Mātaiō 8
8
Te tāne lēpela
(Māleko 1:40-45; Luka 5:12-16)
1Kē leilo mai ia Iētū ki lalo o te maunga, tuāpō mai loa lā muli ōna te lulunga tangata tokawolo ia. 2Eia, yau loa te tangata lēpela#8:2 Ko te maki lēpela e maki wakalialia nō te pākili; ko yē mailonga ia tātou pē ko te lēpela e iloa i te vāia nei. ia tūtulivae ki mua ōna, wakavale loa peia kia ana, “E te Atu ē, ka pole mō koe, kē mea ake koe ia aku kē māyinayina.”
3Wakatolo atu ai te lima o Iētū mimili i te tāne ia, mea loa, “Na pole au, kē māyinayina koe.” Na peia ngatai, mayina oki tona kili, yawea tona maki lēpela ia. 4Eia, mea atu ai ia Iētū ki ai, “Auyē loa koe e tala atu ki e tangata, wano lā wakaālia koe ki te takuvai, kave atu ai koe i te mea aloa na wakauwea mai e Mōté kē wakapono ai kia lātou na lelei tō maki.”#Levitiku 14:1-32
Te lotokono o te langatila Lōma
(Luka 7:1-10)
5Kē oko atu ia Iētū ki te ōile ko Kāpelenāuma, yau loa te langatila tino welau Lōma ia kia ana wakavale māmate ki ai kē paletuaina. 6Mea loa peia, “E te Atu, toku tāviní ko paloa mai i wale, na pilikokia, kamuloa walonatia i te tīngā.”
7Talatala loa ia Iētū ki ai, “Ka angatu au wakaola ia ana.”
8Pau mai oki te langatila tino welau ia, “E te Atu, ko yē kaleka loa ia koe kē ulu mai ki loto o toku wale. Eia wua, maka mai wua ake koe e muna, ka yawea oki toku tāvini ia. 9Ko oku nei oki ko i lalo o te mana o nā toe wakayaele, e nī oki pupu vāeau i lalo ōku. Kē unga au ki te toe, ‘Wano,’ ka wano lāi iāna; peia kē valo au ki te toe, ‘Yau,’ ka pukoyo mai lāi iāna. Kē talatala oki au ki toku tāvini, ‘Mea peia,’ ka mea lāi iāna peia.”
10I te longonga a Iētū i ana muna ia, kamuloa iāna mīngutu wua; eia, talatala loa iāna ki te kau e ālu lā muli ōna ia, “Ko tala atu au i te tika, kāe loa tangata āku na kite i Ītalāela nei na yika atu tona lotokono pēnei. 11Ko tala atu au, e wainga te tangata ka lōmamai mai te wī konga pau, mai te wenakenga o te lā ma te yopungā-lā, ka nōnō wakatai lātou ma Āpelaama, ko Ītaaka ma Iākōpa i te imukai i te Pātileia o te Langi.#Luka 13:29 12Ko te kakai lā o Ītalāela na penapenangia mō te Pātileiá, ka tilia ki te tulanga ki loto o te konga pōulinewu, te konga e i kiai te wakayapiyapi ma te katikati nio.”#Mātaiō 22:13; 25:30; Luka 13:28
13Eia, mea loa ia Iētū ki te langatila tino welau ia, “Wano lā koe! Ka peiangia lāi kē tonu ngaleka ki au lolokunga nā.” Yawea ngatai oki tona tāvini i te ola lāi ia.
E tokawolo te kau na wakaolangia e Iētū
(Māleko 1:29-34; Luka 4:38-41)
14Kē oko mai ia Iētū ki te wale o Pētelo, onoono atu iāna i te matua wawine angavai o Pēteló ko wakatavake i lunga o te loki, na pukea e te maki vela. 15Eia, mimili loa iāna i te lima o te wawine ia, lelei oki tona maki vela ia, tū mai ai iāna ki lunga, lopi ni popoa mā Iētū.
