Mātaiō 10
10
Te tino angaulu mā lua āpōtetolo
(Māleko 3:13-19; Luka 6:12-16)
1Tauvalo loa ia Iētū i tana tino angaulu mā lua pipi kia ana, tuku loa kia lātou i te mana kē tutuli i nā vaelua kikino ki vao ma te wakaola i te wī nguyenguye o te tino tangata ma te wī tū maki tākatoa.
2Ēnei oki nā ingoa o te tino angaulu mā lua āpōtetolo ia: ko taumua kia Timona (e meangia ko Pētelo) ma tona taina ko Ānētelea; ko Iākōpo te tama a Tepetaiō ma tona taina ko Ioane; 3ko Pilipa ma Pālātolomea; ko Toma, ko Mātaiō te kovi taetae telo; ko Iākōpo te tama a Ālepaia, ma Tātaiō;#10:3 Tātaiō: ko i nā toe pōkai talatala, Lepaio, ko tona toe ingoa ko Tātaiō. 4ko Timona nō te pupu Māloyi, ma Iūta Ikaliota, te kovi na vatia iāná.
Na ungaina te tino angaulu mā lua āpōtetolo kē wō
(Māleko 6:7-13; Luka 9:1-6)
5Eia, wakaunga ai ia Iētū i te tino angaulu mā lua ia, tutuku loa kia lātou pēnei: “Auyē kōtou e wō ki nā Ētené, auyē ūlu oki ki nā ōile o te kau Tāmāliá. 6Wō lā kōtou ki nā māmoe na ngangalo o Ītalāelá. 7Ia kōtou e wō ia, ēnei a kōtou muna ka ako atu: ‘Ko talipili mai wua te Pātileia o te Langi.’#Luka 10:4-12 8Wakaola kōtou i te kau mamaki, wakatū ki te ola i te kau na mamate, mea kē mākitakita te kau lēpela ma te taumakomako atu ki vao i nā tēmoni. Na maua wua oki nā mea nei ia kōtou ma te onge tali, kē tuku atu lāi kōtou ma te onge tali. 9Auyē takitaki moni kōlo, tiliva ma te moni kapa i loto o a kōtou kili moni. 10Auyē kave pūtē i tō kōtou tele, pēkole e toe peleue, pēkole ni tenitala, pēkole e tokotoko. Ko wāngaia te tangata yanga kē kaleka ki tana yanga na wai.#1 Kōlīnētia 9:14; 1 Tīmōteo 5:18
11Kē ōko kōtou ki e ōile, mēkole ki e lulu, ulupango kōtou e tangata lelei i kiai, kē papale ai kōtou i tona wale oko wua atu ki te vāia e maka ai kōtou ia kiai. 12Kē ūlu kōtou ki te wale ia, tuku atu i tō kōtou aloa kia lātou. 13Mē lelei mai te ngutuale ia kia kōtou, mea kē tāwi wua peia tō kōtou yauleka kia lātou, pē lā ko yē lelei mai kia kōtou, wakaniko mai i tā kōtou yauleka kia kōtou. 14Ko te wale tangata ma te ōile e yē wuwuli mai kia kōtou, e yē wakalongo oki i a kōtou talatala, mē maka kōtou i te wale ma te konga ia, tūtū atu i nā lewu mai o kōtou vae.#Yanga 13:51 15Ko tala atu au i te tika, i te Ayo o te Wakavānga ka tō lelei ake ia Totoma ma Komola i te ōile ia!#Mātaiō 11:24; Kēnete 19:24-28
Nā takikinonga ka yau
(Māleko 13:9-13; Luka 21:12-17)
16“Wakalongo mai ake! Ko unga au ia kōtou pe nā māmoe e i te puyo o nā lukó. Nō kiai, kē mālelei kōtou pe nā ōvī́, kē yaumālū oki pe nā kūkupá.#Luka 10:3 17Onoono kōtou wakalelei i te tangata; ka tukua kōtou e lātou kē tūāngia e nā kōnitala, ka vayia oki kōtou i nā walepule.#Māleko 13:9-11; Luka 12:11-12; 21:12-15 18Nōoku nei oki ka kāvea ai kōtou ki mua o nā kāvana ma nā aliki wai kite mō te Longo Lelei kia lātou ma nā Ētené. 19Kē likoa kōtou e lātou, auyē ngalangala ni wea a kōtou talatala ma a kōtou muna ka mea atu. Ka avatua lāi a kōtou muna ka talatala i te vāia lāi ia. 20E kiai oki ko kōtou teia e talatala ia, ko te Vaelua lā o tō kōtou Matua e talatala lā loto o kōtou nā.
21Ka vati oki te taina i tona taina lāi i te meanga kē tau tona yana, peia te matua tāne ki tana tama. Ka wakatotoko nā tamaliki ki o lātou mātutua, ka tuku oki ia lātou kē patua kē mamate.#Māleko 13:12; Luka 21:16 22Ka veliveli te wī tāngata ia kōtou nōoku nei; ko te tangata lā ka tū wakamakeke oko wua atu ki te yawenga, ka wakaolaina iāna.#Mātaiō 24:9, 13; Māleko 13:13; Luka 21:17 23Kē takikinoa kōtou i te toe konga, welele atu ki e toe konga. Ko tala atu au i te tika, e yē woke ia kōtou e te wō ki te wī ōile tākatoa o Ītalāela nei i mua ake ka yau ai te Tama a te Tangata.
