Mātaiō 6
6
Te kave penupenu aloa ki te kau vevé
1“Onoono wakalelei, auyē loa kōtou e wakaāli i a kōtou yanga waiwai Atua lā mua o te kakai kē onoonowia e lātou. Mē ka mea kōtou peia, kāyi a kōtou tali e maua mai tō kōtou Matua i te Langi.#Mātaiō 23:5
2Eia wua, kē kave koe i au mea aloa ki te kau vevé, auyē wakatūyā koe e te wakatangi ki te pū pe te kau ngutulua e wai peia i loto o nā walepule ma nā ngutualá, kē wakanaungia lātou e te kakai. Ko tala atu au i te tika, na maua ia lātou te tākatoanga o o lātou tali. 3Yaulā, kē kave koe i au penupenu aloa ki te kau vevé, auyē loa e makoyia e tō lima māyui nā yanga a tō lima mātau e wai ia, 4kē kave nanā wua lā au penupenu aloa. Ko tō Matua oki i te Langi, ia ana e kitea te wī mea e lave ngalo wuá, ka avatungia tō tali.
Nō lunga o te tataku
(Luka 11:2-4)
5“Ko peia oki kē tataku kōtou, auyē kōtou e lāua te kau ngutulua, e mina kē tataku wetū i nā walepule ma nā tīkotinga o nā ngutualá, kē onoonowia mai lātou e te tangata. Ko tala atu au i te tika, na maua ia lātou te tākatoanga o o lātou tali.#Luka 18:10-14 6Yaulā, kē tataku koe, wano koe ki loto o tō pia, pupuni i te pū, tataku ai koe ki tō Matua e yē kiteá. Ko tō Matua oki, ia ana e kitea te wī mea e lave ngalo wuá, ka avatua tō tali. 7Kē tataku kōtou, auyē wole wua i nā talatala kāyi kalu pe nā Ētene e manatu ko i te wolo o te muna e wakalongoa mai ai lātou. 8Auyē wua kōtou ia lātou, nō tēlā ko iloa wua e tō kōtou Matua ni wea a kōtou mea ko winangalo, e muli kōtou ka talikai ai kia ana.
9Kē tataku lā kōtou pēnei:
‘E tō mātou Matua i te Langi,
kē yā tō ingoa,#6:9 kē yā tō ingoa: pēkole, kē wakatapua ma te kē wakayāina tō ingoa. E talatala wakanau ma te wakateniteni nā mea nei i te ingoa mōtoilele o te Atua, pe te mea: kē wakanaua, kē etengia tō ingoa mōtoilele.
10kē oko mai tō Pātileia,
kē tautengia tō winangalo
i te ao nei pē i te Langi nā.
11Aumai ake ni popoa mā mātou mō te ayo nei.
12 Yua ake koe i a mātou yala,
pē mātou oki e yua i nā yala a te kau e wai mai kia mātou nei.#6:12 mēkole: Wakakole mai ake o mātou takayala, pē mātou oki e wakakole i nā takayala a te kau e wai mai kia mātou nei.
13Auyē koe e maka wua ia mātou kē yukiyukia,#6:13 yukiyukia: mēkole, wakatōkāngia
wakaola lā ia mātou mai te Kovi Kinó.#6:13 mai te Kovi Kinó: mēkole, mai te kinó
[Nō koe oki te Pātileia, te mana ma te yilatū,
vāia, ē vāia wua atu. Āmene.]#6:13 Ko te yikunga nei ko i loto wua o nā toe pōkai talatala mumulí.’
14Kē yua koe i nā yala a te kau e wai atu kia koé, ka yua lāi tō Matua i te Langi i au yala.#Māleko 11:25-26 15Kē yē yua lā koe i nā yala#6:14-15 yua … i nā yala: mēkole, i te takayala; ko weolo wua ki te wakakole i te yala mēkole wakakole i te takayala a te kau e wai atu kia koé, e yē yua lāi tō Matua i te Langi i au yala.
Nō lunga o te wakawiakai
16“Kē wakawiakai kōtou, auyē wakalaumatemate o kōtou tupu pe te kau ngutulua e wakatūkē nā tupú, kē kitea e te wī tāngata ko wakawiakakai lātou. Ko tala atu au i te tika, na maua ia lātou te tākatoanga o o lātou tali. 17Yaulā, kē wakawiakai koe, omoomo tō ulu ki te yinu, palupalu ma tō tupu 18kē yē mailonga i te wī tāngata ko wakawiakai koe. Yaulā ko tō Matua wua e yē kiteá, ia ana e kalowia mai te wī mea e wai nanāngiá, ka avatua tō tali.
