Lōma 5
5
Kē yako tātou ki te Atua
1Nō kiai, na wakayakongia tātou#5:1 na wakayakongia tātou: ko i nā toe pōkai talatala, kē wakayakongia tātou ki te Atua e te tū lotokono, na maua oki ia tātou te yauleka ki te Atua lā loto o tō tātou Atu ko Iētū Metia. 2Nō ona ia oki na wakaōngia ai tātou e te tū lotokono ki loto o nā yauyau nunui o te Atua, ēnei e wetū wakamakeke ai tātou nei. Ko vēvēia wua#5:2 Ko vēvēia wua: ko i nā toe pōkai talatala, kē vēvēia wua oki tātou ma te mānakinaki atu ki te yilatū o te Atua. 3E kiai ko teia wua, ko vēvēia#5:3 ko vēvēia: ko i nā toe pōkai talatala, kē vēvēia oki tātou i o tātou konga tūngayala, ko a tātou īloloa oki ko wakatupu nā mea ia i te tū manavatoka; 4ko wakatupu te tū manavatoka i te tū lelei, ko wakatupu te tū lelei i te manakinga lelei mō tātou. 5E yē wakapānakia oki te manakinga lelei ia tātou, nō tēlā na lilingi mai te Atua i tona aloa ki o tātou ngākau lā loto o te Vaelua Yā āna na tuku mai kia tātou.
6Kē mailonga ia kōtou, ia tātou oki nā wewei wuá, mate loa te Metia nō te kau e wai ki te yala i te vāia na tonu ngaleka. 7E mea loa waingatā kē mate e tangata nō te kovi tū tautonú, wua atu oki ka manatu e tangata kē mate iāna mō te kovi tauyala wuá. 8Yaulā, na wakaāli mai te Atua i tona tū aloa ia tātou pēnei, ia tātou oki nā nōnō wua i loto o te yalá, payako loa te Metia mō tātou.
9Ia tātou oki na wakayakongia e tona totó, ka pēwea atu ai te yika ki mua o tana wakaolanga ia tātou mai te lili o te Atua! 10I te vāiá ni veia tātou nō te Atua, yaulā na wakapilingia mai tātou wakawōu kia ana lā loto o te matenga o tana Tama. Ia tātou oki na lilo wai yoa mō te Atuá, ka wolo atu te ola ka maua ia tātou lā loto o tona olānga! 11E kiai oki ko teia wua, ko vēvēia lāi tātou i loto o te Atua lā loto o tō tātou Atu ko Iētū Metia, ko ona oki na wakapilingia tātou ki te Atua.
Na palewa i loto o Ātamu, na ola lā i loto o te Metia
12Nō kiai, na yau te yala ki te ao nei lā loto o te tangata e tayi, peia oki te mate lā loto o te yala; ko te oko mainga tēnei o te mate ki te wī tāngata tākatoa, nō tēlā, na yala pau loa lātou.#Kēnete 3:6 13I mua ake ka tukuna mai ai te Tule, na oko mai taumua te yala ki te ao nei; yaulā, e kiai nā wakalaungia te yala i te vāia kāe tule. 14Wua atu lā te mea ia, na wakayaele loa te mate mai te vāia o Ātamú, ngalo mai kia Mōte, peia oki kia lātou e kiai na yala pē Ātamu na wawati i te tule a te Atuá.
Ko Ātamu oki e tūtū iāna nō te tangata ka yaú. 15Yaulā, ko yē weolo te penupenu aloa a te Atua ki te takayala a Ātamu na waí. Pē te wainga tangata na mamate nō te yala a te tangata tokotayí, ka pēwea atu ai te wolo o te yauyau nunui ma te penupenu aloa ka malingi mai ki te ngini mangone tangata lā loto o te tangata tokotayi ko Iētū Metiá! 16Ko yē weolo oki te penupenu aloa a te Atua ki te tali o te yala a te tangata tokotayi. Na wakavāngia oki te yala e tayi, aumai loa i te tūā; ko te penupenu aloa lā, ko wakayako iāna ia tātou kē ōla mai loto o te wainga yala. 17Ko tika oki ko te yala a te tangata tokotayi ia na wakayaele ai te mate lā loto ōna ia; ki te kau lā na maua ia lātou nā yauyau nunui yē maneke o te Atua ma te mea aloa o te tū tautonú, ka wolo atu te mana ka aumaia ki o lātou olānga i te wakayaelenga a te tangata tokotayi ko Iētū Metiá!
18Nō kiai, ko te takayala e tayi na wakautungaina ai te wī tāngata tākatoá, na peia oki te yanga tautonu a te tangata e tayi nei, na wakayakongia ai te olānga tangata, maua atu ai te ola i te kakai tākatoa o te ao nei. 19Na lā loto oki o te tū talinga tutuli o te tangata e tayi ia, na ūtutua ai te tangata na wai ki te yala; na peia lāi oki, lā loto o te tū māmalu o te tangata e tayí na tokawolo ai te tangata ka wakatautonungia.
20Na wakaulua mai oki te Tule kē wakawowo ai i te yua pūlenga. Ko te konga lā e wolo ai te yalá, ka aumaia kē yika atu lā lunga nā yauyau nunui o te Atua. 21Nō kiai, pē te yala oki e wakatupu i te maté, ka wakayaele lāi peia te yauyau nunui lā loto o te tū tautonu, e maua ai te ola e yē ngata i loto o Iētū Metia tō tātou Atu.
© 2024, Wycliffe Bible Translators New Zealand Inc. in partnership with Te Wui Aliki o Pukapuka ma Nassau