Lōma 8
8
Te olānga i loto o te Vaelua
1Nō kiai, kāe loa konga i te vāia nei e maua ai te tūā nō te kau i loto o te Metia ko Iētū.#8:1 ko Iētū: ko i nā toe pōkai talatala, ko Iētū, ko yē ālu i te tū yala o te tangata nei, ko ālu lā i nā mea a te Vaelua. 2I loto oki o te Metia ko Iētū, na tatalangia koe#8:2 koe: ko i nā toe pōkai talatala, au. e te tule a te Vaelua ola mai loto o te tule o te yala ma te mate. 3Ko te mea na yē maua ai i te mana o te Tule e te wai peia, nō te wewei o te tū tangata. Tuku mai ai te Atua i tana Tama, kē yau i loto o te tū o te tangata yala nei wai ātinga mō te yala. Eia, wakautunga ai ēna te yala i loto lāi o te tino tangata. 4Na wai oki te Atua peia kē wakatupu ai i nā unatinga tautonu a te Tule i loto o tātou e ālu i te Vaeluá, e yē ālu wakawōu i te tū yala o te tangata nei.
5Ko te kau e wakayaelea o lātou olānga e te tū yala o te tangata nei, na vivio o lātou manako ki nā vavakanga o te tū tangata ia. Ko te kau lā e wakayaelea o lātou olānga e te Vaeluá, na wakanoi o lātou manako ki nā mea a te Vaelua e winangalo ai. 6Ko te manako e wakayaelea e te tino tangata nei, e mate tona popō; ko te manako lā e wakayaelea e te Vaeluá, ko i ai te ola ma te āwenua. 7Ko kaitamaki oki te manako yala o te tangata ki te Atua; ko yē māmalu iāna ki te tule a te Atua, kāe konga loa e maua ai. 8Ko te kau e wakayaeleina e te tū yala o te tangata nei, kāe konga loa e popole mai ai te Atua ia lātou.
9Ko kōtou lā, e yē wakayaelea e te tū yala o te tangata nei, e te Vaelua lā, pē ko nō te Vaelua o te Atua i loto o kōtou. Ko te tangata oki e yē ia ana te Vaelua o te Metiá, e kiai iāna i te tangata nō te Metia. 10Mē lā ko i loto te Metia o kōtou, wua atu na mamate o kōtou tino i te yala, ko ōla lā o kōtou vaelua nō te tū tautonu. 11Mē ko nō i loto o kōtou te Vaelua o te Atua na wakatūina ia Iētū mai te maté, ko ona lāi na wakatūina ia Iētū Metia mai te mate ia ka aumaia te ola ki o kōtou tino mate wua nei, lā loto o tona Vaelua e nō i loto o kōtou nā.#1 Kōlīnētia 3:16
12Nō kiai, e oku tāīna, ni tāngata kaiū tātou, e kiai lā nō te wai i nā mea e vavaka ai te tino tangata nei. 13Mē kōtou ka wai i nā manatunga a te tū yala o te tangata, ka mamate kōtou. Kē maua lā ia kōtou i loto o te Vaelua e te patu kē payako i nā yanga kikino a te tino tangata ia, ka ōla kōtou. 14Ko te wī tāngata oki e wakayaelengia e te Vaelua o te Atuá, ni tama lātou nā te Atua. 15E kiai oki te vaelua a kōtou na āliki nā ko wakalilo wakawōu ia kōtou wai tāvini nō te tū mataku. Na āliki lā kōtou i te Vaelua na wakalilongia ai kōtou wai tama kokoti nā te Atua. Nō te Vaelua lāi ia na maua ai ia tātou e te tauvalo, “E Āpā,#8:15 Āpā: ko te leo Ālama teia, ko te wakamaepanga, “E toku tēti ē”. e toku Pāpā.”#Māleko 14:36; Kālātia 4:6 #Kālātia 4:5-7 16Ko te Vaelua e i loto o tātou ia ko wakaponoa mai ki o tātou vaelua ni tama tātou nā te Atua. 17Nō tēlā tātou na lilo wai tama i te vāia nei, ni tāngata tuanga lāi tātou nā te Atua, ni tāngata tuanga e tayi tātou ma te Metia; pē ko teia ngaleka, ka lā loto lāi tātou o ona tīngā, e ō atu ai tātou ki tona yilatū.
Te yilatū o te vāia ki mua
18Kē kakalo atu ki te olānga tīngā e kopikopia ai tātou i te vāia nei, kāe konga loa lewu e weolo ai ki te yilatū ka wakaālia mai i loto o tātou. 19Ko yē mōea oki te wī mea tākatoa na wowoungiá i te kalikalinga i te vāia e wakaālia mai ai nā tama a te Atua. 20Ko te wī mea oki tākatoa na wowoungia, na lilo wua pe nā mea taukolé, e kiai oki i tā lātou tika, i te tika lā a te Atua na mea ai peia.#Kēnete 3:17-19 Ko tana manatunga, 21kē yalangia mai ai te wī mea tākatoa na wowoungia mai te tū nā yelea ai lātou e te papala, kē maua ai ia lātou te yilatū langatila o nā tama a te Atua.
