Lōma 2
2
Te wakavānga yakolele a te Atua
1Nō kiai, kāe konga loa e yao ai koe mē wakatakayala koe i te toe tangata, ia koe oki e wakavā i te tangata ia, ka wakatakayala lāi koe ia koe, nō tēlā koe ko wai lāi i nā yanga ia.#Mātaiō 7:1; Luka 6:37 2Ko a tātou īloloa oki, ko yakolele te wakavānga a te Atua i te kau e wai i nā yanga ia. 3Mē ko manatu koe, e te kovi ia, kē wakatakayala i te toe kau, ēnei koe e wai oki i nā yanga ia, i tau manatunga ka yao koe i te wakavānga a te Atua? 4Pēkole, ko wakavāvā mō koe nō te wolo o tona atawai, yē lili vave ma te manavatoka, pēnei ko yē au manatua ē, ko te tū atawai o te Atua ko takia tō ngākau kē wulikē mai au yala?
5Nō tō tū totoko lā ma tō ngākau yē yalayala, ko wakapuke koe i te lili o te Atua ki lunga o koe mē oko ki te ayo e pā ai tona lili ia, ko te ayo oki teia e wakaālia mai ai tana wakavānga tautonu. 6Ka tali oki te Atua i te wī tāngata kē kaleka ki a lātou yanga nā wai.#Talamo 62:12; Māteli 24:12 7Ko te kau lā e yinumaki e te wai i nā yanga lelei, ko ulu lātou i tona yilatū, te wakanau ma te tū matekole, ka aumai te Atua i te ola kāe mutunga mō lātou. 8Yaulā te kau e lapu wua ia lātou kē lelei, e kiai na a lātou malaia te talatalatika, na nunumi oki nā ngākau e te wai ki te kino, ko i kiai te lili ma te ita o te Atua. 9Ka pukea mai oki e te tūngayala ma te tīngā te wī tāngata e wai ki te kinó, ka taumua ki te Ngāti Iūta, wakamuli ai ki te kau Ētené. 10Ko te kau lā e wai i nā yanga leleí, ka aumaia kia lātou te yilatū, te wakanau ma te āwenua, ka taumua ki te Ngāti Iūta, wakamuli ai ki te kau Ētené. 11Ko yē wai mina oki te Atua.#Teutelonomi 10:17
12Ko te wī tāngata e wai ki te yala i vao o te Tule a Mōté, ka pānakia lāi lātou i vao o te Tule; ko te kau lā e wai ki te yala i lalo o te Tulé, ka wakavāngia lāi lātou i lalo o te Tule. 13E kiai oki ko te kau e wakalongo ki te Tulé ko lilo wai tāngata tū tautonu i mua o te Atua, ko te kau lā e talingatai ki te Tule ia, ka meangia lātou ni tāngata tū tautonu. 14Kāe oki tule a te kau Ētené, wua atu lā kāe a lātou tule, kē wai lātou i nā yanga e tautonu ki nā manatunga a te Tulé, na lilo lāi nā mea ia wai tule kia lātou, wua atu ko yē a lātou īloloa te Tule a Mōte. 15Ko a lātou waiwai oki ko talā mai ē, ko nā tutukunga a te Tulé, na tutingia nā mea ia ki loto o o lātou ngākau. Ko o lātou atamai oki te kite o nā mea ia, ko wakalapa oki a lātou manatunga i nā mea takayala, ma te puipui ia lātou i nā toe vāia. 16Ka tupu oki nā mea nei kē oko ki te ayo ka wakavā ai te Atua i te wī manatunga ngalo a te tangata lā loto o Iētū Metia, kē kaleka ki te longo lelei āku e wakamamata nei.
Ko te Ngāti Iūta ma te Tule
17Ka pēwea ai koe e tauvalo ia koe e tangata Ngāti Iūtá? Ko manaki mō koe ki te Tule, ko wakatietie oki koe nō tēlā e tai ō wī ki te Atua? 18Na au iloa oki te winangalo o te Atua, na āwū oki koe i nā mea matamatua, nō tēlā na āpīngia koe e te Tule. 19Na pono ngaleka oki ia koe e leowi koe nō te kau matapō, e wakayila oki nō te kau e nōnō i te pōuli, 20e pūāpī nō te kau pāioio, e akoako oki nō te kau valetitikó. Na taka lelei oki ia koe ko i loto o te Tule te maoponga o te māwutu ma te talatalatika. 21Eia, ko āpī koe i te toe kau, e wea lā koe e yē āpī ai taumua ia koe? Ko ako koe auyē kaiā, ko yē kaiā lā koe? 22Ko talatala oki koe, auyē te tangata e motutāunga, ko yē motutāunga lā koe? Ia koe oki e meá, ko veliveli koe i nā atua tikí, kāyi lā au mea ko kaiā mai o lātou waleyā? 23Ko wakatietie oki koe i te tule a te Atua, ko yē wakakino lā koe i tona ingoa i te wawatinga i ana tule? 24Na tutingia oki pēnei i te Puka Yā: “Nō kōtou oki e te Ngāti Iūta, na wakakinongia ai te ingoa o te Atua e te kau Ētené.”#Ītaia 52:5 (LXX)
25E kalu loa wolo te mea a te pelitome pē ko taute koe i te Tule; mē lā koe ko wawati i te Tule ko weolo wua koe pe te tangata e kiai na pelitomengiá. 26Pē ko talingatai te tangata e kiai na pelitomengiá ki nā tutukunga a te Tule, ko yē weolo lā iāna pe te tangata na pelitomengiá? 27Nō kiai, ko te tangata Ētene e yē pelitomengia tona tinó, yaulā ko māmalu iāna ki te Tule, ko ona koe ka wakavāngia, wua atu ko ia koe te Tule ma te pelitome, ka meaina lāi e tangata watiwati tule.
28Ko yē meaina oki te tangata e Ngāti Iūta pē iāna e Ngāti Iūta tūtū wua i vao, ko yē meaina oki te pelitome e yanga nō vao wua o te tino. 29Ēkole lava, ko te tangata Ngāti Iūta tika lā, e Ngāti Iūta iāna i loto, na pelitomengia tona ngākau e te Vaelua Yā, kāle ai ko te pelitome a te Tule na tutí. Ko yē talapayangia oki iāna e te kakai, ko te Atua lā iāna ko talapayangia.#Teutelonomi 30:6
Currently Selected:
Lōma 2: PKP
Highlight
Copy
Compare
Share
Want to have your highlights saved across all your devices? Sign up or sign in
© 2024, Wycliffe Bible Translators New Zealand Inc. in partnership with Te Wui Aliki o Pukapuka ma Nassau