Mātaiō 5
5
Na ako ia Iētū nō te wī wakaleleinga i lunga o te maunga
(5:1–7:29)
1I te kitenga a Iētū i te lulunga tangata ia, kake loa iāna ki lunga o te maunga, nō ai ki lalo. Lōmamai loa ana pipi kia ana. 2Eia, wakauyu ai tana akoako ia lātou, mea loa peia:
Te vēvēia tika
(Luka 6:20-23)
3“Valea loa te kau ngākau yakayaká,
nō lātou oki te Pātileia o te Langi.
4Valea loa te kau e wakayapiyapi i te vāia nei,
ka wakaoleolengia oki lātou.#Ītaia 61:2
5Valea loa te kau yaumālū́,
ka maua oki ia lātou te wenua.#Talamo 37:11
6Valea loa te kau e wiakakaia ma te wiainunua nō te tū tautonú,#Ītaia 55:1-2
ka wakatokangia oki o lātou winangalo.
7Valea loa te kau manavaaloá,
ka wakaaloangia mai oki lātou.
8Valea loa te kau ngākau māyinayiná,
ka kitea oki e lātou te Atua.#Talamo 24:3-4
9Valea loa te kau e waia te yauleká,
ka tauvalongia oki lātou ni tama nā te Atua.
10Valea loa te kau e takikinongia nō te tū tautonú,#1 Pētelo 3:14
nō lātou oki te Pātileia o te Langi.
11Valea loa kōtou kē wakakinongia, kē takikinoa, kē tāyīa oki e te tangata ki te wī mea kikino nōoku nei.#1 Pētelo 4:14 12Kē tupeke wua kōtou i te vēvēia, nō tēlā, ko wolo atu tā kōtou tali i te Langi. Nā mea oki lātou peia i te takikinonga i nā peloveta i mua atu o kōtou.#2 Wakapapanga 36:16; Yanga 7:52
Te miti ma te mālama
(Māleko 9:50; Luka 14:34-35)
13“Ko kōtou nā miti o te ao nei. Yaulā mē ngalo te kavakava o te miti, ka mea ai pēwea e kakava wakawōu ai? Kāe ana kalu loa e ao ai, eia wua, ka yakangia atu ki vao kē yoliyolia e te tangata.
14Ko kōtou te mālama o te ao nei. E ōile na wakatūa ki lunga o te maunga e yē ngalo loa.#Ioane 8:12; 9:5 15Kāyi oki tāngata ko tutu i te mōlī tuku ai lā lalo o te pā. Ko tuku lā lātou ki lunga o tona yīaki kē yila tona mālama ki te wī tāngata e i loto o te walé.#Māleko 4:21; Luka 8:16; 11:33 16Kē peia oki o kōtou mālama, kē yilatea wua ki mua o te kakai, kē onoono mai lātou i a kōtou yanga lelei ma te talapaya i tō kōtou Matua i te Langi.#1 Pētelo 2:12
Te Tule a Mōte
17“Auyē kōtou e manatu e yaunga au yua i te Tule a Mōte ma nā akoakonga a nā pelovetá. E kiai au na yau yua i nā mea ia, na yau lā au wakatupu ia lātou. 18Ko tala atu au i te tika, kē tāwi wua pēnei te langi ma te wenua, kāe loa lata lewu, pēkole, kāe loa ila lewu e makatia mai te Tule, nā te yayawe tākatoa loa ana manatunga e te tupu.#Luka 16:17 19Ko te tangata e yē māmalu ki te yīlavā-tule lewu loa o nā pūlenga nei, ma te āpī atu i nā toe tāngata kē wai peia, ka meangia iāna ko ona te tangata lewu loa i te Pātileia o te Langi. Ko te tangata lā e wua ma te āpī atu i nā pūlenga nei, ka meangia iāna e tangata matamatua i te Pātileia o te Langi. 20Nō kiai, ko tala atu au, kē yē yika atu lā mua o kōtou tū tautonu i nā Pālitea ma nā akoako tulé, e yē ō loa kōtou ki te Pātileia o te Langi.
Āpī nō te lili o te tangata
(Luka 12:57-59)
21“Na a kōtou langona oki nā talatalangia ki nā tāngata o te vāiá, ‘Auyē patu tangata, ko te kovi oki patu tangata ka wakavāngia iāna.’#Ēkoto 20:13; Teutelonomi 5:17 22Yaulā ko tala atu au, pē e tayi tangata ko lili i tona taina,#5:22 Ko i nā toe pōkai talatala: ko lili i tona taina ma te taukole wua ka wakavāngia lāi iāna. Ko peia oki ki te tangata ka talatala ki tona taina, ‘kāe au kalu’,#5:22 kāe au kalu: leo Ālama, laka ka tū iāna ki mua o te Kōnitala.#5:22 Ko te ingoa o te Kōnitala nei ko te Tūnēteli; koia oki, ko te wakalulunga a te kau mātutua wowolo o te Ngāti Iūta. Ko te tangata lā ka wakakino atu pēnei, ‘Mūlale Pāioio,’ ka pānakia iāna i te awi o Āte.
23Nō kiai, pē ko kave koe i tau ātinga ki te atalau, eia, manatu loa koe i kiai ko kinokino mai tō taina kia koe, 24maka koe i tau ātinga ia i mua o te atalau. Wano koe taumua wakayakongia koe ki tō taina; eia lā, koa niko ai koe kave i tau ātinga.
