Lōma 3
3
Te tū manakia o te Atua
1E wea ai te konga ko yika ai te lelei o te kau Ngāti Iūta i te wī Ētene? Pēkole, e tayi lā kalu ko maua mai te yanga pelitome? 2E wea oki lava, e kalu wolo. Ko te mea mua, na tukuina mai oki ki te Ngāti Iūta nā talatala na yau tika mai te Atua.
3Ka mea ai pēwea mē ko yē lotokono te toe kau? Ka maua lā i te tū ia e te wakakole i te tū manakia o te Atua? 4Ēkole lava! Ko tāwi wua lāi te tū tika o te Atua, wua atu oki ko vativati te wī tāngata. Pē nā talatala oki na tutingia pēnei:
“Kē tika ngaleka au talatala kē talatala koe,
kē yakolele oki au wakavānga.”#Talamo 51:4 (LXX)
5Yaulā, pē o tātou takayala ko wakaāli mai kē maepa wua i te tū tautonu o te Atua, ka talatala ai tātou pēwea? Ka talatala lā tātou ko yē tautonu te Atua i tana tūānga ia tātou? (E manatunga tangata wua taku mea e talatala nei.) 6Ēkole lava! Mē ko yē tautonu te tū o te Atua ia, ka maua ai pēwea iāna e te wakavā i te ao nei? 7Kē wakatotoko mai oki e tangata pēnei, “Pē ko maua i oku tū takayala e te wakananea i te tū talatalatika o te Atua ma tona yilatū, e wea ai au na pae ai, e meangia ai oki e tangata yala?” 8E wea na yē mea ai pēnei, “Wai tātou i nā yanga kikino kē wolo atu te lelei ka aumaia?” Na talayayāngia oki mātou e te tangata nā mātou nā muna nei, i a lātou meanga. Ko te kau oki e talatala peiá, na kaleka loa lātou kē wakautungaina.
Kāe loa tangata yakolele
9E wea atu ai te talatala? Ko lelei atu lā te Ngāti Iūta i te Ētene? Ēkole lava, na tala takele atu mātou ē, ko weolo wua te Ngāti Iūta ma te Ētene, ko wakayaelea lātou tākatoa e te mana o te yala. 10Pē nā talatala na tutingiá:#Talamo 14:1-3 (LXX); 53:1-3 (LXX); Koeleta 7:20
“Kāe loa tangata tū tautonu, kulakulanga kole,
11kāe loa tangata māwutu,
kāe oki tangata ko ulu i te Atua.
12Na wuwuli pau loa lātou mai te Atua,
na lilo lātou tākatoa pe nā mea wuá,
kāe loa oki tangata ko wai i nā yanga lelei, kulakulanga kole.”
13“Ko o lātou kōpū e lua tuluma pipilo ko mayuke wua,
na mātau o lātou alelo e te vativati.”
“Ko te poitini o te vīpela ko kakale i o lātou laungutu.”#Talamo 5:9 (LXX); 140:3
14“Ko kī yeyele o lātou ngutu i te tawi ma te manavakino.”#Talamo 10:7 (LXX)
15“Ko māwitiwiti o lātou vae e te wakamalingi toto;
16ko te pānakia ma te wakatīngā tangata ko i te wī konga e wō ai lātou,
17ko yē a lātou alawia oki te ala o te āwenua.”#Ītaia 59:7-8
18“Ko ngalo te ete i te Atua i o lātou mata.”#Talamo 36:1
19Nō kiai, ko a tātou īloloa, ko te wī mea na tutingia i loto o te Tulé, ko mana nā mea ia ki te kau e i lalo o te Tule, kē kakapi ai te wī ngutu, kē yau ai te kakai tākatoa o te ao nei ki lalo o te wakavānga a te Atua. 20Nō kiai, kāe tangata loa e meaina e tangata tū tautonu i mua o te Atua kē ālu iāna i te Tule. Nō te Tule oki na mailonga ai ia tātou te mea nei e yala.#Talamo 143:2; Kālātia 2:16
Te tū tautonu e yau lā loto o te lotokono
21I te vāia nei lā na wakaālia mai te tū tautonu mai te Atua, e tawanga wua mai te Tule, nā wakamamata ai oki te Tule ma nā tutinga a te wī peloveta. 22Ko te tū tautonu mai te Atua nei, ko yau lā loto o te tū lotokono ia Iētū Metia,#3:22 te tū lotokono ia Iētū Metia: pēkole, te tū lotokono o Iētū Metia ki te wī tāngata tākatoa e nunumi kia ana. Kāe loa tangata ko tūkē,#Kālātia 2:16 23nō tēlā, na yayala tātou tākatoa, na kāyayā oki i te yilatū o te Atua. 24Yaulā ko ona yauyau nunui na aumai wuá na wakayakongia ai tātou, lā loto o te wakaolanga a te Metia ko Iētū. 25Na wakalilo oki te Atua ia ana wai ātinga ūwiyala,#3:25 ātinga ūwiyala: ko tou te mea nei ki te ūwi (e ūwi ai te yala) i lunga o te pia o te āluna o te wakapononga (onoono ki te Levitiku 16:15-16). kē nunumi ai te tangata ki tona toto. Na wai te Atua i te yanga nei i te wakaāli mainga kia tātou i tona tū yakolele, nō tona tū manavatoka oki na maka wua ai iāna i nā yala o te vāiá ma te yē tūāina; 26I te vāia nei oki, ko wakaāli mai lāi te Atua i tona tū tautonu yē wai mina, ko ona lāi ko wakayakongia te kau yayala e loloku kia Iētū́.
27Ko i wea atu ai te konga ka wakatietie ai tātou? Kākole, na wakamomolengia. E wea na kākole ai? Nō nā tautenga lā i te Tule? Ēkole, nō te tū lotokono lā. 28Nō kiai, ko naumate lāi mātou ko wakayakongia te tangata lā loto wua o tona tū lotokono, ko yē lā loto o te māmalu ki te Tule. 29Nō te Ngāti Iūta wua lā te Atua? E kiai lā iāna i te Atua nō te Ētene oki? Ēeke lava, e Atua lāi iāna nō te Ētene. 30E tayi wua oki Atua, ko ona lāi ko wakayakongia te Ngāti Iūta lā loto o te lotokono, peia oki te Ētene lā loto lāi o te lotokono ia.#Teutelonomi 6:4; Kālātia 3:20 31Ko wakamomole lā tātou i te Tule lā loto o te lotokono nei? Ēkole lava! Ko wakatupu lā tō tātou lotokono i te Tule.
Currently Selected:
Lōma 3: PKP
Highlight
Copy
Compare
Share
Want to have your highlights saved across all your devices? Sign up or sign in
© 2024, Wycliffe Bible Translators New Zealand Inc. in partnership with Te Wui Aliki o Pukapuka ma Nassau