Lōma 1
1
Yāyākinga talatala
1Ko Paulo tēnei, e tāvini nō Iētū Metia, na tauvalongia wai āpōtetolo, na vavaengia oki nō te Longo Lelei a te Atua. 2Ko te longo lelei teia na wakaponongia i te vāiá e te kau peloveta o te Puka Yā, 3nō lunga o tana Tama, ko te Atu ko Iētū Metia. I tona tū tangata na wānaungia mai iāna mai loto o te ulaula o Tāvita. 4I te pae lā o te Vaelua ma tona tapunui, na wakaālia mai iāna, ko ona te Tama a te Atua lā loto o te mana o tona tūwakawōunga mai te mate ē, ia Iētū Metia tō tātou Atu. 5Lā loto oki ōna, na maua ai ia mātou te yauyau nunui ma te taoanga āpōtetolo nō tona ingoa, kē valovalo i te tangata mai te wī Ētene ki loto o te olānga māmalu e wakatupua e te tū lotokono. 6Peia oki kōtou e i te puyo o lātou na tauvaloa nō Iētū Metiá.
7Ko tuti atu au kia kōtou tākatoa i Lōma nā, nā mōuli o te Atua, kōtou na tauvaloa wai tāngata tatapu:
Kē ia kōtou nā yauyau nunui ma te yauleka mai te Atua tō tātou Matua ma te Atu ko Iētū Metia.
E tatakunga wakaatawai
8Ko wakaatawai au taumua i te Atua lā loto o Iētū Metia nō kōtou tākatoa, nō tēlā, ko talakakaingia o kōtou tū lotokono i te wī yionga tākatoa o te ao nei. 9Ko te Atua āku e tāvini nei ma toku ngākau tākatoa i te ako atunga i te Longo Lelei o tana Tama, ko ona oki toku kite, ko māyalayala wua au ia kōtou 10lā loto o aku tatakunga i te wī vāia. Ko tataku oki au, pē ko teia lāi te vāia na tika i te Atua kē yuyuke mai iāna i te ala e oko atu ai au kia kōtou nā.
11Ko aku nunuminga, kē welāvei wua ake tātou, kē maua ai ia aku e te avatu ni waiva aloa a te Vaelua kē pewu ai kōtou; 12i te manatunga, kē wakamāloyingia tātou wakatayi e nā tū lotokono o tātou takitai. 13Ko yē winangalo au kē nōnō pōuli wua kōtou, e oku tāīna, e wolo te vāia nā manatu ai au kē welāvei tātou, yaulā na pulutia au i te konga ia, oko wua mai ki te vāia nei, pēnei ka maua mai ni toe pipi mai loto o kōtou nā, pē nā toe konga nā yanga ai au i loto o te kau Ētene.#Yanga 19:21
14E kaiū oki au ki te wī tāngata, ki te kau Ēleni ma te kau kekē, ki te kau māwuwutu, peia ki te kau valetitiko. 15Nō kiai au e umati ai kē ako atu i te Longo Lelei kia kōtou oki i Lōma nā.
16Ko yē wakamā oki au i te Longo Lelei o te Metia, ko te mana oki teia o te Atua e maua ai te ola i te wī tāngata e nunumí, ki te kau Ngāti Iūta taumua, peia oki ki te kau Ētené.#Māleko 8:38 17Ko te Longo Lelei oki ko yūkena mai ai te tū tautonu mai te Atua, ko maua mai oki lā loto o te tū lotokono mai te wakauyunga oko wua atu ki te mutunga. Kē lāua te yikunga na tutingiá: “Ko te tangata tū tautonu ka ola iāna i te tū lotokono.”#Āpakuka 2:4
Te lili o te Atua i te kakai o te ao nei
18Na wakaālia mai te lili o te Atua mai te Langi, nō te wī tū atuakole ma te yanga kikino tākatoa o te tangata, ia lātou e nanā i te tika lā loto o a lātou yanga kikino. 19Ko te wānonga oki nō te tū o te Atua, na maepa wua ia lātou, nō tēlā, na oti i te Atua e te wakaāli kia lātou. 20Mai te wowounga o te ao nei, ko nā tū oki e yē alawia o te Atuá – tona mana e yē ngata ma tona tū Atua – ko kitea māepaepa wua nā mea ia i loto o ana wī mea na wowoú, nō kiai, kāe konga loa e maua ai te tāyīnga a te tangata.
21Wua atu oki ko a lātou īloloa te Atua, ko yē wakatiketike loa lātou ma te wakaatawai ia ana, nō kiai a lātou manatunga na lilo ai wai mea kalukole, wakapōulingia oki ma o lātou ngākau pāioio.#Ēpētia 4:17-18 22Wō wua ai tala ni tāngata māwuwutu lātou, kākole wua ni pāioio. 23Na yoani oki lātou i te yilatū o te Atua e yē maté ki nā tiki a lātou na wowou pe te tangata e mate wua nei, peia oki nā manu pepeke, nā manu takiwā vae ma nā manu totoló.#Teutelonomi 4:16-18
24Nō kiai te Atua na maka wua ai ia lātou kē wai i nā vavakanga yayala a o lātou ngākau ki nā wakaiponga wakalialia i te wainga i o lātou tino ki te wakamā, te toe ki te toe. 25Na yui oki lātou i te tū tika o te Atua ki te vativati, nā tautapa oki ma te tāvini i nā mea na wowoungia e te lima tangatá, maka lā i te Atua na wowoua te wī mea, ia ana e talapayangia ē vāia wua atu. Āmene.
26Nō kiai te Atua na maka wua ai ia lātou kē wai i nā umiti wakalialia o o lātou tino. Ko a lātou wāwine oki, na yoani i te pilinga tika o te tāne ma te wawiné, ki te pilinga wakamā e yē wakatikaina te tangata kē wai. 27Peia oki te kau tāne, na maka lātou i te pilinga nātula ki te wawine, na kamuloa nā ngākau lalati i te umiti tāne ki te tāne. Nō tā lātou yanga wakalialia ia, na ili ai kia lātou te utunga na kaleka ki te yanga wakamā a lātou na wai ia.
28Yau oki, e kiai loa na a lātou malaia e mea lelei kē liko wakamakeke lātou i te kite o te Atua, eia, maka ai loa te Atua ia lātou ki a lātou manatunga kikino ia, kē valenga ai e te wai i nā yanga wakalialia ia. 29Kamuloa lātou kakale ongo i te wī tū yanga kikino, te waiva kikino, te kalaponganui ma te tūtūkoa; ko kī oki nā ngākau i te makeā, te patu tangata, te wakatupu tamaki, te ngutu vativati ma te wakakino tangata. Ni kau wakaamu tangata oki lātou, 30te tōtangata, te veia i te Atua, te lililili, te wakatietie ma te ngutu māyei; te ulu lāvenga kikino, te yē māmalu ki o lātou mātutua. 31Ni tāngata lātou lolokole, yē māngoto, atekole ma te tū yē wakanānā i te tangata. 32Ko īloloa wua oki e lātou te utunga tautonu a te Atua na tuku nō te kau e wai i nā yanga nei, ka tau o lātou yana, e kiai oki ēnei wua a lātou yanga ko wai, yaulā, ko tonotonoi lāi lātou i te kau e wakamātautau e te wai i nā yanga ia.
© 2024, Wycliffe Bible Translators New Zealand Inc. in partnership with Te Wui Aliki o Pukapuka ma Nassau