25Limalima koe i te eva e te wakayako ia koe ki tō enemi ka kāvea koe ki te wakavāngá. Wai koe i te vāia e yāele ai kōlua i te ngutuala, ko te tukua atu koe ēna ki te akavānui, eia, manatu ai iāna kē tuku atu ia koe ki te lima o te akavā kē tilia koe ki te waleāuli. 26Ko tala atu au i te tika, e yē tukua mai loa koe ki vao nō na tali loa koe i te tene wakayawe o tō tūā.
Nō lunga o te motutāunga
27“Na a kōtou langona oki te muna nā talaina maí, ‘Auyē loa koe e motutāunga.’#Ēkoto 20:14; Teutelonomi 5:18 28Yaulā ko tala atu au, ko te tangata ka kakalo wua atu ki e wawine ma te akawinangalo te ngākau ki ai, na motutāunga taumua wua iāna i loto o tona ngākau. 29Mē ko tō mata mātau ko yala ai koe, napengia ki vao, maka ki nā kongá. E lelei atu koe kē kayā i te toe melo o tō tino i te kāvea tō tino tākatoa kē tilia ki loto o Āte.#Mātaiō 18:9; Māleko 9:47 30Mē oki ko tō lima mātau ko yala ai koe, yemutia kē motu, maka ki nā kongá. E lelei atu koe kē kayā i te toe melo o tō tino, i tō tino tākatoa kē pukoyo ki loto o Āte.#Mātaiō 18:8; Māleko 9:43
Āpī nō te maka wakaaonga
(Mātaiō 19:9; Māleko 10:11-12; Luka 16:18)
31“Nā talaina oki, ‘Ko te tangata e winangalo kē maka i tana wawine, kē tuku atu iāna e pēpa tatala ia lāua ki tana wawine.’#Teutelonomi 24:1-4; Mātaiō 19:7; Māleko 10:4 32Yaulā, ko tala atu au, ko te tāne e maka i tana wawine nō nā toe manatunga, e kiai nō te yanga motutāunga, na wakalilo iāna i tana wawine ia wai wawine motutāunga. Ko te tāne oki ka wakaao i te wawine tauātalo ia, na motutāunga iāna.#Mātaiō 19:9; Māleko 10:11-12; Luka 16:18; 1 Kōlīnētia 7:10-11
Te tuku tika
33“Peia oki, na a kōtou langona te talatala nā talaina ki te kakai i te vāiá, ‘Auyē koe e yua i tau tika na tuku, kē wakatupu lā koe i au tika na tuku ki te Atu.’#Levitiku 19:12; Nūmelo 30:2; Teutelonomi 23:21 34Yaulā, ko tala atu au, auyē loa kōtou e tuku tika wua atu, auyē koe e langaki i te ingoa o te Langi, ko te potu oki teia o te Atua;#Iākōpo 5:12; Ītaia 66:1; Mātaiō 23:22 35pēkole, i te ingoa o te ao nei, ko te pange oki teia o ona vae; auyē oki i te ingoa o Iēlūtalema, nō tēlā ko te ōile teia o te Aliki Wolo.#Ītaia 66:1; Talamo 48:2 36Auyē tuku tika ki tō ulu, ko yē maua oki ia koe e te wai kē yinā te lauulu e tayi, pēkole, e te mea kē uli. 37Eia wua, kē wakalilo koe i tau ‘Ēeke,’ wai ‘Ēeke’ lāi, peia tau ‘Ēkole’, wai ‘Ēkole’ lāi; kē yika atu lā au muna i lua mea nei, na yau nā mea ia mai te Kovi Kinó.
Tali atu i te kino ki te lelei
(Luka 6:29-30)
38“Na a kōtou langona oki te talatala e meá, kē akaweoloina te utunga ki te konga lāi na pakia, ‘E mata ki te mata lāi, e nio ki te nio lāi.’#Ēkoto 21:24; Levitiku 24:20; Teutelonomi 19:21 39Yaulā, ko tala atu au, auyē koe e tali atu i te tangata kino ki te kino. Kē moto mai e tangata i tō papo mātau, wuwuli atu koe i tō toe papo kia ana. 40Kē kave e tangata ia koe ki te wakavānga nō tō pona, tuku atu koe ma tō peleue kē kave ēna. 41Kē naumate mai e tangata ia koe kē takitaki i ana penupenu e tayi maile, wano atu koe kē lua maile. 42Tuku atu ki te tangata e talikai mai kia koé, auyē koe e wuwuli ō pale mai te tangata e wakavale atu i au penupenú.
Mina atu koe i ō veia
(Luka 6:27-28, 32-36)
43“Na a kōtou langona oki nā talatalaina mai, ‘Mina atu i tō tangata tupu, veliveli atu i tō veia.’#Levitiku 19:18 44Yaulā, ko tala atu au, mina atu i o kōtou veia, tataku atu nō te kau e takikino mai ia kōtou, 45eia lā kōtou e lilo mai ai wai tama nā tō kōtou Matua i te Langi. Ko wakayila mai oki i tana lā ki lunga o te kau penupenu kikino ma te kau lelei, ko wakatō mai oki i te ua ki te kau tū tautonu ma te kau waiva kikinó. 46Pē ka mina wua kōtou i te kau e mina mai ia kōtoú, e wea ai tā kōtou tali ka maua mai? Kāle oki te kau taetae teló ko mea peia? 47Pē ko o kōtou yoa wua a kōtou mea ko aloa ai, ni wea ai a kōtou yanga lelei atu i te toe kau? Kāle lā te kau atuakolé ko mea oki peia? 48Nō kiai, kē tauyala wua kōtou pe tō kōtou Matua i te Langi e tauyala wuá.#Levitiku 19:2; Teutelonomi 18:13
© 2024, Wycliffe Bible Translators New Zealand Inc. in partnership with Te Wui Aliki o Pukapuka ma Nassau