Lōma 7
7
E wakataunga nō te olānga wakaao
1E nā tāīna, ko talatala atu au ki te kau e īloloa te tulé, ko yē a kōtou īloloa lā, ko mana te tule ki te olānga o te tangata i te vāia wua e ola ai iāna. 2Ēnei te onoononga, ko te wawine wakaao oki i te mana o te tule, na yelea iāna ki tana tāne i te loanga o te vāia e ola ai tana tāne ia; kē mate lā tana tāne ia, na matala iāna mai te tule o te wakaao. 3Nō kiai, kē pili iāna ki e toe tāne ko ola lāi tana tāne, ka meaina iāna e wawine motutāunga. Mē lā tana tāne ia na mate, na matala iāna mai te tule o te wakaao; e yē lilo iāna wai wawine motutāunga, wua atu iāna ka wakaao ki e toe tāne.
4Ko peia oki kia kōtou, e oku tāīna, na mamate kōtou ki te Tule lā loto o te tino o te Metia, kē lilo kōtou mō te toe tangata, nō ona na wakatūngia mai te maté, kē lilo mai ai tātou wai tāngata wuwua i te lave i te yanga a te Atua. 5I te vāia nā wakayaelengia ai tātou e te tū yala o te tangata, nā wowo nā vavakanga yala e wakatotoko ki te Tulé i loto o o tātou tino, nō kiai tātou nā valea ai e te wai i nā wua e aumaingia te maté. 6I te vāia nei lā, na mamate tātou ki te mea nā yelengia ai tātoú, na matala mai ai tātou mai te Tule. Nō kiai, kē lilo tātou wai tāvini nō te lāvenga wōu a te Vaelua, auyē oki e ālu i te tū tawito o nā wakapapanga na tutingiá.
Ka wakaāli mai te Tule i a tātou yala
7Ni wea atu ai nā toe talatala? Ko wai lā te Tule i te yala? Ēkole lava! E yē taka loa ia aku e wea te mea nei e yala, pī kāle ai i te Tule. E yē aku iloa oki e wea te tū unati penupenu, pī e kiai na talā mai e te Tule, “Auyē unati tō manako i nā mea a te toe kau”.#Ēkoto 20:17; Teutelonomi 5:21 8Ko te yala lā te mea e langaina mai e te Tulé, ko te mea teia nā wakatupungia te wī manatunga nanau i loto ōku. Pī kāle ai i te Tule, e mea mate wua te yala. 9I te vāiá nā nō toku olānga ma te tulekole; i te vāia lā na oko mai ai te Tule, wakaolaina mai loa te yala, nō kiai au na payako ai. 10Alawia ai loa ēku, ko te Tule na manatungia kē aumai i te olá, ko te mate tana mea na aumai kia aku.
11Ko te yala oki te mea e langaina mai e te Tulé, na vati iāna ia aku, ko te Tule ia lāi oki na payako ai au.#Kēnete 3:13 12Nō kiai, e mea tapu te Tule, ko tapu oki ona pūlenga, ni mea yakolele oki ma te taungalulu. 13Ko nā mea lelei ia lā na aumaingia te mate kia aku? Ēkole lava! Yaulā, ko te yala na wakaliloina te mea leleí wai pānakia mō oku, taka lelei ai ia aku te tū tika o te yala; ko ona na aumaia te mate ki loto ōku lā loto o te mea lelei ko te Tulé, nō ona pūlenga ia oki na kitea ai te kino ongo o te yala.
Te tauyulayula o te olānga tangata
14Ko a tātou īloloa oki nō te pae vaelua te Tule, ko toku tū lā e kiai i te tū vaelua, na okongia oki au wai tangata yelea nā te yala. 15Ko yē maliu oki au i aku yanga e wai nei. Ko aku mea e manatu kē waí, ko yē wai au, ko nā mea lā e veliveli ai aú, ko aku mea teia ko wai.#Kālātia 5:17 16Pē oki au ko wakatupu i nā mea e veliveli ai aú, ko āwū toku manako e mea lelei te Tule. 17Nō kiai, kāle ai ko oku teia e wakatupua nā mea ia, ko te yala lā e i loto ōku nei. 18Ko aku iloa oki, kāe mea lelei ko nō i loto ōku, i toku tū tangata yala nei. Wua atu oki ko vavaka toku manako kē wai au i nā mea lelei, yaulā ko yē maua ia aku e te wai. 19Ko aku yanga e wai nei, e kiai ko nā mea lelei e manatu ai au kē waí; ēkole, ko nā mea kikino e yē winangalo ai au kē waí, ko nā mea teia āku e tāwi e te wai nei. 20Pē oki au ko wai i nā mea e veliveli ai au e te waí, e kiai ko oku teia e wai i te mea ia, ko te yala lā e nō i loto ōku nei ko waingia.
21Eia, alawia loa ēku te tule e yanga i loto ōku nei: Kē manatu au ka wai i nā mea lelei, ko i oku tawa wua te kino. 22I te wōwonunga o toku ngākau, ko popole au i te Tule a te Atua. 23Yaulā, e tayi aku toe tule ko kite atu ko yanga i loto o nā melo o toku tino nei, e tule ko wai tāua mai ki te tule o toku manako, i te wakalilonga ia aku wai tangata yelea mā te tule o te yala e yanga i loto o te wī melo o toku tino nei. 24Auwē oki au, te tangata laulau wakaaloa nei! Ko ai au ka wakaolangia mai toku tino mate nei? 25Ko wakaatawai lā au i te Atua, ia ana e wakaolangia au lā loto o Iētū Metia tō tātou Atu!
Nō kiai, ēnei toku tū i te vāia nei: ia aku oki, ko tāvini au i te Tule a te Atua, yaulā i toku tū tangata yala nei, ko yelea au e te tule o te yala.
© 2024, Wycliffe Bible Translators New Zealand Inc. in partnership with Te Wui Aliki o Pukapuka ma Nassau