Lōma 13
13
Māmalu atu kōtou ki te wī wakayaele
1Kē māmalu te wī tāngata ki lalo o te wī mana wakayaele, kāe oki mana wakayaele na tukuna mai, ko te mana wakayaele wua a te Atua na wakatika. Ko te wī mana wakayaele oki e onoono ai tātou nei, ko te Atua tākatoa lātou na wakamanangia. 2Nō kiai, ko te tangata ka wakatotoko atu ki te wakayaele, ko totoko iāna ki te mea a te Atua na wakanō; ko te kau oki e mea peiá ka wakavāngia lātou. 3E yē lilo oki te kau wakayaele wai matakunga mā te kau yanga leleí, ko te kau wua lā e wai ki te kinó. Ko winangalo mō koe kē nō ma te yē mātakutaku ia ana e wakayaeleá? Eia, wai koe i nā yanga tautonu, ka maua ana wakanau ia koe. 4E tāvini oki iāna nō te Atua ko aumai i te lelei kia koe. Yaulā, pē koe ko yanga kikino, ka mataku koe ia ana, nō tēlā e yē wakaeleele iāna i tona mana kē wakautunga. E tāvini oki iāna nō te Atua, ko wakaāli mai iāna i tona lili ma te wakautunga atu i te tangata yanga kikino. 5Nō kiai, e mea lelei kē māmalu kōtou ki nā wakayaele, auyē oki nō tēlā nō nā utunga na peia ai, kē tika lā mai loto o o kōtou wakavā ngākau. 6Nō kiai oki kōtou e tūtaki telo ai, nō tēlā ni tāvini te wī wakayaele nō te Atua, ko wakapau oki i o lātou vāia ki tā lātou yanga ia.#Mātaiō 22:21; Māleko 12:17; Luka 20:25 7Tali atu i au wī kaiū kē peke ki te wī tāngata: pē ko kaiū au telo, tali koe pau i au telo ma te telo o au penupenu; pē e ete tangata, wai atu koe i te tū ete tangata, pē e wakanau, wakanau atu kia lātou na kaleka kē peiangiá.
Penupenu lelei atu ki te toe
8Auyē kōtou e kaiū ki te tangata, kē tāwi wua lā kōtou i te kaiū ko te mina atu i te toe ki te toe. Ko te kau oki e mea peia, ko wakatupu lātou i te Tule. 9Ko nā tule e mea pēneí, “Auyē koe e motutāunga,” “auyē koe e patu tangata,” “auyē koe e kaiā,” “auyē unati tō ngākau i nā penupenu a te toe tangata,” ko nā tule nei pau ma nā toe tule atu, na wakataingia loa tākatoa ki te tule e tayi nei: “Mina atu i tō tangata tupu pē au minanga lāi ia koe nā.”#Ēkoto 20:13-15, 17; Teutelonomi 5:17-19, 21; Levitiku 19:18 10Ko yē tūtūkoa te aloa i tona tangata tupu. Nō kiai, ko te aloa oki ko wakatupua te Tule tākatoa.
11Wai kōtou i te mea ia, nō tēlā na a kōtou iloa ko te vāia tēnei kē weala mai ai kōtou mai te moe. Koa talipili mai oki te vāia e wakaolangia ai tātou, e kiai ko te vāia mua nā nunumi ai tātou. 12E yē loa te pō koa ngalo atu, koa tatū mai ai te ayo o te ola. Nō kiai, maka tātou ki tātea i nā yanga o te pō, wawao lā tātou i te ālai tamaki o te mālama. 13Kē tonu ngaleka oki a tātou waiwai pe nā tāngata o te mālama o te ao, auyē pili atu ki nā ngaluenga inu wakakona i te kava, peia ki nā yanga matamumua ma nā yanga wakatupu wakamā, auyē oki e wakatupu tamaki ma te wakamakeā. 14Yaulā, kē wakakawua kōtou ki te Atu ko Iētū Metia, auyē loa e mayala atu i te manatunga kē wakatoka i nā umiti o te tino tangata yala nei.
© 2024, Wycliffe Bible Translators New Zealand Inc. in partnership with Te Wui Aliki o Pukapuka ma Nassau