Mātaiō 9
9
Te tangata pilikoki na wakaola e Iētū
(Māleko 2:1-12; Luka 5:17-26)
1Witi loa ia Iētū ki loto o te poti, tīkoti wakawōu loa ki te toe kaokao o te loto, wano atu ai ki tona ōile. 2Eia, aumai loa nā tāne ia i te tāne pilikoki ia kia Iētū, ko takoto i lunga o te pānga. I te kitenga a Iētū i tō lātou lotokono, mea oki iāna ki te pilikoki ia, “E taku tama, wakamāloyi koe, na yuaina au yala.”
3Nō tana meanga ia, talatala loa nā toe akoako tule kia lātou wua, “Te kovi nei i te wakakino Atua!”
4Alawia loa e Iētū a lātou manatunga ia, eia, mea atu ai iāna ki ai, “E wea koia o kōtou ngākau na wakamātau ai ki nā manatunga kikino nā? 5Ko i wea te mea waingāwie kē talatala atu, ‘Na yuaina au yala,’ pēkole, ‘Tū ki lunga, yaele!’? 6Yaulā oki, kē mailonga ia kōtou ko te Tama a te Tangata, e mana tona mea kē wakakole i te yala i te ao nei.” Eia, mea ai iāna ki te pilikoki ia, “Tū lā ki lunga, liko tō pānga, wano ki wale.” 7Tū oki te tāne ia ki lunga, yaele ki wale. 8I te kitenga a te lulunga tangata ia i te mea ia, kamuloa o lātou palo wetō wua, eia, talapaya ai lātou i te Atua nō te aumainga i te mana wotu nei ki te tangata.
Te tauvalonga a Iētū ia Mātaiō
(Māleko 2:13-17; Luka 5:27-32)
9Kē yaele atu ia Iētū mai kiai, ana makoyia loa te tāne ia, ko Mātaiō tona ingoa, ko nō i te pia o te kau taetae teló. Mea loa iāna ki ai, “Yau i oku tawa.” Tū oki ia Mātaiō ki lunga, wano i muli ōna.
10I muli mai, nā taumaya ia Iētū i te wale o Mātaiṓ, tokawolo te kau taetae telo ma te toe kau yayalá nā lōmamai kaikai wakatai i ona tawa ma ana pipi. 11Kē makoyia lātou e te kau Pāliteá, iliili loa lātou ki ana pipi, mea loa, “E wea tō kōtou Pūāpī nā e taumaya wakatai ai ki te kau taetae telo ma te kau e wai ki te yalá?”
12Eia, langona loa e Iētū a lātou muna ia, mea atu ia iāna peia, “E kiai nō te kau wulumalié te taote, nō te kau lā e mamakí. 13Yaulā, wō kōtou wakamau kē taka lelei ia kōtou te talatala nei: ‘Ko te manavaaloa taku mea ko winangalo, e kiai ko te ātinga.’ E kiai oki au na yau kē tauvalo i te kau tū tautonu e manatu ko tauyala wua lātoú, i te kau lā yayalá.”#Mātaiō 12:7; Ōtea 6:6
Te uwinga kia Iētū nō te wakawiakai
(Māleko 2:18-22; Luka 5:33-39)
14Eia, lōmamai loa nā pipi a Ioané iliili kia ana, mea loa, “Nō wea mātou ma nā Pāliteá e mou wakawiakakai ai, yaulā au pipi nā ko yē wakawiakakaia loa?”
15Talatala ai ia Iētū kia lātou, “Ko wetangi lā nā yoa o te tāne e pito wakaaó mē iāna ko nō i o lātou tawa? Ko i ai lā te vāia e kāvea ai te tāne na wakaao ia maia lātou; eia lā koa wakawiakakaia ai lātou.
16Kāe tangata ko pupuni i te pula kākawu wōu ki lunga o te peleue takele, ka yāea oki e te pula wōu ia te mea takelé, ongo atu ai loa te ngāyae. 17Ko yē lilingi oki te tangata i nā uwaina wōu ki loto o nā kili ava uwaina takelé. Kē mea oki lātou peia, ka yāea nā kili ava uwaina ia mē pupū te uwaina, pau ma nā uwaina e te yaka ki vao, pānakia atu ai nā ava. Ēkole, ka lilingi lā lātou i nā uwaina wōu ki loto o nā ava wōu, kē lelei ai lua mea pau.”
Te tamāwine na mate ma te wawine liutae
(Māleko 5:21-43; Luka 8:40-56)
18Ia Iētū e talatala ia, yau loa te wakayaele ia wakatō tulivae ki mua ōna, mea loa peia, “E pito mate wua taku tamāwine. Yaulā, yau ake koe tuku i ō lima ki lunga ōna, ka ola mai iāna wakawōu.” 19Matete loa ia Iētū ki lunga, wano i ona tawa, peia ana pipi.
