ēkoto 9:16 (LXX) 18Nō kiai, ko wakaāli te Atua i ona yauyau nunui ki te kau āna na manatu ai, ko mea oki iāna kē totoko ongo nā ngākau o te kau āna na manatu ai kē peia.
Ko te lili o te Atua ma te aloa
19Pēnei ka uwi mai te toe o kōtou, “E wea ai te Atua e wakatakayala ai ia tātou? Ko ai oki ko ālaingia ana manatunga?” 20Yaulā ko ai koe ka apoapo muna ai ki te Atua peia, e te kovi ia? “Ka maua lā i te mea na wowoungiá e te iliili atu ki te tangata na wowoungia iāná, ‘E wea koe na wowou ai ia aku pēnei?’ ”#Ītaia 29:16; 45:9 21E yē tika lā i te tangata wowou pōtela kē wowou iāna mai loto o te putunga kalakalaea e tayi ni ava nō nā yanga lelei, peia nā toe ava nō te wī yanga noa wua a te tangata nei.
22Ka pēwea ai te Atua i te manatunga kē wakaāli i tona lili ma tona mana, na wolo ai te manavatoka i te wakatītīnga ia lātou nā ava o tona lili, te kau na taka kē yīmokamokaina? 23Ka pēwea ai oki kē peia te Atua i te manatunga kē wakaāli i te mākavekave o tona yilatū kia lātou na wakatakaina nō tona manavaaloa, te kau āna na penapena taumua nō te yilatū. 24Ka peia lāi kia tātou, te kau na tauvalongia ēna, e kiai mai loto wua o te Ngāti Iūta, mai loto oki o te Ētene. 25Pē ana muna na tutingia i te puka a Ōteá:#Ōtea 2:23
“Ko te kau e kiai lātou ni tāngata nōoku, ka tauvalo au ia lātou ‘Ni tāngata nōoku’;
ka tauvalo oki au i te wenua tangata ia ‘e mōuli nōoku’, ia ana e kiai na minangia ēku.”
26Peia oki, “Ka meangia i te puyo tikāi o te konga nā meangia ai lātou,
‘E kiai kōtou ni tāngata nōoku,’
ka tauvalongia lātou ‘ni tama nā te Atua ola.’ ”#Ōtea 1:10
27Nā wakamamata oki ia Ītaia pēnei nō Ītalāela:#Ītaia 10:22-23 (LXX)
“Wua atu te tokawolo o te tangata o Ītalāela pe nā kelekele i te tukutai,
ko nā tāngata wua na takoto mai ka wakaolangia.
28Ka wai oki te Atu i tana wakautunganga koyi i te ao nei ma te yawe ngaleka.”
29Kē tonu ngaleka ki nā muna a Ītaia nā talatala i mua atú:#Ītaia 1:9 (LXX)
“Pī pē te Atu Mana Awukele e kiai na maka mai ni ulaula nō tātou,
ka lāua tātou ia Totoma,
ka wekiki wua oki pē Komolá.”
Ko tataku ia Paulo nō Ītalāela
30Ni wea atu ai nā mea a mātou ka talatala? Ko te kau Ētene e kiai lātou nā ālu i te tū tautonú, na maua ia lātou te tū tautonu lā loto o te lotokono. 31Ko Ītalāela lā, nā ālu i te tule o te tū tautonú, e kiai na maua ia lātou. 32Nō te wea lā na yē maua ai? Nō tēlā, e kiai lātou nā ālu lā loto o te lotokono, na manaki lā ki a lātou yanga nā wai. Nō kiai lātou na yīyinga i te “watu wakayinga tangatá.” 33Ēnei nā talatala na tutingiá:
“Onoono ake, na wakatū au i Tiona
e watu wakayīyinga tangata,
e watu ka pangulu ai lātou ki lalo.
Ko te tangata lā e nunumi kia aná
e yē wakamā loa iāna.”#Ītaia 28:16 (LXX)
© 2024, Wycliffe Bible Translators New Zealand Inc. in partnership with Te Wui Aliki o Pukapuka ma Nassau