Lōma 11
11
Te manavaaloa o te Atua ia Ītalāela
1Ko iliili oki au: Na maka lā te Atua i tona ititangata? Ēkole lava! Ia aku oki e tangata Ītalāela, e ulaula nō Āpelaama, mai loto o te katili o Pēniāmina.#Pilipi 3:5 2E kiai loa te Atua na maka i ona tāngata āna na iki mai te yāyākinga. Ko yē a kōtou manatua lā nā muna i te Puka Yā e talatala nō lunga ia Ēliá, i ana unatinga ki te Atua nō Ītalāelá?, mea loa iāna, 3“E te Atu ē, na pau au peloveta e te patua e lātou, peia ki au atalau na pau ki lalo e te lepetia; ko oku wua tokotai ko takoto, ko wuna oki lātou kē patu ia aku.”#1 Aliki 19:10, 14 4E wea te talatala a te Atua na pau atu kia ana? “Na oti ia aku e te vavae e witunga mano tāne, ko te kau e kiai loa lātou na pūnou wua atu kia Paala te atua tiki.”#1 Aliki 19:18 5Ko peia lāi i te vāia nei, e pupu tangata te mea ko takoto na ikingia lā loto o te yauyau nunui o te Atua. 6Pē nō ona yauyau nunui na iki ai iāna i te kau ia, eia, e kiai nō a lātou yanga na peia ai. Pē oki te ikinga a te Atua ia nō lunga o a lātou yanga, e kiai te yauyau nunui ia i te yauyau nunui tika.
7Ka wea atu ai? Ko te mea nā yalavaka ai te kakai o Ītalāela kē maua ia lātoú, e kiai na maua; ko te pupu tangata lā na ikingia e te Atuá, na maua ia lātou. Ko te tākatoanga lā, na wakamakekengia na ngākau. 8Na tutingia oki pēnei:
“Na tuku mai te Atua i te vaelua valetiko kia lātou,
na wakapōulina o lātou mata kē yē a lātou kitea,
na wakatutuliina oki ma nā talinga kē yē a lātou langona te leo o te Atua,
oko wua mai ki te ayo nei.”#Teutelonomi 29:4; Ītaia 29:10
9Na talatala mai ia Tāvita pēnei:#Talamo 69:22-23 (LXX)
“Kē tūwuli a lātou imukai wai matapili mō lātou,
wai watu wakayīyinga, e tali nō a lātou yanga.
10Kē pōulinewu wua peia o lātou mata kē yē kitea,
kē pipiko wua ki lalo o lātou tua ē vāia wua atu.”
Ni lā lākau na wonongia
11Ko iliili wakawōu au: Na yīyinga loa lā te kakai o te Ngāti Iūta pānakia atu ai? Ēkole lava! Nō a lātou yala lā na yau ai te ola ki te Ētene wai wakamākeānga mō te kakai o Ītalāela i te Ētene. 12Pī mō oki te yala a lātou ia na aumai i te wī mea lelei ki te ao nei, peia oki tō lātou makatianga ia na aumai i te wī mea lelei ki te kau Ētene, ka pēwea atu ai te tongi o te lelei ka maua mai kē pau āwuwū te kakai o Ītalāela e te wakaō ki te ola e yē ngata!
Te ola o te kau Ētene
13Ko talatala atu au kia kōtou, e te kau Ētene. Ia aku oki te āpōtetolo ki te kau Ētené, ko manatu au e mea matamatua taku yanga nō te Longo Lelei. 14Pēnei wua ake ka lilo taku yanga nei wai akaalaala i toku ititangata kē maua ai ia lātou e te unati mai, kē ōla mai ai te toe kau o lātou. 15Na lilo mai oki tō lātou makatianga e te Atua ia i te wakapili mai i te ao nei wai yoa mō ona; kē āliki ai te Atua wakawōu ia lātou, e yē aumai lā te mea ia i te ola kia lātou na mamate ia? 16Pē oki ko tapu te vāyanga walaoa pōpō mua na kāvea mā te Atuá, na tapu lāi te wainga walaoa tākatoa; pē oki nā aka o te lākau ko tatapu, ka tatapu lāi ma ona lā tākatoa.#11:16 Ko te wakamaepanga o te yīlava nei: “Ko tatapu te wī tūpuna pau o Ītalāela nō te wakapononga o te Atua kia lātou, nō kiai oki ka tatapu ai te wī tāngata e wai pē lātou ia.”
