Mātaiō 3
3
Te akonga a Ioane Pāpetītō
(Māleko 1:1-8; Luka 3:1-18; Ioane 1:19-28)
1I nā ayo ia, yau loa ia Ioane Pāpetītō ako i loto o te mētēpala o Iūtea, 2mea loa peia, “Wuwuli kōtou mai a kōtou yala, koa talivave mai oki te Pātileia o te Langi.”#Mātaiō 4:17; Māleko 1:15 3Ko ona oki teia nā talangia mai e te peloveta ko Ītaiá, na mea oki peia:#Ītaia 40:3 (LXX)
“E tayi leo tangata ko vānanga pēnei i te mētēpala,
‘Penapenangia te ngutuala mō te Atu,
wakayako ake ona ala ka yaele ai.’ ”
4Ni kākawu na watua ki te wulu kāmela nā kākawu o Ioane, nā lulu oki tona taukupu ki te kili puaka.#3:4 kili puaka: ko nā kili mai nā manu e takiwā vae pe te puakatolo, māmoe, puakanio. Ni tāpaki ma nā meli o nā vaongá ana popoa.#2 Aliki 1:8 5Eia, uepepe mai loa te wainga tangata kia ana mai Iēlūtalema ma Iūtea tākatoa, mai te wī yionga oki e lā tawa o te kauvai ko Iōlītāná. 6Yalayala ai i a lātou yala, eia, pāpetītōngia loa lātou ēna i te kauvai ko Iōlītāna.
7Yaulā, i tana kitenga i te wainga Pālitea ma nā Tātukea ia ko lōmamai ki te konga e pāpetītō ai iāna ia,#3:7 ko lōmamai ki te konga e pāpetītō ai iāna ia: ko i nā toe pōkai talatala, ko lōmamai ki te konga ia ana ia kē pāpetītōngia mea oki iāna kia lātou, “E te wanaunga ōvī ia ē, ko ai na talā atu kē welele kōtou ki tātea mai te lili o te Atua koa talipili mai nei?#Mātaiō 12:34; 23:33 8Wakaāli mai kōtou i te wua e kitea ai ē, na wuwuli kōtou mai a kōtou yala. 9Auyē lā kōtou e manatu i loto o kōtou ē, ‘e matua nō mātou ia Āpelaama.’ Ko tala atu au, ka maua wua i te Atua e te wakatupu ni tama mā Āpelaama mai nā watu nei.#Ioane 8:33 10Ko tike wua mai te kūkī i te pū o te lākau, ko te wī lākau e yē wuwua mai i nā wua leleí, ka yemutia ki lalo, yaka atu ai ki loto o te awi.#Mātaiō 7:19
11Ia aku oki, ko pāpetītō ia kōtou ki te yua kē maua te ngākau e te yalayala ma te wuwuli mai a kōtou yala. Yaulā, ka yau te toe i muli ōku, ko awukele atu tona mana ia aku. Ko yē kaleka oki au kē takitaki i ona tāmaka. Ko ona ka pāpetītōngia kōtou ki te Vaelua Yā ma te awi. 12Ko i tona lima wua tana kōkai lūlū tītona ko lūlū ai i nā tītona mai nā kili. Ka velevele wakalelei iāna i tona taua tatao tītona, wakaputu ai i nā tītona ki loto o tona wale tuku tītona, ko nā kili lā ka tutu ēna ki te awi e yē mate.”
Te pāpetītōnga a Ioane ia Iētū
(Māleko 1:9-11; Luka 3:21-22)
13Eia, yau loa ia Iētū mai Kalilea ki te kauvai ko Iōlītāna kē pāpetītōngia iāna e Ioane. 14Yaulā, na yanga ē ia Ioane e te mea kē papae tona manako, eia, mea atu loa kia ana, “Ko oku tikāi tau mea ka pāpetītō, yaulā koe na yau kia aku?”
15Pau atu oki ia Iētū ki ai, “Mea ake kē tupu i te vāia nei, e mea lelei kē wakatupu tāua i te wī manatunga yakolele a te Atua.” Eia, pole ai loa ia Ioane.
16Kē oti ia Iētū e te pāpetītō, wenake mai loa iāna mai loto o nā yua, na peia wua ake, yūkena loa te Langi, kite atu oki iāna i te Vaelua o te Atua ko leilo mai ki lalo pe te kūkupá, yau loa tau ki lunga ōna. 17Eia, kokoto mai oki te leo mai te Langi, mea loa, “Ko taku Tama wakaemaema tēnei, nō ona nei oki na pūmanava ai au.”#Kēnete 22:2; Talamo 2:7; Ītaia 42:1; Mātaiō 12:18; 17:5; Māleko 1:11; Luka 9:35
Currently Selected:
Mātaiō 3: PKP
Highlight
Copy
Compare
Share
Want to have your highlights saved across all your devices? Sign up or sign in
© 2024, Wycliffe Bible Translators New Zealand Inc. in partnership with Te Wui Aliki o Pukapuka ma Nassau