22Ko a tātou īloloa, ko te wī mea tākatoa na wowoungiá, ko ngungulu wua ma te tīngāina pe te tīngā o te wānau tama, mai te vāiá oko wua mai ki te ayo nei. 23Kāle ai oki ko lātou wua teia e ngungulu ia, ko peia oki tātou, tātou na maua te wua mua a te Vaelua e ngungulu wua i loto o tātou, i te kalikalinga ma te yē mōea ki te vāia e kave ai te Atua ia tātou wai tama lave mā ana, te vāia e wakaolaina ai o tātou tino tangata nei.#2 Kōlīnētia 5:2-4 24Nō a tātou mānakinakinga oki nei na yawea ai tātou. Ko te mānakinaki e kitea e te mata tangatá, kāle ai te mea ia i te mānakinaki. Ko ai te tangata ka mānakinaki ki nā mea e kalowia e ona matá? 25Yaulā, kē mānakinaki tātou ki nā mea e kiai na maua ia tātoú, ko kalikali atu lāi tātou i nā mea ia ma te manavatoka.
26Ko peia oki te Vaelua, ko paletua iāna ia tātou i nā konga wewei o tātou. Ko yē taka lelei oki ia tātou ni wea a tātou mea ka tataku atu, yaulā, ko te Vaelua ko tākua ki te Atua nō tātou lā loto o te ngungulu kāe talatala e aongā ai kē wakamaepa. 27Ko te Atua wua, ia ana e tilomataina o tātou ngākaú, ko iloa nā manatunga a te Vaelua, nō tēlā, ko wakavale te Vaelua nō nā tāngata o te Atua kē kaleka ki nā manatunga a te Atua.
Ko awukele atu tātou i te vāia nei
28Ko a tātou iloa oki, i te wī mea loa tākatoa ko yanga te Atua kē tupu te lelei ki te kau e mina ia aná, ia lātou na tauvalongia ēna kē kaleka ki ana manatunga. 29Ko nā tangata na iloa taumua e te Atuá, ko te kau lāi teia āna na iki kē weolo lātou ki te tū o tana Tama, kē lilo mai tana Tama wai uluaki i te puyo o te wainga tāīna ma nā tuaine. 30Ko te kau na wiliwilia ēna ia, na valovalo lāi ēna; ko lātou oki na tauvaloa ia, na wakayakongia ēna; ko te kau na wakayakoa ēna ia, na maua oki ia lātou tona yilatū.
Kāe mea loa e te vavaengia tātou mai te aloa o te Atua
31Ni wea oki nā toe talatala ka tautonu nō nā mea nei? Pē ko ia tātou te Atua, ko ai te tangata ka maua e te wakatotoko mai kia tātou? 32Ko te Atua oki, e kiai loa na kakīonge i tana Tama, na tuku mai lā ia ana mō tātou tākatoa; e wea ka yē maua ai ia ana ma te Tama e te aumai wua i te wī mea tākatoa kia tātou? 33Ko ai oki te tangata ka maua e te tāyī i te kau na ikingia e te Atua? Ko te Atua wua, ko ona lāi ko wakayakoa te tangata! 34Ko ai oki teia e maua e te tūā ia? Ko Iētū Metia lā na maté, ia ana na tū wakawōu mai te mate, e i te kaokao mātau o te Atua ko wakavale ai ki ai mō tātou? 35Ko ai tātou ka vāea mai te aloa o te Metia? Ko te tūngayala mō, pēkole, ko te waingatā, te takikino, te vāia papango, te onge penupenu, nā mea wakamātataku, pēkole ko te payako i te koke? 36Na tutingia oki pēnei:
“Nō koe oki mātou e patua ai pō te ayo,
kaina loa mātou nā māmoe e kali wua kē patuá.”#Talamo 44:22
37Ēkole lava! I nā mea nei loa tākatoa, ko awukele atu tātou lā loto o te Metia, ia ana na mina mai ia tātou. 38Na pono ngaleka oki ia aku, e yē maua loa i te mate ma te ola, peia te wī āngela ma nā tēmoni, peia te vāia nei ma te vāia ki mua, peia te wī mana wakayaele, 39peia te ao tiketike i lunga atu ma te ao pōlikuliku i lalo loa, kāe loa mea lewu i te wī mea na wowoungiá e maua e te vavae ia tātou mai te aloa o te Atua e i loto o te Metia ko Iētū tō tātou Atu.
© 2024, Wycliffe Bible Translators New Zealand Inc. in partnership with Te Wui Aliki o Pukapuka ma Nassau