20Kē mea lā, ālu mai oki lā muli ōna te wawine ia, nā tae wua tona liu e laungaulu mā lua matawiti, eia, yau loa iāna wakapaki i te tipi o tona pona loa. 21Nā mea wua ai i loto ōna, “Kē mimili wua ake au i tona pona, ka yawea toku maki.”
22Wuwuli atu ia Iētū ki muli, makoyia oki ēna te wawine ia, mea atu ai iāna ki ai, “E taku tamāwine, wakamāloyi koe. Na yawea koe i tō lotokono.” Yawea oki te maki o te wawine ia i te vāia lāi ia.
23Kē ulu atu ia Iētū ki loto o te wale o te wakayaelé, kite loa iāna i te kau wakatangi vīvō o te mate ia, ma te maliunga tangata e aukapa wua ki lunga nō te tamāwine ia. 24Eia, talatala ai iāna, “Wō ki vao! E kiai te tamāwine nei na mate, na moe lā.” Yaulā, vayikata loa te kau ia ma te wai akanau ia ana. 25I te paunga o te maliunga tangata ia ki vao, ulu atu loa iāna ki loto, tango i te lima o te tamāwine ia, tū oki te tamāwine ia ki lunga. 26Eia, mayoya ai te longo o te yanga ia ki te wī yionga tākatoa o te wuti wenua ia.
Na wakaola e Iētū lua tāne matapō
27Kē wano atu ia Iētū mai te konga ia, ālu mai oki i muli ōna lua tāne matapō ia ko wai ma te kakā ki lunga pēnei, “E te tama a Tāvita ia ē, wakaaloa mai ake koe ia māua!”
28Kē oko atu iāna ki loto o te wale, lōmamai oki lua tāne matapō ia kia ana. Iliili ai iāna kia lāua, “Ko loloku lā kōlua ka maua ia aku e te mea kē kakalo o kōlua mata?”
“Ēeke, e te Atu,” tā lāua pau mainga.
29Eia, wakapaki loa iāna i o lāua mata ma te talatala peia, “Ka waia atu lāi kia kōlua kē tautonu ki a kōlua nunuminga!” 30Kakalo oki o lāua mata. Wakalapa pōkelekele ai ia Iētū kia lāua, mea loa, “Auyē loa e tangata e iloa te mea nei.”
31Kē mea lā, wō loa te tokalua ia wakamayoya i te longo o Iētū ki te wī yionga o te wuti wenua ia.
Na wakaola e Iētū te tāne mūlale
32I te tokalua tāne e yāele atu ki vao ia, aumaingia loa te tāne ia kia Iētū, na ulungia iāna e te tēmoni, ko yē ana maua oki e te talatala. 33Kē oti te tēmoni ia e te tūlia ki vao, maua loa i te tāne mūlale ia e te talatala. Kamuloa te lulunga tangata ia mīmīngutu wua, wai lā ma te talatala peia, “Kāe mea loa pēnei na kitea i Ītalāela nei.”
34Yaulā, mea mai loa te kau Pāliteá, “Ko te yula o nā tēmoní ko aumaia te mana e ana maua ai e te tutuli i nā tēmoni ki vao.”#Mātaiō 10:25; 12:24; Māleko 3:22; Luka 11:15
E tokalewu te tangata yanga
35Eia, wano loa ia Iētū lā loto o te wī ōile ma te wī lulu, akoako i loto o o lātou walepule, wakamamata ai i te Longo Lelei o te Pātileia, ma te wakaola i te wī tū maki ma te wī konga nguyenguye tākatoa o te tangata.#Mātaiō 4:23; Māleko 1:39; Luka 4:44 36Kē kakalo atu iāna ki nā maliunga tangata e ngaolo nei, kamuloa iāna wakaaloa ia lātou, nō tēlā lātou ko onoononga yeyḗ ma te tupalo nā ivi, kaina loa nā māmoe kāe taute.#Nūmelo 27:17; 1 Aliki 22:17; 2 Wakapapanga 18:16; Ētēkiela 34:5; Māleko 6:34 37Eia, talatala ai iāna ki ana pipi, mea loa, “Ko wolo ongo te mou, e tokalewu wua lā te kau ka yākiliá.#Luka 10:2 38Ēlā wua, tataku kōtou ki te Atu o te mou, kē unga mai iāna ni tāngata kē yākilia mai tana mou ia.”
© 2024, Wycliffe Bible Translators New Zealand Inc. in partnership with Te Wui Aliki o Pukapuka ma Nassau