Lōma 12
12
Te ātinga ola ki te Atua
1Nō kiai, e oku tāīna, ko unati atu au kia kōtou nō te tū manavaaloa o te Atua, kē tuku atu kōtou i o kōtou tino wai ātinga ola, tapu ma te minangia e te Atua, ko te tautapa tautonu tēnei ko kaleka kē wai kōtou. 2Auyē kōtou e ālu wakawōu i nā waiwai o te ao nei, kē wakatūkēngia lā o kōtou olānga i te wakawōunga i o kōtou manako. Ko te mea tēnei e maua ai ia kōtou e te wāwā ke a kōtou iloa te winangalo o te Atua, tona winangalo lelei, tauyala wua ma te yakolele.
3Nō nā yauyau nunui oki o te Atua na aumai kia aku nei, na maua ai ia aku e te talatala atu kia kōtou takitai, auyē manatunga tiketike kōtou ia kōtou, yaulā kē kaleka wua a kōtou manatunga kē wekiki te ango ki te lotokono a te Atua na avatu kia kōtou. 4Pē o tātou takitayi tino oki e wainga o lātou melo, yaulā ko yē weolo nā yanga a te wī melo,#1 Kōlīnētia 12:12 5ko peia lāi tātou i loto o te Metia, wua atu oki e tokawolo tātou, yaulā na wakataingia tātou wai tino e tayi, ko wī oki te wī mema tākatoa te toe ki te toe. 6Ko tūkekē oki te wī mea aloa na tukuna mai kia tātou, ko kaleka ki nā yauyau nunui na aumaia kia tātou. Mē e yivayiva ki mua tana mea aloa, kē wai lāi iāna i te yanga ia kē kaleka ki te lotokono a te Atua na aumai kia ana.#1 Kōlīnētia 12:4-11 7Pē e tāvini, kē wai iāna i te yanga tāvini; pē ko te yanga akoako, kē akoako lāi iāna; 8pē ko te yanga wakamāloyi, kē wakamāloyi lāi iāna; pē e tau penupenu ki te kau pangapangā, kē kave iāna ma te ngākau atawai; pē ko te yanga wakayaele, kē wakayaele iāna wakalelei; pē ko te manavaaloa, kē wai iāna ma te vēvēia.
Te aloa
9Auyē wakatūtū wua tō kōtou aloa. Veliveli atu kōtou i te kino, liko lā kōtou wakamakeke i nā mea lelei. 10Mina atu kōtou i te toe ki te toe pe nā minanga i o kōtou tāīna. Kē wakanau atu kōtou te toe ki te toe, pe te mea ko i lunga atu te toe o koe. 11Auyē kōtou e wakatopitopi i te tū māngoto, wakamāloyi lā o kōtou vaelua i te tāvininga i te Atu. 12Kē vēvēia wua a kōtou mānakinakinga, kē manavatoka oki i te wī kino, kē tataku wua oki auyē tukutuku. 13Tau atu i o kōtou penupenu ki nā tāngata o te Atu e kāyayā́; wakamātau kōtou i te tū valovalo ma te ālikiliki i te kau mai vao.
14Wakalelei atu kōtou i te kau e takikinongia kōtou; wai atu i nā muna wakalelei, auyē lā e wakavale atu kē loimatangia lātou e te Atua.#Mātaiō 5:44; Luka 6:28 15Kē pōleka wakatai kōtou ma te kau e vēvēiá, kē wakayapi wakatai oki ma lātou e wakayapí. 16Kē nōnō āwenua kōtou te toe ki te toe. Auyē kōtou e wakatietie, kē yanga wakatai lā kōtou ma te kau tūlanga yakayakā́. Auyē oki e manatu ko kikite atu kōtou.
17Auyē kōtou e tali atu i te kino o te toe ki te kino. Kē onoono lā kōtou wakalelei ma te wai i nā yanga tautonu i mua o te mata tangata. 18Yinumaki ake ke a kōtou maua e te nōnō āwenua i te puyo o te kakai. 19Auyē wai lāmati kōtou, e oku tāīna, maka wua lā kōtou kē pā te lili o te Atua; na tutingia oki pēnei i te Puka Yā: “ ‘Nōoku te langaimu, ka tali atu lāi au,’ ko talatala mai te Atu.”#Teutelonomi 32:35 20Yaulā oki na tutingia pēnei:
“Mē ko wiakaia tō veia, wāngai atu koe ia ana,
mē ko wiainua, kave atu koe ni yua mō ona.
Pē ka wai koe peia, ko wakaputu koe i te awi ngālau ki lunga o tona ulu.”#12:20 Ko te wakamaepanga, “ka wakamā iāna i tau yanga lelei e wai atu kia ana ia.” #Māteli 25:21-22 (LXX)
21Auyē kōtou e wolea e te kino, kē wolea lā te kino e kōtou i nā yanga lelei.
© 2024, Wycliffe Bible Translators New Zealand Inc. in partnership with Te Wui Aliki o Pukapuka ma Nassau