24Ko yē yika atu oki lā lunga te kovi wakamau āpī́ i tona pūāpī, peia oki te tāvini i tona pū.#Luka 6:40; Ioane 13:16; 15:20 25Ko kaleka wua oki i te kovi wakamau āpī kē lāua iāna tona pūāpī, peia oki i te tāvini kē lāua tona pū. Kē tauvaloa oki te wakayaele o te wale kia Peletepupa, ka yē ongo atu ai te kikino o nā ingoa ka tauvalongia ai tona wale tangata ia!#Mātaiō 9:34; 12:24; Māleko 3:22; Luka 11:15
Kē mātataku kōtou i te Atua
(Luka 12:2-7)
26“Nō kiai, auyē kōtou e mātataku ia lātou. Ko nā mea oki e pūniá ka yūkena mai lāi kē kitea, peia ki nā mea e nanāngiá ka talā mai lāi kē iloa.#Māleko 4:22; Luka 8:17 27Ko aku mea e tala atu kia kōtou i te pōulí, tala kōtou i te konga mālama; nā mea oki e tolomuyu ki o kōtou talingá, vānanga kōtou mai lunga o nā wale. 28Auyē kōtou e mātataku i te kau e patu i te tino tangata kē maté, yaulā, e yē maua ia lātou e te patu i te vaelua. Kē mātataku lā kōtou i te Atua, ia ana ka maua e te patu āwuwū i te tino tangata ma te vaelua i loto o Āte. 29Ko yē okongia lā lua manu liliki ki te tayi tene? Yaulā, e yē tō te toe o lāua ki lalo pē e kiai na tika i tō kōtou Matua. 30Ko peia oki ki nā lauulu o o kōtou ulu, na yawe tākatoa loa e te kauwingia. 31Nō kiai, auyē kōtou e mātataku, ko kalu wolo atu oki kōtou i nā wainga manu liliki ia.
Te wakamamata ma te nanā ia Iētū
(Luka 12:8-9)
32“Ko te kovi ka wakamamata ia aku ki mua o te tangata, ka peia lāi au e te wakamamata ia ana ki mua o toku Matua i te Langí. 33Ko te kovi lā e nanā ia aku ki mua o te tangatá, ka nanā lāi au ia ana ki mua o toku Matua i te Langí.#2 Tīmōteo 2:12
E kiai i te yauleka, e koke lā
(Luka 12:51-53; 14:26-27)
34“Auyē kōtou e manatu ē, na yau au aumai i te yauleka ki te ao nei. E kiai au na yau aumai i te yauleka, i te koke lā. 35Na yau oki au wakatupu i te pae kē,
‘te tamatāne ma tona matua tāne,
te tamāwine ma tona matua wawine,
peia te unaonga tamāwine ki tona matua wawine angavai;
36ko te enemi oki o te tangata ko yau lāi mai loto o tona wale tangata.’#Mika 7:6
37Ko te tangata ka yika atu tona winangalo i ona mātutua ia aku nei, e yē kaleka loa iāna nōoku nei; ko te tangata oki ka yika atu tona winangalo i tana tamatāne pēkole, i tana tamāwine ia aku nei, e yē kaleka loa iāna nōoku nei; 38peia oki te tangata e yē amo i tana tātaulo yau ai lā muli ōku, e yē kaleka loa iāna wai pipi mā aku.#Mātaiō 16:24; Māleko 8:34; Luka 9:23 39Ko te tangata oki e wakatītī i tona olānga mō ona wua, ka kayā i te ola; ko te tangata lā e wakakayā i tona olānga mō oku nei, ka maua tona ola.#Mātaiō 16:25; Māleko 8:35; Luka 9:24; 17:33; Ioane 12:25
Nā tali ka yoania mai
(Māleko 9:41)
40“Ko te tangata ka āliki mai ia kōtou, ko āliki mai lāi iāna ia aku; ko te tangata oki e āliki mai ia aku ia, ko āliki lāi ia ana na ungaina mai au nei. 41Ko te tangata oki ka valo mai i te peloveta nō tēlā e peloveta iāna, ka maua lāi iāna te tali a te peloveta. Peia te tangata ka valo mai i te tāne tū tautonu, nō tēlā e tāne tū tautonu iāna, ka maua lāi iāna te tali a te tāne tū tautonu ia. 42Ko tala atu au i te tika, ko te tangata ka kave e kapu yua anu wua ki te toe o te kauliki liliki nei, nō tēlā iāna e pipi nā aku, e yē kayā loa iāna i tona tali.”
© 2024, Wycliffe Bible Translators New Zealand Inc. in partnership with Te Wui Aliki o Pukapuka ma Nassau