Lōma 10
10
1E oku tāīna ē, ko nā umatinga o toku ngākau ma taku pule ki te Atua, kē wakaolaina wua ake oku tāngata Ītalāela. 2Ko wakapono atu au e ititangata lātou māngoto Atua, yaulā a lātou wakayayanonga ia ko yē yau mai te tū kite i te Atua. 3Nō tēlā ko yē taka ia lātou te tū tautonu e yau mai te Atua ia, wai wua loa lātou ki a lātou manatunga tangata, e kiai oki lātou na papā kē māmalu ki te tū tautonu o te Atua. 4Na yawe ngaleka oki te Tule i loto o te Metia, kē maua ai te tū tautonu i te wī tāngata e nunumi kia aná.
5Ēnei te wakamaepanga a Mōte nō lunga i te tū tautonu e yau mai loto o te Tule: “Ko te tangata e māmalu ki nā wakauwenga a te Tulé ka ola iāna i nā mea ia.”#Levitiku 18:5 6Ko te tū tautonu lā e lā loto o te lotokonó, ko mea pēnei:#Teutelonomi 30:12-14 (LXX) “Auyē tō ngākau e mea ē, ‘Ko ai ka kake ki lunga o te Langi?’ ” (i te manatunga, kē taki mai i te Metia ki lalo nei), 7“pēkole, ‘Ko ai ka leilo ki lalo o te Pō?’ ” (i te manatunga, kē aumai i te Metia mai te mate). 8Yaulā ēnei te tika o te talatala, “Ko nā muna a te Atua ko i tawa wua o koe; ko i mua wua i ō laungutu, ko i loto oki o tō ngākau,” ko ia oki nā talatala o te lotokono e ako atu ai mātou nei. 9Mē wakamamata tō ngutu, “Ko Iētū te Atu” ma te nunumi tō ngākau ē, na wakatū te Atua ia ana ki lunga mai te mate, ka ola koe. 10Ko tō ngākau oki e nunumí ko wakatautonuina ai koe, ko tō ngutu oki e wakamamatá ko maua ai ia koe te ola. 11Pē nā muna oki e mea mai i te Puka Yā́, “Ko te tangata e nunumi kia aná, e yē wakamā loa iāna.”#Ītaia 28:16 (LXX) 12Ko yē tūkē oki te Ngāti Iūta ma te Ētene, e tayi wua Atu, ia ana te Atu o te wī mea tākatoá, ko ona lāi ka wakaleleingia kē yika wua te kau e tauvalo kia aná. 13Pe nā muna a te Puka Yā e mea maí, “Ko te tangata oki e valovalo atu i te ingoa o te Atú, ka ola iāna.”#Ioela 2:32
14Ka tauvalo ai lātou pēwea kia ana mē e kiai lātou nā nunumi ki ai? Ka nunumi ai oki lātou pēwea kia ana mē e kiai na a lātou langona iāna? Ka langona pēwea oki e lātou mē e kiai na akongia atu nā talatala kia lātou? 15Ka ako lātou pēwea mē e kiai lātou na yeungaina? Na tutingia oki pēnei, “Kamuloa i te mōtoilele nā vae o nā valoyeunga e aumaingia nā longo leleí!”#Ītaia 52:7
16Yaulā, e kiai ko te katoanga o te wī tāngata Ītalāela na āliki i te longo lelei ia. Na tala mai oki ia Ītaia pēnei, “E te Atu, ko ai te kau na nunumi i nā talatala a mātou e ako nei?”#Ītaia 53:1 (LXX); Ītaia 53:1 17Nō kiai, ko yau te lotokono lā loto o te wakalongonga i nā talatala, ko langona oki nā talatala ia mai nā akonga i te Metia. 18Yaulā ko uwi au: E kiai lā na a lātou langona te talatala ia? Na pono ngaleka, na langona e lātou:
“Na oko te vavalo o o lātou leo ki te wī wenua tākatoa,
peia a lātou talatala ki nā pōlikulikunga o te ao nei.”#Talamo 19:4 (LXX)
19Ko uwi wakawōu au, “E kiai lā na taka ake i te wī tāngata o Ītalāela?” Ko talatala taumua mai ia Mōte pēnei:
“Ka yoani atu au i te kau e kiai lātou na ititangata ake, kē mākekeā ai kōtou ia lātou,
ka mea au e ititangata valetiko kē līlili wua ai kōtou.”#Teutelonomi 32:21
20Na wakayē mataku ia Ītaia e te talatala pēnei,
“Na kitea au e te kau e yē ulu mai ia akú;
na wakaāli oki au ia aku kia lātou e kiai nā iliili mai ia akú.”#Ītaia 65:1 (LXX)
21Kia Ītalāela lā na mea iāna pēnei,
“Na pō te ayo o oku lima i te wakatolo atunga kia lātou,
te ititangata talinga tutuli ma te totoko.”#Ītaia 65:2 (LXX)
© 2024, Wycliffe Bible Translators New Zealand Inc. in partnership with Te Wui Aliki o Pukapuka ma Nassau