Lōma 6
6
Na payako i te yala, na yawea lā i loto o te Metia
1Ka talatala ai tātou pēwea? Ka vayi wua lā tātou ki te yala kē utouto wua mai ona yauyau nunui? 2Ēkole lava! Na mamate tātou i te yala, e wea ai oki tātou e naumate ai e te nōnō wakawōu i loto o te olānga ia? 3Ko yē a kōtou manatua lā, ia tātou na pāpetītōina ki loto o Iētū Metiá, na pāpetītōina lāi tātou ki loto o tona matenga? 4Nō kiai, na tatanu tātou ma ana lā loto o te pāpetītō ki loto o te mate, kē lāua ai tātou te Metia na wakatūina mai te mate lā loto o te yilanui o te Matua Yā́, kē peia oki tātou i te nōnōnga i loto o te olānga wōu.#Kolota 2:12
5Mē na wakataingia tātou peia lā loto o tona matenga, ka pono ngaleka lāi oki tō tātou wakatainga kia ana i tona tūwakawōunga mai te mate. 6Ko a tātou īloloa oki, ko o tātou tū takele na wakatātauloina iāna ma te Metia kē ngalo atu ai te tino yala ia, kē yē lilo wakawōu tātou wai tāngata yelea mā te yala; 7nō tēlā, ko te tangata na maté, na matala iāna mai te mana o te yala.
8Nō kiai, mē na mamate tātou ma te Metia, ko nunumi lāi tātou ka ōla tātou ma ana. 9Ko a tātou īloloa oki, i te wakatūinanga o te Metia mai te mate, e yē mate wakawōu iāna; na yē mana wakawōu oki te mate ki lunga ōna. 10Ko tona matenga ia, e tayi wua ona matenga nō te wī yala tākatoa; ko tona olānga e ola nei, ko ola iāna nō te Atua.
11Kē peia oki kōtou i te manatunga ē, na mamate kōtou ki te yala, na ōla lā ki te Atua lā loto o Iētū Metia. 12Nō kiai, auyē kōtou e papā kē wakayaele wakawōu te yala i o kōtou tino tangata, kē yē popole ai kōtou ki ona umiti kikino. 13Auyē loa kōtou e tuku wua atu e melo lewu i o kōtou tino nā kē wakayaelea e te yala, kē lilo wai penupenu tamaki nā te wī yanga kikino. Kē tuku lā kōtou ia kōtou lāi ki te Atua, ma te wī melo tākatoa o o kōtou tino kia ana ia, kē lilo wai penupenu tamaki nā te tū tautonu, kē lāua kōtou nā tāngata mamate na ōla wakawōu mai. 14Auyē te yala kē lilo wakawōu wai pū mō kōtou, ko yē i lalo oki kōtou o te Tule, ko i lalo lā kōtou o nā yauyau nunui o te Atua.
Ni tāvini tātou nō te tū tautonu
15Ka wea atu ai? Ka vayi lā tātou ki te yala, nō tēlā ko i lalo tātou o te yauyau nunui, ko yē i lalo o te Tule? Ēkole lava! 16Ko yē a kōtou iloa lā kē tuku kōtou i o kōtou tino ki e tangata kē māmalu ai kia ana pe nā tāviní, na lilo kōtou wai tāvini mō te kovi e māmalu ai kōtou ia? Ka lilo kōtou wai tāvini nō te yala, te ala ki te mate, pēkole, ni tāngata kōtou talingatai ki te Atua, te ala ki te olānga tautonu. 17Yaulā, atawai wolo yē maneke ki te Atua! Wua atu oki kōtou nā tāvini nō te yala, na āwuwū lā o kōtou ngākau tākatoa i te ālikinga i nā akoakonga nā avatua atu kia kōtou. 18Na wakatangaina oki kōtou mai te yala, na lilo mai ai kōtou wai tāvini mō te tū tautonu.
19Ko talatala atu au i tō tātou tū tangata wai onoononga, nō tēlā o kōtou tino tangata nei ko wewei wua. I te vāiá, nā tuku kōtou i nā melo o o kōtou tino wai tāvini nō nā yanga wakalialia ma te wī yanga kikino ongo. I te vāia nei lā, tuku kōtou i nā melo ia wai tāvini mō te tū tautonu e wakatupungia te olānga tapu. 20I te vāia nā tāvini ai kōtou nō te yalá, e kiai kōtou nā i lalo o te wakayaelenga a te tū tautonu. 21Ni wea ai a kōtou kalu na maua mai nā mea nā mātau ai kōtou i te vāia ia, nā mea e wakamamā ai kōtou i te vāia nei? Ko nā mea oki teia e wakatupungia te mate. 22I te vāia nei lā na matala kōtou mai loto o te olānga yala, na lilo mai kōtou wai tāvini nō te Atua. Ka wakatupu oki te mea ia i te tū tapu ki o kōtou olānga, te olānga ka aumaia te ola kāe ngatanga. 23E tali oki te mate nō te yala, ko te ola kāe ngatanga lā, e mea na aumaingia wua e te Atua lā loto o te Metia, ko Iētū tō tātou Atu.
© 2024, Wycliffe Bible Translators New Zealand Inc. in partnership with Te Wui Aliki o Pukapuka ma Nassau