Mātaiō 4
4
Na yukiyukia ia Iētū
(Māleko 1:12-13; Luka 4:1-13)
1Eia, takia loa ia Iētū e te Vaelua ki te mētēpala kē yukiyukingia e te Tiāpolo.#Ēpela 2:18; 4:15 2Wakawiakai loa iāna e lauwā te pō e lauwā te ao, eia, yayalo ai loa iāna i te wiakai. 3Yau ai te kovi yukiyuki tangata ia, mea loa kia ana, “Pē ko koe lāi te Tama a te Atua, wakaunga ake koe i nā watu nei kē lilo wai popoa.”
4Kākole lā te meanga a Iētū ki ai, “Na tutingia oki pēnei, ‘E kiai ko te popoa wua te mea ko ola ai te tangata, ko te wī talatala lā e yau mai loto o te ngutu o te Atuá.’ ”#Teutelonomi 8:3
5Eia, kave loa te Tiāpolo ia ana ki lunga o te Ōile Tapu, tuku loa ia ana kē tū ki lunga o te konga loa tiketike o te Waleyā. 6Mea ai kia ana, “Pē ko koe te Tama a te Atua, wakatō koe ia koe ki lalo; na tutingia oki pēnei,#Talamo 91:11-12
‘Ka wakauwe iāna i ana āngela mō koe nā,
kē palepalea koe ki lunga e o lātou lima,
kē yē tukia ō vae e te watu.’ ”
7Pau atu oki ia Iētū ki ai, “Na tutingia oki pēnei, ‘Auyē loa koe e wakatōkā atu i te Atu tō Atua.’ ”#Teutelonomi 6:16
8Eia, kave wakawōu oki te Tiāpolo ia ana ki lunga o te maunga loa tiketike, wakaāli ai kia ana i te wī pātileia o te ao nei ma o lātou mōtoilele. 9“Ka avatu pau loa au i nā mea nei kia koe,” tana meanga, “pē ka pūnou mai koe ki lalo tautapa ia aku.”
10Talatala atu ai ia Iētū peia ki ai, “Wano ki nā kongá, e Tātani. Na tutingia oki pēnei, ‘Ko te Atu tō Atua tau mea ka tautapa. Ko ona wua tokotayi tau mea ka wakamāmalu ai.’ ”#Teutelonomi 6:13
11Eia, maka atu ai te Tiāpolo ia ana, lōmamai ai nā āngelá tiutiu ia ana.
Na yāyāki te ako a Iētū i Kalilea
(Māleko 1:14-15; Luka 4:14-15)
12I te longonga a Iētū na tilingia ia Ioane ki te waleāuli, niko loa iāna ki Kalilea.#Mātaiō 14:3; Māleko 6:17; Luka 3:19-20 13Maka loa iāna ia Nātalēta, wano atu ai iāna nō i Kāpelenāuma, e ōile ko i tawa wua o te loto ko Kalilea i nā kawa wenua o Tēpulūna ma Nāpātali.#Ioane 2:12 14Na wai peia iāna, kē tautonu ki nā talatala nā talā mai e te peloveta ko Ītaiá, mea loa:
15“E te wenua o Tēpulūna ma te wenua o Nāpātali ē,
nā konga lā tai,
i te toe kaokao o Iōlītāna,
ia Kalilea te yionga e nōnō ai te Ētené –
16ko o kōtou tāngata e nōnō i te pōulí,
na pulawia e lātou te yila wolo,
te kau e nōnō i te wenua o te malu maté,
na yilangia lātou e te mālama.”#Ītaia 9:1-2
17Na yāyāki te ako a Iētū mai te vāia ia, mea loa iāna pēnei, “Wuwuli kōtou mai a kōtou yala, koa talipili mai oki te Pātileia o te Langi.”#Mātaiō 3:2
Te tauvalonga i nā pipi mumua
(Māleko 1:16-20; Luka 5:1-11)
18Ia Iētū e yaele atu lā te tukutai o te loto ko Kalilea, ana makoyia loa lua tāīna ia, ko Timona e lapangia kia Pētelo, ma tona taina ko Ānētelea; ko tuku kupenga lāua i te loto ia, ni lua lavāika oki lāua. 19Eia, tauvalo ai ia Iētū ia lāua, mea loa, “Lōmamai i oku tawa, ka wakalilo au ia kōlua wai lavāika tangata.” 20E kiai oki lāua na pōvalevale, maka loa i a lāua kupenga, ālu ai i ona tawa.
21Kē yaele atu iāna ki tō muamua, ana makoyia oki lua toe tāīna, ko Iākōpo e tama nā Tepetaiō ma tona taina ko Ioane. Nā i loto lāua o te poti ma tō lāua matua ko Tepetaiō, ko penapena i a lātou kupenga. Tauvalo oki ia Iētū ia lāua. 22Na peia ngatai, maka oki lāua i te poti ma tō lāua matua tāne i loto, ālu ai i ona tawa.
Na wakaola e Iētū te wī maki
(Luka 6:17-19)
23Eia, wano loa ia Iētū lā loto o Kalilea tākatoa, āpī i loto o o lātou walepule ma te ako atu i te Longo Lelei o te Pātileia, wakaola atu ai i te wī tū maki ma te wī konga nguyenguye tākatoa o te tangata.#Mātaiō 9:35; Māleko 1:39 24Mayoya loa tona longo puni ia Tūlia tākatoa, aumai ai te wī tāngata i te kau na pīa e te wī tū makí kia ana, te kau e tīngangā nā tinó, te kau na ulungia e te tēmoní, te kau maki vivilí, ma te kau oki na pilikokiá, wakaola loa ēna te kau ia tākatoa. 25E wainga oki te maliunga tangata tokawowolo nā ālu mai ia ana mai Kalilea, mai Tekapoli,#4:25 Tekapoli: tona wakamaepanga, te “Laungaulu Ōile” mai Iēlūtalema, mai Iūtea, mai te wuti wenua oki e lā te toe kaokao o te kauvai ko Iōlītāná.
© 2024, Wycliffe Bible Translators New Zealand Inc. in partnership with Te Wui Aliki o Pukapuka ma Nassau