Nā penupenu i te Langi
(Luka 12:33-34)
19“Auyē wakapuke i a kōtou mea wakaemaema i te ao nei, te konga e pau ai e te papala ma te kaina e te manumanu, te konga oki e ūlu nanā mai nā tōpakava ki loto, kaiā i a kōtou penupenu ia.#Iākōpo 5:2-3 20Wakapuke lā i a kōtou mea wakaemaemá i te Langi, te konga e yē papala, e yē kaina e te manumanu, e yē maua oki i nā tōpakava e te ūlu ki loto kaiā i nā mea ia. 21Ko te konga oki e pukenga ai au mea wakaemaemá, ko te konga lāi teia ko popole ai tō ngākau.
Te wakayila o te tino
(Luka 11:34-36)
22“Ko te mata oki te wakayila o te tino. Mē ko lelei ō mata, ka ulungia lāi tō tino tākatoa e te mālama. 23Mē ko kino lā ō mata, e kamuloa tō tino tākatoa pōulinewu. Pē oki te mālama i loto o koe ia na lilo wai pōuli, ka ongo kino atu te pōulinewu ia!
Te Atua ma nā penupenu
(Luka 16:13; 12:22-31)
24“Kāe tangata oki e maua kē tāvini atu ki lalo o lua pū. Ko te veia mai iāna i te toe, mina loa i te toe; pēkole, ka popole iāna ki te toe, wakavāvā loa i te toe. E yē maua oki ia kōtou kē tāvini wakatai atu i te Atua ma te moni.
Auyē wakavao o kōtou ngākau
(Luka 12:22-31)
25“Nō kiai, ko tala atu au, auyē wakavao i o kōtou olānga i nā popoa a kōtou ka kai, ma nā yua ka inu, peia ki o kōtou kākawu ka wawao. Ko yē wolo atu lā te olānga i te popoa, peia te tino i nā kākawu? 26Onoono ake i nā manu o te levá; ko yē tokikai, ko yē yākili kai, ko yē wakaputu oki lātou ki loto o nā wale tuku kai; kē mea lā ko tō kōtou Matua i te Langi ko wāngaia lātou. Ko yē kalunui atu lā kōtou i nā manu ia? 27E tayi lā tangata o kōtou nā kē wakavao tona ngākau, ka maua e te wakananea atu e ola e tayi ki tona olānga?#6:27 e te wakananea atu e ola e tayi ki tona olānga: mēkole, kē wakayika atu i tona loa e tai taulu lima
28E wea oki kōtou e wakavavao wua ai nā ngākau ki nā kākawu? Onoono ake ki nā tiale e wetupu wua i te wī kongá. Ko yē yanga lātou, ko yē tui kākawu oki. 29Yaulā, ko tala atu au, e kiai loa ia Tōlomona i ona wī mōtoilele tākatoa na wakakawuina kē weolo pe te toe o nā tiale nei.#1 Aliki 10:4-7; 2 Wakapapanga 9:3-6 30Na peia lāi te Atua i te lākeinga i nā vayavaya o te vao, e i kinei i te vāia nei, kē oko lā ki te tāyao, koa yakangia atu ki loto o te awi. Ko yē yika atu lā tana wakakawunga ia kōtou, e te kau lotokono māyangiyangi ia? 31Nō kiai, auyē wakavao wakawōu nā manatunga i te meanga, ‘Ni wea a tātou popoa ka kai?’, pēkole, ‘Ni wea a tātou yua ka inu?’, pēkole, ‘Ni wea o tātou kākawu ka wawao?’ 32Ko te wī mea oki tēnei e naumate ai te kau atuakolé, ko iloa wua e tō kōtou Matua i te Langi ko winangalo kōtou i nā mea ia. 33Kē taumua lā kōtou e te ulupango i te Pātileia o te Atua ma ona tū tautonu, eia lā, koa avatungia ai nā mea loa nei tākatoa kia kōtou. 34Nō kiai, auyē wakavao i a kōtou manatunga nō te tāyao, ko te tāyao lāi iāna ka onoonoa mai. Ko te ayo e tayi ma ona tūngayala, lava wua ai ki ai.
© 2024, Wycliffe Bible Translators New Zealand Inc. in partnership with Te Wui Aliki o Pukapuka ma Nassau