17Pē oki nā toe lā na wawatingia mai te pū ōlive, yaulā koe, wua atu oki e lā nō te pū ōlive o nā vaongá, na wonongia mai koe ki te pū o te ōlive matua kē tiutiu wakatai atu ai i nā tāpou lelei e yau mai nā aka o te pū ōlive ia. 18Auyē lā koe e wakatietie lā lunga o nā lā na wawatingia ia. Manatu ake koe, e kiai ko koe ko paletuaina te aka, e lā wua koe, ko nā aka lā ko likoa koe. 19Kai mea io koe, “Ēeke, na wawatingia nā lā ia kē wonongia ai au ki loto.” 20Ko tautonu wua te mea ia. Yaulā, na wawatingia lātou ki vao nō te tū yē nunumi, nō te tū lotokono oki o koe e makeke ai koe nei. Auyē lā koe e ngākau tiketike, onoono koe wakalelei ma te ete o tō ngākau. 21Pē oki te Atua e kiai na wakaeleele i nā lā tiká, e yē wakaeleele mai lāi iāna ia koe.
22Ēnei te konga e mailonga ai ia tātou te tū atawai ma te tū yē wakaeleele o te Atua. Ko yē wakaeleele iāna i te kau na yīyingá, ko wakaāli mai lā i tona tū atawai kia koe, pē ko tāwi wua koe i loto o tona atawai. Mēkole lā, ka yemutia oki koe ēna ki tātea. 23Pē oki te Ngāti Iūta e yē tāwi wua peia i tō lātou tū yē nunumi, ka wonongia mai lātou wakawōu ki loto, ko waingāwie wua oki i te Atua e te mea peia. 24Manatu ake koe, e te Ētene, na yemungia mai koe mai te ōlive o nā vaongá, na wonongia oki ki loto o te pū ōlive nā tiutiuá, e yanga na tūkē wua mai te tū nātula. E mea loa waingāwie wua e te wono wakawōu atu i te Ngāti Iūta, nā lā tika, ki loto o tō lātou pū ōlive lāi.
Nō te wī tāngata te aloa o te Atua
25Ko yē winangalo au kē nōnō pōuli wua kōtou i te muna ngalo nei, e te wī tāīna, kē yē wakatietie ai ma a kōtou manatunga. Ko te kakai o Ītalāela, e yē vai wua peia tō lātou tū wakatotoko, ka mutu lā te tū ia mē ka pau āwuwū te tokawolonga o te kau Ētene a te Atua na manatú e te ō mai ki loto. 26Nō kiai, ka wakaolaina te kakai tākatoa o Ītalāela, pe te yīlava na tutingia pēnei:#Ītaia 59:20 (LXX)
“Ka yau te Wakaola mai Tiona;
ka wulikēina te tū atuakole o te ulaula o Iākōpa.
27Ko taku wakapononga oki tēnei kia lātou
kē oko mai te vāia e maka ai au ki tātea i a lātou yala.”#Ielemia 31:33-34
28Nō te Longo Lelei nei oki, na lilo ai te Ngāti Iūta wai veia mō te Atua nō kōtou nā, e te Ētene. Nō te ikinga lā a te Atua, na lilo ai lātou wai mina mō ona nō o lātou tūpuna ia. 29E yē maua oki e te wakatūkē i nā mea aloa a te Atua ma tana ikinga. 30Ko kōtou oki e te Ētene, nā wakatotoko kōtou ki te Atua i te vāiá, yaulā i te vāia nei na maua ia kōtou tona manavaaloa, nō te tū wakatotoko o te Ngāti Iūtá. 31Nō kiai lātou e wakatotoko ai i te vāia nei, kē maua ai oki ia lātou e te āliki i te manavaaloa o te Atua, nō tona manavaaloa ia kōtou nā. 32Na wakalilo oki te Atua i te wī tāngata tākatoa wai tāngata yelea nō tō lātou tū totoko, kē wakaāli ai iāna i tona tū manavaaloa kia lātou tākatoa.
Talapayanga
33Kamuloa i te wōwonutū ma te mākavekave te tū māwutu o te Atua ma ona wanewane!
E yē pāea loa ana tukungā-tika,
e yē maua oki e te wakamailonga ona ala e wano ai.#Ītaia 55:8
34“Ko ai ko ana iloa te manako o te Atu?
Ko ai oki ko akoako atu ia ana?”#Ītaia 40:13 (LXX)
35“E tayi lā tangata na kave atu ki te Atua,
kē maua ai ia ana e te tali atu ki te kovi ia?”#Iōpu 41:11
36Maia ana, lā loto ōna, nō ona oki te wī mea tākatoa nei.#1 Kōlīnētia 8:6
Kē i te Atua te yilatū ē vāia wua atu. Āmene.
© 2024, Wycliffe Bible Translators New Zealand Inc. in partnership with Te Wui Aliki o Pukapuka ma Nassau