16I te okonga ki te awiawi, aumaingia loa te wainga tāngata na ulungia e nā tēmoní kia ana, tutuli oki ēna ki te muna e tayi wua i nā vaelua ia ki nā kongá, wakaola oki i te wī tāngata mamaki tākatoa. 17Na wakatupu te yanga nei i nā muna a te peloveta Ītaia nā tala mai peiá:#Ītaia 53:4
“Na liko iāna i o tātou tū nguyenguye,
na kave oki ki tātea i o tātou maki.”
Te waingatā o te ālu ia Iētū
(Luka 9:57-62)
18I te kitenga a Iētū na tokawolo te lulunga tangata e lā tawa ōna ia, wakaunga loa iāna i nā pipi kē tīkoti lātou ki te toe kaokao o te loto. 19Eia, yau ai te akoako tule ia kia ana, mea loa, “E te Pūāpī, ka angatu wua au i ō tawa i te wī konga a koe ka wano ai.”
20Kākole lā te mea atunga a Iētū, “E nī pū wakalulu o nā tuolí, e nī oki kōanga o nā manu o te levá, yaulā te Tama a te Tangata nei, kāe ona konga loa kē lalango ai tona ulu.”
21Mea oki tana toe pipi ki ai, “E te Atu, tuku ake au taumua kē wano au tanu i toku matua tāne.”
22Pau atu loa ia Iētū ki ai, “Ālu mai ia aku, maka wua te kau na mamaté kē tanu i o lātou mate.”
Na mamaya te timu matangi ia Iētū
(Māleko 4:35-41; Luka 8:22-25)
23Eia, witi loa ia Iētū ki lunga o te poti, ālu oki ana pipi lā muli ōna. 24Na peia ngatai, pā mai loa te timu matangi pōkelekele ki te loto ia, kamuloa te kale o nā ngalu wati ki loto o te poti. Ko Iētū lā nā tukulowi. 25Eia, wō ai nā pipi wakaala ia ana, mea loa peia “E te Atu, wakaola ake tātou koa mālelemo nei!”
26Kākole lā te meanga a Iētū, “E te kau e wewei wua nā lotokono ia, e wea kōtou na mātataku ai?” Eia, matike loa iāna ki lunga, taumakomako i te matangi ma nā ngalu kē wakamutu, na peia ngāwie, mamaya oki te wī mea.
27Na kamuloa te kau tāne ia wetō na palo, wai lā ma te iliili wua, “Nō wea nā tū tangata nei? Ko talingatai lāi te ngalu ma te matangi kia ana!”
Lua tāne na ulungia e te tēmoni
(Māleko 5:1-20; Luka 8:26-39)
28Kē oko ia Iētū ki te toe kaokao o te loto, i te tuanga wenua o te kakai o Kātala, lōmamai loa lua tāne na ulungia e te tēmoni ia mai nā pō tanu tangatá, welāvei ia ana. Ni lua tāngata loa wakamātataku, kāe oki tangata ko maua e te wano lā te konga ia. 29Kakā ai lāua ki lunga, mea loa, “E te Tama a te Atua ē, e wea tau manatunga na yau ai kia māua? Na yau lā koe ki kinei takikino taumua ia māua, e kiai ake na oko ki tona vāia?”
30E tayi oki lāngai puaka wolo nā kaikai, e yē mamao loa mai te konga ia lātou ia. 31Wakavale ai nā tēmoni ia kia Iētū, mea loa, “Pē ka tutuli koe ia mātou ki vao, mea ake koe kē ūlu mātou ki loto o te lāngai puaká.”
32Mea oki iāna ki ai, “Wō lā!” Eia, lōmamai loa lātou ki vao, ūlu atu ai ki loto o nā puaká, tuyi mākalokalo oki te lāngai puaka ia ki lalo o te tāliva o te tuāivi ia, pau āwuwū e te mālelemo. 33Ko te kau lā e tautea nā puaka ia, welele loa ki loto o te ōile wakalele i te wī mea pau, peia te yanga na tupu ki lua tāne nā ulungia e nā tēmoni ia. 34E kiai na loa, uepepe mai oki te wī tāngata o te ōile ia welāvei ia Iētū. I tā lātou kitenga ia ana, wakavale māmate loa lātou kia ana kē wano mai tō lātou wenua ia.
© 2024, Wycliffe Bible Translators New Zealand Inc. in partnership with Te Wui Aliki o Pukapuka ma Nassau