Mātaiō 2
2
Te lōmamainga a te kau māwuwutu
1Wānau loa ia Iētū i Pētelēma i Iūtea, i te vāia o te aliki ko Ēlota. Eia, lōmamai ai nā tāngata māwuwutu ia ki Iēlūtalema mai te tua i te wenakenga o te lā. 2Iliili ai lātou pēnei, “Ko i wea lā mō te kovi lewu, te Aliki o te Ngāti Iūta e pito wānau mai? Na a mātou kitea oki tona mata, na pula mai i te wenakenga o te lā. Na lōmamai oki mātou kē tautapa ia ana.”
3Kē mumuyu te talatala nei ki nā talinga o te aliki ko Ēlota, kamuloa iāna nōngakino, peia te kakai tākatoa o Iēlūtalema. 4Valo mai loa iāna i te wī tatakuvai wowolo o te kakai ma te wī akoako tule, uwi loa kia lātou, “Ko i wea te konga ka wānau mai ai te Metia?”#2:4 Ko te wulinga o te ingoa Metia i te leo Ēleni ko te Kilito.
5Pau oki lātou kia ana, “Ko i Pētelēma i Iūtea, ko te talatala oki teia na tutingia mai e te pelovetá, mea loa peia:
6‘Ko koe oki, e Pētelēma i te wenua o Iūta,
ko yē kawaliki koe i loto o te wī aliki o Iūta.
Mai loto oki o koe ka yau ai te yula,
ko ona ka leoleoa oku tāngata Ītalāela.’ ”#Mika 5:2
7Eia, valo ngalo wua loa ia Ēlota i te kau māwuwutu ia, iloa ai ēna maia lātou te vāia tonu ngaleka na pula mai ai te mata ia. 8Wakaunga ai ēna te kau ia kē wō ki Pētelēma, mea loa kia lātou: “Wō kōtou, ulupango i te kovi lewu ia. Ke a kōtou kitea, wakavave mai kōtou i te talatala kia aku, kē maua ai ia aku e te angatu tautapa ia ana.”
9Kē oti tā lātou wakalongo i nā muna a te aliki, wō atu loa lātou. Ko te mata na a lātou kitea i te wenakenga o te lā, wano loa lā mua o lātou, taki ai ia lātou, oko wua atu ki te konga e i ai te kovi lewu ia, nō wua ai i lunga ia. 10I tā lātou kitenga i te mata ia, kamuloa lātou yulā wua i te vēvēia. 11Kē ūlu atu lātou ki loto o te wale, kite atu loa lātou i te kovi lewu ia ma tona matua wawine ko Mālia; pūnonou loa lātou ki lalo, tautapa ai ia ana. Eia, yuyuke loa i a lātou yana, tuku atu ai i nā penupenu aloa nei mā ana: te kōlo, te yinu kakala ma te manongi kakala. 12Na wakalapaina oki lātou e te Atua lā loto o te miti, auyē lātou e nīniko atu kia Ēlota, eia, wō ai lātou ki tō lātou wenua lā te toe ala.
Te welelenga ki Aipiti
13I te nīnikonga a te kau ia, wakaāli mai loa te āngela a te Atu kia Iōtēpa lā loto o te miti, mea loa peia, “Tū ki lunga, liko te kovi lewu nā ma tona matua wawine, welele ki Aipiti. Nōnō kōtou i ai, oko wua atu ki te vāia koa mea atu ai au, kē nīniko mai kōtou. Ka ulupango oki ia Ēlota i te kovi lewu nā patu kē mate.” 14Eia, tū loa iāna ki lunga, liko i te kovi lewu ia ma tona matua wawine, wō ai lātou i te pō ia ki Aipiti. 15Nōnō ai lātou i kiai, oko wua atu ki te vāia na palewa ai ia Ēlota, kē tautonu ki nā talatala a te Atu na lā loto mai o te pelovetá, “Mai loto o Aipiti na tauvalo ai au i taku tama.”#Ōtea 11:1
16I te iloanga e Ēlota, na wai akanaungia iāna e te kau māwuwutu ia, kamuloa ita ongo tona lili. Wakaunga ai iāna kē patua te wī tamatāne tākatoa o Pētelēma ma te wī yikuanga e lā tawa wuá, mai te kauliki na oko ki te lua matawiti, ma te kauliki e i lalo o lātou matawiti, kē kaleka ki te vāia nā talā mai kia ana e te kau māwuwutú. 17Eia, tupu ai nā muna a te peloveta Ielemia nā mea maí:
18“E leo nā langona mai Lama
ko wakayapi wua ma te tōkia e te tangi,
ko Lāela ko aukapa wua nō ana tama,
ko yē pā oki kē wakaoleolengia,
nō tēlā, na tō-te-liku lātou.”#Ielemia 31:15
Te nīnikonga ki Nātalēta
19I muli wua o te matenga o Ēlota, wakaāli mai loa te āngela a te Atu kia Iōtēpa i Aipiti lā loto o te miti. 20Mea loa peia, “Tū ki lunga, liko te kovi lewu nā, wō ma tona matua wawine ki te wenua ko Ītalāela. Ko te kau oki nā naumate kē patu i te kovi lewu nā, na pau e te mamate.”
21Eia, tū loa iāna, liko i te kovi lewu ia, wō atu ai ma tona matua wawine ki te wenua ko Ītalāela. 22Yaulā, i tana longonga na lilo ia Ālekelau wai aliki nō Iūtea, ko ona te yui o tona matua ko Ēlota, mataku loa iāna e te niko atu ki ai. Nō tei wakalapangia iāna lā loto o te miti, wano ai loa iāna ki te wuti wenua ko Kalilea. 23Angatu loa iāna nō i te ōile e lapangia te ingoa kia Nātalētá. Eia, tupu ai nā muna nā talā mai e nā pelovetá: “Ka talatalangia iāna#2:23 Ko te iāna nei ko Iētū, e kiai ko Iōtēpa. e tangata Nātalēta.”#Māleko 1:24; Luka 2:39; Ioane 1:45
Currently Selected:
Mātaiō 2: PKP
Highlight
Copy
Compare
Share
Want to have your highlights saved across all your devices? Sign up or sign in
© 2024, Wycliffe Bible Translators New Zealand Inc. in partnership with Te Wui Aliki o Pukapuka ma Nassau